Кабалега — уникатното делче на Нил во Уганда

„Тоа беше најубавиот водопад на Нил“ (Сер Семјуел Вајт Бејкер, англиски истражувач).

ВОДОПАДИТЕ отсекогаш го пленеле вниманието на луѓето и ги исполнувале со восхит. Смирувачкиот звук на водата што се разбива од камењата под неа и нежната, свежа пареа што се издига над водата ги гоштеваат безбројните посетители со часови слатко задоволство и опуштеност.

И водопадот Кабалегаa во Уганда не е исклучок. Реката Нил има тек долг речиси 6.400 километри, а некои сметаат дека овој водопад е најспектакуларната глетка на неа. Вистина, тој не е висок колку Ангелските Водопади во Јужна Америка и неговите води не се толку бујни како на водите на Викториините Водопади во Африка или на Нијагарините Водопади во Северна Америка. Но, убавината и моќта на водопадот Кабалега оставаат неизбришлив впечаток.

Малку историја

Водопадот Кабалега е само едно од убавите катчиња во Националниот парк „Кабалега“ кој се протега на површина од 3.841 квадратен километар. Овој предел, кој се наоѓа во северозападна Уганда, беше прогласен за Национален парк во 1952 год. Бејкер го посетил водопадот во почетокот на 1860-тите. Во својата книга Езерото Алберт (The Albert N’yanza), тој го опишува моментот кога за првпат го здогледал водопадот.

„Само што свртевме“, напишал тој, „пред очи ни блесна величествена глетка... Од водопадот се слеваше снежно бела вода која беше во совршен контраст со темните карпи што се издигаа околу реката. Убавината на целата таа глетка ја надополнуваа витите тропски палми и дрвјата на дивите брашнести банани. Тоа беше најубавиот водопад на Нил.“ Бејкер му го дал на водопадот името Марчисонови Водопади во чест на тогашниот претседател на Британското кралско географско друштво.

Начини да го набљудуваш

Еден убав начин да го разгледаш водопадот е со чамец. Пловењето започнува од Пара и им овозможува на посетителите да го доживеат возбудливото искуство што го дава крстарењето по Нил и во исто време да ги набљудуваат животните од безбедна оддалеченост. Може да се видат нилски коњи, но и големи африкански слонови, крокодили и биволи. Прекрасниот животински свет по течението на Нил може дури да го натера посетителот за миг да заборави дека дошол да го види водопадот. Но, штом ќе ги здогледа снежно белите води кои изгледа како да бликаат од самите карпи, веднаш му е јасно зошто Бејкер бил толку воодушевен.

Иако многу посетители вистински уживаат кога ги гледаат водопадите од чамец, глетката одозгора си има посебна привлечност. Некои сметаат дека тоа е најдобрата глетка. Оттаму може да се види како водите на 49 метри широкиот Нил се принудени да поминат низ еден теснец широк едвај 6 метри и потоа да се спуштат во слап висок 40 метри. Некој го опишал ова како „еден од најмоќните млазови вода во светот“. Понекогаш посетителите можат да почувствуваат слабо тресење на тлото под нозете кога водата паѓа долу.

Бејкер го опишал впечатокот што го имал непосредно пред да го види водопадот. Тој рекол дека, додека се шетал едно утро, чул силен татнеж. Помислил дека некаде далеку грми, но се изненадил кога сфатил дека звукот доаѓа од водопадот.

Секоја година, исто како Бејкер, илјадници луѓе остануваат занемени пред неверојатната убавина и моќ на оваа спектакуларна сцена. Глетката на водите кои со голема сила се слеваат удолу е незаборавно доживување. Водопадот Кабалега е навистина уникатно делче на Нил.

[Фуснота]

[Рамка/слика на страница 17]

Националниот парк „Кабалега“

Според еден попис од 1969 год., во овој парк имало 14.000 нилски коњи, 14.500 слонови и 26.500 биволи. Во наредните децении дојде до драстично опаѓање на бројот на овие животни. Неодамна, благодарение на напорите да бидат заштитени, нивниот број почна повторно да расте. Денес, во шумите има и многу примати, како што се шимпанзата и бабуните, а на саваните пасат жирафи, Џексонови еленски антилопи и други животни. Всушност, во паркот се евидентирани повеќе од 70 цицачи и преку 450 видови птици.

[Извор на слика на страница 16]

Сите слики на страници 16 и 17: Со љубезна дозвола на Uganda Wildlife Authority