Gâd prisant tara wankan ba tawan tingki yabaia
1. Dia tawan yawan Jehova ra uba tingki yabisa?
1 Jehova mita ‘diara pain’ ailal wankan tila wina, ai Luhpia latwankira bak pri wan sakan ba prisant kau tara sa (Jems 1:17). Pri wan sakan tawan tingki yabisa, kan blisin manas briaia sip sa, wan saurka nani kat sin swih tikisa (Epe. 1:7). Naha sut mita yawan ban kaia ra tingki luki kabia. Jisas Pruan Kupia Kraukanka pyua ra, yawan taim saki prisant painkira wankan ba ra luki kaikaia sa.
2. Pri wan sakaia mana aibapan tawan yawan selp, bara pamali baku kulki ba nahki kau marikbia ki?
2 Kulkanka kau yabaia. Pamalikam aikuki kulkanka kau yabaia dukyara, Jisas Pruan Kupia Kraukanka Marzo 30 yua kau balras wikka nani kainara, Pamali Mayunra yua kum kum ra pain kabia pri wan sakaia mana aibapan ba tanka laki kaikaia. Baku sin, Jisas pruan tanka Baibil aisi kaikanka ba pamali baku yu bani aisi kaikaia. Pri wan sakan mana aibapan ba wina, dia yamnika saki ba luki kaikaia, bara baku daukan tawan Jehova ra, yawan selp, wala nani ra, bara kaina pyua ba dukyara nanara nahki kaiki ba, kumi bani selp luki kaikaia sa. Jisas Pruan Kupia Kraukanka yua ra lawana raya nani aiwanai ba kaina wina praptis muni waia aitani kabia, lawanka numba 8 bara 109 (Lawana 77:12).
3. Nahki wan tingkika yabaia sip sa ki?
3 Wan tingkika yabaia. Pri wan sakaia mana aibapan tawan yawan uba tingki luki sa baha mita, Jehova bara nahki witin latwan wan kaiki ai Luhpia blikan ba dahra wala nani ra aisi kaia want sa (Lawana 145:2-7). Pamali kum kum ai tingkika yabaia dukyara Marzo, Abril, bara Mayo katka ra trai munisa pamali tila wina kum pan ta baiki smasmalkra takbia. Naku sip daukras sma kaka, ‘pyua brisma ba pain yus muni’ smalkaia warkka ra kau daukaia sip sma ki? (Epe. 5:16.) Yawan tingki yabi ba wan munbia upla ra help munaia Jisas Pruan Kupia Kraukanka ra aikuki kaia (Par.m 22:17). Upla kli wih kaikram ba, Baibil stadika, tamya, wark panika, bara lamam uplika nani ra paiwaia want sma ba mahka nina ulbi bris, bara ningkara sip kama ba kat trai kaiks Jisas Pruan Kupia Kraukanka paiwanka ba sut yuaia.
4. Jisas Pruan Kupia Kraukanka pyua ba nahki tnatka ra pain yus munaia sip sa ki?
4 Jisas Pruan Kupia Kraukanka pyua ba, sanska wala nani wankisa Jehova mita yawan ra prisant kum wankan ba ra tingki luki ba marikaia. Pri wan sakan ba, bara “Kraist yuyaka sip kulki sakras” nani ba sut mita sin, wan tingkika paki marikaia pyua sa (Epe. 3:8).