Најважниот настан во човечката историја
1 Исус дошол на Земјата по упатство на својот Татко за да сведочи за вистината која ќе нѐ доведе до вечен живот (Јован 18:37). Неговата верност до смрт му донела чест на Јехова, го осветила Божјето име и обезбедила откупнина (Јован 17:4, 6). Токму ова ја направило Исусовата смрт да биде најважниот настан во целата човечка историја.
2 Од создавањето на Адам наваму, на Земјава живееле само двајца совршени луѓе. Адам бил во положба да донесе прекрасни благослови за своето неродено потомство. Наместо тоа, тој себично се побунил, осудувајќи го на бедно постоење што ќе заврши со смрт. Кога дошол Исус, покажал совршена лојалност и послушност, отворајќи ја можноста за вечен живот за сите кои покажуваат вера (Јован 3:16; Рим. 5:12).
3 Ниту еден друг настан не може да се спореди со Исусовата жртвена смрт. Таа го променила текот на човечката историја. Обезбедила основа за воскресение од смрт на милијарди луѓе. Положила темел за едно вечно Царство кое ќе му стави крај на злото и ќе ја претвори Земјата во рај. На крајот ќе го ослободи сето човештво од секој облик на притисок и ропство (Пс. 36:11; Дела 24:15; Рим. 8:21, 22).
4 Сето ова ни помага да сфатиме зошто ги поучил Исус своите ученици да ја памтат неговата смрт, одржувајќи Спомен секоја година (Лука 22:19). Бидејќи го сфаќаме нејзиното значење, со нетрпение очекуваме да се состанеме со собранијата на Јеховините сведоци низ целиот свет во петок, на 14 април после зајдисонце. Пред тоа ќе биде добро заедно како семејство да ги читаме библиските извештаи за Исусовите последни денови на Земјата и за неговиот храбар став за вистината. (Пасусите што се препорачуваат се забележани на нашиот Календар 1995, од 9 до 14 април.) За нас Исус претставува образец за оддаденост на нашиот Творец (1. Петр. 2:21). Да сториме сѐ што можеме за да ги поканиме на овој значаен собир своите пријатели и семејството, како и библиските ученици и другите интересенти. Објасни однапред што ќе се случува и какво е значењето на симболите (1. Кор. 11:23-26).
5 Старешините треба да планираат доволно однапред за да се осигураат дека Салата на Царството е уредна и чиста. Треба да се направат подготовки за да може некој да ги набави симболите. Послужувањето на симболите треба да биде добро организирано. Корисни информации за тоа како можеме да покажеме почитување кон Господовата вечера, дадени се во Стражарска кула од 1 март 1985, стр. 16. Би било сосема прикладно собранијата да организираат зголемена активност во службата на подрачјето неколку дена пред прославата, како и неколку дена после неа.
6 Минатата година низ целиот свет, на комеморацијата на овој важен настан присуствуваа 12.288.917 лица. Бидејќи тоа е најважниот ден во нашиот календар, сите ние треба да бидеме присутни.