Param aisas

Jisas dîa daukan ba

LILKA: Jisas ba wihta wahma lalahkira kum ra smalkisa

1. LILKA ba kaiks, apia kaka Mark 10:17-22 aisi kaiki, naha makabi walanka nani laki kaiks:

1. ¿Jisas ba naha wahmika dîa sât daukanka pain nani bri kan ba kaikan?

2. ¿Jisas naha wahmika ra smalkaia dukiara, dîa muni latwan lâka wal param aisaia nit kan?

¿Jisas dîa daukan ba wina yawan dîa lan takaia sip sa ki?

2. Wan stadi tatakrika nani spirit lainka ra pâwbia yawan want sa kaka, latwan lâka mariki witin nani ra param aisaia nit kabia.

Jisas daukan baku dauks

3. Spirit lainka ra pâwaia dukiara dîa daukaia nit ba daukbia hilp muns.

1. Man lilia bas bukka ra saptika bani ra “Naha na trai muns” pîska ba yus muns.

2. Stadi tatakrikam nani spirit lainka ra pâwi, Jehova warkka nani daukaia dukiara, nawas bara naikara dîa daukaia nit ba tânka bribia hilp muns.

3. Spirit lainka ra pâwi ba dukiara, piua bani bîla pain nani wal ai kupia buks.

4. Spirit lainka ra pâwaia dukiara dîa stadi tatakrikam ra alki takaski ba nu takaia trai muns, bara pura lubia dukiara hilpkam yas.

1. Naha makabi walanka nani ra luks:

   • “Stadi tatakriki ba tahbi daukan lâka briaia dukiara spirit lainka ra pâwras kaka, ¿dîa ba witin ra alki takaskisa?”.

   • “¿Hilp munaia dukiara yang dîa daukaia sip sna?”.

2. Stadi tatakrikam dîa daukaia nit ba latwan lâka wal param aisaia dukiara, Jehova ra kupia karna lâka makas.

5. Spirit lainka ra pâwras sa kaka, Baibil stadika ba aima kum alki takas.

1. Ban stadika yabi kaia aitani sa sapa nu takaia dukiara, naha makabi walanka nani ra luks:

   • “¿Dîa lan taki ba ai rayaka ra alki daukisa ki?”.

   • “¿Asla aidrubanka nani ra dimisa, bara tânka kasak dukiara upla wala nani ra aisisa ki?”.

   • “Pat stadi taki piua ailal brisa kaka, ¿Jehova witniska kum takaia brinka brisa ki?”.

2. Witin spirit lainka ra pâwaia dukiara diara daukras sa kaka:

   • Witin ra dîa alki takaski ba kaikbia dukiara ai kupia buks.

   • Dîa muni witin ra danh stadi yama apia tânka marikma taim, tânkira bas, bara latwan lâka wal dauks.

   • Naikara witin kli Baibil stadi takaia want sa kaka, ai rayaka ra dîa chens nani daukaia nit ba param wis.