Gâd Warkka Daukaia Aidrubanka dukyara helpka nani

Naha wauhkataya ulbanka lalka na wina, Gâd Warkka Daukaia Aidrubanka aisanka lalka nani kau kunhku daukisa. Bara naha kupia kraukanka nani ba kau param dauki swibia ba, pat kainara “Lan Wan Dauki Aidrubanka ba dukyara Nahki Ridi Takaia Sa” aisanka ra aisata, naha na, Gâd Warkka Dauki wauhkataya Lih Mairin kati 2009 manka ra takisa.

◼ Aisanka: Naha tanka sa aisanka ridi kum sa bara muihni lakri nani aisaia nit apia sa. Bara aisasara ba lukbia nahki ai aisanka ba kangrigisan ra help munbia.

◼ Wali nani ra makabi wals bara ansika maikbia. Naha ba, La Atalaya stadika baku sa, aisanka na ta krikaia bila nani ba kunhku sa bara dan prakaia bila nani sim sat kaia sa. Aisasara ba sturi uba aisaia apia sa. Bara tiks nani ba, taim bara sa kaka, aisi kaikaia sip sa. Baiki sakanka nani nit apia sa aisi kaikaia, adarka brisa kaka lika sip sa aisi kaikaia.

◼ Wali nani wal tanka ba pana pana laki kaiks. Naha tanka sa aisanka na ra muihni lakri nani ba sturi kum kum baman aisaia sa. Bara aisanka kum baman apia sa, baku sin wali nani ra makabi walanka dauki bara ansika yabi baman apia.

◼ Marikanka nani bara aisi makabi walanka nani. “Marikanka” wisuya taim tanka sa naha aisanka ta bri ba ai mihta ra sa marikanka kum upla wala ra yaka daukaia; bara witin bui daukbia tanka apia sa. Bara marikanka daukbia uplika ba lankira kaia sa, bara ai daukanka sin pain bri kaia sa, bara ta brabrira ba kaina manas wina marikanka ba laki kaikaia sa. Aitani apia sa kristian raya kum yus munaia uli bui pliska ba ra marikanka kum daukbia, dis sanska kum yabaia dukyara baman wisi, aima kum kum ra watla dawan baku marikanka ra yus munaia sip kabia. Uli bui pliska ra marikanka kum daukisa taim, dauki nani ba aman kaikaia sa ai nina ba laki yabaia apia sa. “Aisi makabi walanka” nani bri ba uli bui pliska ra wih daukaia sa, iwi ba pliska wina lika apia. Bara aisasara kum ai taimka ba dan taki ba tawan smalkanka ba kau kunhku daukaia nit sa kaka, marikanka nani bara aisi makabi walanka nani dakbaia apia sa. Kangrigisan help mamunra napakanka nani ba marikanka daukbia uplika nani kau wahbi sakras kainara kangrigisan daknika ta bri ba (apia kaka kangrigisan almukka wala kum) almukka ba wal aisaia sa.

Bara aisanka kum ra kupia kraukanka pranakira bara sa kaka, dia ulban ba kat daukaia sa. Kasak lukisa naha kupia kraukanka nani ba help munbia Gâd Warkka Daukaia Aidrubanka aisanka ra,‘diara sut ba pain bara wapni kat sin dauki kabia’ (1 Kor. 14:40).