Посебната акција за Спомен-свеченоста почнува на 17 март

1. Каква акција почнува на 17 март?

¹ Со одбележувањето на Спомен-свеченоста секоја година ја објавуваме смртта на Исус (1. Кор. 11:26). Затоа, сакаме и другите да дојдат и да чујат за откупнината која Јехова со љубов ја дал за нас (Јован 3:16). Оваа година, акцијата во која ќе ги каниме луѓето да дојдат на Спомен-свеченоста почнува во сабота, на 17 март. Се радуваш ли што и ти ќе можеш да дадеш сѐ од себе во таа акција?

2. Како би можеле да ја понудиме поканата?

² Што би можеле да речеме: Најдобро е да бидеме кратки. Еве еден предлог: „Здраво. Сакаме да Ве поканиме на еден важен настан што ќе се одржи низ целиот свет на 5 април. Ќе можете да слушнете еден библиски говор во кој се објаснува од какво значење е смртта на Исус и што прави сега тој. На поканата е наведено кога и каде ќе се одржува таа свеченост. Влезот е бесплатен“. Кога ќе ги делиме поканите за време на викендите, можеме да понудиме и списанија.

3. Како можеме да поканиме што е можно повеќе луѓе?

³ Покани што е можно повеќе: Нашата цел е да поканиме што е можно повеќе луѓе. Затоа, не заборавај да ги поканиш оние со кои проучуваш, лицата што редовно ги посетуваш, роднините, колегите, соучениците и другите познајници. Собраниските старешини ќе дадат упатства како да го обработите вашето подрачје. Акцијата што секоја година ја имаме за да ги каниме луѓето на Спомен-свеченоста дава резултат. Минатата година, кога една жена дошла на Споменот, редарот ѝ понудил да ѝ помогне да ги најде оние што ја поканиле. Но, жената рекла дека не познава никого и дека добила покана од некој што одел од куќа до куќа истиот тој ден.

4. Од кои причини треба ревносно да учествуваме во акцијата?

⁴ Можеби на Спомен-свеченоста ќе дојде и некој кому ти си му дал покана. Без разлика дали некој ќе дојде или не, сепак со својот труд ќе дадеш сведоштво. Од поканите што ќе ги поделиш луѓето ќе можат да дознаат дека Исус сега е моќен Цар. Со својата ревносна служба ќе им покажеш на сите што те набљудуваат — луѓето на подрачјето, другите објавители, а пред сѐ, Јехова — дека навистина ја цениш откупнината (Кол. 3:15).