Smalki taki waia aidrubanka nani yuskira kabia dukiara smalkanka nani

Smalki taki waia aidrubanka nani ba kangrigisan aidrubanka nani baku, Jehova wina prisant kum sa. Baha ra wan kupia bukisa yawan pana pana wan walka nani ra latwan lâka marikaia bara wark yamni nani daukaia (Hib 10:24, 25). Aidrubanka ba dakni nani sakaia, ani pliska smalkaia ba mangkaia bara pura sunra kat, 5 apia kaka 7 minit bilka ra daukaia sa. Aidrubanka wala daukaisa kaka, kau kunhku kaia sa. Ya ya aidrubanka tâ bribia nani ba baha deka smalki taki wabia nani mapara diara yuskira kum ridi munaia sa. Satadi sa kaka, muihni lakri nani wik bilara smalkaia takras nani ra yuskira kabia kupia kraukaia upla nani wal dîa aisaia ba. ¿Ani tâ bîla wala nani ba yuskira kaia sip sa?

• Kristian Rayaka bara Smalkaia Warkka aidrubanka dukiara ridi takaia wauhkataya “Nahki upla wala ra smalkaia” pîska ba

• Nahki sip sa diara takan sturka kum yus munaia upla kum wal aisaia dukiara.

• Smalkisa pliska ra upla kum walaia sip apia wi ba nahki kupia alkaia.

• Gâd ba âpu sa luki uplika kum, rayaka sut ban wina bal takan luki uplika kum, bîla aisanka wala aisi uplika kum, apia kaka rilidian tringsar kum ra kasak luki uplika kum wal nahki aisaia.

• Nahki sip sa yus munaia Internet pliska jw.org, JW Library^® aplicaciónka apia kaka Baibil ba.

• Nahki yus munaia smalkaia hilpka nani ba.

• Tnatka kum telepon bâk smalkaia, wauhkataya ku smalkaia, upla ailal lui pliska ra smalkaia, kli wih kaikanka apia kaka Baibil stadika nani dukiara.

• Kupia kraukanka nani pât ra dimbia apia dukiara, kupia swapnikira kaia, daukanka yamni marikaia, lukanka yamni briaia, bara diara wala nani dukiara.

• Aisi Kakaira bara Smasmalkra Kau Pain Kaia wauhkataya wina lisin kum apia kaka lilka kum.

• Smalkaia warkka ra wan yula kahbi ba ra nahki kupia bukaia bara hilp munaia.

• Smalkaia warkka dukiara aisi Baibil tikska kum, apia kaka smalkaia warkka ra dîa takan sturka kum wan kupia buki ba.