‘നക്ഷത്ര​ത്തെ​പ്പോ​ലെ കൂരി​രു​ളി​നെ തുളച്ചി​റ​ങ്ങാൻ ഒരു താളിനു കഴിയും’

തിരു​വെ​ഴു​ത്തു​ക​ളു​ടെ പരിഭാ​ഷകൾ ഇന്നു മിക്കവാ​റും സകലയി​ട​ത്തും ലഭ്യമാണ്‌. എന്നിരു​ന്നാ​ലും, ബൈബി​ളി​നെ​പ്രതി ഒരു ജീവൻ-മരണ പോരാ​ട്ടം​തന്നെ നടന്നി​ട്ടുണ്ട്‌.

പതിന​ഞ്ചാം നൂററാ​ണ്ടി​ലെ ബൈബി​ളു​കൾ [ഇംഗ്ലീഷ്‌] എന്ന പുസ്‌ത​ക​ത്തിൽ വെൻഡൽ പ്രൈം എഴുതി: “അച്ചടി കണ്ടുപി​ടി​ച്ചിട്ട്‌ 30 വർഷം പിന്നി​ട്ടി​രു​ന്നു. സ്‌പെ​യി​നിൽ മതവി​ചാ​രണ തകർത്തു മുന്നേ​റി​ക്കൊ​ണ്ടി​രു​ന്നു. ആ രാജ്യത്ത്‌ അതുമു​ഖാ​ന്തരം ശിക്ഷി​ക്ക​പ്പെട്ട 3,42,000 ആളുക​ളിൽ 32,000 പേരെ ജീവ​നോ​ടെ കത്തിച്ചു. രക്തസാ​ക്ഷി​ത്വ​ത്തി​ന്റെ തീജ്ജ്വാ​ല​യി​ലേക്ക്‌ അവർ എറിയ​പ്പെ​ട്ട​തി​നു കാരണം അവർ ബൈബിൾ കൈവ​ശം​വെ​ക്കു​ക​യും വായി​ക്കു​ക​യും ചെയ്‌തു എന്നതാ​യി​രു​ന്നു. ഇററലി​യു​ടെ ഉത്തര-ദക്ഷിണ​ഭാ​ഗ​ത്തും സമാന​മാ​യി ഭയാന​ക​മാ​യി​രു​ന്നു മതവി​ചാ​ര​ണ​യെന്ന ഈ നാശോ​പാ​ധി. മതവി​ചാ​ര​ണ​യു​ടെ സഹായം​കൊണ്ട്‌ ആർച്ചു​ബി​ഷ​പ്പു​മാർ ബൈബി​ളി​നും അതിന്റെ വായന​ക്കാർക്കും ദഹിപ്പി​ക്കുന്ന അഗ്നിയാ​യി​ത്തീർന്നു. കുടി​ച്ചു​കൂ​ത്താ​ടാ​നുള്ള രംഗങ്ങൾക്കു വെളിച്ചം പകരാൻ നീറോ ചെയ്‌തത്‌ ചില ക്രിസ്‌ത്യാ​നി​കളെ ചാക്കിൽ തുന്നി​ക്കെട്ടി അതിനു​മേൽ കീൽ പുരട്ടി തീ കൊളു​ത്തു​ക​യാ​യി​രു​ന്നു. അവരെ പന്തമായി ഉപയോ​ഗി​ച്ചു​കൊണ്ട്‌ അദ്ദേഹം ക്രിസ്‌ത്യാ​നി​ക​ളു​ടെ വെളിച്ചം ലോക​ത്തിൽ പ്രകാ​ശി​പ്പി​ച്ചു. എന്നാൽ യൂറോ​പ്യൻ നഗരങ്ങ​ളു​ടെ തെരു​വീ​ഥി​കൾ ബൈബിൾ കത്തിക്ക​ലു​ക​ളാൽ വെട്ടി​ത്തി​ളങ്ങി. ബൈബി​ളി​ന്റെ വായന​ക്കാ​രെ പാപ്പരാ​ക്കാം, വിവസ്‌ത്ര​രാ​ക്കാം, പീഡിപ്പിക്കാം, അംഗവി​ഹീ​ന​രാ​ക്കാം, ഭ്രഷ്ട​രോ​ടെ​ന്ന​പോ​ലെ പെരു​മാ​റാം. പക്ഷേ ബൈബി​ളി​ന്റെ കാര്യം അതല്ലല്ലോ. “നക്ഷത്ര​ത്തെ​പ്പോ​ലെ കൂരി​രു​ളി​നെ തുളച്ചി​റ​ങ്ങാൻ അവശേ​ഷി​ക്കുന്ന ഒരു താളി​നു​പോ​ലും കഴിയും.”—ചെരി​ച്ചെ​ഴു​ത്തു ഞങ്ങളു​ടേത്‌.

ഗ്രന്ഥകർത്താ​വാ​യ പ്രൈം വിവരി​ക്കു​ന്നത്‌ ഇവിടെ കാണി​ച്ചി​രി​ക്കുന്ന ബൈബിൾ താളിന്റെ ശരിപ്പ​കർപ്പി​ന്റെ കാര്യ​ത്തിൽ യാഥാർഥ്യ​മാ​യി. കോ​ളോ​ഫോൺ പേജ്‌ എന്നറി​യ​പ്പെ​ടുന്ന, പരിഭാ​ഷകൻ ആരെന്നു എഴുതി​യി​ട്ടുള്ള, പുസ്‌ത​ക​ത്തി​ന്റെ അവസാന പേജാ​യി​രു​ന്നു ഇത്‌. മുകളിൽ കണ്ട രണ്ടു സമാന്തര കോളങ്ങൾ അപ്പോ​ക്കാ​ലി​പ്‌സി​ന്റെ അഥവാ വെളി​പാട്‌ പുസ്‌ത​ക​ത്തി​ന്റെ അവസാന വാക്യ​ങ്ങ​ളാ​യി​രു​ന്നു.

ഈ പുസ്‌ത​ക​ത്തെ​പ്പ​ററി ദ കേം​ബ്രി​ഡ്‌ജ്‌ ഹിസ്‌റ​ററി ഓഫ്‌ ദ ബൈബിൾ പ്രസ്‌താ​വി​ക്കു​ന്നത്‌ ഇപ്രകാ​ര​മാണ്‌: “1478-ൽ ബോണി​ഫാ​സി​യോ ഫെററി​ന്റെ [Ferrer] കാററലൻ ബൈബിൾ പരിഭാഷ വലൻസ്യാ​യിൽ അച്ചടിച്ചു; അതിന്റെ ലഭ്യമാ​യി​രുന്ന എല്ലാ പ്രതി​ക​ളും മതവി​ചാ​ര​ണ​യു​ടെ ഫലമായി 1500-നു മുമ്പു​തന്നെ നശിപ്പി​ച്ചി​രു​ന്നു, എന്നാൽ ഒരു താളിനു മാത്രം ആ ദുർഗ​തി​യു​ണ്ടാ​യില്ല. അത്‌ അമേരി​ക്കൻ ലൈ​ബ്ര​റി​യു​ടെ ഹിസ്‌പാ​നിക്‌ സൊ​സൈ​റ​റി​യിൽ ഇപ്പോ​ഴു​മുണ്ട്‌.”—ചെരി​ച്ചെ​ഴു​ത്തു ഞങ്ങളു​ടേത്‌.

വെൻഡൽ പ്രൈം ഇതും സൂചി​പ്പി​ക്കു​ന്നു: “പേടി​ച്ചരണ്ട പുരോ​ഹി​തൻമാർക്ക്‌ ചെയ്യാൻ ഒന്നേയു​ണ്ടാ​യി​രു​ന്നു​ള്ളൂ, ബൈബിൾ കത്തിച്ചു​ക​ള​യുക. കൂടു​ത​ലെണ്ണം കണ്ടെത്തി​യി​രു​ന്നെ​ങ്കിൽ വിശു​ദ്ധാ​ഗ്നി ഇനിയും അനവധി​യും ഉജ്ജ്വല​വും ആയേനേ. സകല ബൈബി​ളു​ക​ളും കണ്ടെത്തു​ന്ന​തിൽ അധികാ​രി​കൾ കാണിച്ച അങ്ങേയ​റ​റത്തെ ജാഗ്രത നിമിത്തം അനേക​യി​ട​ങ്ങ​ളിൽ ബൈബിൾ കത്തിക്ക​ലു​കൾ നടത്തേ​ണ്ടി​വ​ന്നില്ല.” സാമാന്യ ജനത്തി​നു​വേ​ണ്ടി​യുള്ള ബൈബി​ളു​ക​ളെ​ല്ലാം​തന്നെ തൂത്തു​വാ​രി നശിപ്പി​ക്കാ​നുള്ള അത്തരം കടുത്ത നടപടി​ക​ളു​ണ്ടാ​യി​രു​ന്നി​ട്ടും അനേകം പ്രതികൾ നാശത്തെ അതിജീ​വി​ച്ചു. “നാടു​വി​ട്ടു​പോ​യവർ കൂടെ​ക്കൊ​ണ്ടു​പോ​യ​തി​നാ​ലോ ദുരന്ത​വും അപകട​വു​മുള്ള സമയങ്ങ​ളിൽ വിലപി​ടിച്ച രത്‌ന​ങ്ങ​ളും ലോഹ​ങ്ങ​ളും​പോ​ലെ പൂഴ്‌ത്തി​വെ​ച്ച​തി​നാ​ലോ ബൈബി​ളു​കൾ സംരക്ഷി​ക്ക​പ്പെട്ടു” എന്നു പ്രൈം കൂട്ടി​ച്ചേർത്തു.

ദൈവ​ത്തി​ന്റെ പ്രവാ​ച​ക​നായ യെശയ്യാവ്‌ എഴുതി: “സകലജ​ഡ​വും പുല്ലു​പോ​ലെ . . . പുല്ലു​ണ​ങ്ങു​ന്നു, പൂ വാടുന്നു; നമ്മുടെ ദൈവ​ത്തി​ന്റെ വചനമോ എന്നേക്കും നിലനി​ല്‌ക്കും.” (യെശയ്യാ​വു 40:6, 8) നൂററാ​ണ്ടു​ക​ളാ​യി ബൈബിൾ സ്‌നേ​ഹി​ക​ളും ധീരരായ പരിഭാ​ഷ​ക​രു​മായ അനേകർ പലതും അപകട​ത്തി​ലാ​ക്കി​ക്കൊണ്ട്‌ ദൈവ​വ​ച​ന​ത്തി​നു​വേണ്ടി വൻകഷ്ടങ്ങൾ സഹിച്ചു. എന്നിരു​ന്നാ​ലും, അതിന്റെ സംരക്ഷണം ഉറപ്പാ​ക്കി​യത്‌ ഒരിക്ക​ലും മാനു​ഷിക ശ്രമങ്ങൾ മാത്ര​മാ​യി​രി​ക്കില്ല. ഈ സംരക്ഷ​ണ​ത്തി​നു കാരണ​മെ​ന്ന​നി​ല​യിൽ നമുക്കു ബൈബി​ളി​ന്റെ ഗ്രന്ഥകർത്താ​വായ യഹോ​വക്കു നന്ദി പറയാം.

[7-ാം പേജിലെ ചിത്ര​ത്തി​നു കടപ്പാട്‌]

Courtesy of The Hispanic Society of America, New York