ലോക​ത്തി​ന്റെ പൂട്ടു​തു​റന്ന മനുഷ്യൻ

ഓസ്‌ട്രേലിയയിലെ ഉണരുക! ലേഖകൻ

മനുഷ്യർ ആദ്യമാ​യി ചന്ദ്രനി​ലേക്കു പോയ​പ്പോൾ തങ്ങൾ എവി​ടേ​ക്കാണ്‌ പോകു​ന്നത്‌, അവിടെ എങ്ങനെ എത്തി​പ്പെ​ടാൻ സാധി​ക്കും എന്നീ കാര്യ​ങ്ങ​ളെ​ല്ലാം ഗണിത​ശാ​സ്‌ത്ര​പ​ര​മായ കൃത്യ​ത​യോ​ടെ അവർ ആസൂ​ത്രണം ചെയ്‌തു. തന്നെയു​മല്ല, അവർക്ക്‌ ഭൂമി​യി​ലു​ള്ള​വ​രു​മാ​യി ആശയവി​നി​യമം നടത്താ​നും കഴിയു​മാ​യി​രു​ന്നു. എന്നാൽ ഫെർഡി​നാൻഡ്‌ മഗല്ലന്റെa അഞ്ച്‌ കൊച്ചു തടിക്ക​പ്പ​ലു​കൾ—അവയിൽ മിക്കതി​ന്റെ​യും നീളം ആധുനിക സെമി​ട്രെ​യി​ല​റി​ന്റേ​തി​നോ​ളം, അതായത്‌ 21 മീറ്റ​റോ​ളം, വരും—1519-ൽ സ്‌പെ​യിൻ വിട്ട​പ്പോൾ അവയി​ലു​ണ്ടാ​യി​രു​ന്നവർ അജ്ഞാത​മായ ഒരിട​ത്തേ​ക്കാ​യി​രു​ന്നു യാത്ര ചെയ്‌തത്‌. മാത്രമല്ല, അവർ തീർത്തും തനിച്ചാ​യി​രു​ന്നു.

നടന്നി​ട്ടു​ള്ള​തിൽവെച്ച്‌ ഏറ്റവും സാഹസി​ക​വും ധീരവു​മായ നാവി​ക​പ​ര്യ​ട​ന​ങ്ങ​ളിൽപ്പെ​ട്ട​വ​യാണ്‌ മഗല്ലന്റെ സമു​ദ്ര​യാ​ത്രകൾ. അവ പര്യ​വേക്ഷണ മഹായു​ഗ​ത്തി​ലെ—ധീരത​യു​ടെ​യും ഭയത്തി​ന്റെ​യും, ആവേശ​ത്തി​ന്റെ​യും ദുരന്ത​ത്തി​ന്റെ​യും, ദൈവ​ത്തി​ന്റെ​യും മാമോ​ന്റെ​യും ഒരു യുഗത്തി​ലെ—സ്‌മാ​ര​ക​മാ​യി നില​കൊ​ള്ളു​ന്നു. നമുക്ക്‌ 1480-ലേക്ക്‌, വടക്കേ പോർച്ചു​ഗ​ലിൽ ഫെർഡി​നാൻഡ്‌ മഗല്ലൻ ജനിച്ച കാല​ത്തേക്കു പോകാം. എന്നിട്ട്‌, ലോക​ത്തി​ന്റെ പൂട്ടു​തു​റന്ന ആ ശ്രദ്ധേയ പുരു​ഷ​നെ​യും അദ്ദേഹ​ത്തി​ന്റെ ചരി​ത്ര​പ്ര​ധാ​ന​മായ യാത്ര​ക​ളെ​യും കുറിച്ച്‌ പരിചി​ന്തി​ക്കാം.

കൊട്ടാ​ര​പ​രി​ചാ​രകൻ നിർഭ​യ​നായ നാവി​ക​നാ​കു​ന്നു

മഗല്ലൻ കുടും​ബ​ക്കാർ ഉന്നതകു​ല​ജാ​ത​രാണ്‌. അതു​കൊണ്ട്‌ അന്നത്തെ സമ്പ്രദാ​യ​മ​നു​സ​രിച്ച്‌, ബാലനാ​യി​രി​ക്കെ​തന്നെ രാജ​കൊ​ട്ടാ​ര​ത്തിൽ പരിചാ​ര​ക​നാ​യി സേവി​ക്കാൻ ഫെർഡി​നാൻഡ്‌ വിളി​ക്ക​പ്പെ​ടു​ന്നു. ഇവിടെ, വിദ്യാ​ഭ്യാ​സ​ത്തി​നു​പു​റമേ ക്രിസ്റ്റഫർ കൊളം​ബ​സി​നെ​പ്പോ​ലു​ള്ള​വ​രിൽനിന്ന്‌ അവരുടെ ധീരമായ പര്യ​വേ​ക്ഷ​ണ​ങ്ങ​ളെ​ക്കു​റി​ച്ചു നേരിട്ടു പഠിക്കാ​നും അദ്ദേഹ​ത്തി​നു സാധി​ക്കു​ന്നു. കൊളം​ബസ്‌, പ്രശസ്‌ത​മായ സുഗന്ധ​വ്യ​ഞ്‌ജ​ന​ങ്ങ​ളു​ടെ ദ്വീപി​ലേക്ക്‌ (ഇന്തോ​നേഷ്യ) ഒരു പടിഞ്ഞാ​റൻ സമു​ദ്ര​മാർഗം കണ്ടെത്തി​യ​ശേഷം അമേരി​ക്ക​ക​ളിൽനി​ന്നു മടങ്ങി​യെ​ത്തി​യ​തേ​യു​ള്ളു. കപ്പൽപ്പാ​യ്‌കൾ ഉലയുന്ന ശബ്ദം കേൾക്കാൻ കഴിയുന്ന, മനുഷ്യ​രെ​ത്താത്ത സമു​ദ്ര​ങ്ങ​ളി​ലെ ജലസ്‌പർശം മുഖ​ത്തേൽക്കാൻ കഴിയുന്ന, ഒരു ദിവസ​ത്തെ​ക്കു​റിച്ച്‌ കൊച്ചു ഫെർഡി​നാൻഡ്‌ താമസി​യാ​തെ സ്വപ്‌നം കാണാൻ തുടങ്ങു​ന്നു.

സങ്കടക​ര​മെ​ന്നു പറയട്ടെ, 1495-ൽ, അദ്ദേഹത്തെ പിന്തു​ണ​ച്ചി​രുന്ന ജോൺ രാജാവ്‌ വധിക്ക​പ്പെ​ടു​ന്നു. പകരം, മാനുവൽ പ്രഭു സിംഹാ​സ​ന​ത്തി​ലേ​റു​ന്നു. മാനു​വ​ലിന്‌ സമ്പത്തു​ണ്ടാ​ക്കു​ന്ന​തി​ലാണ്‌ താത്‌പ​ര്യം, പര്യ​വേ​ക്ഷ​ണ​ത്തി​ലല്ല. ചില കാരണ​ങ്ങൾക്കൊണ്ട്‌ മാനു​വ​ലിന്‌, 15 വയസ്സു​കാ​ര​നായ ഫെർഡി​നാൻഡി​നോ​ടു നീരസം തോന്നു​ക​യും കടലിൽ പോകാ​നുള്ള അവന്റെ അഭ്യർഥ​നകൾ അദ്ദേഹം അവഗണി​ക്കു​ക​യും ചെയ്യുന്നു. എന്നാൽ വാസ്‌കൊ ഡി ഗാമ സുഗന്ധ​വ്യ​ഞ്‌ജ​നങ്ങൾ നിറച്ച കപ്പലു​ക​ളു​മാ​യി ഇന്ത്യയിൽനി​ന്നു മടങ്ങി​വ​ന്ന​പ്പോൾ, ധാരാളം പണം സമ്പാദി​ക്കാ​മെന്ന്‌ മാനുവൽ മനസ്സി​ലാ​ക്കു​ന്നു. ഒടുവിൽ, 1505-ൽ അദ്ദേഹം മഗല്ലനു കടലി​ലേക്കു പോകാ​നുള്ള അനുമതി നൽകുന്നു. മഗല്ലൻ ഒരു പോർച്ചു​ഗീസ്‌ പടക്കപ്പൽ വ്യൂഹ​വു​മാ​യി കിഴക്കൻ ആഫ്രി​ക്ക​യെ​യും ഇന്ത്യ​യെ​യും ലക്ഷ്യമാ​ക്കി പുറ​പ്പെ​ടു​ന്നു, അറബി വ്യാപാ​രി​ക​ളു​ടെ കയ്യിൽനിന്ന്‌ സുഗന്ധ​വ്യ​ഞ്‌ജന വ്യാപാ​ര​ത്തി​ന്റെ നിയ​ന്ത്രണം കൈക്ക​ലാ​ക്കു​ക​യാ​യി​രു​ന്നു ലക്ഷ്യം. അതിനു​ശേഷം മറ്റൊരു സൈനിക പര്യട​ന​ത്തി​നാ​യി അദ്ദേഹം പിന്നെ​യും കിഴ​ക്കോട്ട്‌, മലാക്കാ​യി​ലേക്ക്‌, യാത്ര ചെയ്യുന്നു.

1513-ൽ മൊ​റോ​ക്കോ​യി​ലെ ഒരു ഏറ്റുമു​ട്ട​ലിൽ മഗല്ലന്റെ കാൽമു​ട്ടിന്‌ സാരമായ പരി​ക്കേൽക്കു​ന്നു. തത്‌ഫ​ല​മാ​യി, അദ്ദേഹ​ത്തിന്‌ ശേഷിച്ച ജീവി​ത​കാ​ലം ഒരു മുടന്ത​നാ​യി കഴി​യേ​ണ്ടി​വ​രു​ന്നു. അദ്ദേഹം മാനു​വ​ലി​നോട്‌ പെൻഷൻ കൂട്ടി​ത്ത​രാൻ ആവശ്യ​പ്പെ​ടു​ന്നു. എന്നാൽ മഗല്ലന്റെ പര്യ​വേ​ക്ഷ​ണ​ങ്ങ​ളും അദ്ദേഹം കാണിച്ച ത്യാഗ​മ​നോ​ഭാ​വ​വും ധീരത​യു​മൊ​ന്നും മാനു​വ​ലി​ന്റെ ശത്രു​ത​യ്‌ക്ക്‌ തെല്ലും അയവു വരുത്തു​ന്നില്ല. കഷ്ടിച്ച്‌ ജീവി​ക്കാ​നുള്ള പണം മാത്രം നൽകി അദ്ദേഹം മഗല്ലനെ ഒരു ദരിദ്ര കുലീ​ന​നാ​യി ജീവി​ക്കാൻ വിടുന്നു.

മഗല്ലന്റെ ജീവി​ത​ത്തി​ലെ ഏറ്റവും ദുരിതം നിറഞ്ഞ ഈ കാലത്താണ്‌ ഒരു പഴയ സുഹൃത്ത്‌, പ്രശസ്‌ത സമു​ദ്ര​പ​ര്യ​വേ​ക്ഷ​ക​നായ ജോയോ ദെ ലിസ്‌ബോവ, അദ്ദേഹത്തെ സന്ദർശി​ക്കു​ന്നത്‌. എൽ പേസോ​യി​ലൂ​ടെ—തെക്കേ അമേരി​ക്ക​യു​ടെ കുറുകെ കിടക്കു​ന്ന​താ​യി പറയ​പ്പെ​ടുന്ന ഒരു കടലി​ടു​ക്കി​ലൂ​ടെ—തെക്കു​പ​ടി​ഞ്ഞാ​റൻ ഭാഗ​ത്തേക്കു യാത്ര ചെയ്‌ത്‌, ബൽബോണ ആയിട​യ്‌ക്ക്‌ പനാമാ കരയി​ടുക്ക്‌ മുറി​ച്ചു​ക​ട​ന്ന​പ്പോൾ കണ്ടെത്തിയ സമു​ദ്ര​വും പിന്നിട്ട്‌, സുഗന്ധ​വ്യ​ഞ്‌ജ​ന​ങ്ങ​ളു​ടെ ദ്വീപിൽ എത്തി​ച്ചേ​രാ​നുള്ള വഴിക​ളെ​ക്കു​റിച്ച്‌ ഇരുവ​രും ചർച്ച​ചെ​യ്യു​ന്നു. ഈ സമു​ദ്ര​ത്തി​ന്റെ അങ്ങേയ​റ്റ​ത്താണ്‌ സുഗന്ധ​വ്യ​ഞ്‌ജ​ന​ങ്ങ​ളു​ടെ ദ്വീ​പെന്ന്‌ അവർ വിശ്വ​സി​ക്കു​ന്നു.

മഗല്ലൻ ഇപ്പോൾ കൊളം​ബസ്‌ ചെയ്യാൻ പരാജ​യ​പ്പെട്ട ഒരു കാര്യം ചെയ്യാൻ അതിയാ​യി വാഞ്‌ഛി​ക്കു​ന്നു. പൗരസ്‌ത്യ​ദേ​ശ​ത്തേ​ക്കുള്ള ഒരു പടിഞ്ഞാ​റൻ മാർഗം കണ്ടെത്തുക എന്നതാണ്‌ അദ്ദേഹ​ത്തി​ന്റെ ലക്ഷ്യം. കിഴക്കൻ മാർഗ​ത്തെ​ക്കാൾ ദൂരം കുറവാണ്‌ അതി​നെന്ന്‌ അദ്ദേഹം വിശ്വ​സി​ക്കു​ന്നു. എന്നാൽ അദ്ദേഹ​ത്തിന്‌ സാമ്പത്തിക സഹായം ആവശ്യ​മാണ്‌. മാനു​വ​ലി​ന്റെ ക്രോ​ധ​ത്തി​ന്റെ ചൂടി​നാൽ അപ്പോ​ഴും വലഞ്ഞി​രു​ന്ന​തു​കൊണ്ട്‌ അൽപ്പകാ​ലം​മുമ്പ്‌ കൊളം​ബസ്‌ ചെയ്‌ത അതേ കാര്യം​തന്നെ അദ്ദേഹ​വും ചെയ്യുന്നു, സ്‌പെ​യി​നി​ലെ രാജാ​വിൽനിന്ന്‌ പിന്തുണ തേടുന്നു.

സ്‌പെ​യി​നി​ലെ രാജാവ്‌ ചെവി​കൊ​ടു​ക്കു​മോ?

ഭൂപടങ്ങൾ തുറന്നു​വെച്ച്‌ സ്‌പെ​യി​നി​ലെ യുവരാ​ജാ​വായ ചാൾസ്‌ ഒന്നാമന്റെ മുമ്പാകെ മഗല്ലൻ തന്റെ വാദമു​ഖങ്ങൾ നിരത്തു​ന്നു. സുഗന്ധ​വ്യ​ഞ്‌ജ​ന​ങ്ങ​ളു​ടെ നാട്ടി​ലേ​ക്കുള്ള മഗല്ലന്റെ പടിഞ്ഞാ​റൻ കടൽമാർഗ​ത്തോട്‌ അദ്ദേഹ​ത്തി​നു താത്‌പ​ര്യ​മുണ്ട്‌. കാരണം പോർച്ചു​ഗീസ്‌ കപ്പൽപ്പാ​ത​ക​ളി​ലേ​ക്കുള്ള കടന്നു​ക​യറ്റം ഒഴിവാ​ക്കാൻ ഇതു സഹായി​ക്കും. സുഗന്ധ​വ്യ​ഞ്‌ജ​ന​ങ്ങ​ളു​ടെ ദ്വീപ്‌ വാസ്‌ത​വ​ത്തിൽ സ്‌പാ​നിഷ്‌ പ്രദേ​ശ​ത്താ​യി​രി​ക്കാ​മെ​ന്നും അല്ലാതെ പോർച്ചു​ഗീസ്‌ പ്രദേ​ശ​ത്താ​യി​രി​ക്കി​ല്ലെ​ന്നും മഗല്ലൻ പറയുന്നു!—“ടോർഡെ​സി​ല്ലാസ്‌ ഉടമ്പടി” എന്ന ചതുരം കാണുക.

ചാൾസി​നു കാര്യങ്ങൾ ബോധ്യ​മാ​കു​ന്നു. അറ്റകു​റ്റ​പ്പ​ണി​കൾ തീർത്ത്‌ പര്യട​ന​ത്തിന്‌ ഉപയോ​ഗി​ക്കാൻ അഞ്ച്‌ പഴയ കപ്പലുകൾ അദ്ദേഹം മഗല്ലനു നൽകു​ക​യും മഗല്ലനെ കപ്പൽവ്യൂ​ഹ​ത്തി​ന്റെ മേധാ​വി​യാ​ക്കു​ക​യും ചെയ്യുന്നു. കൂടാതെ, സ്വദേ​ശ​ത്തേക്കു കൊണ്ടു​വ​രുന്ന സുഗന്ധ​വ്യ​ഞ്‌ജ​ന​ങ്ങ​ളു​ടെ ലാഭത്തി​ന്റെ ഒരു വിഹി​ത​വും വാഗ്‌ദാ​നം ചെയ്യുന്നു. മഗല്ലൻ ഉടനടി തന്റെ ജോലി​യാ​രം​ഭി​ക്കു​ന്നു. എന്നാൽ മാനുവൽ രാജാവ്‌ തന്ത്രപൂർവം ഈ പദ്ധതിയെ അട്ടിമ​റി​ക്കാൻ ശ്രമി​ക്കു​ന്ന​തു​കൊണ്ട്‌ ഒരു വർഷത്തി​ലേറെ സമയം കഴിഞ്ഞാണ്‌ കപ്പൽവ്യൂ​ഹ​ത്തിന്‌ ചരി​ത്ര​പ്ര​ധാ​ന​മായ ആ യാത്ര ആരംഭി​ക്കാൻ സാധി​ക്കു​ന്നത്‌.

“ചരി​ത്ര​ത്തി​ലെ ഏറ്റവും വലിയ സമുദ്ര പര്യ​വേ​ക്ഷണം”

1519 സെപ്‌റ്റം​ബർ 20-ന്‌ സാൻ അന്റോ​ണി​യോ, കോൺസെ​പ്‌സ്യോൻ, വിക്‌ടോ​റിയ, സാൻറ്യാ​ഗോ എന്നിവ—വലിപ്പ​മ​നു​സ​രിച്ച്‌ അവരോ​ഹ​ണ​ക്ര​മ​ത്തിൽ—മഗല്ലന്റെ, രണ്ടാമത്തെ വലിയ കപ്പലായ ട്രിനി​ഡാഡ്‌ എന്ന നായക​ക്ക​പ്പ​ലി​നു പിന്നാലെ തെക്കേ അമേരി​ക്കയെ ലക്ഷ്യമാ​ക്കി യാത്ര​യാ​കു​ന്നു. ഡിസംബർ 13-ന്‌ അവർ ബ്രസീ​ലിൽ എത്തി​ച്ചേ​രു​ന്നു. അറ്റകു​റ്റ​പ്പ​ണി​കൾ നടത്താ​നും ആഹാര​സാ​ധ​നങ്ങൾ ശേഖരി​ക്കാ​നു​മാ​യി, തലയെ​ടു​പ്പോ​ടെ നിൽക്കുന്ന പൗൻ ഡി അസൂകർ അല്ലെങ്കിൽ ഷുഗർലോഫ്‌ പർവത​ത്തിന്‌ അഭിമു​ഖ​മാ​യുള്ള മനോ​ഹ​ര​മായ റിയോ ദെ ജനിറോ ഉൾക്കട​ലി​ലേക്ക്‌ അവർ പ്രവേ​ശി​ക്കു​ന്നു. പിന്നെ അവർ തെക്കോട്ട്‌, ഇപ്പോൾ അർജൻറീന എന്നു വിളി​ക്കു​ന്നി​ട​ത്തേക്ക്‌, യാത്ര തുടരു​ന്നു. യാത്ര​യി​ലു​ട​നീ​ളം അവരുടെ കണ്ണുകൾ എൽ പാസോ​യ്‌ക്കു​വേണ്ടി, മറ്റൊരു സമു​ദ്ര​ത്തി​ലേ​ക്കുള്ള ദുർഗ്ര​ഹ​മായ മാർഗ​ത്തി​നു​വേണ്ടി, തിരയു​ക​യാണ്‌. ദിവസം ചെല്ലു​ന്തോ​റും തണുപ്പ്‌ കൂടി​ക്കൂ​ടി വരുന്നു, ഹിമാ​നി​കൾ പ്രത്യ​ക്ഷ​പ്പെ​ടു​ന്നു. ഒടുവിൽ 1520 മാർച്ച്‌ 31-ന്‌, സാൻ ഹൂല്യാ​നി​ലെ തണുപ്പുള്ള തുറമു​ഖത്ത്‌ ശിശിരം കഴിച്ചു​കൂ​ട്ടാൻ മഗല്ലൻ തീരു​മാ​നി​ക്കു​ന്നു.

കൊളം​ബസ്‌ ആദ്യമാ​യി അറ്റ്‌ലാൻറിക്‌ മുറി​ച്ചു​കടന്ന സമയത്തി​ന്റെ ആറിരട്ടി സമു​ദ്ര​യാ​ത്ര​യ്‌ക്കാ​യി ഇപ്പോൾത്തന്നെ എടുത്തു​ക​ഴി​ഞ്ഞി​രി​ക്കു​ന്നു—എന്നിട്ടും കടലി​ടുക്ക്‌ ഇപ്പോ​ഴും കണ്ടെത്തി​യി​ട്ടില്ല! ആത്മ​ധൈ​ര്യം സാൻ ഹൂല്യാ​നി​ലെ കാലാ​വ​സ്ഥ​പോ​ലെ തണുത്തു​റ​യു​ന്നു. ചില കപ്പിത്താൻമാ​രും ഉദ്യോ​ഗ​സ്ഥ​രും ഉൾപ്പെടെ ഏതാനും പേർക്ക്‌ വീട്ടി​ലേക്കു പോകാ​തെ നിവൃ​ത്തി​യി​ല്ലെ​ന്നാ​യി. അപ്പോൾ ലഹള പൊട്ടി​പ്പു​റ​പ്പെ​ട്ട​തിൽ അത്ഭുത​പ്പെ​ടാ​നി​ല്ല​ല്ലോ. എങ്കിലും മഗല്ലൻ ഒട്ടും വൈകാ​തെ​തന്നെ നിർണാ​യ​ക​ന​ട​പടി കൈ​ക്കൊ​ണ്ട​തി​നാൽ അതു കെട്ടട​ങ്ങു​ന്നു, രണ്ട്‌ ലഹളത്ത​ല​വ​ന്മാർ കൊല്ല​പ്പെ​ടു​ന്നു.

തുറമു​ഖത്ത്‌ വിദേശ കപ്പലുകൾ കിടക്കുന്ന കാഴ്‌ച ബലിഷ്‌ഠ​രും ദൃഢഗാ​ത്ര​രു​മായ തദ്ദേശ​വാ​സി​ക​ളിൽ സ്വാഭാ​വി​ക​മാ​യും ജിജ്ഞാസ ഉളവാ​ക്കു​ന്നു. ഈ ഭീമാ​കാ​ര​ന്മാർക്ക​രി​കിൽ തങ്ങൾ വെറും കുള്ളന്മാ​രാ​ണെന്നു തോന്നിയ സന്ദർശകർ ആ ദേശത്തെ പേറ്റ​ഗോ​ണിയ—“വലിയ പാദങ്ങൾ” എന്നർഥ​മുള്ള ഒരു സ്‌പാ​നിഷ്‌ വാക്കിൽനി​ന്നു വന്നത്‌—എന്നു വിളി​ക്കു​ന്നു. ഇന്നോളം ആ സ്ഥലത്തിന്റെ പേര്‌ അങ്ങനെ​ത​ന്നെ​യാണ്‌. കൂടാതെ, ‘പശുക്കി​ടാ​ങ്ങ​ളു​ടെ വലുപ്പ​മുള്ള കടൽ ചെന്നാ​യ്‌ക്ക​ളെ​യും വെള്ളത്തി​ന​ടി​യി​ലൂ​ടെ നീന്തുന്ന, കാക്കക​ളു​ടേ​തി​നോ​ടു സമാന​മായ കൊക്കു​ക​ളുള്ള, മത്സ്യത്തെ പിടി​ച്ചു​തി​ന്നുന്ന, കറുപ്പും വെളു​പ്പും നിറമുള്ള വാത്തക​ളെ​യും അവർ കാണുന്നു.’ അതേ, നിങ്ങളു​ടെ ഊഹം ശരിയാണ്‌—അവ നീർനാ​യ്‌ക്ക​ളും പെൻഗ്വി​നു​ക​ളും​ത​ന്നെ​യാണ്‌!

ധ്രുവ​പ്ര​ദേ​ശ​ങ്ങ​ളിൽ ഓർക്കാ​പ്പു​റത്ത്‌ ഉഗ്രമായ കൊടു​ങ്കാറ്റ്‌ വീശി​യ​ടി​ക്കാ​നുള്ള സാധ്യ​ത​യുണ്ട്‌. ശൈത്യ​കാ​ലം കഴിയു​ന്ന​തി​നു​മു​മ്പു​തന്നെ കപ്പൽവ്യൂ​ഹം ആദ്യത്തെ അപകടം നേരി​ടു​ന്നു—കൊച്ചു സാൻറ്യാ​ഗോ തകർന്നു​പോ​കു​ന്നു. എങ്കിലും അനു​ഗ്ര​ഹ​ക​ര​മെന്നു പറയട്ടെ, കപ്പൽച്ചേ​ത​ത്തി​ല​ക​പ്പെ​ട്ട​വരെ രക്ഷിക്കാൻ സാധി​ക്കു​ന്നു. അതിനു​ശേഷം, അവശേ​ഷി​ക്കുന്ന നാലു കപ്പലു​ക​ളും, നിലയ്‌ക്കാത്ത ശൈത്യ​ക്കൊ​ടു​ങ്കാ​റ്റിൽപ്പെട്ട്‌ ചിറ​കൊ​ടിഞ്ഞ കൊച്ചു ശലഭങ്ങ​ളെ​പ്പോ​ലെ തെക്കോട്ട്‌, തണുത്തു​റഞ്ഞ വെള്ളത്തി​ലേക്ക്‌, ആടിയു​ലഞ്ഞ്‌ യാത്ര തുടരു​ന്നു—ഒക്‌ടോ​ബർ 21 വരെ. തിരമാ​ല​കൾക്കും ആലിപ്പഴ വർഷത്തി​നു​മി​ട​യി​ലൂ​ടെ എല്ലാ കണ്ണുക​ളും പടിഞ്ഞാ​റോ​ട്ടുള്ള ഒരു പ്രവേ​ശ​ന​ദ്വാ​ര​ത്തിൽ ഉടക്കി നിൽക്കു​ന്നു. അത്‌ എൽ പാസോ ആണോ? അതേ! അങ്ങനെ ഒടുവിൽ അവർ തങ്ങളുടെ കപ്പലുകൾ തിരിച്ച്‌ കടലി​ടു​ക്കി​ലേക്ക്‌ പ്രവേ​ശി​ക്കു​ന്നു. പിന്നീ​ടിത്‌ മഗല്ലൻ കടലി​ടുക്ക്‌ എന്നാണ്‌ അറിയ​പ്പെ​ടു​ന്നത്‌! എങ്കിലും ഈ വിജയ മുഹൂർത്ത​ത്തി​നും മങ്ങലേൽക്കു​ന്നു. ദുർഘ​ട​മായ ആ കടലി​ടു​ക്കിൽവെച്ച്‌ സാൻ അൻറോ​ണി​യോ യാത്ര ഉപേക്ഷിച്ച്‌ സ്‌പെ​യി​നി​ലേക്കു തിരി​ച്ചു​പോ​കു​ന്നു.

അവശേ​ഷി​ക്കു​ന്ന മൂന്നു കപ്പലുകൾ ഇരുവ​ശ​ത്തും തരിശായ സമു​ദ്ര​വ​ങ്ക​ങ്ങ​ളും മഞ്ഞണിഞ്ഞ കൊടു​മു​ടി​ക​ളു​മുള്ള വളഞ്ഞു​പു​ളഞ്ഞു കിടക്കുന്ന ആ കടലി​ടു​ക്കി​ലൂ​ടെ, നിശ്ചയ​ദാർഢ്യ​ത്തോ​ടെ യാത്ര തുടരു​ന്നു. തെക്കു ഭാഗത്ത്‌ പലയി​ട​ങ്ങ​ളി​ലാ​യി തീ കത്തുന്നത്‌ അവരുടെ ശ്രദ്ധയിൽപ്പെ​ടു​ന്നു. അത്‌ ഇന്ത്യൻ പാളയ​ങ്ങ​ളിൽനി​ന്നാ​യി​രി​ക്കണം. അതു​കൊണ്ട്‌ അവർ ആ ദേശത്തെ ടീയെര ദെൽ ഫ്യൂ​വെ​ഗോ, അതായത്‌ “അഗ്നി​ദേശം,” എന്നു വിളി​ക്കു​ന്നു.

ശാന്തസ​മു​ദ്ര​ത്തി​ലെ അഗ്നിപ​രീ​ക്ഷ

പ്രയാസം നിറഞ്ഞ അഞ്ചാഴ്‌ച​യ്‌ക്കു​ശേഷം അവർ വളരെ ശാന്തമായ ഒരു സമു​ദ്ര​ത്തി​ലേക്കു യാത്ര​യാ​കു​ന്നു. അതു​കൊണ്ട്‌ മഗല്ലൻ അതിന്‌ ശാന്തസ​മു​ദ്രം എന്നു പേരി​ടു​ന്നു. ആളുകൾ പ്രാർഥി​ക്കു​ക​യും കീർത്ത​നങ്ങൾ ആലപി​ക്കു​ക​യും തങ്ങളുടെ പീരങ്കി​ക​ളിൽനി​ന്നു വെടി​യു​തിർത്ത്‌ വിജയം കൊണ്ടാ​ടു​ക​യും ചെയ്യുന്നു. എങ്കിലും അവരുടെ സന്തോഷം അധിക​സ​മയം നീണ്ടു​നിൽക്കു​ന്നില്ല. അവർ അതുവരെ അനുഭ​വി​ച്ച​തി​നെ​ക്കാൾ വലിയ കഷ്ടം സംഭവി​ക്കാൻ പോകു​ക​യാണ്‌. കാരണം അത്‌ അവർ വിചാ​രി​ച്ച​തു​പോ​ലെ ചെറി​യൊ​രു കടലല്ല—അതങ്ങനെ നീണ്ടു​പ​രന്നു കിടക്കു​ക​യാണ്‌. ആളുകൾക്ക്‌ വിശപ്പ്‌ സഹിക്കാൻ വയ്യെന്നാ​കു​ന്നു, അവർ കൂടുതൽ ക്ഷീണി​ത​രാ​കു​ന്നു, രോഗങ്ങൾ കലശലാ​കു​ന്നു.

അക്കൂട്ട​ത്തി​ലു​ള്ള, അൻറോ​ണി​യോ പിഗാ​ഫേറ്റാ എന്ന ധീരനായ ഒരു ഇറ്റലി​ക്കാ​രൻ അനുദിന സംഭവങ്ങൾ എഴുതി സൂക്ഷി​ക്കു​ന്നു. അദ്ദേഹം എഴുതു​ന്നു: “1520 നവംബർ 28, ബുധനാഴ്‌ച. ഞങ്ങൾ . . . ശാന്തസ​മു​ദ്ര​ത്തി​ലേക്കു പ്രവേ​ശി​ച്ചു. ആഹാര​മി​ല്ലാ​തെ മൂന്നു മാസവും ഇരുപതു ദിവസ​വും ഞങ്ങൾ അവിടെ കഴിച്ചു​കൂ​ട്ടി . . . പൊടിഞ്ഞ, പുഴു​വ​രി​ക്കുന്ന, പഴകിയ ബിസ്‌ക്കറ്റ്‌ മാത്ര​മാ​യി​രു​ന്നു ഞങ്ങളുടെ ഭക്ഷണം. മാത്രമല്ല, എലികൾ അതിന്മേൽ കാഷ്‌ഠി​ച്ചി​രു​ന്ന​തു​കൊണ്ട്‌ വല്ലാത്ത നാറ്റവും . . . മഞ്ഞ നിറത്തി​ലുള്ള ദുർഗന്ധം വമിക്കുന്ന വെള്ളമാണ്‌ ഞങ്ങൾ കുടി​ച്ചത്‌. കാളയു​ടെ തുകൽ . . . അറുക്ക​പ്പൊ​ടി, അര ക്രൗൺനാ​ണയം മാത്രം വിലവ​രുന്ന എലികൾ എന്നിവ​യും ഞങ്ങളുടെ ഭക്ഷണത്തിൽ ഉൾപ്പെ​ട്ടി​രു​ന്നു. തന്നെയു​മല്ല, ആവശ്യ​ത്തിന്‌ എലികളെ കിട്ടാ​നു​മു​ണ്ടാ​യി​രു​ന്നില്ല.” അങ്ങനെ, കപ്പൽപ്പാ​യ്‌ക​ളിൽ വീശി​യ​ടി​ക്കുന്ന ശുദ്ധമായ വാണി​ജ്യ​ക്കാ​റ്റി​ന്റെ ഗതിക്ക​നു​സ​രിച്ച്‌ കപ്പൽ നീങ്ങവേ, കപ്പലി​ന​ടി​യി​ലൂ​ടെ തെളി​നീർ ഒഴുകവേ, സ്‌കർവി എന്ന രോഗം പിടി​പെട്ട്‌ അഴുകിയ മോണ​യു​മാ​യി കപ്പലി​ന​കത്ത്‌ ആളുകൾ കിടക്കു​ന്നു. 1521 മാർച്ച്‌ 6-ന്‌ മറിയാന ദ്വീപു​ക​ളിൽ എത്തു​മ്പോ​ഴേ​ക്കും പത്തൊ​മ്പ​തു​പേർ മരിച്ചി​രി​ക്കു​ന്നു.

എന്നാൽ ഇപ്പോൾ ദ്വീപ​നി​വാ​സി​ക​ളു​മാ​യുള്ള ശത്രുത നിമിത്തം യാത്ര തിരി​ക്കു​ന്ന​തി​നു​മു​മ്പാ​യി അവർക്ക്‌ പഴകാത്ത അൽപ്പം ഭക്ഷണം മാത്രമേ ലഭിക്കു​ന്നു​ള്ളൂ. ഒടുവിൽ മാർച്ച്‌ 16-ന്‌ ഫിലി​പ്പീൻസ്‌ അവരുടെ ദൃഷ്ടി​യിൽ പെടുന്നു. എല്ലാവ​രും നന്നായി ഭക്ഷണം കഴിക്കു​ന്നു, വിശ്രമം എടുക്കു​ന്നു, ആരോ​ഗ്യ​വും ശക്തിയും വീണ്ടെ​ടു​ക്കു​ന്നു.

ദുരന്തം—ഒരു സ്വപ്‌നം പൊലി​യു​ന്നു

ഉറച്ച മതവി​ശ്വാ​സി​യായ മഗല്ലൻ അവിടു​ത്തെ പല നിവാ​സി​ക​ളെ​യും അവരുടെ ഭരണാ​ധി​പ​ന്മാ​രെ​യും കത്തോ​ലി​ക്കാ സഭയി​ലേക്കു മതം മാറ്റുന്നു. എന്നാൽ അദ്ദേഹ​ത്തി​ന്റെ തീക്ഷ്‌ണ​ത​തന്നെ അദ്ദേഹ​ത്തി​നു വിനയാ​യി​ത്തീ​രു​ന്നു. അദ്ദേഹം ഒരു വർഗാന്തര ലഹളയിൽ ഉൾപ്പെ​ടു​ന്നു. വെറും 60 പുരു​ഷ​ന്മാ​രോ​ടൊ​പ്പം അവി​ടെ​യുള്ള ഏതാണ്ട്‌ 1,500 നിവാ​സി​കളെ അദ്ദേഹം ആക്രമി​ക്കു​ന്നു, ചൂണ്ടു​വി​ല്ലു​ക​ളും തോക്കു​ക​ളും ദൈവ​വും തനിക്ക്‌ വിജയം നേടി​ത്ത​രു​മെന്ന വിശ്വാ​സ​ത്തോ​ടെ. പകരം അദ്ദേഹ​വും അദ്ദേഹ​ത്തി​ന്റെ ഒട്ടേറെ കൂട്ടാ​ളി​ക​ളും കൊല്ല​പ്പെ​ടു​ന്നു. മഗല്ലന്‌ 41 വയസ്സു കാണും. വിശ്വ​സ്‌ത​നായ പിഗാ​ഫേറ്റ വിലപി​ക്കു​ന്നു: ‘ഞങ്ങളുടെ മാതൃ​കാ​പു​രു​ഷ​നും ഞങ്ങൾക്ക്‌ വെളിച്ചം കാട്ടി​ത്ത​ന്ന​വ​നും സാന്ത്വനം പകർന്നു​ത​ന്ന​വ​നു​മായ വിശ്വസ്‌ത വഴികാ​ട്ടി​യെ​യാണ്‌ അവർ കൊന്നത്‌.’ ഏതാനും ദിവസ​ങ്ങൾക്കു​ശേഷം, തങ്ങളുടെ കപ്പലിൽ ഇരുന്നു​കൊണ്ട്‌ സുരക്ഷി​ത​മാ​യി ഇതെല്ലാം നോക്കി​ക്കാ​ണു​ക​മാ​ത്രം ചെയ്‌ത ഏതാണ്ട്‌ 27 ഉദ്യോ​ഗ​സ്ഥ​ന്മാർ മുമ്പ്‌ സൗഹൃദം കാണി​ച്ചി​രുന്ന ഗോ​ത്ര​ത്ത​ല​വ​ന്മാ​രാൽ കൊല്ല​പ്പെ​ടു​ന്നു.

പരിചി​ത​മാ​യ ചുറ്റു​പാ​ടു​ക​ളിൽവെ​ച്ചാണ്‌ മഗല്ലൻ മരിക്കു​ന്നത്‌. അൽപ്പം തെക്കോ​ട്ടു​മാ​റി സുഗന്ധ​വ്യ​ഞ്‌ജ​ന​ങ്ങ​ളു​ടെ ദ്വീപും, പടിഞ്ഞാ​റാ​യി മലാക്ക​യും—1511-ൽ അവി​ടെ​വെ​ച്ചാണ്‌ അദ്ദേഹം പടയോ​ട്ടം നടത്തി​യത്‌—സ്ഥിതി ചെയ്യുന്നു. ചില ചരി​ത്ര​കാ​രൻമാർ കരുതു​ന്ന​തു​പോ​ലെ, മലാക്ക​യി​ലെ പോരാ​ട്ട​ത്തി​നു​ശേഷം അദ്ദേഹം ഫിലി​പ്പീൻസി​ലേക്കു കപ്പലിൽ യാത്ര ചെയ്‌തി​ട്ടു​ണ്ടെ​ങ്കിൽ, ഒറ്റ യാത്ര​കൊ​ണ്ട​ല്ലെ​ങ്കി​ലും അദ്ദേഹം ഭൂഗോ​ളം മുഴുവൻ ചുറ്റി​യി​ട്ടു​ണ്ടെ​ന്നർഥം. കിഴക്കു​നി​ന്നും പടിഞ്ഞാ​റു​നി​ന്നും അദ്ദേഹം ഫിലി​പ്പീൻസിൽ എത്തിയി​രു​ന്നു.

മടക്കയാ​ത്ര​യിൽ ദുരന്തം ആഞ്ഞടി​ക്കു​ന്നു

ചുരുക്കം പേരേ അവശേ​ഷി​ക്കു​ന്നു​ള്ളൂ എന്നതി​നാൽ മൂന്നു കപ്പലുകൾ ഓടി​ക്കു​ന്നത്‌ അസാധ്യ​മാ​യി​ത്തീ​രു​ന്നു. അതു​കൊണ്ട്‌ അവർ കോൺസെ​പ്‌സ്യോൻ മുക്കി​ക്ക​ള​ഞ്ഞിട്ട്‌ രണ്ടു കപ്പലു​ക​ളി​ലാ​യി ലക്ഷ്യസ്ഥാ​ന​ത്തേക്ക്‌, സുഗന്ധ​വ്യ​ഞ്‌ജ​ന​ങ്ങ​ളു​ടെ ദ്വീപി​ലേക്ക്‌, യാത്ര ചെയ്യുന്നു. എന്നിട്ട്‌, സുഗന്ധ​വ്യ​ഞ്‌ജ​നങ്ങൾ നിറച്ച​ശേഷം രണ്ടു കപ്പലു​ക​ളും വേർപി​രി​യു​ന്നു. ട്രിനി​ഡാ​ഡി​ലു​ള്ള​വരെ പോർച്ചു​ഗീ​സു​കാർ പിടി​കൂ​ടി തടവി​ലാ​ക്കു​ന്നു.

എന്നാൽ മുൻനാ​വിക മേധാ​വി​യായ ച്വാൻ സെബാ​സ്റ്റ്യൻ ദെ എൽക്കാ​നോ​വി​ന്റെ നേതൃ​ത്വ​ത്തിൽ വിക്ടോ​റിയ രക്ഷപ്പെ​ട്ടു​പോ​കു​ന്നു. ഒരു തുറമു​ഖ​മൊ​ഴി​കെ മറ്റെല്ലാ​റ്റി​നെ​യും ഒഴിവാ​ക്കി, ഗുഡ്‌ഹോപ്പ്‌ മുനമ്പി​നെ ചുറ്റി​യുള്ള അപകടം നിറഞ്ഞ പോർച്ചു​ഗീസ്‌ കപ്പൽമാർഗ​ത്തി​ലൂ​ടെ അവർ യാത്ര ചെയ്യുന്നു. എങ്കിലും അവശ്യ​സാ​ധ​നങ്ങൾ ശേഖരി​ക്കാ​തെ യാത്ര തുടരു​ന്നത്‌ വലിയ വില ഒടു​ക്കേ​ണ്ടി​വ​രുന്ന ഒരു സംഗതി​യാണ്‌. ഒടുവിൽ 1522 സെപ്‌റ്റം​ബർ 6-ന്‌ സ്‌പെ​യി​നിൽ എത്തിയ​പ്പോൾ—അവർ യാത്ര പുറ​പ്പെ​ട്ടിട്ട്‌ മൂന്നു വർഷം പിന്നി​ട്ടി​രി​ക്കു​ന്നു—ജീവ​നോ​ടെ​യു​ള്ളത്‌ രോഗി​ക​ളും ദുർബ​ല​രു​മായ വെറും 18 പേർ. എങ്കിലും ലോക​ത്തി​ലെ ആദ്യത്തെ കപ്പൽഭൂ​പ്ര​ദ​ക്ഷി​ണ​ക്കാർ അവരാണ്‌, ദെ എൽക്കാ​നോ വീരനാ​യ​ക​നും. അവിശ്വ​സ​നീ​യ​മെന്നു പറയട്ടെ, പര്യട​ന​ത്തി​ന്റെ മുഴുവൻ ചെലവും വഹിക്കാൻ വിക്ടോ​റി​യ​യിൽ ഉള്ള 26 ടൺ സുഗന്ധ​വ്യ​ഞ്‌ജ​നങ്ങൾ ധാരാളം മതി!

മഗല്ലന്റെ പേര്‌ നിലനിൽക്കു​ന്നു

ചരി​ത്ര​ത്തിൽ മഗല്ലനു ലഭിക്കേണ്ട സ്ഥാനം വർഷങ്ങ​ളോ​ളം നിഷേ​ധി​ക്ക​പ്പെ​ടു​ന്നു. മത്സരി​ക​ളായ കപ്പിത്താൻമാ​രു​ടെ റിപ്പോർട്ടു​ക​ളാൽ വഴി​തെ​റ്റി​ക്ക​പ്പെട്ട സ്‌പെ​യിൻകാർ പരുക്കൻ സ്വഭാ​വ​ക്കാ​ര​നും പ്രാപ്‌തി​യി​ല്ലാ​ത്ത​വ​നു​മെന്നു മുദ്ര​കു​ത്തി അദ്ദേഹ​ത്തി​ന്റെ സത്‌കീർത്തി​ക്കു മങ്ങലേൽപ്പി​ക്കു​ന്നു. പോർച്ചു​ഗീ​സു​കാ​രാ​കട്ടെ അദ്ദേഹത്തെ വഞ്ചകനാ​യി മുദ്ര​കു​ത്തു​ന്നു. സങ്കടക​ര​മെന്നു പറയട്ടെ, അദ്ദേഹ​ത്തി​ന്റെ കപ്പലിന്റെ വൃത്താ​ന്ത​രേഖ അദ്ദേഹ​ത്തി​ന്റെ മരണ​ത്തോ​ടെ അപ്രത്യ​ക്ഷ​മാ​കു​ന്നു. അതിൽ ആരെക്കു​റി​ച്ചെ​ല്ലാം വെട്ടി​ത്തു​റന്നു പരാമർശി​ച്ചി​രു​ന്നു​വോ അവരുടെ കയ്യാൽ അതു നശിപ്പി​ക്ക​പ്പെ​ട്ടി​രി​ക്കാ​നാ​ണു സാധ്യത. എന്നാൽ ലോകം ചുറ്റിയ ആ 18 പേർക്കി​ട​യി​ലെ അജയ്യനായ പിഗാ​ഫേ​റ്റ​യു​ടെ​യും പര്യട​ന​ക്കാ​രി​ലെ മറ്റ്‌ 5-ഓളം അംഗങ്ങ​ളു​ടെ​യും സഹായ​ത്താൽ ദുരന്ത​പൂർണ​മെ​ങ്കി​ലും അസാധാ​ര​ണ​മായ ഈ സമു​ദ്ര​യാ​ത്ര​യെ​ക്കു​റി​ച്ചുള്ള ഏതാനും രേഖകൾ നമുക്കുണ്ട്‌.

കാല​ക്ര​മേണ ചരിത്രം അതിന്റെ അഭി​പ്രാ​യം മാറ്റി​യെ​ഴു​തി. ഇന്ന്‌ മഗല്ലന്റെ പേരിന്‌ അതർഹി​ക്കുന്ന ബഹുമതി ലഭിച്ചി​രി​ക്കു​ന്നു. ഒരു കടലി​ടു​ക്കി​നും മഗല്ലനിക്ക്‌ പടലങ്ങൾക്കും—അദ്ദേഹ​ത്തി​ന്റെ കൂടെ​യു​ണ്ടാ​യി​രു​ന്നവർ ആദ്യമാ​യി വിവരിച്ച, അവ്യക്ത​മായ രണ്ട്‌ ദക്ഷിണ ഗാലക്‌സി​കൾക്കും—ഒരു ബഹിരാ​കാശ പര്യ​വേക്ഷണ ഉപകര​ണ​ത്തി​നും അദ്ദേഹ​ത്തി​ന്റെ പേരാ​ണു​ള്ളത്‌. കൂടാതെ, ലോക​ത്തി​ലെ ഏറ്റവും വലിയ സമു​ദ്ര​ത്തി​ന്റെ—ശാന്തസ​മു​ദ്ര​ത്തി​ന്റെ—പേരി​നും നാം കടപ്പെ​ട്ടി​രി​ക്കു​ന്നതു മഗല്ല​നോ​ടു​തന്നെ.

“ഈ സംഭവം നടന്ന്‌ 447 വർഷത്തി​നു​ശേഷം അപ്പോ​ളോ II-ൽ ചന്ദ്രനിൽ ചെന്നി​റ​ങ്ങി​യ​താ​യി​രു​ന്നു പിന്നെ മനുഷ്യൻ നടത്തി​യ​തി​ലേ​ക്കും പ്രധാ​ന​പ്പെട്ട ദീർഘ​യാ​ത്ര,” മഗല്ലന്റെ ദീർഘ​യാ​ത്ര (ഇംഗ്ലീഷ്‌) എന്ന പുസ്‌ത​ക​ത്തിൽ റിച്ചാർഡ്‌ ഹമ്പിൾ എഴുതു​ന്നു. ഈ യാത്ര എന്തു​കൊ​ണ്ടാണ്‌ അത്ര പ്രധാ​ന​മാ​യി​രു​ന്നത്‌? ഒന്നാമത്തെ സംഗതി, കൊളം​ബസ്‌ വിചാ​രി​ച്ച​തു​പോ​ലെ അമേരി​ക്കൻ ഭൂഖണ്ഡങ്ങൾ ഏഷ്യയു​ടെ ഭാഗമോ ഏഷ്യയു​ടെ അടുത്തോ അല്ലെന്ന്‌ അതു തെളി​യി​ച്ചു. രണ്ടാമ​താ​യി, യാത്ര​യു​ടെ ഒടുവിൽ, തീയതി​ക​ളി​ലുള്ള വ്യത്യാ​സം ഒരു അന്താരാ​ഷ്‌ട്ര ദിനാ​ങ്ക​രേ​ഖ​യു​ടെ ആവശ്യ​ക​തയെ ചൂണ്ടി​ക്കാ​ണി​ച്ചു. അവസാ​ന​മാ​യി, ശാസ്‌ത്ര എഴുത്തു​കാ​ര​നായ ഐസക്ക്‌ അസി​മോഫ്‌ പറഞ്ഞതു​പോ​ലെ അത്‌ ഭൂമി ഒരു ഗോള​മാ​ണെന്നു വെളി​പ്പെ​ടു​ത്തി. അതേ, ഒടുവിൽ പറഞ്ഞ സംഗതി​യോ​ടുള്ള ബന്ധത്തിൽ, 2,250 വർഷം മുമ്പ്‌ ബൈബിൾ പറഞ്ഞ ഒരു സംഗതി പ്രാ​യോ​ഗി​ക​മായ വിധത്തിൽ മഗല്ലൻ തെളി​യി​ച്ചു. (യെശയ്യാ​വു 40:20; ഇയ്യോബ്‌ 26:7 താരത​മ്യം ചെയ്യുക.) ലോക​ത്തി​ന്റെ പൂട്ടു​തു​റന്ന, ഉറച്ച മതവി​ശ്വാ​സി​യായ ആ മനുഷ്യ​നെ ഇത്‌ സന്തോ​ഷി​പ്പി​ച്ചി​രി​ക്ക​ണ​മെ​ന്ന​തി​നു സംശയ​മില്ല.

[അടിക്കു​റി​പ്പു​കൾ]

[14-ാം പേജിലെ ചതുരം]

ടോർഡെസില്ലാസ്‌ ഉടമ്പടി

ഒരു വിശാ​ല​മായ ലോകം തങ്ങളുടെ മുമ്പിൽ നീണ്ടു​പ​രന്നു കിടന്നി​രു​ന്ന​തു​കൊണ്ട്‌ പോർച്ചു​ഗ​ലും സ്‌പെ​യി​നും പുതിയ ദേശങ്ങ​ളി​ന്മേ​ലുള്ള വാണിജ്യ, അധികാര അവകാ​ശങ്ങൾ പങ്കിടാ​മെന്ന്‌ ഒരു ഉടമ്പടി​വഴി സമ്മതിച്ചു. അങ്ങനെ മാർപ്പാ​പ്പാ​മാ​രാ​യി​രുന്ന അലക്‌സാ​ണ്ടർ ആറാമ​ന്റെ​യും ജൂലി​യസ്‌ രണ്ടാമ​ന്റെ​യും നിർദേ​ശ​ത്തിൻ കീഴിൽ ഇന്ന്‌ ബ്രസീൽ എന്നറി​യ​പ്പെ​ടുന്ന രാജ്യ​ത്തി​ലൂ​ടെ ഒരു രേഖാം​ശ​രേഖ വരച്ചു. ഈ രേഖയു​ടെ കിഴക്ക്‌ കണ്ടെത്ത​പ്പെ​ടുന്ന ദേശങ്ങൾ പോർച്ചു​ഗീ​സി​ന്റേ​തും ബാക്കി സ്‌പെ​യി​നി​ന്റേ​തു​മാ​കു​മാ​യി​രു​ന്നു. എന്നാൽ മഗല്ലൻ ബുദ്ധി​ശൂ​ന്യ​മായ ഒരു പ്രവൃത്തി ചെയ്‌തു. ഈ രേഖ ധ്രുവ​ങ്ങൾക്കു ലംബമാ​യി ഭൂഗോ​ള​ത്തി​ന്റെ മറ്റേ വശത്തേക്കു കടത്തി​വി​ട്ടാൽ സുഗന്ധ​വ്യ​ഞ്‌ജ​ന​ങ്ങ​ളു​ടെ നാട്‌ സ്‌പെ​യി​നി​ന്റെ അധീന​ത​യി​ലാ​കു​മെന്ന്‌ മഗല്ലൻ പോർച്ചു​ഗീസ്‌ രാജാ​വായ മാനു​വ​ലി​നോ​ടു പറഞ്ഞു. ശാന്തസ​മു​ദ്രം തീരെ ചെറു​താ​ണെന്ന വിശ്വാ​സത്തെ അടിസ്ഥാ​ന​പ്പെ​ടു​ത്തി​യുള്ള സത്യസ​ന്ധ​മായ ഈ അഭി​പ്രാ​യ​പ്ര​ക​ടനം നിമിത്തം അദ്ദേഹം കടുത്ത അനിഷ്ട​ത്തി​നു പാത്ര​മാ​യി. വിരോ​ധാ​ഭാ​സ​മെന്നു പറയട്ടെ, താൻ പറഞ്ഞതു തെറ്റാ​യി​രു​ന്നെന്നു മഗല്ലൻതന്നെ ഒടുവിൽ തെളി​യി​ച്ചു. എന്നാൽ ഈ വിശ്വാ​സ​മാ​യി​രു​ന്നു അദ്ദേഹം സ്‌പെ​യിൻ രാജാ​വി​ന്റെ പിന്തുണ തേടാ​നു​ണ്ടായ കൂടു​ത​ലായ ഒരു കാരണം.

[15-ാം പേജിലെ ചതുരം/ചിത്രം]

ഒരു ആദ്യകാല നാവി​കന്റെ അഗ്നിപ​രീ​ക്ഷ

നിസ്സാ​ര​നായ ഒരു നാവി​കനെ സംബന്ധി​ച്ചി​ട​ത്തോ​ളം ജീവിതം സുഖക​ര​മാ​യി​രു​ന്നില്ല, പ്രത്യേ​കി​ച്ചും വർഷങ്ങ​ളോ​ളം നീണ്ടു​നിന്ന പര്യട​ന​വേ​ള​ക​ളിൽ. ഒരു സമു​ദ്ര​യാ​ത്രി​കന്റെ ജീവി​ത​ത്തി​ന്റെ മാതൃ​ക​യി​താ:

• ശോച​നീ​യ​മാം​വി​ധം ഇടുങ്ങിയ മുറികൾ, സ്വകാ​ര്യ​ത​യു​ടെ അഭാവം

• മിക്ക​പ്പോ​ഴും ക്രൂര​മായ ശിക്ഷ, അതും കപ്പിത്താ​ന്റെ അപ്പോ​ഴത്തെ തോന്ന​ല​നു​സ​രിച്ച്‌

• വിറ്റാ​മിൻ സി-യുടെ അഭാവം മൂലമു​ണ്ടാ​കുന്ന സ്‌കർവി എന്ന രോഗ​വും മരണവും

• കപ്പൽച്ചേതം, പട്ടിണി, ദാഹം, കഠിന​കാ​ലാ​വ​സ്ഥ​യിൽ സംരക്ഷ​ണ​മി​ല്ലായ്‌മ എന്നിവ​യാ​ലും തദ്ദേശ​വാ​സി​ക​ളാ​ലും സംഭവി​ക്കുന്ന മരണം

• ദുർഗന്ധം വമിക്കുന്ന മലിന​ജലം കുടി​ക്കു​ന്നതു നിമിത്തം ഉണ്ടാകുന്ന അതിസാ​ര​മോ ടൈ​ഫോ​യി​ഡോ

• ചീഞ്ഞ, രോഗാ​ണു​ക്ക​ളുള്ള ആഹാര​സാ​ധ​നങ്ങൾ നിമി​ത്ത​മു​ണ്ടാ​കുന്ന ഭക്ഷ്യവി​ഷ​ബാ​ധ

• വിശന്നു​വലഞ്ഞ എലിക​ളു​ടെ കടി​യേൽക്കു​ന്നതു മൂലമു​ണ്ടാ​കുന്ന എലിപ്പനി

• വൃത്തി​യി​ല്ലാത്ത ശരീര​ങ്ങ​ളി​ലൂ​ടെ​യും വസ്‌ത്ര​ങ്ങ​ളി​ലൂ​ടെ​യും ഇഴഞ്ഞു​ന​ട​ക്കുന്ന പേൻപ​റ്റങ്ങൾ വരുത്തുന്ന ടൈഫസ്‌

• മിക്ക കേസു​ക​ളി​ലും ജീവ​നോ​ടെ തിരി​ച്ചെ​ത്താ​നുള്ള സാധ്യത 50 ശതമാനം മാത്ര​മാണ്‌

[കടപ്പാട്‌]

Century Magazine

[16, 17 പേജു​ക​ളി​ലെ ഭൂപടം/ചിത്രങ്ങൾ]

(പൂർണ​രൂ​പ​ത്തിൽ കാണു​ന്ന​തി​നു പ്രസി​ദ്ധീ​ക​രണം നോക്കുക.)

മഗല്ലന്റെ നാവി​ക​പ​ര്യ​ടനം, 1519-22

⇦••• മാർഗം □ ആരംഭ​വും അവസാ​ന​വും

മഗല്ലൻ കടലി​ടുക്ക്‌

ഫിലി​പ്പീൻസിൽവെ​ച്ചാണ്‌ മഗല്ലൻ കൊല്ല​പ്പെ​ട്ടത്‌

ച്വാൻ സെബാ​സ്റ്റ്യൻ ദെ എൽകാ​നോ നടത്തിയ യാത്ര​യു​ടെ അന്ത്യപാ​ദം

[കടപ്പാട്‌]

മഗല്ലൻ: Giraudon/Art Resource, NY; ഭൂപടം: Mountain High Maps® Copyright © 1995 Digital Wisdom, Inc.; ഉന്നതാംശമാപി: Courtesy of Adler Planetarium

[16-ാം പേജിലെ ചിത്രം]

ഫെർഡിനാൻഡ്‌ മഗല്ലൻ

[16-ാം പേജിലെ ചിത്രം]

“വിക്‌ടോ​റിയ,” ഭൂഗോ​ളത്തെ ചുറ്റിയ ആദ്യത്തെ കപ്പൽ. അദ്ദേഹ​ത്തി​ന്റെ അഞ്ചു കപ്പലു​ക​ളിൽവെച്ച്‌ നാലാ​മത്തെ വലിയ കപ്പൽ അതായി​രു​ന്നു. 45 ആളുകൾ അതിലു​ണ്ടാ​യി​രു​ന്നു. ഈ കപ്പലിന്‌ 21 മീറ്റർ നീളമു​ണ്ടാ​യി​രു​ന്നു

[17-ാം പേജിലെ ചിത്രം]

സമുദ്രയാത്രയ്‌ക്കുള്ള ഉപകര​ണങ്ങൾ: സമയം കണക്കാ​ക്കാ​നുള്ള മണൽഘ​ടി​കാ​രം, കപ്പലിന്റെ സ്ഥാനമ​റി​യാ​നുള്ള ഉന്നതാം​ശ​മാ​പി