Примери на понизност кои треба да ги имитираме

„Твојата сопствена понизност ќе ме направи голем“ (ПСАЛМИ 18:35, НС).

1. Каков доказ за понизност можел да се види кај еден поранешен претседател на Watch Tower Society?

ЏОЗЕФ Ф. РАТЕРФОРД имал импресивен изглед, бил висок преку 180 сантиметри и тежок над 90 килограми. Поседувал и силен глас што го користел не само за да го објави Јеховиното име на начин како никогаш порано, туку и за да ја разоткрие дволичноста на религиозните водачи на т. н. христијанство, нарекувајќи ја нивната религија „замка и измама“. Но иако говорите му биле моќни, кога се молел со бетелската фамилија во централата, звучел како некое мало детенце кое му се обраќа на својот тато, и со тоа дал доказ и за својот присен однос со својот Творец, и за својата понизност. Да, тој бил понизен како мало дете (Матеј 18:3, 4).

2. Во кој особен поглед стојат Јеховините сведоци во остра спротивност со поединци од светот?

² Без сомнение, сите вистински слуги на Јехова Бог се понизни. Во овој оглед тие се во остра спротивност со луѓето од светот, кој денеска, повеќе од било кога порано, е исполнет со горди поединци. Високите и моќните, богатите и учените, па дури и многумина сиромашни и хендикепирани, се горди.

3. Што може да се рече за плодовите на гордоста?

³ Горделивоста предизвикува бескрајна борба и беда. Всушност, сиот лелек во вселената започнал затоа што извесен ангел станал горделив, сакајќи да биде обожаван на начин на кој му припаѓал единствено на Творецот, Јехова Бог (Матеј 4:9, 10). Освен тоа, зарем тој, кој себеси се сторил Ѓавол и Сатана, не успеал да ја заведе првата жена, Ева, апелирајќи на нејзината гордост, така што ѝ ветил дека ако јаде од забранетиот плод, би могла да биде како самиот Бог и ќе знае што е добро а што лошо? Да била понизна, таа би рекла: ‚Зошто би сакала да бидам како Бог?‘ (1. Мојсеева 3:4, 5). Кога ја гледаме бедната состојба во која се наоѓа човештвото во физички, умствен и морален поглед, колку е непростива гордоста од страна на луѓето! Не е чудо кога читаме дека Јехова ја мрази ‚високомерноста [самовозвишувањето, НС] и гордоста‘ (Соломонови изреки 8:13). Во остар контраст со сите горди се примерите на понизност кои се наоѓаат во Божјата Реч, Библијата.

Јехова Бог е понизен

4. Кои библиски стихови покажуваат дека Јехова е понизен?

⁴ Јехова Бог — Највишиот, Универзалниот Суверен, Царот на вечноста — е понизен (1. Мојсеева 14:22). Дали би можело тоа навистина да биде така? Да, сигурно! Царот Давид рекол како што е забележано во Псалми 18:35: „Ти ми даде заштита за моето спасение, Твојата десница ме прифати, и Твоето воспитување ме исправи до крај [и твојата сопствена понизност ќе ме направи голем, НС]“. Јасно дека заслугата за тоа дека го прави голем, Давид ѝ ја припишал на Јеховината понизност. И повторно, во Псалам 113:6 (ДК) читаме дека Јехова „се наведнува да види што е на небесата и на земјата“. Други преводи гласат: „стапнува долу за да види“ (New International Version), „се понизува за да погледне толку ниско долу“ (The New English Bible).

5. Кои настани сведочат за Јеховината понизност?

⁵ Јехова Бог сигурно се спуштил на начинот на кој постапил со Авраам, дозволувајќи му на Авраам да ја доведе во прашање Неговата праведност кога намеравал да ги уништи злите градови Содом и Гомора.a (1. Мојсеева 18:23-32). А кога Јехова ја изразил својата настроеност да ја избрише израелската нација — еднаш поради идолопоклонство, другиот пат поради бунт — Мојсеј во обете прилики расудувал со Јехова како да разговара со некој човек. Всушност, Јехова секој пат рекол: ‚Мојсеј, имаш право‘. Тоа претставувало понизност од Негова страна да се согласи со Мојсеевите молби во врска со Неговиот народ Израел (2. Мојсеева 32:9-14; 4. Мојсеева 14:11-20). Други примери на Јеховино понизно постапување со луѓето, така да се каже, на основа со одредено лице, можат да се видат во неговите односи со Гедеон и Јона, како што е запишано во Судии Израилеви 6:36-40 и Јона 4:9-11.

6. Која Јеховина карактеристика понатаму ја открива неговата понизност?

⁶ Фактички, најмалку девет пати за Јехова е речено дека е „долготрпелив [бавен на гнев, НС]“.b Тоа што Јехова бил долготрпелив, бавен на гнев, во постапувањето со несовршените човечки суштества низ милениумите, претставува натамошен доказ дека е понизен. Гордите лица се нестрпливи, брзо изразуваат лутина и ни оддалеку не се долготрпеливи. Колку Јеховината понизност ја прави гордоста на несовршените луѓе да изгледа апсурдна! Бидејќи ни е речено да ‚се угледаме на Бога, како чеда возљубени‘, ние мораме да бидеме понизни исто како што е понизен тој (Ефесјаните 5:1).

Христовиот пример на понизност

7, 8. Што вели Библијата за понизноста на Исус Христос?

⁷ Вториот најизразит пример на понизност што треба да го имитираме се споменува во 1. Петрово 2:21: „Бидејќи вие сте за тоа повикани, оти и Христос пострада за нас, оставајќи ни пример, за да врвиме по Неговите стапки“. Долго пред да дојде на Земјата како човек, во Захарија 9:9 за него било проречено: „Извикувај, ќерко ерусалимска; ете, Царот твој доаѓа при тебе, праведен и со спасувачка сила, кроток [понизен, НС], седнат на осле, рожба на ослица“. Да бил горд, Исус Христос би прифатил кога Ѓаволот му ги понудил сите царства на светот во замена за еден чин на обожавање (Матеј 4:9, 10). Тој исто така ја покажал својата понизност кога му ја препишал на Јехова сета заслуга за своето учење, велејќи: „Кога ќе го издигнете Синот Човечки, тогаш ќе узнаете дека сум Јас и дека ништо не правам Сам од Себе, туку, како што Ме научи Мојот Отец, така и зборувам“ (Јован 8:28).

⁸ Тој можел прикладно да им рече на своите слушатели: „Земете го Мојот јарем на себе и поучете се од Мене, бидејќи сум кроток и смирен [понизен, НС] по срце, и ќе најдете мир [закрепа, НС] за душите ваши“ (Матеј 11:29). А каков извонреден пример на понизност оставил кога им ги измил нозете на своите апостоли последната вечер кога бил со нив како човек! (Јован 13:3-15). Што е најприкладно, во Филипјаните 2:3-8 (НС), апостолот Павле ги советува христијаните да имаат „понизност на умот“, наведувајќи го Исус Христос како пример: „Зачувајте го во себе овој мисловен став, кој беше и во Христос Исус, кој, иако постоеше во Божји облик, не размислуваше за тоа да присвои нешто сосила, имено да биде еднаков на Бог. Не, туку се одрече од самиот себе и зеде облик на роб и стана сличен на луѓето. Повеќе од тоа, кога се најде во човечки облик, се понизи себеси и стана послушен до смртта, да, до смрт на маченички столб“. Кога бил соочен со најголемата криза во својот живот, понизно му се молел на својот Татко: „Не како Јас што сакам, туку како Ти“ (Матеј 26:39). Секако, за да бидеме имитатори на Исус Христос кои тесно ги следат неговите стапки, мораме да бидеме понизни.

Апостолот Павле, извонреден пример на понизност

9-12. На кои начини апостолот Павле дал извонреден пример на понизност?

⁹ Апостолот Павле напишал: „Угледајте се на мене, како што и јас на Христа!“ (1. Коринтјаните 11:1). Дали апостолот Павле го имитирал Исус Христос така што бил понизен во мислите и потоа ни дал уште еден пример на понизност што треба да го имитираме? Сосем сигурно. Пред сѐ, тој понизно признал дека бил роб на Исус Христос (Филипјаните 1:1). На старешините од Ефес им кажал за своето ‚служење [робување, НС] на Господа со голема смиреност [понизност на умот, НС] и многу солзи и меѓу искушенија, што му доаѓале од лошите замисли на Јудејците‘ (Дела на св. апостоли 20:17-19). Да не бил понизен, тој никогаш не би ги запишал зборовите што се наоѓаат во Римјаните 7:18, 19: „Јас знам дека во мене, односно во моето тело, не живее доброто; . . . Оти не доброто, кое го сакам, туку злото, што не го сакам, го вршам“.

¹⁰ Показателно за Павловата понизност е и она што им го напишал на христијаните во Коринт, како што е запишано во 1. Коринтјаните 2:3: „И јас меѓу вас бев во немоќ, и страв, и во голем трепет“. Понизно осврнувајќи се на својот минат животен пат пред да стане христијанин, напишал: „Порано бев хулител, гонител и мачител; . . . Христос Исус дојде во светот да ги спаси грешниците, меѓу кои сум прв јас“ (1. Тимотеј 1:13, 15).

¹¹ Понатаму, неговата понизност се покажува во тоа што сите успеси во своите напори му ги припишал на Јехова Бог. Во врска со својата служба напишал: „Јас посадив, Аполос поли, но Бог направи да израсте“ (1. Коринтјаните 3:6, 7). Исто така ги молел своите браќа да се молат за него за да би можел да даде добро сведоштво, како што читаме во Ефесјаните 6:18-20: „Молете се . . . за мене, та, кога ќе ја отворам устата да ми се даде слободно да ја соопштувам тајната на Благовестието [светата тајна на добрата вест, НС]“.

¹² Павле ја покажал својата понизност и во начинот на кој соработувал со останатите апостоли: „Јаков, Кифа и Јован . . . ни ја подадоа мене и на Варнава раката и се согласија ние да отидеме при незнабошците, а тие — при обрезаните“ (Галатјаните 2:9). Понатаму ја покажал својата спремност да соработува со старешините од ерусалимското собрание така што презел извесен завет (Дела на св. апостоли 21:23-26).

13. Што ја прави Павловата понизност толку значајна?

¹³ Павловата служба е дотолку позначајна кога ќе забележиме колку силно Јехова Бог го употребил него. На пример, читаме дека ‚Бог правел не мали чудеса преку рацете Павлови‘ (Дела на св. апостоли 19:11, 12). Уште повеќе од тоа, му биле дадени натприродни визии и откровенија (2. Коринтјаните 12:1-7). Не треба да го превидиме и тоа што бил инспириран да напише 14 од 27-те книги (поправо писма) од Христијанските Грчки списи. Сето тоа, така да се каже, не му удрило в глава. Тој останал понизен.

Современи примери

14-16. а) Како првиот претседател на Друштвото бил одличен пример на понизност? б) Со кого стои во остра спротивност неговиот пример?

¹⁴ Во Евреите 13:7 го читаме советот на апостол Павле: „Помнете ги и вашите наставници, што ви го проповедаа словото Божјо, и, имајќи го пред очи крајот на нивниот живот, подражавајте ја верата нивна“. Во склад со ова начело, како современ пример можеме да го земеме првиот претседател на Watch Tower Bible and Tract Society, Чарлс Тејз Расел, чија вера би требало да ја имитираме. Дали тој бил понизен човек? Навистина бил! Како што добро се забележува, во неговите Studies in the Scriptures (Студии на Писмото), шест тома од околу 3.000 страници, ниту еднаш не се осврнува на себеси. Публикациите на Watch Tower Bible and Tract Society го следат ова начело да не ги идентификуваат своите писатели.

¹⁵ Еднаш Расел во Стражарска кула напишал дека не познавал такво нешто како „Раселизам“ и „Раселити“, изрази што ги користеле неговите противници, но кои тој категорично ги одбивал. Напишал: „Нашето дело . . . се состои во тоа да се состават одамна расфрлени парчиња на вистината и да му се посредуваат на Господовиот народ — не како нешто ново, не како нешто наше, туку како Господови. . . . Делото, за кое Господ нашол благоволение да го употреби нашиот понизен талент, е помалку дело на создавање отколку дело на реконструкција, исправање и ускладување“. Навистина, ги изразил чувствата на апостолот Павле, како што е запишано во 1. Коринтјаните 3:5-7.

¹⁶ Неговот став бил сосема спротивен од оној на Чарлс Дарвин. Во своето прво издание на Потекло на видовите од 1859, Дарвин повеќе пати се осврнал на „мојата“ теорија, игнорирајќи го она што другите пред него го рекле за еволуцијата. Еден прочуен писател од тој век, Семјуел Батлер, го нападнал Дарвин, истакнувајќи дека мнозина други пред тоа ја унапредувале еволуциската хипотеза; таа воопшто не потекнувала од Дарвин.

17. Кои се некои натамошни примери за понизноста на брат Ратерфорд?

¹⁷ Еден друг верен слуга од поново време кого Јехова Бог силно го употребил, бил Џозеф Ф. Ратерфорд, споменат на почетокот. Тој бил храбар бранител на библиската вистина, а особено на Јеховиното име. Иако нашироко бил познат како Судијата Ратерфорд, тој во душата бил понизен човек. На пример, еднаш дал догматски изјави во однос на тоа што би можеле да очекуваат христијаните во 1925 година. Кога настаните не ги поддржале неговите очекувања, тој понизно рекол пред бруклинската бетелска фамилија дека испаднал смешен. Еден помазан христијанин кој имал сосема блиски односи со него, посведочил дека честопати го слушал брат Ратерфорд како се извинува во духот на Матеј 5:23, 24, и јавно и приватно, затоа што повредил некој сохристијанин со некаква непромислена изјава. Потребна е понизност за оној кој е на положба на власт да им се извини на оние кои му се потчинети. Братот Ратерфорд оставил одличен пример за сите надгледници, сеедно дали во собранието, во патувачката служба или во некоја од подружниците.

18. Каква изјава дал третиот претседател на Друштвото, која открива понизна состојба на умот?

¹⁸ Третиот претседател на Watch Tower Bible and Tract Society, Натан Х. Нор, исто така покажал дека, иако бил угледен меѓу Јеховиниот народ, не се чувствувал возвишен поради својата положба. Иако се истакнувал со организаторските способности и во јавното говорење, имал огромна почит кон она што другите го правеле. Така, еднаш посетил еден член на Одборот за пишување во неговата канцеларија и изјавил: „Овде се одвива најважната и најтешката работа. Затоа имам толкав мал удел во неа“. Да, тој понизно го применил советот од Филипјаните 2:3, ‚од понизност да се сметаме еден друг за погорен од себе си‘. Го ценел тоа дека иако служењето како претседател на Друштвото било важно, другите задачи исто така биле важни. Била потребна понизност за да се чувствува така и тоа да го изрази толку јасно. Тој бил уште еден пример што сите треба да го имитираат, особено оние кои можеби имаат угледна положба на надгледување.

19, 20. а) Каков пример на понизност дал четвртиот претседател на Друштвото? б) Каква помош ќе ни пружи следната статија во поглед на нашето покажување на понизност?

¹⁹ Четвртиот претседател на Друштвото, Фред В. Франц, исто така бил извонреден пример на понизност. За 32-те години во кои служел како потпретседател на Друштвото, дал голем удел во пишувањето за списанијата и конгресните ракописи; сепак во овој поглед секогаш се држел во позадина и оставал другите да го привлечат вниманието. Можеме да наведеме еден споредлив пример од старо време. Кога Јоав ги поразил Моавците кај Рава, се погрижил славата за победата да му припадне на цар Давид (2. Царства 12:26-28).

²⁰ Навистина, има многу одлични примери, и од минатото и од сегашноста, кои ни даваат силни причини да бидеме понизни. Меѓутоа, постојат многу повеќе причини да бидеме понизни, и во следната статија ќе ги разгледаме и нив, како и средствата кои ни помагаат да бидеме понизни.

[Фусноти]

Дали се сеќаваш?

◻ Кои се плодовите на гордоста?

◻ Кој го дал најизвонредниот пример на понизност?

◻ Што покажува кој бил вториот најголем пример на понизност?

◻ Каков одличен пример на понизност дал апостол Павле?

◻ Кои угледни современи примери на понизност ги имаме?

[Слика на страница 15]

Исус покажал понизност на извонреден начин

[Слика на страница 16]

Павле дал одличен пример на понизност

[Слика на страница 17]

Братот Расел не си ја припишал себеси заслугата за работите кои ги напишал