Да им сведочиме на луѓето од сите јазици и религии
1 Христијаните од првиот век им давале ревно сведоштво на луѓето кои зборувале други јазици и кои исповедувале различни религии. Како резултат од тоа, „до 100-тата година, веројатно во секоја провинција која се граничела со Медитеранот имало христијанска заедница“ (History of the Middle Ages).
2 Тука во Македонија, извесен број луѓе зборуваат други јазици освен македонскиот. Некои градови имаат средини во кои се зборува странски јазик. Многумина практикуваат нехристијански религии. Поради оваа разновидност на јазици и религии, вистински предизвик е да се знае како да се разговара и да им се сведочи на сите такви луѓе кога ги среќаваме. Како можеме да го следиме Исусовиот налог, „да им проповедаме на луѓето и да сведочиме [да даваме темелно сведоштво, NW]“ на луѓето од сите јазици и религии? (Дела 10:42).
Да им сведочиме на луѓето кои зборуваат друг јазик
3 Голем пораст на нови објавители доаѓа од населението кое зборува странски јазик. На пример, во Соединетите Држави биле основани собранија на 17 странски јазици, а дејствуваат групи на 7 додатни јазици. Други земји покажуваат слични резултати. Меѓутоа, онаму каде што нема собранија на странски јазик кои веќе го работат подрачјето може да се постигне уште многу.
4 Да се прескокне јазичната бариера: Нема сомнение дека голем број луѓе учат многу побрзо и со подлабоко разбирање кога се поучени на нивниот мајчин јазик. „Поради Евангелието“ и „за да бидат учесници во Него“, многу браќа и сестри научиле друг јазик (1. Кор. 9:23). Иако една жена која зборува кинески со години спаѓала во обиколката со списанија на една сестра која зборува англиски, жената ги одбивала понудите за библиска студија сѐ додека една друга сестра, која учела кинески, не ѝ понудила книга на тој јазик. Радо биле прифатени и книгата и студијата. Она што ја променило сета таа работа бил напорот на втората сестра да каже неколку зборови на сопствениот јазик на жената. (Спореди Дела 22:2.)
5 Со добра причина, Стражарска кула од 1 ноември 1992 го дала овој коментар: „Учењето странски јазик не само што ќе ја развие умствената способност на младите луѓе, туку и ги прави покорисни за Јеховината организација“. На пример, многу членови од бетелската фамилија во Соединетите Држави ја презеле задачата да учат нов јазик. На тој начин, браќата се од особена корист во собранијата каде што се потребни за да преземат водство. Доколку знаеш друг јазик или, пак, си спремен да научиш, можеби и ти ќе можеш да укажеш помош во некое место од земјава каде што се зборува странски јазик (Мат. 9:37, 38).
6 Еден брат од Флорида (САД) кој научил виетнамски пред да дојде во вистината, сега наоѓа голема радост во споделувањето на добрата вест со луѓето кои зборуваат виетнамски. За да се стави уште повеќе на располагање да го користи своето знаење на тој јазик за сведочење, се преселил со своето семејство од едниот на другиот крај на земјата — каде што имало поголема потреба на виетнамскиот терен. После преселбата, тој има добар успех во проучувањето на Библијата со многу луѓе од Виетнам.
7 Една сестра пионерка од Калифорнија (САД), запознала неколку глуви луѓе на нејзиното подрачје. Се молела за Јеховина помош да најде некој кој би можел да ја научи знаковен јазик — за да може таа да ги поучува за вистината. Еден ден, додека купувала во блискиот супермаркет, ѝ се приближила една глува млада жена која напишала една белешка молејќи ја за помош да најде некој производ. Откако ѝ помогнала да го најде, пионерката напишала една белешка изразувајќи ѝ ја својата желба да го научи знаковниот јазик за да им помага на глувите во тоа место. Потоа, глувата жена напишала, прашувајќи: „Зошто сакате да им помагате на глувите луѓе?“ Сестрата писмено ѝ одговорила: „Јас сум Јеховин сведок и сакам да им помогнам на глувите да ја разберат Библијата. Ќе бидам среќна да Ве научам за Библијата ако Вие ме научите знаковен јазик“. Сестрата вели: „Не можете да ја замислите мојата радост кога таа ми рече: ‚Во ред‘“. Секоја вечер сестрата одела во домот на жената шест седмици. Го научила знаковниот јазик, а глувата жена ја научила вистината и се крстила! Тоа се случило пред повеќе од 30 години, а сестрата пионерка сѐ уште им сведочи на глувите, и сега ѝ се придружило едно собрание на знаковен јазик.
8 Ако течно зборуваш друг јазик и имаш желба и можеш да се преселиш онаму каде што има поголема потреба на тој терен, зошто не дискутираш за таа работа со старешините во собранието. Доколку тие мислат дека се квалификуваш за една таква преселба, прашај го покраинскиот надгледник дали во близина постои подрачје каде што можеш да служиш. Доколку не постои, можеш да напишеш до Заедницата, под услов, старешините да испратат придружно писмо со нивните забелешки за твоите квалификации и јазични вештини. (Види Стражарска кула од 15 август 1988, страници 21—23 [англ.].)
9 Користи ги орудијата кои се обезбедени: Нашата литература е достапна на многу странски јазици. Би било добро да се носат трактати — или ако нема странско собрание кое го обработува истото подрачје, брошурата Бара — на јазиците кои се зборуваат на твоето подрачје. Доколку е очигледно дека македонскиот не му е мајчин јазик на лицето, прашај го кои јазици ги чита. Така може да се зголеми твојот избор за тоа која литература можеш да ја нудиш. На пример, едно лице кое зборува ромски можеби може да чита и турски.
10 Дури и ако не го зборуваш јазикот на лицето кое го среќаваш во твојата активност на сведочење, можеби сѐ уште можеш да му ја презентираш добрата вест. Како? Користејќи ја џебната брошура Good News for All Nations (Добра вест за сите народи). Таа содржи кратка печатена порака на 59 јазици. Како што објаснуваат упатствата на страница 2 од џебната брошура, откако си го одредил јазикот на станарот, дозволи му да ја прочита печатената информација на соодветната страница од џебната брошура. Откако ќе ја прочита, покажи му публикација на неговиот јазик. Доколку немаш таква, покажи му ја публикацијата на македонски. Наведи дека ќе се обидеш да навратиш со примерок на неговиот јазик. Прашај го за името, и запиши го заедно со адресата. Можеби ќе можеш да ја предадеш информацијата на некој кој го знае неговиот јазик. Ако нема на располагање никој кој го зборува тој јазик за да ја преземе посетата, можеби ќе можеш да го прифатиш предизвикот дури и да проучуваш со лицето следејќи во македонска публикација (1. Кор. 9:19—23).
Да им сведочиме на луѓето од нехристијанските религии
11 Ако имаме извесно спознание за религиозната заднина на лицето, тоа ни помага да дадеме делотворно сведоштво за Божјето Царство. Книгата Čovječanstvo u potrazi za Bogom ни дава увид во поголемите светски религии за да можеме доста добро да ги разбереме верувањата на луѓето — со цел да им помогнеме да дојдат до спознание на вистината.
12 Рамката на последната страница од овој додаток дава текушт список со публикации кои ги обезбедила Јеховината организација за да ги користиме при сведочењето на луѓето кои се нехристијани. Читајќи ги овие публикации, ние разбираме како да им пристапиме на луѓето со добрата вест. Не треба да се заборави дека едно помошно орудие е брошурата Како да се започнат и продолжат библиски дискусии. Страници 13—16 од таа брошура даваат практични предлози за тоа како да се одговори на будисти, хиндуси, Евреи и муслимани.
13 Внимавај што кажуваш: Треба да бидеме внимателни да не ги шаблонизираме луѓето од извесна религија, заклучувајќи дека нивните лични верувања мора да се исти како и верувањата на другите од таа вера. Наместо тоа, настојувај да разбереш како размислува поединецот со кого разговараш (Дела 10:24—35). Како муслиман, Салимун бил воспитан да верува дека Коранот е Божја Реч. Но, никогаш не можел во потполност да го прифати муслиманското учење дека еден семилостив Бог би ги мачел луѓето во огнен пекол. Еден ден, Јеховините сведоци го поканиле на состанок. Веднаш препознавајќи ја вистината, тој сега среќно служи како старешина во христијанското собрание.
14 Кога им сведочиме на оние со нехристијански верувања, треба да бидеме внимателни нашиот пристап да не ни ја оттргне приликата да разговараме со нив за добрата вест (Дела 24:16). Приврзаниците на некои религии се многу осетливи на кој и да било обид да бидат преобратени од нивната вера. Затоа, биди буден да најдеш точки на кои ќе градиш еден заеднички темел за да ги привлечеш кон целокупната вистина од Божјата Реч. Лицата слични на овци ќе се оѕвијат на еден љубезен пристап и на една јасна презентација на вистината.
15 Нашиот избор на зборови исто така игра важна улога во тоа непотребно да не ги отуѓиме луѓето од нашата порака. На пример, доколку веднаш се идентификуваш како христијанин, твојот слушател автоматски би можел да те поврзе со црквите на христијанскиот свет, што би можело да постави бариера. Исто така, можеби ќе биде корисно да укажеш на Библијата како на „Писмото“ или „светите списи“ (Мат. 21:42; 2. Тим. 3:15, обата NW).
16 Доколку сретнеш некое лице од нехристијанска религија и не се чувствуваш доволно опремен да дадеш сведоштво на лице место, искористи ја приликата само да се запознаете, остави трактат и разменете си ги имињата. Потоа, наврати за ден или два, откако адекватно си се подготвил да дадеш сведоштво (1. Тим. 4:16; 2. Тим. 3:17).
17 Сведочење на будисти: (Види го 6. поглавје од Čovječanstvo u potrazi za Bogom.) Будистичките верувања многу варираат од еден приврзаник до друг. Наместо да го застапува постоењето на еден Творец како личност, будизмот се држи за Индиецот Буда Гаутама, од шестиот век пр. н. е., како за религиозен идеал. Кога првпат видел болен, постар и мртов човек, Гаутама се мачел околу смислата на животот. ‚Зарем луѓето се раѓаат само за да страдаат, стареат и умираат?‘ се прашувал тој. Се разбира, ние можеме да им ги одговориме тие прашања на искрените будисти кои сакаат да ги знаат одговорите.
18 Кога зборуваш со будисти, држи се за позитивната порака и јасните вистини кои се наоѓаат во најголемата од сите свети книги, Библијата. Како и повеќето други луѓе, будистите се длабоко заинтересирани за мирот, моралот и семејниот живот, и честопати срдечно прифаќаат дискусија на тие теми. Ова може да доведе до тоа да му го истакнеш Царството како реално решение за проблемите на човештвото.
19 На пример, во Соединетите Држави, во некои метрополи постои огромен прилив на Кинези кои се држат за будизмот и за други ориентални филозофии. Многумина се студенти кои посетуваат универзитети во Соединетите Држави. Кога една сестра од Монтана (САД) видела еден Кинез во една колонијална продавница, му врачила трактат на неговиот јазик и му понудила библиска студија. Тој рекол: „Мислите на Светата Библија? Јас трагав по ова сиот мој живот!“ Започнал да проучува истата седмица и почнал да присуствува на сите состаноци.
20 Повеќе од една деценија, една сестра пионерка од Невада (САД) поучувала за вистината кинески студенти. Кога работела една зграда со осум станови во кои живееле тие студенти, го молела Јехова да ѝ помогне да започне студија во секој стан. Во рок од две седмици, проучувала барем со по еден студент од секој стан. За неа добро функционира пристапот да каже дека таа нашла една заедничка грижа меѓу студентите — сите тие сакаат мир и среќа. Потоа, прашува дали тоа е и нивна грижа. Тие секогаш се сложуваат. Нивното внимание го насочува кон брошурата Lasting Peace and Happiness—How to Find Them (Траен мир и среќа — како да се најдат), која е наменета за кинезите. Откако имал само пет сесии на проучување, еден студент ѝ рекол дека тој долго време трагал по вистината и дека сега ја нашол.
21 Сведочење на хиндуси: (Види го 5. поглавје од Čovječanstvo u potrazi za Bogom.) Хиндуизмот нема специфично верување. Неговата филозофија е многу сложена. Хиндусот има тринитаријански концепт за нивниот главен бог Брахма (Брахма — Творецот, Вишна — Одржувачот и Шива — Уништувачот). Верувањето во бесмртна душа е битно во нивното учење за реинкарнација, кое има тенденција да му даде на хиндусот фаталистичко гледиште за животот. (Види ја книгата Расправљање, страници 321—325 и Стражарска кула од 15 мај 1997, страници 3—8.) Хиндуизмот учи на толеранција, дека сите религии водат до истата вистина.
22 Еден пристап кој треба да го користиме при сведочењето на некој хиндус е да ја објасниме нашата библиски темелена надеж да живееме засекогаш во човечко совршенство на Земјата, како и задоволителните одговори кои ги дава Библијата на важните прашања со кои се соочува сето човештво.
23 Сведочење на Евреи: (Види го 9. поглавје од Čovječanstvo u potrazi za Bogom.) За разлика од другите нехристијански религии, јудаизмот е вкоренет во историјата, а не во митологијата. Преку инспирираните Хебрејски списи, дадена е една битна алка во потрагата на човештвото по вистинскиот Бог. А сепак, спротивно на Божјата Реч, основно учење на современиот јудаизам е верувањето во бесмртна човечка душа. Заеднички темел можеме да воспоставиме со тоа што ќе потврдиме дека ние го обожаваме Богот на Авраам и ќе признаеме дека во денешниов свет ние се соочуваме со истите тешкотии.
24 Доколку сретнеш Евреин кому му недостасува вера во Бог, прашањето дали отсекогаш се чувствувал така може да ти помогне да проникнеш што најмногу би го привлекло. На пример, можеби тој никогаш не чул задоволително објаснување во врска со тоа зошто Бог го допушта страдањето. Искрените Евреи можат да бидат охрабрени повторно да го испитаат идентитетот на Исус како Месија, не преку неговите погрешни претставувања од страна на христијанскиот свет, туку на начинот на кој го претставуваат еврејските писатели на Грчките списи.
25 Сведочење на муслимани: (Види го 12. поглавје од Čovječanstvo u potrazi za Bogom.) Муслиманите се приврзаници на исламот (или мухамеданството), кое вклучува верување во Алах како нивно единствено божество и во Мухамед (570—632 н. е.) како негов последен и најважен пророк. Бидејќи тие не веруваат дека Бог има син, муслиманите го признаваат Исус Христос како пророк помал од Бог, но ништо повеќе од тоа. Коранот, кој е стар помалку од 1.400 години, ги цитира како Хебрејските така и Грчките списи. Постојат силни сличности меѓу исламот и католицизмот. Обете религии учат за бесмртност на човечката душа, за состојба на привремено мачење и за постоењето на пекол што гори.
26 Очигледен заеднички темел е вашето верување дека постои само еден вистински Бог и дека тој ја инспирирал Библијата. Еден грижлив читател на Коранот ги увидува укажувањата на Тората, Псалмите и Евангелијата како Божја Реч и чита дека тие треба да бидат признати како такви и им се повинува. Според тоа, можеш да понудиш да ги проучувате нив со поединецот.
27 Оваа презентација би можела да функционира кај некој кој се идентификува како муслиман: „Не сум разговарал со многу муслимани, но во овој прирачник имам прочитано нешто во врска со неколку учења од Вашата религија. [Сврти на страница 16 од џебната брошура Како да се започнат и продолжат библиски дискусии.] Тој вели дека Вие верувате оти Исус бил пророк, но дека Мухамед бил последниот и најважниот пророк. Дали верувате дека и Мојсеј бил вистински пророк? [Дозволи одговор.] Дали може да Ви покажам што научил Мојсеј од Бог во врска со Неговото лично име?“ Потоа, прочитај 2. Мојсеева 17:15. На повторната посета би можел да дискутираш за поднасловот „Еден Бог, една религија“, на страница 13 од џебната брошура Време за вистинска подложност на Бог.
28 Денес, многумина постапуваат во склад со зборовите од Исаија 55:6, кој гласи: „Барајте го Господа, кога можете да Го најдете; Викајте Го додека е близу“. Ова се применува на сите луѓе со искрени срца, без оглед на јазикот кој го зборуваат или на нивната религиозна заднина. Можеме да бидеме сигурни дека Јехова ќе ги благослови нашите напори додека настојуваме да одиме и ‚да правиме ученици од сите народи‘ (Мат. 28:19, NW).
[Рамка на страница 6]
Литература наменета за нехристијански народи
Будисти
„Гледај! Сѐ ново создавам!“ (брошура)
Евреи
Ќе постои ли некогаш свет без војни? (брошура)
Муслимани
Како да се пронајде патот до рајот (трактат)
Време за вистинска подложност на Бог (џебна брошура)