Пресметајте ги трошоците на селидбата!

ОД ДОПИСНИКОТ НА РАЗБУДЕТЕ СЕ! ВО ЈУЖНА АФРИКА

ДАЛИ размислувате да се преселите во друга земја? Дали сте го пресметале трошокот? Не мислиме само на финансискиот трошок. Најпосле, повеќето луѓе сепак размислуваат да се преселат заради економска сигурност. Мислиме на скриените трошоци кои стануваат очевидни само откако физичката преселба е завршена. Тогаш обично е предоцна да се вратите по истиот пат. Следните мисли не се со намера да Ве растревожат, но вреди да се размислува за нив:

„Потребни се понизност и труд за да се учи нов јазик. Тешко е за еден возрасен човек да открие дека дури и малите деца мислат дека тој е чуден затоа што не можат да го разберат. И понатаму да се прават грешки додека постојано Ви се исмејуваат поради нив, за многумина е огромен испит на гордоста. Животот е неподносливо самотен за странците кои не можат да го зборуваат локалниот јазик“ (Роузмери, мисионерка во Јапонија).

Можеби чувствувате дека доволно го знаете јазикот за да се снајдете. Но дали сте сигурни дека целата Ваша фамилија го знае доволно за да биде среќна поради преселбата?

Каков би бил ефектот врз фамилијата кога некои членови би биле наговорени да мигрираат против нивната волја? „Некои жени [од Мексико]“, вели журналот Psychology of Women Quarterly, „не играле никаква улога во процесот на одлучување да мигрираат и никогаш не ни сакале да имигрираат ниту сакале да останат во Соединетите Држави после миграцијата.“ Под такви околности, присилената преселба би можела да му наштети на фамилијарното единство. Но, што ако хранителот сам се пресели?

Во книгата Population, Migration, and Urbanization in Africa се пресметува дека во една мала рурална земја во јужна Африка, преку 50 проценти од „возрасните мажи се отсутни во кое и да било време“. Тоа отсуство може да ја лиши фамилијата од задоволство и од стабилност. Исто така, ја остава отворена можноста брачните партнери да подлегнат на неморал. Колку е подобро кога, без разлика дали ќе одлучи да мигрира или не, постои можност фамилијата да остане заедно! Фамилијарното единство е нешто што не може да се купи со пари.

Потоа, тука е и тешкиот товар на справување со предрасудите. „Дури кога дојдов во Англија ја открив ‚бојата‘“, се сеќава една мигрантка од Индија. „Тоа [сфаќање] беше ужасно. Горчлив шок. Сакав да си одам дома, да побегнам од сето тоа“ (The Un-melting Pot).

Затоа, пред да се преселите, запрашајте се: ‚Кои се алтернативите? Зарем не би можеле дома да направиме преиначувања? Дали навистина би вредело да се преселиме во друга земја?‘ Можеби би вредело, а можеби и не, но пред да одлучите, земете го во обѕир овој добар совет од Исус: „Кој од вас, сакајќи да соѕида кула, не ќе седне најнапред да направи сметка колку ќе чини и дали има сѐ, што е потребно за нејзиното довршување“ (Лука 14:28).