Како можете да ги заштитите своите деца?

ОТКАКО со години учел во едно локално училиште, Вернерa‚ заедно со отприлика 3.000 други младинци, започнал виши студии во Сао Паоло (Бразил). За првпат, тој забележал како состудентите продаваат и користат дрога. Бидејќи бил со мал раст, наскоро станал жртва на деградирачки и рискантни церемонии за зачленување од страна на постарите студенти.

Вернеровата сестра, Ева, исто така имала проблеми. Сакајќи да стори сѐ што може, таа учела толку интензивно што доживеала исцрпеност и ментална конфузија. Како и на другите адолесценти, на Вернер и на Ева им била потребна како физичка така и емоционална заштита. Каква помош им треба на вашите деца? Како можете да ги подготвите за живот како возрасни луѓе? Всушност, каква иднина им посакувате на своите деца?

Ним им е потребно повеќе од издршка

Размисли за момент за предизвикот со кој денес се соочуваат родителите во заштитата на своите деца. Поради опаѓањето на квалитетот на семејниот живот и порастот на сиромаштијата, во многу земји расте бројот на децата кои живеат на улица. Детската работна сила е резултат на пропустот да се заштитат младите од експлоатација. Исто така, злоупотребата на дрога уништува многу млади луѓе. На пример, кога некој бразилски тинејџер станал зависник од дрога, мирот во неговиот дом исчезнал. Освен емоционалниот притисок кој го доживувале неговите родители, тука била и борбата да се финансира неговото опоравување, а немилосрдните дилери со наркотици доаѓале на нивната врата барајќи исплата.

Меѓутоа, и покрај животните притисоци, многу родители ја продолжуваат борбата да ги обезбедат своите деца не само со храна, облека и засолниште туку и со заштита од насилството, злоупотреба на дрога и други проблеми. Тоа е благороден напор, но дали е доволен? Што е со заштитата од емоционална и духовна штета? Многумина увидуваат дека успешното родителство вклучува зафаќање со предизвиците кои го вклучуваат изборот на пријатели и рекреацијата на нивните деца. Сепак, како можат родителите да избегнат да бидат или претерано заштитнички или премногу попустливи? Поканети сте да ги разгледате одговорите кои се наоѓаат во следната статија.

[Фуснота]