Jw.org smalkaia warkka ra yus muns: “Preguntas sobre la Biblia”

Jw.org pliska ra “Enseñanzas bíblicas” wi ba ra dimisa taim, pîska kum takisa nina “Preguntas sobre la Biblia”. Baha ra ulbanka lalka nani taki ba pain sa yawan kakaira takbia smalkaia warkka ra yus munaia dukiara, kan upla kum naha pîska ra taki makabi walanka kum daukbia kaka yawan sip kabia wiaia Internet ra dimi ansika bribia. Baku sin, yawan sip sa baha sim makabi walanka nani ba yus munaia upla wal aisi tâ krikaia dukiara. Sampla baku, yawan sip sa makabi walanka kum upla nani walaia want kabia ba wahbi sakaia, bara upla ra dîa luki ba makabi walaia, baha wina Baibil wal jw.org dîa smalkanka yabi ba marikaia. Baha ningkara uplika ra wibia ansika ba jw.org wina sakan bara dairiksanka ba marikbia. Natka wala daukaia sip ba sika, uplika ba Internet pali ba wina yaka ansika aisi kaikbia. Impaki pura kakaira maya mairin kum naha natka yus muni witin ra pain takan sa: “Upla manis nu takan daukisa Gâd ba pât wahwanka nani sut taki ba patka bri sa sapa. ¿Ansika nu takan mai daukisa ki? Minit kum apia kaka kau wiria mai bribia naha nu takaia”. Baha wina, ulbanka lalka jw.org wina ai teleponka ra alahban ba uplika ra yaban walisa. Lâs ra Smalkisa bukka, sapta 11 ba marikisa.