അഭിവൃ​ദ്ധി പ്രാപി​ക്കാൻ നിങ്ങളു​ടെ മക്കളെ സഹായി​ക്കു​ക

കുട്ടി​കളെ വളർത്തി​ക്കൊ​ണ്ടു​വ​രു​ന്നതു സംബന്ധിച്ച വിവര​ങ്ങൾക്കാ​യി പല മാതാ​പി​താ​ക്ക​ളും നെട്ടോ​ട്ട​മോ​ടു​ന്നു. വാസ്‌ത​വ​ത്തിൽ ഉത്തരങ്ങൾ തങ്ങളുടെ ഭവനത്തിൽത്തന്നെ ലഭ്യമാ​ണെന്ന കാര്യം അവർക്ക​റി​യില്ല. നിരവധി കുടും​ബ​ങ്ങ​ളി​ലും ബൈബി​ളുണ്ട്‌. എന്നാൽ കുട്ടി​കളെ വളർത്തി​ക്കൊ​ണ്ടു​വ​രു​ന്ന​തി​നാ​യി ഉപയോ​ഗി​ക്ക​പ്പെ​ടു​ന്ന​തി​നു​പ​കരം അത്‌ പുസ്‌തക അലമാ​ര​യിൽ പൊടി​പി​ടി​ച്ചി​രി​ക്കു​ക​യാ​കും.

കുടും​ബ​ജീ​വി​ത​ത്തിൽ ഒരു വഴികാ​ട്ടി​യാ​യി ബൈബിൾ ഉപയോ​ഗി​ക്കു​ന്ന​തി​നെ​ക്കു​റിച്ച്‌ പലരും ഇന്ന്‌ സന്ദേഹ​മു​ള്ള​വ​രാണ്‌. കാലഹ​ര​ണ​പ്പെ​ട്ട​തോ പഴഞ്ചനോ അങ്ങേയറ്റം കർക്കശ​മോ ആണെന്നു പറഞ്ഞ്‌ അവർ അതിനെ തള്ളിക്ക​ള​യു​ന്നു. എന്നാൽ ആത്മാർഥ​മാ​യി പരി​ശോ​ധി​ക്കു​ക​യാ​ണെ​ങ്കിൽ ബൈബിൾ കുടും​ബ​ങ്ങൾക്കുള്ള ഒരു പ്രാ​യോ​ഗിക ഗ്രന്ഥമാ​ണെന്നു തെളി​യും. എങ്ങനെ​യെന്നു നമുക്കു നോക്കാം.

ശരിയായ പരിസ്ഥി​തി

മക്കളെ ‘[തന്റെ] മേശെക്കു ചുററും ഇരിക്കുന്ന ഒലിവു​തൈ​കളെ’പ്പോലെ വീക്ഷി​ക്കാൻ ബൈബിൾ പിതാ​വി​നോ​ടു പറയുന്നു. (സങ്കീർത്തനം 128:3, 4) ശ്രദ്ധാ​പൂർവ​മുള്ള പരിച​ര​ണ​മി​ല്ലെ​ങ്കിൽ, ശരിയായ പോഷ​ക​ങ്ങ​ളും മണ്ണും ജലവും പ്രദാനം ചെയ്‌തി​ല്ലെ​ങ്കിൽ ഇളം തൈകൾ വളർന്നു​വ​ലു​താ​കു​ക​യില്ല. അതു​പോ​ലെ​തന്നെ, കുട്ടി​കളെ വിജയ​ക​ര​മാ​യി വളർത്തി​ക്കൊ​ണ്ടു​വ​രാൻ ശ്രമവും കരുത​ലും ആവശ്യ​മാണ്‌. പക്വത​യി​ലേക്കു വളർന്നു​വ​രാൻ കുട്ടി​കൾക്ക്‌ ആരോ​ഗ്യ​ക​ര​മായ ഒരു പരിസ്ഥി​തി ആവശ്യ​മാണ്‌.

അത്തര​മൊ​രു പരിസ്ഥി​തിക്ക്‌ ആവശ്യ​മായ ഒരു ഘടകമാ​ണു സ്‌നേഹം. അതായത്‌, വിവാ​ഹിത ഇണകൾ തമ്മിലും മാതാ​പി​താ​ക്ക​ളും കുട്ടി​ക​ളും തമ്മിലു​മുള്ള സ്‌നേഹം. (എഫെസ്യർ 5:33; തീത്തൊസ്‌ 2:4) പല കുടും​ബാം​ഗ​ങ്ങ​ളും പരസ്‌പരം സ്‌നേ​ഹി​ക്കു​ന്നു. എന്നാൽ അത്തരം സ്‌നേഹം പ്രകടി​പ്പി​ക്കേ​ണ്ടത്‌ ആവശ്യ​മാ​ണെന്ന്‌ അവർ കരുതു​ന്നില്ല. എന്നാൽ ഇതു പരിചി​ന്തി​ക്കുക: നിങ്ങളു​ടെ സുഹൃ​ത്തി​നു കത്തെഴു​തി​യിട്ട്‌ പുറത്തു മേൽവി​ലാ​സം എഴുതു​ക​യോ സ്റ്റാമ്പ്‌ ഒട്ടിക്കു​ക​യോ അത്‌ അയയ്‌ക്കു​ക​യോ ചെയ്യു​ന്നി​ല്ലെ​ങ്കിൽ നിങ്ങൾ അയാളു​മാ​യി ആശയവി​നി​യമം നടത്തി​യെന്നു വാസ്‌ത​വ​ത്തിൽ പറയാൻ സാധി​ക്കു​മോ? അതു​പോ​ലെ​തന്നെ, യഥാർഥ സ്‌നേഹം ഹൃദയത്തെ ഊഷ്‌മ​ള​മാ​ക്കുന്ന ഒരു വികാരം മാത്ര​മ​ല്ലെന്നു ബൈബിൾ വെളി​വാ​ക്കു​ന്നു; അതു വാക്കു​ക​ളി​ലൂ​ടെ​യും പ്രവൃ​ത്തി​ക​ളി​ലൂ​ടെ​യും പ്രകടി​പ്പി​ക്കേണ്ട ആവശ്യ​മുണ്ട്‌. (യോഹ​ന്നാൻ 14:15-ഉം 1 യോഹ​ന്നാൻ 5:3-ഉം താരത​മ്യം ചെയ്യുക.) തന്റെ പുത്ര​നോ​ടുള്ള സ്‌നേഹം ഇപ്രകാ​രം വാക്കു​ക​ളി​ലൂ​ടെ പ്രകടി​പ്പി​ച്ചു​കൊണ്ട്‌ ദൈവം അതിനു മാതൃക വെച്ചു: “ഇവൻ എന്റെ പ്രിയ​പു​ത്രൻ; ഇവനിൽ ഞാൻ പ്രസാ​ദി​ച്ചി​രി​ക്കു​ന്നു.”—മത്തായി 3:17.

പ്രശംസ

മാതാ​പി​താ​ക്കൾക്കു മക്കളോട്‌ അത്തരത്തി​ലുള്ള സ്‌നേഹം എങ്ങനെ കാണി​ക്കാൻ സാധി​ക്കും? ആദ്യമാ​യി, നന്മ കണ്ടെത്താൻ ശ്രമി​ക്കുക. കുട്ടി​ക​ളിൽ കുറ്റം കണ്ടെത്താൻ എളുപ്പ​മാണ്‌. അവരുടെ പക്വത​യി​ല്ലായ്‌മ, അനുഭ​വ​പ​രി​ച​യ​മി​ല്ലായ്‌മ, സ്വാർഥത എന്നിവ ദിവസേന നിരവധി വിധങ്ങ​ളിൽ പ്രകട​മാ​കും. (സദൃശ​വാ​ക്യ​ങ്ങൾ 22:15) എന്നാൽ അവർ ദിവസ​വും പല നല്ല കാര്യ​ങ്ങ​ളും ചെയ്യും. നിങ്ങൾ ഏതിലാ​യി​രി​ക്കും ശ്രദ്ധ കേന്ദ്രീ​ക​രി​ക്കുക? ദൈവം നമ്മുടെ തെറ്റു​ക​ളിൽ ശ്രദ്ധ കേന്ദ്രീ​ക​രി​ക്കു​ന്നില്ല. മറിച്ച്‌, നാം ചെയ്യുന്ന നല്ല കാര്യങ്ങൾ അവൻ ഓർക്കു​ന്നു. (സങ്കീർത്തനം 130:3; എബ്രായർ 6:10) ഇതേ രീതി​യി​ലാ​യി​രി​ക്കണം നാം കുട്ടി​ക​ളോ​ടും ഇടപെ​ടേ​ണ്ടത്‌.

ഒരു യുവാവ്‌ പറയുന്നു: “വീട്ടിൽനിന്ന്‌ എനിക്ക്‌ എന്തെങ്കി​ലും തരത്തി​ലുള്ള പ്രശംസ കിട്ടി​യ​താ​യി ഞാൻ ഓർക്കു​ന്നില്ല—വീട്ടി​ലോ സ്‌കൂ​ളി​ലോ കൈവ​രിച്ച നേട്ടങ്ങൾക്കു​പോ​ലും.” മാതാ​പി​താ​ക്കളേ, നിങ്ങളു​ടെ കുട്ടി​കൾക്കാ​വ​ശ്യ​മായ മർമ​പ്ര​ധാ​ന​മായ ഈ സംഗതി അവഗണി​ക്ക​രുത്‌! ചെയ്യുന്ന എല്ലാ നല്ല കാര്യ​ങ്ങൾക്കും മക്കളെ​യെ​ല്ലാ​വ​രെ​യും മുടങ്ങാ​തെ അഭിന​ന്ദി​ക്കേ​ണ്ട​താണ്‌. വളർന്നു​വ​രവേ, തങ്ങൾ ചെയ്യു​ന്ന​തൊ​ന്നും ശരിയാ​കി​ല്ലെന്ന ചിന്തയാൽ ‘നിരു​ന്മേ​ഷരാ’കാതി​രി​ക്കാൻ ഇത്‌ അവരെ സഹായി​ക്കും.—കൊ​ലൊ​സ്സ്യർ 3:21, പി.ഒ.സി. ബൈ.

ആശയവി​നി​മ​യം

‘കേൾപ്പാൻ വേഗത​യും പറവാൻ താമസ​വും കോപ​ത്തി​ന്നു താമസ​വു​മു​ള്ളവൻ ആയിരി​ക്കുക’ എന്ന യാക്കോബ്‌ 1:19-ലെ ബുദ്ധ്യു​പ​ദേശം കൈ​ക്കൊ​ള്ളു​ന്ന​താ​ണു മക്കളോ​ടുള്ള നിങ്ങളു​ടെ സ്‌നേഹം പ്രകടി​പ്പി​ക്കാ​നുള്ള മറ്റൊരു നല്ല മാർഗം. മക്കളുടെ മനസ്സി​ലു​ള്ളത്‌ എന്താ​ണെ​ന്ന​റി​യാൻ നിങ്ങൾ ശ്രമി​ക്കാ​റു​ണ്ടോ? അവർ പറയു​ന്ന​തെ​ന്തെന്നു നിങ്ങൾ വാസ്‌ത​വ​ത്തിൽ ശ്രദ്ധി​ക്കു​ന്നു​ണ്ടോ? കാര്യം പറഞ്ഞു തീരു​ന്ന​തി​നു​മു​മ്പേ നിങ്ങൾ പ്രസംഗം തുടങ്ങു​മെ​ന്നോ തങ്ങളുടെ തോന്നൽ മനസ്സി​ലാ​ക്കു​മ്പോൾ നിങ്ങൾ ദേഷ്യ​പ്പെ​ടു​മെ​ന്നോ നിങ്ങളു​ടെ മക്കൾക്ക​റി​യാ​മെ​ങ്കിൽ അവർ തങ്ങളുടെ വിചാ​ര​ങ്ങ​ളൊ​ന്നും നിങ്ങ​ളോ​ടു തുറന്നു പറഞ്ഞെ​ന്നു​വ​രില്ല. എന്നാൽ നിങ്ങൾ ശരിക്കും ശ്രദ്ധി​ക്കു​മെന്ന്‌ അറിയാ​മെ​ങ്കിൽ അവർ കാര്യങ്ങൾ തുറന്നു പറയും.—സദൃശ​വാ​ക്യ​ങ്ങൾ 20:5 താരത​മ്യം ചെയ്യുക.

തെറ്റാ​ണെ​ന്നു നിങ്ങൾക്ക​റി​യാ​വുന്ന തരത്തി​ലുള്ള തോന്ന​ലു​ക​ളാണ്‌ അവർ വെളി​പ്പെ​ടു​ത്തു​ന്ന​തെ​ങ്കി​ലോ? കോപം​പൂണ്ട പ്രതി​ക​ര​ണ​ത്തി​നോ, പ്രസം​ഗ​ത്തി​നോ അല്ലെങ്കിൽ എന്തെങ്കി​ലും തരത്തി​ലുള്ള ശിക്ഷണ​ത്തി​നോ ഉള്ള സമയമാ​ണോ അത്‌? ബാലി​ശ​മായ ചില പൊട്ടി​ത്തെ​റി​കൾ ‘പറവാൻ താമസ​വും കോപ​ത്തി​ന്നു താമസ​വും’ എന്ന തത്ത്വം പാലി​ക്കാൻ ബുദ്ധി​മു​ട്ടു​ള​വാ​ക്കി​യേ​ക്കാം. എന്നാൽ വീണ്ടും തന്റെ മക്കളോ​ടുള്ള ദൈവ​ത്തി​ന്റെ ദൃഷ്ടാന്തം പരിചി​ന്തി​ക്കുക. മക്കൾക്കു തങ്ങളുടെ തോന്നൽ അവനോ​ടു പറയാൻ ഭയം തോന്നുന്ന തരത്തിൽ കൊടിയ ഭയത്തി​ന്റേ​തായ ഒരു അന്തരീക്ഷം അവൻ സൃഷ്ടി​ക്കു​ന്നു​ണ്ടോ? ഇല്ല! സങ്കീർത്തനം 62:8 പറയുന്നു: “എല്ലാകാ​ല​ത്തും അവനിൽ [ദൈവ​ത്തിൽ] ആശ്രയി​പ്പിൻ; നിങ്ങളു​ടെ ഹൃദയം അവന്റെ മുമ്പിൽ പകരു​വിൻ; ദൈവം നമുക്കു സങ്കേത​മാ​കു​ന്നു.”

സോ​ദോം, ഗൊ​മോറ പട്ടണങ്ങളെ നശിപ്പി​ക്കാ​നുള്ള ദൈവ​ത്തി​ന്റെ തീരു​മാ​ന​ത്തിൽ വേവലാ​തി​പ്പെട്ട്‌ അബ്രാ​ഹാം തന്റെ സ്വർഗീയ പിതാ​വി​നോട്‌ ഇപ്രകാ​രം പറയാൻ മടിച്ചില്ല: “ഇങ്ങനെ നീ ഒരുനാ​ളും ചെയ്യു​ന്ന​ത​ല്ല​ല്ലോ? . . . സർവ്വഭൂ​മി​ക്കും ന്യായാ​ധി​പ​തി​യാ​യവൻ നീതി പ്രവൃ​ത്തി​ക്കാ​തി​രി​ക്കു​മോ?” യഹോവ അബ്രാ​ഹാ​മി​നെ ശാസി​ച്ചില്ല; യഹോവ അവൻ പറഞ്ഞതു ശ്രദ്ധിച്ച്‌ അവന്റെ ഭയത്തെ ദൂരീ​ക​രി​ച്ചു. (ഉല്‌പത്തി 18:20-33) ദൈവം ശ്രദ്ധേ​യ​മായ വിധത്തിൽ ക്ഷമയും സൗമ്യ​ത​യും പ്രകടി​പ്പി​ക്കു​ന്നു, തന്റെ മക്കൾ തികച്ചും ന്യായീ​ക​രി​ക്കാൻ പറ്റാത്ത​തും യുക്തി​സ​ഹ​മ​ല്ലാ​ത്ത​തു​മായ തോന്ന​ലു​കൾ തന്റെ മുമ്പാകെ പകരു​മ്പോൾപ്പോ​ലും.—യോനാ 3:10–4:11.

സമാന​മാ​യി, തങ്ങളുടെ ഉള്ളി​ന്റെ​യു​ള്ളി​ലെ തോന്ന​ലു​കളെ, അവ എത്രതന്നെ അലട്ടു​ന്ന​വ​യാ​യി​ക്കൊ​ള്ളട്ടെ, വെളി​പ്പെ​ടു​ത്തു​ന്ന​തു​കൊ​ണ്ടു കുഴപ്പ​മി​ല്ലെന്നു കുട്ടി​കൾക്കു തോന്ന​ത്ത​ക്ക​വി​ധ​മുള്ള ഒരു പരിസ്ഥി​തി മാതാ​പി​താ​ക്കൾ സൃഷ്ടി​ക്കണം. അതു​കൊണ്ട്‌, നിങ്ങളു​ടെ കുട്ടി വികാ​രാ​ധീ​ന​നാ​യി പൊട്ടി​ത്തെ​റി​ച്ചാൽ ശ്രദ്ധി​ക്കുക. വഴക്കു പറയു​ന്ന​തി​നു​പ​കരം, കുട്ടി​യു​ടെ വിചാ​ര​ങ്ങളെ മനസ്സി​ലാ​ക്കി കാരണ​മെ​ന്താ​ണെ​ന്ന​റി​യാൻ ശ്രമി​ക്കുക. ഉദാഹ​ര​ണ​ത്തിന്‌ നിങ്ങൾക്ക്‌ ഇപ്രകാ​രം പറയാൻ സാധി​ക്കും: ‘നിനക്ക്‌ ഇന്ന ആളി​നോട്‌ ദേഷ്യ​മു​ള്ള​തു​പോ​ലു​ണ്ട​ല്ലോ? കാരണ​മെ​ന്താ​ണെന്ന്‌ എന്നോടു പറയാ​മോ?’

കോപം നിയ​ന്ത്രി​ക്കൽ

മാതാ​പി​താ​ക്ക​ളാ​രും യഹോ​വ​യോ​ളം ക്ഷമാശീ​ല​ര​ല്ലെ​ന്നതു ശരിതന്നെ. മാത്രമല്ല, മക്കൾ മാതാ​പി​താ​ക്കളെ ക്ഷമയുടെ നെല്ലി​പ്പലക കാണി​ക്കു​മെ​ന്നതു തീർച്ച. മക്കളോട്‌ കൂടെ​ക്കൂ​ടെ ദേഷ്യം തോന്നു​ക​യാ​ണെ​ങ്കിൽ നിങ്ങൾ ഒരുത്തമ മാതാ​വോ പിതാ​വോ അല്ലെന്നു കരുതി വേവലാ​തി​പ്പെ​ട​രുത്‌. ചില​പ്പോൾ നിങ്ങൾക്കു ദേഷ്യം തോന്നു​ന്നതു തികച്ചും ഉചിത​മാ​യി​രി​ക്കും. ദൈവം തന്റെ മക്കളോട്‌, അവന്‌ വളരെ പ്രിയ​മു​ള്ള​വ​രോ​ടു​പോ​ലും, ഉചിത​മായ രീതി​യിൽ ദേഷ്യ​പ്പെ​ടു​ന്നു. (പുറപ്പാ​ടു 4:14; ആവർത്ത​ന​പു​സ്‌തകം 34:10) എങ്കിലും അവന്റെ വചനം ദേഷ്യം നിയ​ന്ത്രി​ക്കാൻ നമ്മെ പഠിപ്പി​ക്കു​ന്നു.—എഫെസ്യർ 4:26.

എങ്ങനെ? ചില സന്ദർഭ​ങ്ങ​ളിൽ നിങ്ങളു​ടെ ദേഷ്യം കെട്ടട​ങ്ങു​ന്ന​തു​വരെ അൽപ്പസ​മ​യ​ത്തേക്ക്‌ മാറി​നിൽക്കു​ന്നതു നന്നായി​രി​ക്കും. (സദൃശ​വാ​ക്യ​ങ്ങൾ 17:14) മാത്രമല്ല, അവനൊ​രു കുട്ടി​യാ​ണെന്ന്‌ ഓർക്കുക! മുതിർന്ന​വ​രെ​പ്പോ​ലെ​യുള്ള പെരു​മാ​റ്റ​മോ പക്വത​യുള്ള ചിന്താ​ഗ​തി​യോ കുട്ടി​യിൽനി​ന്നു പ്രതീ​ക്ഷി​ക്ക​രുത്‌. (1 കൊരി​ന്ത്യർ 13:11) കുട്ടി അത്തരത്തിൽ പെരു​മാ​റി​യത്‌ എന്തു​കൊ​ണ്ടാ​ണെന്നു മനസ്സി​ലാ​ക്കു​ന്നതു നിങ്ങളു​ടെ കോപത്തെ ശമിപ്പി​ച്ചേ​ക്കാം. (സദൃശ​വാ​ക്യ​ങ്ങൾ 19:11) കൊള്ള​രു​താത്ത കാര്യങ്ങൾ ചെയ്യു​ന്ന​തും കൊള്ള​രു​താത്ത വ്യക്തി​യാ​യി​രി​ക്കു​ന്ന​തും തമ്മിൽ വലിയ അന്തരമു​ണ്ടെന്ന്‌ ഒരിക്ക​ലും മറക്കരുത്‌. കൊള്ള​രു​താ​ത്തവൻ എന്നു വിളി​ച്ചു​കൊണ്ട്‌ ഒരു കുട്ടി​യു​ടെ നേരേ ആക്രോ​ശി​ക്കു​ന്നത്‌, ‘ഞാൻ എന്തിന്‌ നന്നാകണം?’ എന്ന്‌ അവൻ ചിന്തി​ക്കു​ന്ന​തി​ലേക്കു വഴി​തെ​ളി​ച്ചേ​ക്കാം. എന്നാൽ സ്‌നേ​ഹ​പൂർവ​മുള്ള തിരുത്തൽ, അഭിവൃ​ദ്ധി പ്രാപി​ക്കാൻ കുട്ടിയെ സഹായി​ച്ചേ​ക്കാം.

അച്ചടക്ക​വും ആദരവും നിലനിർത്തൽ

അച്ചടക്ക​വും ആദരവും സംബന്ധിച്ച്‌ കുട്ടി​കളെ പഠിപ്പി​ക്കു​ന്ന​താ​ണു മാതാ​പി​താ​ക്കൾ നേരി​ടുന്ന വലിയ വെല്ലു​വി​ളി​ക​ളി​ലൊന്ന്‌. ഇന്നത്തെ വഴിവിട്ട ലോക​ത്തിൽ തങ്ങളുടെ മക്കളെ നിയ​ന്ത്രി​ക്കു​ന്ന​തു​തന്നെ ഉചിത​മാ​ണോ എന്നു പലരും ചിന്തി​ക്കു​ന്നു. ബൈബിൾ ഉത്തരം നൽകുന്നു: “വടിയും ശാസന​യും ജ്ഞാനത്തെ നല്‌കു​ന്നു; തന്നിഷ്ട​ത്തി​ന്നു വിട്ടി​രുന്ന ബാലനോ അമ്മെക്കു ലജ്ജ വരുത്തു​ന്നു.” (സദൃശ​വാ​ക്യ​ങ്ങൾ 29:15) “വടി” എന്നു കേൾക്കു​മ്പോൾത്തന്നെ ചിലർ നെറ്റി ചുളി​ക്കു​ന്നു. കാരണം കുട്ടി​കളെ ഉപദ്ര​വി​ക്കുക എന്ന ധ്വനി​യാണ്‌ അതു നൽകു​ന്ന​തെന്ന്‌ അവർ കരുതു​ന്നു. എന്നാൽ വാസ്‌ത​വ​മതല്ല. “വടി” എന്നതിന്റെ എബ്രായ പദത്തിന്റെ അർഥം കോൽ എന്നാണ്‌. അതായത്‌, ഒരു ആട്ടിടയൻ തന്റെ ആടുകളെ നയിക്കാൻ—ഉപദ്ര​വി​ക്കാ​നല്ല—ഉപയോ​ഗി​ച്ചി​രു​ന്ന​തു​പോ​ലുള്ള ഒന്ന്‌.a അതു​കൊണ്ട്‌, വടി പ്രതി​നി​ധീ​ക​രി​ക്കു​ന്നതു ശിക്ഷണ​ത്തെ​യാണ്‌.

ശിക്ഷണം നൽകുക എന്നതു​കൊണ്ട്‌ ബൈബി​ളിൽ മുഖ്യ​മാ​യും അർഥമാ​ക്കു​ന്നതു പഠിപ്പി​ക്കുക എന്നാണ്‌. അതു​കൊ​ണ്ടാണ്‌ ‘പ്രബോ​ധനം കേൾക്ക’ അഥവാ ‘ഉപദേശം കേൾക്ക’ [“ശിക്ഷണ​ത്തി​നു ശ്രദ്ധ നൽകുക,” NW] എന്ന്‌ സദൃശ​വാ​ക്യ​ങ്ങൾ ഏതാണ്ട്‌ നാലു തവണ പറയു​ന്നത്‌. (സദൃശ​വാ​ക്യ​ങ്ങൾ 1:8; 4:1; 8:33; 19:27) നന്മ ചെയ്യു​ന്നതു പ്രതി​ഫ​ല​വും തിന്മ ചെയ്യു​ന്നതു ഭവിഷ്യ​ത്തു​ക​ളും കൈവ​രു​ത്തു​മെന്നു കുട്ടികൾ പഠി​ക്കേ​ണ്ടത്‌ ആവശ്യ​മാണ്‌. പ്രശംസ പോലുള്ള പ്രതി​ഫ​ലങ്ങൾ സത്‌പ്ര​വൃ​ത്തി​ക​ളോ​ടു താത്‌പ​ര്യം ജനിപ്പി​ക്കു​ന്ന​തു​പോ​ലെ​തന്നെ ശിക്ഷ ദുഷ്‌പ്ര​വൃ​ത്തി​കൾ ചെയ്യാ​നുള്ള പ്രവണ​തയെ ശക്തി​പ്പെ​ടു​ത്തും. (ആവർത്ത​ന​പു​സ്‌തകം 11:26-28 താരത​മ്യം ചെയ്യുക.) ശിക്ഷയു​ടെ കാര്യ​ത്തിൽ മാതാ​പി​താ​ക്കൾ ദൈവ​ത്തി​ന്റെ മാതൃക അനുക​രി​ക്കു​ന്നതു നന്നായി​രി​ക്കും. കാരണം അവൻ തന്റെ ജനത്തോ​ടു പറഞ്ഞതു താൻ അവരെ “ന്യായ​മാ​യി ശിക്ഷി​ക്കും” എന്നാണ്‌. (ചെരി​ച്ചെ​ഴു​ത്തു ഞങ്ങളു​ടേത്‌.) (യിരെ​മ്യാവ്‌ 46:28) ചില കുട്ടി​കളെ നിലയ്‌ക്കു നിർത്താൻ കർക്കശ​മായ ഏതാനും വാക്കുകൾ മാത്രം മതിയാ​കും. ചിലർക്ക്‌ അതി​നെ​ക്കാൾ ദൃഢമായ ശിക്ഷണ​ന​ട​പ​ടി​കൾ ആവശ്യ​മാ​യി​രി​ക്കാം. എന്നാൽ ‘ന്യായ​മായ ശിക്ഷ’ നൽകു​ന്ന​തിൽ ഒരിക്ക​ലും ഒരു കുട്ടിക്കു വൈകാ​രി​ക​മോ ശാരീ​രി​ക​മോ ആയി ദോഷം ചെയ്യു​ന്ന​ത​ര​ത്തി​ലുള്ള കാര്യ​ങ്ങ​ളൊ​ന്നും ഉൾപ്പെ​ടില്ല.

സന്തുലി​ത​മാ​യ ശിക്ഷണ​ത്തിൽ പരിധി​ക​ളെ​യും പരിമി​തി​ക​ളെ​യും സംബന്ധിച്ച്‌ കുട്ടി​കളെ പഠിപ്പി​ക്കു​ന്ന​തും ഉൾപ്പെ​ടു​ത്തേ​ണ്ട​താണ്‌. ഇവയിൽ പലതും ദൈവ​വ​ച​ന​ത്തിൽ വ്യക്തമാ​യി നിർവ​ചി​ച്ചി​ട്ടുണ്ട്‌. വ്യക്തി​സ്വ​ത്തായ സ്ഥലത്തിന്റെ അതിരു​കളെ ആദരി​ക്കാൻ ബൈബിൾ പഠിപ്പി​ക്കു​ന്നു. (ആവർത്ത​ന​പു​സ്‌തകം 19:14) ശാരീ​രി​ക​മായ കാര്യ​ങ്ങ​ളി​ലും അതു പരിധി​കൾ വെക്കുന്നു. അതു​കൊണ്ട്‌, അക്രമത്തെ പ്രിയ​പ്പെ​ടു​ന്ന​തോ മറ്റൊ​രാ​ളെ മനപ്പൂർവം ഉപദ്ര​വി​ക്കു​ന്ന​തോ തെറ്റാണ്‌. (സങ്കീർത്തനം 11:5; മത്തായി 7:12) ലൈം​ഗി​ക​ത​യു​ടെ കാര്യ​ത്തി​ലും അതു പരിധി​കൾ വെക്കുന്നു, അത്‌ നിഷിദ്ധ ബന്ധു​വേ​ഴ്‌ചയെ കുറ്റം വിധി​ക്കു​ന്നു. (ലേവ്യ​പു​സ്‌തകം 18:6-18) വ്യക്തി​പ​ര​വും വൈകാ​രി​ക​വു​മായ കാര്യ​ങ്ങ​ളിൽപ്പോ​ലും അതു പരിമി​തി​കൾ വെക്കുന്നു. ആരെ​യെ​ങ്കി​ലും മോശ​മായ പേരു​ക​ളോ മറ്റുത​ര​ത്തി​ലുള്ള അസഭ്യ​മോ വിളി​ക്കു​ന്ന​തി​നെ അതു വിലക്കു​ന്നു. (മത്തായി 5:22) ഈ പരിധി​ക​ളെ​യും പരിമി​തി​ക​ളെ​യും കുറിച്ചു മക്കളെ പഠിപ്പി​ക്കു​ന്നത്‌—വാക്കാ​ലും മാതൃ​ക​യാ​ലും—ആരോ​ഗ്യ​ക​ര​മായ ഒരു കുടും​ബാ​ന്ത​രീ​ക്ഷ​ത്തിന്‌ അനിവാ​ര്യ​മാണ്‌.

കുടും​ബ​ത്തിൽ അച്ചടക്ക​വും ആദരവും നിലനിർത്താ​നുള്ള മറ്റൊരു താക്കോ​ലാ​ണു കുടും​ബ​ത്തി​ലെ ഓരോ​രു​ത്ത​രു​ടെ​യും സ്ഥാനം മനസ്സി​ലാ​ക്കു​ക​യെ​ന്നത്‌. ഇന്നു പല ഭവനങ്ങ​ളി​ലും അത്തരം സ്ഥാനങ്ങൾ അവ്യക്ത​മോ ആശയക്കു​ഴ​പ്പ​ത്തി​ലോ ആണ്‌. ചില കുടും​ബ​ങ്ങ​ളിൽ ഒരു മാതാ​വോ പിതാ​വോ ഭാരിച്ച പ്രശ്‌നങ്ങൾ—ഒരു കുട്ടിക്ക്‌ കൈകാ​ര്യം ചെയ്യാ​നാ​കാത്ത പ്രശ്‌നങ്ങൾ—കുട്ടി​യു​ടെ മേൽ കെട്ടി​വെ​ക്കും. ചില കുടും​ബ​ങ്ങ​ളി​ലാ​കട്ടെ, കുട്ടി​കളെ മുഴു​കു​ടും​ബ​ത്തി​നും വേണ്ടി തീരു​മാ​ന​മെ​ടു​ക്കുന്ന കൊച്ചു സ്വേച്ഛാ​ധി​പ​തി​ക​ളാ​യി ചമയാൻ അനുവ​ദി​ക്കും. അത്‌ തെറ്റാ​ണെന്നു മാത്രമല്ല, ദോഷ​വും ചെയ്യും. മക്കളുടെ ആവശ്യങ്ങൾ—ശാരീ​രി​ക​മോ വൈകാ​രി​ക​മോ ആത്മീയ​മോ ആയി​ക്കൊ​ള്ളട്ടെ—നിറ​വേ​റ്റാ​നുള്ള കടപ്പാടു മാതാ​പി​താ​ക്കൾക്കാണ്‌, മറിച്ചല്ല. (2 കൊരി​ന്ത്യർ 12:14; 1 തിമൊ​ഥെ​യൊസ്‌ 5:8) യാക്കോ​ബി​ന്റെ ഉദാഹ​രണം പരിചി​ന്തി​ക്കുക. കുട്ടി​കൾക്കു ഭാരം തോന്നാ​തി​രി​ക്ക​ത്ത​ക്ക​വണ്ണം അവൻ തന്റെ മുഴു​കു​ടും​ബ​ത്തി​ന്റെ​യും ദാസന്മാ​രു​ടെ​യും ജീവി​ത​ഗ​തി​യിൽ ക്രമീ​ക​ര​ണങ്ങൾ വരുത്തി. അവൻ അവരുടെ പരിമി​തി​കൾ മനസ്സി​ലാ​ക്കി അപ്രകാ​രം പ്രവർത്തി​ച്ചു.—ഉല്‌പത്തി 33:13, 14.

ആത്മീയാ​വ​ശ്യ​ങ്ങൾക്കു ശ്രദ്ധ നൽകൽ

കുടും​ബ​ത്തിൽ ആരോ​ഗ്യ​ക​ര​മായ ഒരന്തരീ​ക്ഷം ഉണ്ടായി​രി​ക്കു​ന്ന​തി​നു മർമ​പ്ര​ധാ​ന​മായ സംഗതി​യാണ്‌ ആത്മീയത. (മത്തായി 5:3) ആത്മീയ കാര്യങ്ങൾ മനസ്സി​ലാ​ക്കാൻ കുട്ടി​കൾക്കു നല്ല കഴിവുണ്ട്‌. അവരുടെ മനസ്സു നിറയെ ചോദ്യ​ങ്ങ​ളാണ്‌: നാം ജീവി​ക്കു​ന്നത്‌ എന്തു​കൊ​ണ്ടാണ്‌? ഭൂമി​യെ​യും മൃഗങ്ങ​ളെ​യും വൃക്ഷങ്ങ​ളെ​യും സമു​ദ്ര​ങ്ങ​ളെ​യു​മൊ​ക്കെ ഉണ്ടാക്കി​യത്‌ ആരാണ്‌? മനുഷ്യർ മരിക്കു​ന്നത്‌ എന്തു​കൊ​ണ്ടാണ്‌? മരണാ​ന​ന്തരം എന്താണ്‌ സംഭവി​ക്കു​ന്നത്‌? നല്ല ആളുകൾക്കു മോശ​മായ കാര്യങ്ങൾ സംഭവി​ക്കു​ന്നത്‌ എന്തു​കൊ​ണ്ടാണ്‌? ചോദ്യ​ങ്ങൾ അങ്ങനെ നീണ്ടു​പോ​കു​ന്നു. മിക്ക​പ്പോ​ഴും അത്തരം കാര്യ​ങ്ങ​ളെ​ക്കു​റി​ച്ചു ചിന്തി​ക്കാൻ താത്‌പ​ര്യം കാണി​ക്കാ​ത്തതു മാതാ​പി​താ​ക്ക​ളാണ്‌.b

മക്കൾക്ക്‌ ആത്മീയ പരിശീ​ലനം നൽകു​ന്ന​തി​നു സമയം ചെലവി​ടാൻ ബൈബിൾ മാതാ​പി​താ​ക്കളെ പ്രോ​ത്സാ​ഹി​പ്പി​ക്കു​ന്നു. മാതാ​പി​താ​ക്ക​ളും കുട്ടി​ക​ളും തമ്മിലുള്ള ഊഷ്‌മ​ള​മായ സംഭാ​ഷ​ണ​ത്തി​ലൂ​ടെ അത്തരം പരിശീ​ലനം നൽകു​ന്ന​തി​നെ​ക്കു​റിച്ച്‌ അതു പറയുന്നു. ഒന്നിച്ചു നടക്കു​മ്പോ​ഴും വീട്ടിൽ ഒന്നിച്ചി​രി​ക്കു​മ്പോ​ഴും കിടക്കു​മ്പോ​ഴും—സാധ്യ​മാ​കു​മ്പോ​ഴൊ​ക്കെ—ദൈവ​ത്തെ​യും അവന്റെ വചന​ത്തെ​യും കുറിച്ചു മക്കളെ പഠിപ്പി​ക്കാ​വു​ന്ന​താണ്‌.—ആവർത്ത​ന​പു​സ്‌തകം 6:6, 7; എഫെസ്യർ 6:4.

അത്തര​മൊ​രു ആത്മീയ പരിപാ​ടി ശുപാർശ ചെയ്യുക മാത്രമല്ല ബൈബിൾ ചെയ്യു​ന്നത്‌. നിങ്ങൾക്കാ​വ​ശ്യ​മായ വിവര​ങ്ങ​ളും അതു പ്രദാനം ചെയ്യുന്നു. നിങ്ങളു​ടെ മക്കളുടെ മുമ്പു പ്രതി​പാ​ദിച്ച ചോദ്യ​ങ്ങൾക്കുള്ള ഉത്തരം നിങ്ങൾ എങ്ങനെ നൽകും? അവയ്‌ക്കുള്ള ഉത്തരങ്ങൾ ബൈബി​ളി​ലുണ്ട്‌. അവ സുവ്യ​ക്ത​മാണ്‌, രസകര​മാണ്‌, ആശയറ്റ ഈ ലോക​ത്തിൽ അവ വളരെ​യ​ധി​കം പ്രത്യാശ നൽകുന്നു. അതിലു​പരി, ബൈബി​ളി​ന്റെ ജ്ഞാനം നിങ്ങളു​ടെ മക്കൾക്ക്‌ ഏറ്റവും ഉറച്ച നങ്കൂര​മാ​യി വർത്തി​ക്കും. ഈ പ്രക്ഷുബ്ധ കാലത്ത്‌ അത്‌ അവർക്ക്‌ ഏറ്റവും നല്ല മാർഗ​നിർദേശം പ്രദാനം ചെയ്യും. അവർക്ക്‌ അതു നൽകൂ, അവർ വാസ്‌ത​വ​മാ​യും അഭിവൃ​ദ്ധി പ്രാപി​ക്കും—ഇപ്പോൾ മാത്രമല്ല, ഭാവി​യി​ലും.

[അടിക്കു​റി​പ്പു​കൾ]

[11-ാം പേജിലെ ആകർഷ​ക​വാ​ക്യം]

പ്രത്യേകിച്ച്‌ എന്തി​നെ​ക്കു​റി​ച്ചെ​ങ്കി​ലും നിങ്ങളു​ടെ കുട്ടിയെ പതിവാ​യി പ്രശം​സി​ക്കു​ന്ന​തി​നുള്ള വഴികൾ കണ്ടെത്തുക

[9-ാം പേജിലെ ചതുരം]

അഭിവൃദ്ധി പ്രാപി​ക്കാൻ മക്കളെ സഹായി​ക്കാ​വുന്ന വിധം

• തങ്ങൾ സ്‌നേ​ഹി​ക്ക​പ്പെ​ടു​ന്ന​വ​രാ​ണെ​ന്നും തങ്ങളെ​ക്കൊണ്ട്‌ ആവശ്യ​മു​ണ്ടെ​ന്നും കുട്ടിക്കു തോന്നുന്ന ഒരു സുരക്ഷിത ചുറ്റു​പാ​ടു പ്രദാനം ചെയ്യുക

• അവരെ നിരന്തരം പ്രശം​സി​ക്കുക. പ്രത്യേ​കിച്ച്‌ എന്തി​നെ​ക്കു​റി​ച്ചെ​ങ്കി​ലു​മാ​യി​രി​ക്കണം അത്‌

• നല്ലൊരു ശ്രോ​താ​വാ​യി​രി​ക്കുക

• കോപം ആളിക്ക​ത്തു​മ്പോൾ മാറി​നിൽക്കു​ക

• വ്യക്തമായ, സുദൃ​ഢ​മായ പരിധി​ക​ളും പരിമി​തി​ക​ളും വെക്കുക

• ഓരോ കുട്ടി​ക്കും വ്യക്തി​പ​ര​മാ​യി അനു​യോ​ജ്യ​മാ​യി​രി​ക്കുന്ന ശിക്ഷണം നൽകുക

• ന്യായ​മാ​യ​തിൽ കവിഞ്ഞ്‌ നിങ്ങളു​ടെ കുട്ടി​യിൽനി​ന്നു പ്രതീ​ക്ഷി​ക്കാ​തി​രി​ക്കുക

• കുട്ടി​ക​ളു​മൊ​ത്തു ദൈവ​വ​ചനം ക്രമമാ​യി പഠിച്ചു​കൊണ്ട്‌ അവരുടെ ആത്മീയ ആവശ്യ​ങ്ങൾക്കാ​യി കരുതുക

[10-ാം പേജിലെ ചതുരം]

വളരെക്കാലം മുമ്പേ

ബൈബിൾ നിയമങ്ങൾ ചുറ്റു​മുള്ള ജനതക​ളു​ടേ​തി​നെ​ക്കാൾ ഉയർന്ന നിലവാ​ര​മുള്ള കുടും​ബ​ജീ​വി​തം നയിക്കാൻ പുരാതന ഇസ്രാ​യേ​ലി​ലെ ജനങ്ങളെ സഹായി​ച്ചു. ചരി​ത്ര​കാ​ര​നായ ആൽഫ്രഡ്‌ എഡർഷൈം ഇങ്ങനെ അഭി​പ്രാ​യ​പ്പെ​ടു​ന്നു: “ഇസ്രാ​യേ​ലി​നു വെളി​യി​ലുള്ള ആളുക​ളെ​ക്കു​റി​ച്ചു പറയു​ക​യാ​ണെ​ങ്കിൽ, നാം മനസ്സി​ലാ​ക്കുന്ന അർഥത്തി​ലുള്ള കുടും​ബ​ജീ​വി​ത​മോ കുടും​ബ​മോ അവർക്കു​ണ്ടാ​യി​രു​ന്നു എന്നു പറയാൻ സാധി​ക്കു​ക​യില്ല.” ഉദാഹ​ര​ണ​ത്തിന്‌, പുരാതന റോമാ​ക്കാർക്കി​ട​യിൽ നിയമ​പ്ര​കാ​രം കുടും​ബ​ത്തിൽ പരമാ​ധി​കാ​രം പിതാ​വി​നാ​യി​രു​ന്നു. അയാൾക്കു വേണ​മെ​ങ്കിൽ മക്കളെ അടിമ​ക​ളാ​യി വിൽക്കു​ക​യോ അവരെ​ക്കൊ​ണ്ടു പണി​യെ​ടു​പ്പി​ക്കു​ക​യോ അല്ലെങ്കിൽ അവരെ കൊല്ലുക പോലു​മോ ചെയ്യാ​മാ​യി​രു​ന്നു. എങ്കിലും അയാൾ ശിക്ഷി​ക്ക​പ്പെ​ടു​മാ​യി​രു​ന്നില്ല.

യഹൂദർ തങ്ങളുടെ മക്കളോ​ടു സൗമ്യ​ത​യോ​ടെ പെരു​മാ​റു​ന്നത്‌ ഒരു വിചിത്ര കാര്യ​മാ​യി​ട്ടാ​ണു ചില റോമാ​ക്കാർ വീക്ഷി​ച്ചി​രു​ന്നത്‌. വാസ്‌ത​വ​ത്തിൽ, യഹൂദ​രു​ടെ ആചാരങ്ങൾ “ഒരേസ​മയം വികട​വും അറപ്പു​ള​വാ​ക്കു​ന്ന​തു​മാ​യി​രു​ന്നു” എന്നു പറഞ്ഞു​കൊണ്ട്‌ ഒന്നാം നൂറ്റാ​ണ്ടി​ലെ റോമൻ ചരി​ത്ര​കാ​ര​നായ ടാസി​റ്റസ്‌ അവരെ​ക്കു​റിച്ച്‌ വിദ്വേ​ഷം കലർന്ന രീതി​യിൽ എഴുതു​ക​യു​ണ്ടാ​യി. എങ്കിലും അദ്ദേഹം ഇങ്ങനെ സമ്മതി​ച്ചു​പ​റഞ്ഞു: “ഒരു നവജാത ശിശു​വി​നെ കൊല്ലു​ന്നത്‌ അവർക്കി​ട​യിൽ അപരാ​ധ​മാണ്‌.”

ബൈബിൾ ഉന്നതമായ ഒരു മാനദ​ണ്ഡ​മാ​ണു കൽപ്പി​ച്ചി​രു​ന്നത്‌. കുട്ടികൾ വില​പ്പെ​ട്ട​വ​രാ​ണെ​ന്നും—വാസ്‌ത​വ​ത്തിൽ ദൈവ​ത്തിൽനി​ന്നുള്ള ഒരു അവകാ​ശ​മാ​യി വീക്ഷി​ക്ക​പ്പെ​ട​ണ​മെ​ന്നും—അതിൻപ്ര​കാ​രം അവരോ​ടു പെരു​മാ​റ​ണ​മെ​ന്നും അതു യഹൂദരെ പഠിപ്പി​ച്ചു. (സങ്കീർത്തനം 127:3) പലരും അത്തരം ബുദ്ധ്യു​പ​ദേ​ശ​മ​നു​സ​രിച്ച്‌ ജീവി​ച്ചു​വെന്നു സ്‌പഷ്ടം. അവരുടെ ഭാഷ​പോ​ലും ഇതു വെളി​പ്പെ​ടു​ത്തു​ന്നു. പുത്രൻ, പുത്രി എന്നീ വാക്കു​കൾക്കു​പു​റമേ പുരാതന എബ്രാ​യ​യിൽ കുട്ടികൾ എന്നതിന്‌ ഒമ്പതു വാക്കുകൾ ഉണ്ടായി​രു​ന്നു​വെന്ന്‌ എഡർഷൈം അഭി​പ്രാ​യ​പ്പെ​ടു​ന്നു. ഓരോ​ന്നും ജീവി​ത​ത്തി​ന്റെ വ്യത്യസ്‌ത ഘട്ടങ്ങളെ കുറി​ക്കാ​നു​ള്ള​താ​യി​രു​ന്നു. ഉദാഹ​ര​ണ​ത്തിന്‌, മുലകു​ടി മാറാത്ത ഒരു കുട്ടി​യെ​യും മുലകു​ടി മാറിയ ഒരു കുട്ടി​യെ​യും കുറി​ക്കാൻ വ്യത്യസ്‌ത വാക്കു​ക​ളു​ണ്ടാ​യി​രു​ന്നു. അൽപ്പം​കൂ​ടെ മുതിർന്ന കുട്ടി​കളെ കുറി​ക്കാൻ അവർ ദൃഢചി​ത്ത​രും ശക്തരു​മാ​യി വളർന്നു കൊണ്ടി​രി​ക്കു​ക​യാ​ണെന്നു സൂചി​പ്പി​ക്കുന്ന ഒരു വാക്കു​ണ്ടാ​യി​രു​ന്നു. യുവജ​ന​ങ്ങൾക്കാ​യി അക്ഷരാർഥ​ത്തിൽ ‘കുതറി മാറിയ’ എന്നർഥ​മുള്ള ഒരു വാക്കു​ണ്ടാ​യി​രു​ന്നു. എഡർഷൈം അഭി​പ്രാ​യ​പ്പെ​ടു​ന്നു: “വളർന്നു​വ​രുന്ന ഓരോ കാലഘ​ട്ട​വും ചിത്രീ​ക​രി​ക്ക​ത്ത​ക്ക​വി​ധം കുട്ടി​യു​ടെ ജീവി​തത്തെ സശ്രദ്ധം വീക്ഷി​ച്ചി​രു​ന്ന​വർക്ക്‌ തങ്ങളുടെ കുട്ടി​ക​ളോ​ടു വളരെ വാത്സല്യ​മു​ണ്ടാ​യി​രു​ന്നി​രി​ക്കണം, തീർച്ച.”