തേൻ—മനുഷ്യന്‌ തേനീ​ച്ച​യു​ടെ സമ്മാനം

മെക്‌സിക്കോയിലെ ഉണരുക! ലേഖകൻ

അയാൾ ക്ഷീണിച്ച്‌ അവശനാ​യി​രു​ന്നു. കാട്ടിൽ തേൻ ഇറ്റിറ്റു​വീ​ഴുന്ന ഒരു തേൻകട്ട അവിചാ​രി​ത​മാ​യി കണ്ടപ്പോൾ ആ യിസ്രാ​യേല്യ പടയാ​ളി​യു​ടെ മനംനി​റഞ്ഞു. തന്റെ വടി​കൊണ്ട്‌ തേൻക​ട്ട​യിൽ കുത്തി അയാൾ അൽപ്പം തേൻ നുകർന്നു. പെട്ടെ​ന്നു​തന്നെ അയാളു​ടെ “കണ്ണു തെളിഞ്ഞു.” അയാൾ ഉന്മേഷം വീണ്ടെ​ടു​ത്തു. (1 ശമൂവേൽ 14:25-30) മനുഷ്യ​നു ഗുണം ചെയ്യുന്ന തേനിന്റെ ഒരു സവി​ശേഷത ഈ ബൈബിൾ വിവര​ണ​ത്തിൽ കാണാം. അതേ, പെട്ടെന്ന്‌ ഊർജം പകർന്നു​ത​രുന്ന ഒരു ഭക്ഷ്യപ​ദാർഥ​മാ​ണിത്‌. ഇതിൽ പ്രധാ​ന​മാ​യും കാർബോ​ഹൈ​ഡ്രേ​റ്റു​കൾ അടങ്ങി​യി​രി​ക്കു​ന്നു എന്നതാണ്‌ അതിനു കാരണം, ഏകദേശം 82 ശതമാനം. സിദ്ധാ​ന്ത​പ​ര​മാ​യി പറഞ്ഞാൽ, വെറും 30 ഗ്രാം തേൻ നൽകുന്ന ഊർജം മതി ഒരു തേനീ​ച്ച​യ്‌ക്ക്‌ ഉലകം​ചു​റ്റി​പ്പ​റ​ക്കാൻ. വിസ്‌മ​യ​കരം അല്ലേ?

മനുഷ്യ​നു​വേ​ണ്ടി മാത്ര​മാ​ണോ തേനീ​ച്ചകൾ തേനു​ണ്ടാ​ക്കു​ന്നത്‌? അല്ല. അവയുടെ ആഹാര​മാണ്‌ തേൻ. സാധാ​ര​ണ​വ​ലു​പ്പ​മുള്ള ഒരു തേനീ​ച്ച​ക്കൂ​ട്ടി​ലെ ഈച്ചകൾക്ക്‌ ശൈത്യ​കാ​ലത്തെ അതിജീ​വി​ക്ക​ണ​മെ​ങ്കിൽ 10 മുതൽ 15 കിലോ​ഗ്രാം​വരെ തേൻ ആവശ്യ​മാണ്‌. എന്നാൽ അനു​യോ​ജ്യ​മായ ഋതുവിൽ ഒരു തേനീ​ച്ച​ക്കൂ​ട്ടിൽ ഏകദേശം 25 കിലോ​ഗ്രാം തേൻ ഉത്‌പാ​ദി​പ്പി​ക്ക​പ്പെ​ടു​ന്നു. അപ്പോൾ മനുഷ്യർക്കും കരടി, റക്കൂൺ തുടങ്ങിയ മൃഗങ്ങൾക്കും നുകരാൻ വേണ്ടു​വോ​ളം മിച്ചമു​ണ്ടാ​കും.

തേനീ​ച്ചകൾ തേനു​ണ്ടാ​ക്കു​ന്നത്‌ എങ്ങനെ​യാണ്‌? തീറ്റി​യ​ന്വേ​ഷി​ച്ചു​പോ​കുന്ന ഈച്ചകൾ പുഷ്‌പ​ങ്ങ​ളിൽനി​ന്നു പൂന്തേൻ നുകരു​ന്നു, കുഴൽപോ​ലെ​യുള്ള നാക്ക്‌ ഉപയോ​ഗി​ച്ചാ​ണു പൂന്തേൻ വലി​ച്ചെ​ടു​ക്കു​ന്നത്‌. പൂന്തേൻ ശേഖരി​ച്ചു കൊണ്ടു​വ​രാൻവേണ്ടി മാത്രം തേനീ​ച്ച​യ്‌ക്ക്‌ ഒരു വയറുണ്ട്‌. കൂട്ടി​ലെ​ത്തി​ക്ക​ഴി​യു​മ്പോൾ പൂന്തേൻ മറ്റ്‌ ഈച്ചകൾക്കു കൈമാ​റു​ന്നു, പൂന്തേൻ “ചവയ്‌ക്കുക” എന്ന ജോലി​യാണ്‌ ഇക്കൂട്ട​രു​ടേത്‌. ഏകദേശം അരമണി​ക്കൂർ നേര​ത്തേ​ക്കുള്ള ഈ പ്രക്രി​യ​യിൽ അവയുടെ വായിലെ ഗ്രന്ഥി​ക​ളിൽനി​ന്നുള്ള എൻ​സൈ​മു​കൾ പൂന്തേ​നു​മാ​യി കൂടി​ക്ക​ല​രു​ന്നു. തുടർന്ന്‌ ഈ മിശ്രി​തം ആറ്‌ വശങ്ങളുള്ള മെഴു​കു​നിർമി​ത​മായ അറകളിൽ വെച്ചിട്ട്‌ ഈച്ചകൾ ചിറകു​കൾകൊ​ണ്ടു വീശി അധിക​മുള്ള ജലാംശം നീക്കം ചെയ്യുന്നു.a ജലാംശം 18 ശതമാ​ന​ത്തി​ലും കുറവാ​കു​മ്പോൾ അറകൾ മെഴു​കി​ന്റെ നേർത്ത ഒരു ആവരണം​കൊ​ണ്ടു മൂടുന്നു. ഇങ്ങനെ ഭദ്രമാ​ക്കിയ തേൻ എത്രകാ​ലം വേണ​മെ​ങ്കി​ലും കേടാ​കാ​തെ ഇരുന്നു​കൊ​ള്ളും. ഫറവോ​ന്മാ​രു​ടെ ഏകദേശം 3,000 വർഷം പഴക്കമുള്ള ശവകു​ടീ​ര​ങ്ങ​ളിൽനിന്ന്‌ തികച്ചും ഭക്ഷ്യ​യോ​ഗ്യ​മായ തേൻ കണ്ടെടു​ത്ത​താ​യി റിപ്പോർട്ടു ചെയ്യ​പ്പെ​ട്ടി​ട്ടുണ്ട്‌.

തേനിന്റെ ഔഷധ​ഗു​ണ​ങ്ങൾ

വിശേ​ഷ​ത​ര​മായ ഒരു ഭക്ഷണം—ബി ജീവകങ്ങൾ, പലതരം ധാതുക്കൾ, ആന്റിഓ​ക്‌സി​ഡ​ന്റു​കൾ എന്നിവ​യു​ടെ ഒരു ഒന്നാന്തരം കലവറ​യാണ്‌ തേൻ—എന്നതി​ലു​പരി അറിയ​പ്പെ​ടു​ന്ന​തിൽവെച്ച്‌ അതി​പ്രാ​ചീ​ന​വും ഇന്നുവ​രെ​യും ഉപയോ​ഗ​ത്തി​ലി​രി​ക്കു​ന്ന​തു​മായ ഒരു ഔഷധ​വു​മാണ്‌ തേൻ.b യു.എസ്‌.എ.-യിലെ ഇല്ലി​നോ​യ്‌സ്‌ സർവക​ലാ​ശാ​ല​യി​ലെ പ്രാണി​ശാ​സ്‌ത്ര​വി​ദ​ഗ്‌ധ​നായ ഡോ. മേയ്‌ ബെറെൻബൗം പറയുന്നു: “മുറി​വു​കൾ, പൊള്ളൽ, തിമിരം, തൊലി​പ്പു​റ​ത്തു​ണ്ടാ​കുന്ന വ്രണങ്ങൾ, ചൊറി​ഞ്ഞു​പൊ​ട്ടൽ തുടങ്ങി​യ​വ​യെ​ല്ലാം ചികി​ത്സി​ക്കാൻ നൂറ്റാ​ണ്ടു​ക​ളാ​യി തേൻ ഉപയോ​ഗി​ച്ചു​വ​രു​ന്നു.”

അടുത്ത കാലത്ത്‌ തേനിന്റെ ഔഷധ​മൂ​ല്യ​ത്തി​ലു​ണ്ടായ വർധിച്ച താത്‌പ​ര്യ​ത്തെ​ക്കു​റിച്ച്‌ സിഎൻഎൻ വാർത്താ​സം​ഘടന ഇപ്രകാ​രം റിപ്പോർട്ടു ചെയ്യുന്നു: “മുറി​വു​ക​ളിൽ പുരട്ടാൻ രണ്ടാം ലോക​മ​ഹാ​യുദ്ധ കാലത്ത്‌ ആന്റിബ​യോ​ട്ടി​ക്കു​കൾ കണ്ടുപി​ടി​ച്ച​പ്പോൾ തേൻ അപ്രസ​ക്ത​മാ​യി. എന്നാൽ, പുതിയ ഗവേഷ​ണ​ങ്ങ​ളും ആന്റിബ​യോ​ട്ടി​ക്കു​കളെ വെല്ലു​വി​ളി​ക്കുന്ന ഇനം ബാക്ടീ​രി​യ​യും ഈ പുരാതന നാട്ടു​മ​രു​ന്നിന്‌ ആധുനിക വൈദ്യ​ശാ​സ്‌ത്ര​ത്തി​ന്റെ മരുന്നു​പെ​ട്ടി​യിൽ സ്ഥാനം നൽകി​യി​രി​ക്കു​ന്നു.” ഉദാഹ​ര​ണ​ത്തിന്‌, ഗവേഷ​ണ​ത്തി​ന്റെ ഒരു ഭാഗം പൊള്ള​ലി​നുള്ള ചികി​ത്സാ​വി​ധി​യെ​ക്കു​റി​ച്ചു​ള്ള​താണ്‌. പൊള്ള​ലിൽ തേൻ പുരട്ടി​യ​പ്പോൾ രോഗി​കൾ കൂടുതൽ വേഗം സുഖം പ്രാപി​ച്ച​താ​യും വേദന​യും പാടും കുറവാ​യി​രു​ന്ന​താ​യും നിരീ​ക്ഷി​ക്ക​പ്പെട്ടു.

പൂന്തേ​നിൽ തേനീ​ച്ച​ക​ളിൽനി​ന്നുള്ള ഒരു എൻസൈം കൂടി​ക്ക​ല​രു​ന്ന​തി​നാൽ തേനിന്‌ ചെറി​യ​തോ​തിൽ ബാക്ടീ​രിയ-പ്രതി​രോധ പ്രാപ്‌തി​യും ആന്റിബ​യോ​ട്ടിക്ക്‌ സവി​ശേ​ഷ​ത​ക​ളും ഉണ്ടെന്നു പഠനങ്ങൾ കാണി​ക്കു​ന്നു. ഈ എൻസൈം ഉപദ്ര​വ​കാ​രി​ക​ളായ ബാക്ടീ​രി​യയെ കൊല്ലുന്ന ഹൈ​ഡ്രജൻ പെറോ​ക്‌​സൈഡ്‌ ഉത്‌പാ​ദി​പ്പി​ക്കു​ന്നു.c ഇനി, തേൻ തൊലി​പ്പു​റമേ തേച്ചാൽ വീക്കം കുറയു​ക​യും ആരോ​ഗ്യ​മുള്ള കലകളു​ടെ വളർച്ച ത്വരി​ത​പ്പെ​ടു​ക​യും ചെയ്യു​ന്നു​വെ​ന്നും കണ്ടെത്തി​യി​ട്ടുണ്ട്‌. അതു​കൊണ്ട്‌ ന്യൂസി​ലൻഡി​ലെ ഒരു ബയോ​കെ​മി​സ്റ്റായ ഡോ. പീറ്റർ മോലൻ പറയുന്നു: “വ്യാപ​ക​മാ​യി നടപ്പി​ലി​രി​ക്കുന്ന ചികിത്സ നടത്തുന്ന ഡോക്ടർമാർ ഇപ്പോൾ തേനിനെ ഫലപ്ര​ദ​വും മാന്യ​വു​മായ ഒരു ചികിത്സാ ഉപാധി​യാ​യി അംഗീ​ക​രി​ച്ചു വരിക​യാണ്‌.” തേനിനെ ഒരു ഔഷധ​മാ​യി ഓസ്‌​ട്രേ​ലി​യൻ തെറാ​പ്യൂ​ട്ടിക്‌ ഗുഡ്‌സ്‌ അഡ്‌മി​നി​സ്‌​ട്രേഷൻ അംഗീ​ക​രി​ച്ചി​ട്ടുണ്ട്‌. മുറി​വു​ക​ളിൽ പുരട്ടു​ന്ന​തി​നുള്ള ഒരു ഔഷധ​മാ​യി തേൻ അവിടത്തെ വിപണി​യിൽ ലഭ്യമാണ്‌.

ഇതു​പോ​ലെ പോഷ​ക​സ​മൃ​ദ്ധ​വും രുചി​ക​ര​വും ഔഷധ​ഗു​ണ​മു​ള്ള​തു​മായ വേറെ എത്ര ഭക്ഷണപ​ദാർഥ​ങ്ങ​ളുണ്ട്‌? കഴിഞ്ഞ​കാ​ല​ങ്ങ​ളിൽ തേനീ​ച്ച​ക​ളെ​യും തേനീ​ച്ച​വ​ളർത്ത​ലു​കാ​രെ​യും സംരക്ഷി​ക്കു​ന്ന​തി​നുള്ള പ്രത്യേക നിയമങ്ങൾ രൂപീ​ക​രി​ച്ച​തി​ന്റെ കാരണം നമുക്കു മനസ്സി​ലാ​ക്കാ​വു​ന്ന​തേ​യു​ള്ളൂ. തേനീച്ച കൂടു​കൂ​ട്ടി​യി​രി​ക്കുന്ന മരങ്ങൾക്കോ അവയുടെ കൂടു​കൾക്കോ കേടു​വ​രു​ത്തു​ന്ന​വർക്കു കനത്ത പിഴയോ മരണശിക്ഷ പോലു​മോ വിധി​ച്ചി​രു​ന്നു. അതേ, തേൻ മനുഷ്യന്‌ തേനീ​ച്ച​യു​ടെ വിലപ്പെട്ട സമ്മാന​മാണ്‌, അവയുടെ സ്രഷ്ടാ​വി​നു ബഹുമ​തി​യും.

[അടിക്കു​റി​പ്പു​കൾ]

[16-ാം പേജിലെ ചതുരം/ചിത്രം]

തേൻ ചേർത്തുള്ള പാചകം

തേനിന്‌ പഞ്ചസാ​ര​യെ​ക്കാൾ മധുര​മുണ്ട്‌. അതു​കൊണ്ട്‌ പഞ്ചസാ​ര​യ്‌ക്കു പകരം തേൻ ഉപയോ​ഗി​ക്കു​മ്പോൾ പഞ്ചസാ​ര​യു​ടെ പകുതി​മു​തൽ മുക്കാൽ ഭാഗം​വ​രെ​യുള്ള അളവിൽ ചേർത്താൽ മതി. തേനിൽ 18 ശതമാ​ന​ത്തോ​ളം വെള്ളമാ​യ​തി​നാൽ തേൻ ചേർത്തു പാകം ചെയ്യു​മ്പോൾ അതിന​നു​സ​രി​ച്ചു ദ്രാവ​ക​ങ്ങ​ളു​ടെ അളവു കുറയ്‌ക്കുക. പാചക​ത്തിൽ ദ്രാവ​ക​ങ്ങ​ളൊ​ന്നും ചേരു​വ​യാ​യി​ട്ടി​ല്ലെ​ങ്കിൽ ഒരു കപ്പ്‌ തേനിന്‌ രണ്ടു ടേബിൾസ്‌പൂൺ മാവ്‌ വീതം ചേർക്കുക. ബേക്ക്‌ ചെയ്‌തെ​ടു​ക്കു​ന്ന​വ​യിൽ ഒരു കപ്പ്‌ തേനിന്‌ അര ടീസ്‌പൂൺ എന്ന കണക്കിൽ ബേക്കിങ്‌ സോഡ ചേർക്കണം, ചൂട്‌ 15 ഡിഗ്രി സെൽഷ്യസ്‌ കുറയ്‌ക്കു​ക​യും വേണം.

[കടപ്പാട്‌]

National Honey Board

[16-ാം പേജിലെ ചിത്രം]

പൂന്തേൻ തേടുന്ന തേനീച്ച

[16, 17 പേജു​ക​ളി​ലെ ചിത്രം]

തേനട

[17-ാം പേജിലെ ചിത്രം]

തേനീച്ചകളുടെ ഒരു കോളനി

[17-ാം പേജിലെ ചിത്രം]

ഒരു തേനീ​ച്ച​വ​ളർത്ത​ലു​കാ​രൻ കൂട്ടി​നു​ള്ളി​ലെ ഒരു ചട്ടം പരി​ശോ​ധി​ക്കു​ന്നു