വലിയ വെള്ളപ്പ​ക്ഷി​യു​ടെ തിരി​ച്ചു​വ​രവ്‌

ജപ്പാനിലെ ഉണരുക! ലേഖകൻ

അഴകാർന്ന ആ വെള്ളപ്പ​ക്ഷി​കളെ തല്ലി​ക്കൊ​ല്ലാ​നാ​യി കുറെ ആളുകൾ വടിയു​മാ​യി ഇറങ്ങി. ആ പക്ഷികൾ ആൽബ​ട്രോ​സു​കൾ ആയിരു​ന്നു. ആളുകൾ: ഹാനെ​മോൻ റ്റാമാ​ഓ​ക്കി​യും കൂട്ടരും. സ്ഥലം: ടോക്കി​യോ​യിൽനിന്ന്‌ ഏതാണ്ട്‌ 600 കിലോ​മീ​റ്റർ തെക്കോ​ട്ടു മാറി സ്ഥിതി​ചെ​യ്യുന്ന റ്റോറി​ഷി​മാ ദ്വീപ്‌. വർഷം: 1887.

റ്റാമാ​ഓ​ക്കി ഇതിനു​വേണ്ടി പദ്ധതി​യി​ടാൻ തുടങ്ങി​യിട്ട്‌ വർഷങ്ങ​ളാ​യി​രു​ന്നു. കിടക്കകൾ ഉണ്ടാക്കു​ന്ന​തി​നുള്ള മാർദ​വ​മാർന്ന തൂവലു​കൾക്ക്‌ അന്ന്‌ അദ്ദേഹ​ത്തി​ന്റെ നാട്ടി​ലും വിദേ​ശ​ത്തും വലിയ കമ്പമാ​യി​രു​ന്നു. റ്റോറി​ഷി​മാ ഒരു വിദൂര ദ്വീപാ​യി​രു​ന്നു. അതിലെ നിവാ​സി​ക​ളാ​കട്ടെ പ്രജന​ന​ത്തി​നാ​യി പതിവാ​യി അവിടെ എത്തിയി​രുന്ന ആയിര​ക്ക​ണ​ക്കിന്‌ ആൽബ​ട്രോ​സു​ക​ളും. അക്കൂട്ട​ത്തിൽ ഉണ്ടായി​രുന്ന കുറി​യ​വാ​ലൻ ആൽബ​ട്രോസ്‌, പ്രത്യേ​കി​ച്ചും റ്റാമാ​ഓ​ക്കി​യു​ടെ ശ്രദ്ധ ആകർഷി​ച്ചു. ഉത്തരാർധ​ഗോ​ള​ത്തി​ലെ ഏറ്റവും വലിയ കടൽപ്പക്ഷി ആയിരു​ന്നു അത്‌. ഏതാണ്ട്‌ എട്ടു കിലോ​ഗ്രാം തൂക്കവും രണ്ടര മീറ്ററി​ല​ധി​കം ചിറകു​വി​രി​വു​മുള്ള അതിന്റെ കൊഴു​ത്തു​രുണ്ട ശരീരത്തെ പൊതിഞ്ഞ്‌ എത്രയ​ധി​കം തൂവലു​കൾ ഉണ്ടായി​രു​ന്നി​രി​ക്കും എന്ന്‌ ഒന്നു സങ്കൽപ്പി​ച്ചു നോക്കൂ! മാത്രമല്ല, ഇണക്കമുള്ള ആ പക്ഷി അപകട​ത്തിൽപ്പെ​ട്ടാ​ലും രക്ഷപ്പെ​ടാൻ ശ്രമി​ച്ചി​രു​ന്നില്ല.

പക്ഷികളെ കൊല്ലാ​നും അവയുടെ തൂവൽ പറിക്കാ​നു​മാ​യി റ്റാമാ​ഓ​ക്കി 300 ജോലി​ക്കാ​രെ ആ ദ്വീപി​ലേക്കു കൊണ്ടു​വന്നു. അവർ അവിടെ ഒരു ഗ്രാമ​വും പക്ഷികളെ കൊന്നു കൊണ്ടു​പോ​കു​ന്ന​തി​നാ​യി ഒരു ചെറിയ റെയിൽവേ​യും സ്ഥാപിച്ചു. വളരെ ഫലപ്ര​ദ​മാ​യി​രു​ന്നു അവരുടെ പ്രവർത്തനം. റ്റാമാ​ഓ​ക്കി പെട്ടെ​ന്നു​തന്നെ വലിയ പണക്കാരൻ ആയിത്തീർന്നു—50 ലക്ഷത്തോ​ളം പക്ഷികളെ കൊന്നി​ട്ടാ​ണെന്നു മാത്രം. 1902-ൽ ആ ദ്വീപി​ലു​ണ്ടായ അഗ്നിപർവത സ്‌ഫോ​ട​ന​ത്തിൽ ആ ഗ്രാമ​വും അതിലെ മുഴു നിവാ​സി​ക​ളും ഒടുങ്ങി​യ​പ്പോൾ ചിലർ അതിനെ “ആൽബ​ട്രോ​സു​കളെ കൊന്ന​തി​നുള്ള ശാപമാ​യി” വീക്ഷി​ക്ക​ത്ത​ക്ക​വണ്ണം അത്രമാ​ത്രം വലുതാ​യി​രു​ന്നു അവർ വിതച്ച വിനാശം. എങ്കിലും, പിറ്റേ​വർഷം പിന്നെ​യും ആളുകൾ അവി​ടെ​യെത്തി, ശേഷിച്ച പക്ഷികളെ തേടി.

ഏതാണ്ട്‌ 1,500 കിലോ​മീ​റ്റർ അകലെ കിഴക്കൻ ചൈനാ കടലിൽ തായ്‌വാ​നും ഓക്കി​നാ​വ​യ്‌ക്കും ഇടയി​ലുള്ള പാറകൾ നിറഞ്ഞ വിജന​മായ ഒരു ദ്വീപ​സ​മൂ​ഹ​ത്തിൽ റ്റാറ്റ്‌സു​ഷി​റോ കോഗാ എന്നയാൾ ആദായ​ക​ര​മായ അതേ ബിസി​ന​സിൽതന്നെ ഏർപ്പെ​ട്ടി​രി​ക്കു​ക​യാ​യി​രു​ന്നു. പെട്ടെ​ന്നു​തന്നെ പക്ഷിക​ളു​ടെ എണ്ണം ഗണ്യമാ​യി കുറ​ഞ്ഞെന്നു റ്റാമാ​ഓ​ക്കി​യെ​പ്പോ​ലെ​തന്നെ കോഗാ​യും കണ്ടെത്തി. ഒടുവിൽ, 1900-ൽ അയാൾ ദ്വീപു വിട്ടു. എന്നാൽ അപ്പോ​ഴേ​ക്കും അയാൾ പത്തു ലക്ഷത്തോ​ളം ആൽബ​ട്രോ​സു​കളെ വകവരു​ത്തി​യി​രു​ന്നു.

ദുരയു​ടെ ദാരുണ ഫലം

ആ പക്ഷികളെ തൂത്തടച്ചു കൊന്നത്‌ ദാരുണ ഭവിഷ്യ​ത്തു​ക​ളോ​ടു കൂടിയ ഒരു ദുരന്ത​മാ​യി​രു​ന്നു. ആൽബ​ട്രോ​സു​ക​ളു​ടെ വിവിധ സ്‌പീ​ഷീ​സു​ക​ളിൽ മൂന്നെണ്ണം ഉത്തര പസഫി​ക്കി​ലാണ്‌. അവ മുഖ്യ​മാ​യും കൂടു​കൂ​ട്ടു​ന്നത്‌ റ്റാമാ​ഓ​ക്കി​യും കോഗാ​യും കൊള്ള​യ​ടിച്ച ദ്വീപു​ക​ളി​ലാണ്‌. അവയി​ലൊ​ന്നായ കുറി​യ​വാ​ലൻ ആൽബ​ട്രോസ്‌ (ഡയോ​മെ​ഡിയ ആൽബ​ട്രസ്‌) ലോക​ത്തിൽ മറ്റെവി​ടെ​യെ​ങ്കി​ലും പ്രജനനം നടത്തു​ന്ന​താ​യി ആർക്കും അറിയി​ല്ലാ​യി​രു​ന്നു.

പുറങ്ക​ട​ലി​ലെ നാവികർ ആൽബ​ട്രോ​സു​കളെ ഭയാദ​ര​വോ​ടെ വീക്ഷി​ച്ചി​രുന്ന ഒരു കാലമു​ണ്ടാ​യി​രു​ന്നു. സമു​ദ്ര​ത്തെ​ക്കു​റി​ച്ചുള്ള ഐതി​ഹ്യ​ങ്ങ​ളും പരമ്പരാ​ഗത വിശ്വാ​സ​ങ്ങ​ളും അതിനെ കാറ്റി​ന്റെ​യും മൂടൽമ​ഞ്ഞി​ന്റെ​യും മുന്നോ​ടി​യാ​യി ചിത്രീ​ക​രി​ക്കു​ന്നു. എങ്കിലും, ഈ വലിയ വെള്ളപ്പ​ക്ഷി​യു​ടെ അസാധാ​രണ നീളമുള്ള ചിറകു​കൾ, ഏതാനും ദിവസ​ങ്ങൾകൊണ്ട്‌ സമുദ്രം കുറുകെ കടക്കാൻ അതിനെ പ്രാപ്‌ത​മാ​ക്കു​ന്നു എന്നത്‌ ഒരു ഐതി​ഹ്യ​മല്ല. അധിക​സ​മ​യ​ത്തും ഇവ ചിറക​ടി​ക്കാ​തെ കാറ്റിനെ വാഹന​മാ​ക്കി സഞ്ചരി​ക്കു​ക​യാ​ണു ചെയ്യു​ന്നത്‌. തെന്നി​പ്പ​റ​ക്കാ​നും ദീർഘ​കാ​ലം സമു​ദ്ര​ത്തിൽ കഴിച്ചു​കൂ​ട്ടാ​നു​മുള്ള അതിന്റെ പ്രാപ്‌തി അതുല്യ​മാണ്‌.

ആൽബ​ട്രോസ്‌ വായു​വിൽ ഉയർന്നു പറക്കു​ന്നതു കാണാൻ ചന്തമാ​ണെ​ങ്കി​ലും നിലത്തു​കൂ​ടെ​യുള്ള അതിന്റെ ചലനം മന്ദവും വികൃ​ത​വു​മാണ്‌. നീളമുള്ള ചിറകു​ക​ളും കൊഴു​ത്തു​രുണ്ട ശരീര​വും കാരണം അതിന്‌ നിലത്തു​നിന്ന്‌ വേഗത്തിൽ പറന്നു​യ​രാൻ കഴിയില്ല. അതു മനുഷ്യ​രോട്‌ പേടി​യും വളർത്തി​യെ​ടു​ത്തി​ട്ടി​ല്ലാ​യി​രു​ന്നു. ഇതെല്ലാം നിമിത്തം അതിനെ പിടി​കൂ​ടാൻ എളുപ്പ​മാ​യി​രു​ന്നു. അതു​കൊണ്ട്‌ ആളുകൾ അതിന്‌ ഗൂണി പക്ഷി, മോളി​മോക്ക്‌ എന്നിങ്ങ​നെ​യുള്ള ചീത്ത​പ്പേ​രു​കൾ നൽകി.a

ആൽബ​ട്രോ​സി​നെ കൊന്നാൽ പണം ഉണ്ടാകു​മെന്ന ചിന്തയാൽ പ്രേരി​ത​രായ നിരു​ത്ത​ര​വാ​ദി​ക​ളായ ആളുകൾ അവയെ സന്തോ​ഷ​ത്തോ​ടെ കൊ​ന്നൊ​ടു​ക്കി​ക്കൊ​ണ്ടേ​യി​രു​ന്നു. 1933 ആയപ്പോ​ഴേ​ക്കും റ്റോറി​ഷി​മാ​യിൽ 600 പക്ഷികൾ പോലും ഇല്ലാത്ത സ്ഥിതി​യാ​യി എന്ന്‌ ഒരു സർവേ വെളി​പ്പെ​ടു​ത്തി. ഗത്യന്ത​ര​മി​ല്ലാ​തെ, ജാപ്പനീസ്‌ ഗവൺമെൻറ്‌ ആ ദ്വീപിൽ മനുഷ്യർക്ക്‌ പ്രവേ​ശനം നിരോ​ധി​ച്ച​താ​യി പ്രഖ്യാ​പി​ച്ചു. എന്നാൽ, നിരോ​ധനം നടപ്പിൽ വരുന്ന​തി​നു മുമ്പ്‌ കഴിയു​ന്നി​ട​ത്തോ​ളം പക്ഷികളെ കൊ​ന്നൊ​ടു​ക്കു​ന്ന​തി​നാ​യി തത്ത്വദീ​ക്ഷ​യി​ല്ലാത്ത മനുഷ്യർ ആ ദ്വീപി​ലേക്കു പാഞ്ഞു. ഒരു വിദഗ്‌ധന്റെ അഭി​പ്രാ​യ​പ്ര​കാ​രം, 1935 ആയപ്പോ​ഴേ​ക്കും 50 പക്ഷികൾ മാത്രമേ അവിടെ അവശേ​ഷി​ച്ചു​ള്ളൂ. ഒടുവിൽ, കുറി​യ​വാ​ലൻ ആൽബ​ട്രോ​സിന്‌ വംശനാ​ശം സംഭവി​ച്ച​താ​യി പ്രഖ്യാ​പി​ക്കേ​ണ്ടി​വന്നു. മനുഷ്യ ദുരയു​ടെ എന്തൊരു ദാരു​ണ​മായ ഫലം! എന്നാൽ വലി​യൊ​രു വിസ്‌മയം കാത്തി​രി​പ്പു​ണ്ടാ​യി​രു​ന്നു.

ആ പക്ഷി തിരി​ച്ചു​വ​രാൻ തുടങ്ങു​ന്നു

1951 ജനുവ​രി​യി​ലെ ഒരു സായാഹ്നം. റ്റോറി​ഷി​മാ​യി​ലെ പാറക​ളി​ലൂ​ടെ കയറി​പ്പോ​കു​ക​യാ​യി​രുന്ന ഒരു മനുഷ്യൻ പെട്ടെ​ന്നൊ​രു ചിലപ്പു കേട്ട്‌ അമ്പരന്നു. നോക്കി​യ​പ്പോൾ കൺമു​മ്പിൽ ഒരു ആൽബ​ട്രോസ്‌! കുറി​യ​വാ​ലൻ ആൽബ​ട്രോസ്‌ എങ്ങനെ​യോ അതിജീ​വിച്ച്‌ റ്റോറി​ഷി​മാ​യിൽ വീണ്ടും പ്രജനനം നടത്തു​ക​യാ​യി​രു​ന്നു. എങ്കിലും, ഇത്തവണ ആ പക്ഷികൾ കൂടു​കൂ​ട്ടി​യത്‌ മനുഷ്യർക്ക്‌ എത്തി​പ്പെ​ടുക ഏതാണ്ട്‌ അസാധ്യ​മായ ചെരി​വു​ക​ളി​ലാ​യി​രു​ന്നു. മനുഷ്യ​രോട്‌ അവയ്‌ക്ക്‌ മുമ്പി​ല്ലാ​തി​രുന്ന തരം ഭയമു​ള്ള​താ​യി കാണ​പ്പെട്ടു. പ്രകൃതി സ്‌നേ​ഹി​കൾക്ക്‌ എത്ര സന്തോഷം തോന്നി​യി​രി​ക്കണം!

ജാപ്പനീസ്‌ ഗവൺമെൻറ്‌ ദ്രുത​ഗ​തി​യിൽ പ്രവർത്ത​ന​മാ​രം​ഭി​ച്ചു. പക്ഷികൾക്ക്‌ കൂടു​കെ​ട്ടാൻ തക്കവണ്ണം മണ്ണിനെ ബലവത്താ​ക്കു​ന്ന​തിന്‌ അവർ പാംപസ്‌ പുല്ല്‌ നട്ടുപി​ടി​പ്പി​ക്കു​ക​യും ആളുകൾ റ്റോറി​ഷി​മാ​യി​ലേക്കു പോകു​ന്നത്‌ വിലക്കു​ക​യും ചെയ്‌തു. ആൽബ​ട്രോ​സി​നെ ഒരു ദേശീയ നിധി​യാ​യി പ്രഖ്യാ​പി​ച്ചു. ആ പക്ഷി അന്തർദേ​ശീ​യ​മാ​യി സംരക്ഷി​ക്ക​പ്പെട്ടു.

ജപ്പാനി​ലെ റ്റോഹോ യൂണി​വേ​ഴ്‌സി​റ്റി​യി​ലെ ഹിറോ​ഷി ഹാസെ​ഗാ​വാ 1976 മുതൽ ആ പക്ഷിക​ളെ​ക്കു​റിച്ച്‌ പഠനം നടത്തി​ക്കൊ​ണ്ടി​രി​ക്കു​ക​യാണ്‌. അവയെ നിരീ​ക്ഷി​ക്കു​ന്ന​തി​നാ​യി അദ്ദേഹ​മി​പ്പോൾ വർഷത്തിൽ മൂന്നു തവണ ആ ദ്വീപ്‌ സന്ദർശി​ക്കു​ന്നുണ്ട്‌. കുറി​യ​വാ​ലൻ ആൽബ​ട്രോ​സു​ക​ളു​ടെ കാലു​ക​ളിൽ ഓരോ വർഷവും വ്യത്യസ്‌ത നിറത്തി​ലുള്ള വളയമി​ടു​ക​വഴി, മൂന്നോ നാലോ വർഷത്തിൽ ഒരിക്കൽ മാത്രമേ അവ പ്രജന​ന​ത്തി​നാ​യി ജന്മസ്ഥല​ത്തേക്കു മടങ്ങി​വ​രു​ന്നു​ള്ളൂ എന്നു താൻ കണ്ടെത്തി​യ​താ​യി അദ്ദേഹം ഉണരുക!യോടു പറഞ്ഞു. ആറാം വയസ്സി​ലാണ്‌ അവ ആദ്യമാ​യി പ്രജനനം നടത്തു​ന്നത്‌. ഓരോ തവണയും ഒരു മുട്ട മാത്രം ഇടുന്നു. അതു​കൊണ്ട്‌, ശരാശരി 20 വർഷത്തെ ആയുർ​ദൈർഘ്യം ഉണ്ടെങ്കി​ലും അവയുടെ എണ്ണം വർധി​ക്കാൻ ദീർഘ​നാ​ളെ​ടു​ക്കു​ന്നു. ആ പക്ഷികൾ 1996/97-ലെ ശിശി​ര​ത്തിൽ റ്റോറി​ഷി​മാ​യിൽ 176 മുട്ടക​ളി​ട്ട​തിൽ 90 എണ്ണം മാത്രമേ വിരി​ഞ്ഞു​ള്ളൂ.

ആൽബ​ട്രോ​സു​കൾ ബാക്കി സമയത്ത്‌ എന്തു ചെയ്യു​ക​യാണ്‌? അതു സംബന്ധിച്ച്‌ കാര്യ​മാ​യി ഒന്നും അറിയി​ല്ലെന്ന്‌ ഹാസെ​ഗാ​വാ പറയുന്നു. അവ തീർച്ച​യാ​യും കരയെ​യും മനുഷ്യ​രെ​യും ഒഴിവാ​ക്കു​ന്നു. ആൽബ​ട്രോ​സു​കൾ കപ്പലു​കളെ പിന്തു​ട​രു​ക​യും അവയുടെ മുകളിൽ വന്നിരി​ക്കു​ക​യും ചെയ്യാ​റു​ണ്ടോ? ഹാസെ​ഗാ​വാ​യു​ടെ അഭി​പ്രാ​യ​ത്തിൽ അതിനു യാതൊ​രു തെളി​വു​മില്ല, വെറും ഐതി​ഹ്യം മാത്രം. “ജാപ്പനീസ്‌ ആൽബ​ട്രോ​സു​കൾ കപ്പലു​ക​ളു​ടെ മുകളിൽ വന്നിരി​ക്കാ​റില്ല” എന്ന്‌ അദ്ദേഹ​ത്തിന്‌ ഉറപ്പുണ്ട്‌. എന്നാൽ, ലോക​ത്തി​ന്റെ മറ്റുഭാ​ഗ​ങ്ങ​ളി​ലുള്ള “ചില ആൽബ​ട്രോ​സു​കൾ തീറ്റി കൊടു​ക്കു​ന്ന​പക്ഷം അൽപ്പ​നേ​ര​ത്തേക്ക്‌ കപ്പലിൽ പറ്റിക്കൂ​ടി​യേ​ക്കാം,” അദ്ദേഹം കൂട്ടി​ച്ചേർക്കു​ന്നു. മിക്കസ​മ​യ​ത്തും അവ തങ്ങളുടെ ഏറ്റവും മികച്ച പ്രവർത്ത​ന​ത്തിൽ ഏർപ്പെ​ടു​ന്നു.—അതായത്‌ അനുകൂ​ല​മായ വായു പ്രവാ​ഹത്തെ വാഹന​മാ​ക്കി വിശാ​ല​മായ ആഴിക്കു മീതെ ചുറ്റി​യ​ടി​ക്കു​ന്നു. പറന്നു ക്ഷീണി​ക്കു​മ്പോൾ അവ ആഴിപ്പ​ര​പ്പിൽ പൊന്തി​ക്കി​ടന്ന്‌ ഉറങ്ങുന്നു. കൂന്തൽ, പറവമീൻ, ഞണ്ട്‌, ചെമ്മീൻ എന്നിവ​യാണ്‌ അവയുടെ ഭക്ഷണം. ഹാസെ​ഗാ​വാ വളയമിട്ട പക്ഷികളെ ബെറിങ്‌ കടലി​ലും അലാസ്‌കൻ ഉൾക്കട​ലി​ലും പതിവാ​യി കാണാ​റുണ്ട്‌. 1985-ൽ കുറി​യ​വാ​ലൻ ആൽബ​ട്രോ​സി​നെ കാലി​ഫോർണിയ തീരത്തിന്‌ തെല്ലക​ലെ​യാ​യി കണ്ടത്‌—ഏതാണ്ട്‌ ഒരു നൂറ്റാ​ണ്ടു​കൂ​ടി​യാ​യി​രു​ന്നു അതിനെ കാണു​ന്നത്‌—അവിടു​ത്തെ പക്ഷി നിരീ​ക്ഷ​ക​രിൽ ആവേശ​ത്തി​ന്റെ അലകളു​യർത്തി.

അതിന്റെ ഭാവി സംബന്ധി​ച്ചെന്ത്‌?

എന്നാൽ കുറി​യ​വാ​ലൻ ആൽബ​ട്രോ​സി​ന്റെ എണ്ണം ക്രമാ​നു​ഗ​ത​മാ​യി കൂടി​വ​രു​ന്നു എന്നത്‌ ആശാവ​ഹ​മായ ഒരു സംഗതി​യാണ്‌. കഴിഞ്ഞ മേയ്‌ മാസത്തിൽ “കുഞ്ഞു​ങ്ങ​ള​ടക്കം 900-ത്തിലധി​കം എണ്ണം” ഉണ്ടായി​രു​ന്ന​താ​യി ഹാസെ​ഗാ​വാ കണക്കാ​ക്കു​ന്നു. അദ്ദേഹം ഇങ്ങനെ കൂട്ടി​ച്ചേർത്തു: “ഓരോ വർഷവും 100-ലധികം കുഞ്ഞുങ്ങൾ ഉണ്ടാകു​ക​യാ​ണെ​ങ്കിൽ 2000-ാമാണ്ട്‌ ആകു​മ്പോ​ഴേ​ക്കും റ്റോറി​ഷി​മാ​യിൽ തന്നെ 1,000-ത്തിലധി​കം പക്ഷികൾ ഉണ്ടായി​രി​ക്കും.” 88 വർഷത്തി​നു ശേഷം 1988-ൽ അവ കിഴക്കൻ ചൈനാ കടലിൽ വീണ്ടും പ്രജനനം നടത്തു​ന്ന​താ​യി കാണ​പ്പെ​ട്ട​തും പുളക​മ​ണി​യി​ക്കുന്ന ഒരു വസ്‌തു​ത​യാണ്‌. തർക്ക പ്രദേ​ശത്തെ പാറകൾ നിറഞ്ഞ, സൈനിക നിരീ​ക്ഷ​ണ​ത്തി​ലുള്ള ഒരു പ്രദേ​ശ​മാണ്‌ പക്ഷികൾ തിര​ഞ്ഞെ​ടു​ത്തി​രി​ക്കു​ന്നത്‌. തന്മൂലം കുറച്ചു നാള​ത്തേ​ക്കെ​ങ്കി​ലും അവയ്‌ക്കു മനുഷ്യ​രു​ടെ ഉപദ്ര​വ​മു​ണ്ടാ​കാൻ വഴിയില്ല.

ഒരു നൂറ്റാണ്ടു മുമ്പത്തെ പിഴവു​കൾ സാവധാ​നം തിരു​ത്ത​പ്പെ​ട്ടു​കൊ​ണ്ടി​രി​ക്കു​ക​യാണ്‌. അതോ അങ്ങനെ അല്ലെന്നു​ണ്ടോ? വളയമി​ടു​ന്ന​തി​നാ​യി പക്ഷികളെ പിടി​ക്കു​മ്പോൾ അവ പരി​ഭ്ര​മിച്ച്‌ കക്കുന്ന​താ​യി ഗവേഷകർ പലപ്പോ​ഴും കണ്ടെത്തു​ന്നു. അവയുടെ വയറ്റിൽനിന്ന്‌ പ്ലാസ്റ്റി​ക്കി​ന്റെ​യും ഉപയോ​ഗി​ച്ചിട്ട്‌ കളയുന്ന സിഗരറ്റ്‌ ലൈറ്റ​റു​ക​ളു​ടെ​യും കഷണങ്ങ​ളും മറ്റു ചപ്പുച​വ​റു​ക​ളും പുറത്തു​വ​രു​ന്നു. അവയുടെ ഭക്ഷണ സ്രോ​ത​സ്സായ സമു​ദ്ര​ത്തി​ലേക്ക്‌ ആളുകൾ അത്തരം പാഴ്‌വ​സ്‌തു​ക്കൾ കൊണ്ടു​വന്ന്‌ അശ്രദ്ധ​മാ​യി തള്ളുന്ന​തി​ന്റെ ഫലമാ​ണത്‌.

മനുഷ്യ​ന്റെ അവി​വേകം ആ വലിയ വെള്ളപ്പ​ക്ഷി​യെ ഒരിക്കൽകൂ​ടി അപകട​ത്തി​ന്റെ വക്കി​ലെ​ത്തി​ക്കു​മോ?

[അടിക്കു​റിപ്പ്‌]

[16-ാം പേജിലെ ചിത്രം]

ആൽബട്രോസിന്റെ നീണ്ടു മെലിഞ്ഞ ചിറകു​കൾ അതിനെ ലോക​ത്തി​ലെ തെന്നി​പ്പ​റക്കൽ വിദഗ്‌ധ​നാ​ക്കി​ത്തീർക്കു​ന്നു

[16, 17 പേജു​ക​ളി​ലെ ചിത്രം]

റ്റോറിഷിമാ, കുറി​യ​വാ​ലൻ ആൽബ​ട്രോ​സി​ന്റെ നാട്‌

[17-ാം പേജിലെ ചിത്രം]

കുറിയവാലൻ ആൽബ​ട്രോസ്‌ റ്റോറി​ഷി​മാ​യിൽ തിരി​ച്ചെ​ത്തി​യി​രി​ക്കു​ന്നു