Да ги насочуваме учениците кон организацијата зад нашето име
1 „Тоа е порака која се зборува на повеќе од 200 јазици. Тоа е порака која се слуша во повеќе од 210 земји. Тоа е порака која се пренесува лично, секаде каде што може да се најдат луѓе. Сето тоа е дел од најголемата проповедничка кампања која досега му е позната на светот, порака која обединува милиони низ целиот свет. Повеќе од 100 години Јеховините сведоци се организирани за да го извршуваат ова дело!“
2 Вака почнува раскажувањето во видеокасетата Јеховини сведоци — организацијата зад името. Таа понатаму одговара на прашањата: Кои се, всушност, Јеховините сведоци? Како се организира нивната активност? Како се води? Како се финансира? На посматрачите им остава впечаток фактот дека „Јеховините сведоци низ целиот свет се оспособувани како организација за да им помагаат на своите ближни да изградат вера во Библијата“ и ги охрабрува самите да ја видат организацијата зад нашето име. Откако ја видела оваа видеокасета, една жена која проучувала се расплакала од радост и ценење, па рекла: „Како може некој да не гледа дека тоа е организацијата на вистинскиот Бог, Јехова?“ (Спореди 1. Коринтјаните 14:24, 25.)
3 Една друга жена долго време со прекини ја проучувала Библијата, но не можела да го прифати фактот дека тројството е лажна доктрина. Потоа, на неа и на нејзиниот сопруг им била покажана нашата видеокасета. Тие биле многу импресионирани од презентацијата и ја гледале двапати истата ноќ. На нивната следна студија, жената ја изразила својата желба да стане Сведок. Таа рекла дека била сосредоточена на нејзиното верување во тројство и дека пропуштила да гледа на нашата организација и на луѓето во неа. Од видеокасетата увидела дека ја пронашла Божјата вистинска организација. Сакала веднаш да започне со проповедање од куќа до куќа. Откако ѝ било објаснето кои се неопходните чекори за да стане некрстен објавител, таа рекла: „Па, ајде да се зафатиме со тоа“. Се отпишала од нејзината црква, започнала со активноста во службата на теренот и станала вешта во побивањето на тројството.
4 Добро е утврдено дека библиските ученици подобро духовно напредуваат и побрзо растат кон зрелоста кога ја препознаваат Јеховината организација и се поврзуваат со неа. Значајно е тоа што, откако на Пентакост се крстиле 3.000 лица, „тие и понатаму му се посветуваа на учењето на апостолите и на меѓусебното дружење“ (Дела 2:42, НС, фус.). Неопходно е да им помогнеме на учениците денес да го прават истото. Како можеме?
5 Да се преземе одговорноста: Секој оној кој прави ученици мора да сфати дека негова одговорност е да го насочува библискиот ученик кон Божјата организација (1. Тим. 4:16). На секој час за проучување треба да се гледа како на скалило кон среќниот ден кога новиот ќе го симболизира своето предание на Јехова со крштавање во вода. Едно од прашањата кои ќе му бидат поставени за време на церемонијата на крштавање е: „Дали сфаќаш дека твоето предание и крштавањето те идентификуваат како еден од Јеховините сведоци во поврзаност со Божјата организација која е водена со неговиот дух?“ Според тоа, важно е тој да сфати дека не може да му служи на Бог без да е активно поврзан со вистинското христијанско собрание (Мат. 24:45—47, НС; Јован 6:68; 2. Кор. 5:20).
6 Продолжи да го школуваш ученикот во врска со локалното собрание и меѓународната организација зад Јеховините сведоци. Прави го тоа на секој час за проучување на Библијата, почнувајќи уште од првиот. Од самиот почеток покани го ученикот на состаноците и продолжи да го каниш (Откр. 22:17).
7 Користи ги алатките кои се обезбедени: Наши најдобри публикации кои служат за водење домашни библиски студии се брошурата Што бара Бог од нас? и книгата Спознание кое води до вечен живот. И двете ја истакнуваат потребата за поврзување со собранието. Крајот на 5. лекција од брошурата Бара, наведува: „Треба да продолжиш да учиш за Јехова и да ги слушаш неговите барања. Присуствувањето на состаноците во локалната Сала на Царството на Јеховините сведоци ќе ти помогне да го сториш тоа“. Книгата Спознание секогаш одново го охрабрува ученикот да се дружи на состаноците. Поглавје 5, пасус 22, ја нуди оваа покана: „Јеховините сведоци . . . срдечно те поттикнуваат да им се придружиш во обожавањето на Бог ‚со дух и со вистина‘ (Јован 4:24)“. Поглавје 12, пасус 16, наведува: „Додека и понатаму продолжуваш со ова проучување и создаваш навика да присуствуваш на состаноците на Јеховините сведоци, твојата вера ќе биде уште позајакната“. Поглавје 16, пасус 20, вели: „Нека ти биде навика да присуствуваш на состаноците на Јеховините сведоци“. Тоа додава: „Таа ќе ти помогне да го разбереш, а потоа и да го применуваш спознанието за Бог во својот живот, и ќе ти донесе среќа. Ако бидеш дел од светското христијанско братство, тоа ќе ти помогне да останеш близу до Јехова“. Поглавје 17 детално дискутира за тоа како едно лице наоѓа вистинска сигурност меѓу Божјиот народ. Додека проучуваме со другите, наша одговорност е да ги нагласиме овие делови од материјалот.
8 Брошурата Јеховините сведоци — обединето ја извршуваат Божјата волја ширум светот е прекрасна алатка која е произведена за да ги запознае поединците со единствената видлива организација што ја користи Јехова денес за да ја изврши својата волја. Подробните информации кои ги содржи таа во врска со нашата служба, состаноците и организацијата, ќе го охрабрат читателот да се поврзе со нас во обожавањето на Бог. Штом се воспостави библиска студија, се препорачува да му дадеме на ученикот примерок од оваа брошура за да ја чита сам. Нема потреба да ја проучуваме со него како што правевме во минатото.
9 Некои од видеокасетите кои ги подготвила Заедницата се одлични алатки за насочување на учениците кон организацијата зад нашето име. Би било добро кога би можеле да ги гледаат: 1) Општеството на новиот свет во акција — преглед на филмот од 1954 кој го доловува мирниот, делотворен и полн со љубов дух со кој функционира Јеховината организација; 2) Обединети преку божествената поука, која го разгледува мирољубивото единство што беше покажано на нашите меѓународни конгреси во Источна Европа, Јужна Америка, Африка и Азија; 3) До краевите на Земјата, која ја одбележува 50-годишнината од Библиската школа Гилеад на Watchtower и го покажува учинокот кој го имале мисионерите врз делото на проповедање ширум светот; 4) Јеховините сведоци стојат цврсто наспроти нацистичкиот напад, која ја изнесува восхитувачката приказна за храброста на Сведоците и триумфот покрај Хитлеровото брутално прогонство над нив и, се разбира, 5) Јеховини сведоци — организацијата зад името.
10 Поставувај напредни цели во врска со состаноците: На учениците мора да им се објасни дека нам ни треба и приватно поучување кое се обезбедува во рамките на домашната библиска студија, како и училнички дискусии кои се обезбедуваат на собраниските состаноци (Јован 6:45). Некој кој е нов треба подеднакво да напредува во неговото разбирање на Писмото и на организацијата. За таа цел, не постои замена за присуството на состаноците (Евр. 10:23—25). Веднаш почни да го каниш лицето на собраниските состаноци. Некои новозаинтересирани лица почнуваат да присуствуваат на состаноците дури и пред да имаат редовна домашна библиска студија. Секако, ние сакаме самите да дадеме исправен пример со тоа што ќе бидеме редовно присутни (Лука 6:40; Фил. 3:17, НС).
11 Дај им доволно информации за состаноците и за тоа како тие се водат за да се чувствува ученикот сталожено кога ќе присуствува на неговиот прв состанок. Со оглед на тоа што некои луѓе се чувствуваат многу непријатно кога првпат одат на нови места, можеби ќе биде корисно да го придружуваме ученикот до Салата на Царството кога тој ќе присуствува на неговиот прв состанок. Ќе се чувствува посталожен ако си со него додека се запознава со членовите на собранието. Секако, биди добар домаќин за твојот посетител, правејќи да се чувствува пријатно и добредојдено (Мат. 7:12; Фил. 2:1—4).
12 Охрабри го ученикот да присуствува на Денот на посебен состанок, на покраинскиот состанок или на обласниот конгрес во првата прилика. Можеби ќе можеш да го вклучиш во твоите подготовки за превоз.
13 Всади искрено ценење: Книгата Организирани за да ја извршуваме нашата служба, на страница 92 објаснува: „Ако твоето лично длабоко ценење за Јеховината организација се одразува во твоите разговори со заинтересираните лица, нивното ценење побрзо ќе расте и тоа ќе ги наведе да прават поголем напредок во запознавањето на Јехова“. Секогаш зборувај позитивно за твоето локално собрание, никогаш негативно (Псал. 83:10; 132:1, 3б). Во молитвите што ги изнесуваш на библиската студија спомнувај го собранието и потребата на ученикот редовно да се дружи со него (Ефеш. 1:15—17).
14 Ние сигурно сакаме новите да развијат искрено ценење за восхитувачкото друштво и за духовната сигурност што се наоѓаат меѓу Божјиот народ (1. Тим. 3:15; 1. Петр. 2:17; 5:9). Како Јеховини сведоци, да направиме сѐ што можеме за да ги насочиме оние кои ја проучуваат Божјата Реч кон организацијата зад нашето име.
[Истакната мисла на страница 3]
Учениците побрзо духовно напредуваат кога самите ја гледаат организацијата
[Истакната мисла на страница 4]
Не одложувај да ги поканиш учениците да присуствуваат на состаноците