¡Kaisa tutni saiwan ra smalkaia!

1. Buk ulbanka kum ra wi ba baku, ¿ani awarka ra apastil Pal ba utla utla smalki kan?

¹ Buk ulbanka kum ra wisa, apastil Pal ba utla utla ra wih smalki kan “tutni 4 aklak wina tihmia ba kat” (Daily Life in Bible Times). Rait pali nu âpu sa apastil Pal baku dauki kan sapa, sakuna yawan nu sa witin diara sut dauki kan smalkaia warkka dukiara (1 Ko. 9:19-23). Ban kra, witin ai taimka wahbi sakan bara baku natka ra sip kan utla utla ra smalkaia.

2. ¿Dîa muni tutni saiwan ra smalkaia ba pain sa?

² Kuntri ailal ra smalki tataukra nani ba wik bilara titan piua ra utla utla ra smalkisa. ¿Baha awarka ra smalki takisa pliska ra upla nani pliki sakaia ba kau pain sa? Tâura smasmalkra kum win: “Kakna taim upla nani ba âpu sa, sakuna tihmia ra lika ai watla ra banhwisa”. Tihmia ra wan lama uplika nani ba kau pain sa bara upla wal aisaia kau wilin sa. Baku sin, waitna nani ra smalkaia sanska brisa. Ani piua ra daukaia sanska bri kabia taim, kangrigisan almukka nani ba tutni saiwan ra smalki taki waia aidrubanka nani ba daukaia sa.

3. Tihmia ra smalkisa taim, ¿nahki muni tânkira lâka marikisa?

³ Tânkira lâka marikaia. Tihmia ra smalkisa taim tânkira lâka marikaia sa. Sampla baku, utla kum ra wan, sakuna baha minitka ra tutni pata pîsa, uplika ra wiaia sip sa tisku balbia. Bara pliska ba wira tihmu sa kaka, uplika mai kaikbia pliska kum ra buaia sa. Baha wina, mahka wan nina ba wiaia bara dîa muni witin ra wih kaiki tauki ba dukiara sin wiaia. Baku sin, pain kabia upla wala wal taukaia, apia kaka dakni kum wal taki waia. Bara plis kum uba tihmu sa bara upla âpu pliska ra taukaia ba pain apia sa. Tânkira lâka apia sa uba tihmia ra upla durka ra kangbaia, kan upla nani ba mahka yapaia ridi taki kaia sip sa (2 Ko. 6:3). Baha mita, plis kum ba tihmia ra taukaia pain apia sa kaka, pain kabia kau yu dimras ba ra baha pliska ra smalkaia (S.L 22:3).

4. Tutni saiwan ra smalkbia kaka, ¿dîa blisinka nani sâkbia?

⁴ Blisinka nani. Smalkaia warkka ba kau lilia sa upla nani wal aisaia sip sa taim. Baha mita, upla ra smalkaia sanska kau plikaia sa baku upla ailal tânka kasak ba lan takbia bara ai rayaka swaki sakaia sip sa (1 Ti. 2:3, 4). ¿Naha sât warkka daukaia dukiara wan taimka sakaia sip sa?