Љубовта е неопходна

БЕЗ оглед на годините, културата, јазикот или расата, сите луѓе гладуваат по љубов. Ако тој глад не се задоволи, тогаш се несреќни. Еден медицински истражувач напишал: „Љубовта и блискоста се коренот на она што нѐ прави болни и што нѐ прави здрави, што создава тага и што донесува среќа, што прави да страдаме и што води до излекување. Кога некој нов лек би го имал истиот ефект, тогаш речиси секој лекар во земјава би им го препорачал на своите пациенти. Би било професионална небрежност да не го препише“.

Сепак, современото општество, особено неговите медиуми и популарните личности што луѓето ги имитираат, честопати става поголем нагласок врз богатството, моќта, славата и сексот отколку на човечката потреба за срдечни, љубезни врски. Многу воспитувачи ги нагласуваат световните цели и кариера, дефинирајќи го успехот првенствено со она што некој го постигнал и со неговата положба во општеството. Точно, образованието и негувањето на нечии дарби се важни, но треба ли некој да се стреми по нив со толку цврста решеност што нема да има време за семејството и пријателите? Еден древен образован писател кој бил прониклив набљудувач на човечката природа споредил еден човек што е надарен но без љубов со „парче бакар што ечи или цимбал што ѕвечи“ (1. Коринќаните 13:1). Таквите луѓе можеби и ќе станат богати, дури и славни, но никогаш вистински среќни.

Исус Христос, кој имал длабоко разбирање и особена наклоност за луѓето, ја ставил љубовта кон Бог и кон ближниот во сржта на своето учење. Тој рекол: „Љуби го Јехова, својот Бог, со сето свое срце и со сета своја душа и со сиот свој ум . . . Љуби го својот ближен како себеси“ (Матеј 22:37—39). Само оние што ги следат овие зборови навистина би биле следбеници на Исус. Затоа, тој рекол: „По тоа сите ќе знаат дека сте мои ученици, ако имате љубов меѓу себе“ (Јован 13:35).

Меѓутоа, како може некој да негува љубов во денешниов свет? И како можат родителите да ги научат своите деца на љубов? Следната статија ќе се осврне на овие прашања.

[Слики на страница 3]

Предизвик е да се негува љубов во свет во кој владее алчност