വായന​ക്കാ​രിൽനി​ന്നുള്ള ചോദ്യ​ങ്ങൾ

ബൈബിളിൽ പരാമർശി​ച്ചി​രി​ക്കുന്ന ഫെലി​സ്‌ത്യർ ആരായി​രു​ന്നു?

ഫെലി​സ്‌ത്യർ എന്നറി​യ​പ്പെ​ടുന്ന ഒരു ജനത്തെ ബൈബിൾ കൂടെ​ക്കൂ​ടെ പരാമർശി​ക്കു​ന്നുണ്ട്‌. ദൈവ​ത്തി​ന്റെ പുരാതന ജനത വാഗ്‌ദ​ത്ത​ദേശം കയ്യടക്കി​യ​പ്പോൾ കനാനിൽ ജീവി​ച്ചി​രു​ന്ന​വ​രാ​യി​രു​ന്നു ഫെലി​സ്‌ത്യർ. ദീർഘ​കാ​ല​ത്തോ​ളം ഈ പുരാതന ഫെലി​സ്‌ത്യർ ദൈവ​ജ​നത്തെ എതിർത്തി​രു​ന്നു. ഇക്കാര്യം നന്നായി വ്യക്തമാ​ക്കു​ന്ന​താണ്‌ ഗോലി​യാത്ത്‌ എന്നു പേരായ രാക്ഷസീയ രണവീ​ര​നു​മാ​യുള്ള ദാവീ​ദി​ന്റെ ഏററു​മു​ട്ട​ലി​നെ​ക്കു​റി​ച്ചുള്ള വിവരണം.—1 ശമൂവേൽ 17:1-3, 23-53.

പുരാതന ഫെലി​സ്‌ത്യർ കഫ്‌തോ​റിൽനി​ന്നു കനാന്റെ തെക്കു​പ​ടി​ഞ്ഞാ​റെ തീര​ത്തേക്കു കുടി​യേ​റി​പ്പാർത്തു​വെന്നു ബൈബിൾ സൂചി​പ്പി​ക്കു​ന്നു. (യിരെ​മ്യാ​വു 47:4) കഫ്‌തോർ എവി​ടെ​യാ​യി​രു​ന്നു? ദി ഇൻറർനാ​ഷണൽ സ്‌ററാൻഡേഡ്‌ ബൈബിൾ എൻ​സൈ​ക്ലോ​പീ​ഡിയ (1979) ഇങ്ങനെ രേഖ​പ്പെ​ടു​ത്തു​ന്നു: “കൃത്യ​മാ​യി പറയാൻ മതിയായ തെളി​വു​ക​ളി​ല്ലെ​ങ്കി​ലും, തീർച്ച​യാ​യും ഏററവും സാധ്യ​ത​യുള്ള സ്ഥലമായി ഇപ്പോൾ പണ്ഡിതൻമാർ വിരൽചൂ​ണ്ടു​ന്നതു ക്രേത്ത ദ്വീപി​ലേ​ക്കാണ്‌ (അല്ലെങ്കിൽ സാംസ്‌കാ​രി​ക​മാ​യി ഒന്നായി​രി​ക്കുന്ന ക്രേത്ത​യും ഏജിയൻ ദ്വീപു​ക​ളും ഉൾപ്പെ​ടെ​യുള്ള സ്ഥലത്തേ​ക്കാണ്‌).”—വാല്യം 1, പേജ്‌ 610.

ഇതി​നോ​ടു​ള്ള യോജി​പ്പിൽ വിശുദ്ധ തിരു​വെ​ഴു​ത്തു​ക​ളു​ടെ പുതി​യ​ലോക ഭാഷാ​ന്ത​ര​ത്തിൽ ആമോസ്‌ 9:7 വായി​ക്കു​ന്നത്‌ ഇങ്ങനെ​യാണ്‌: “‘അല്ലയോ ഇസ്രാ​യേൽ മക്കളേ, നിങ്ങൾ എനിക്കു കൂശ്യ മക്കളെ​പ്പോ​ലെ അല്ലയോ?’ എന്നു യഹോ​വ​യു​ടെ അരുള​പ്പാട്‌. ‘ഞാൻ ഇസ്രാ​യേ​ലി​നെ ഈജി​പ്‌തിൽനി​ന്നും ഫെലി​സ്‌ത്യ​രെ ക്രേത്ത​യിൽനി​ന്നും സിറി​യ​ക്കാ​രെ കീറിൽനി​ന്നും കൊണ്ടു​വ​ന്നി​ല്ല​യോ?’”

സമു​ദ്ര​തീ​ര​വാ​സി​ക​ളായ ഈ പുരാതന ജനത ക്രേത്ത​യിൽനി​ന്നു കനാന്റെ ഒരു ഭാഗ​ത്തേക്കു കുടി​യേ​റി​യത്‌ എപ്പോ​ഴെന്ന്‌ അറിയില്ല. യോപ്പ​യ്‌ക്കും ഗാസയ്‌ക്കും ഇടയി​ലുള്ള തെക്കു​പ​ടി​ഞ്ഞാ​റെ കടൽത്തീ​ര​മായ ഈ കനാൻപ്ര​ദേ​ശ​മാണ്‌ ഫെലി​സ്‌ത്യ എന്ന്‌ അറിയ​പ്പെ​ടാ​നി​ട​യാ​യത്‌. അബ്രഹാ​മി​ന്റെ​യും ഇസഹാ​ക്കി​ന്റെ​യും നാളു​ക​ളിൽ അവർ സമു​ദ്ര​തീ​ര​പ്ര​ദേ​ശ​മായ ഈ താഴ്‌ന്ന സ്ഥലത്തു പാർത്തി​രു​ന്ന​താ​യി തോന്നു​ന്നു.—ഉല്‌പത്തി 20:1, 2; 21:32-34; 26:1-18.

ദൈവം വാഗ്‌ദത്തം ചെയ്‌ത ദേശത്ത്‌ ഇസ്രാ​യേൽ പ്രവേ​ശി​ച്ചു കഴിഞ്ഞ്‌ ദീർഘ​നാ​ളു​കൾക്കു​ശേ​ഷ​വും ഫെലി​സ്‌ത്യർ ആ മേഖല​യിൽ ഒരു ശക്തമായ സ്വാധീ​ന​മാ​യി​ത്തന്നെ തുടർന്നു. (പുറപ്പാ​ടു 13:17; യോശുവ 13:2; ന്യായാ​ധി​പൻമാർ 1:18, 19; 3:3, 4; 15:9, 10; 1 ശമൂവേൽ 4:1-11; 7:7-14; 13:19-23; 1 രാജാ​ക്കൻമാർ 16:15) യഹൂദാ രാജാ​വായ ഉസ്സിയാ​വി​ന്റെ ഭരണകാ​ല​ത്തോ​ള​വും ഫെലി​സ്‌ത്യർ തങ്ങളുടെ നഗരമായ ഗാത്ത്‌, യബ്‌നെ, അസ്‌തോദ്‌ എന്നിവി​ട​ങ്ങ​ളിൽ പാർത്തി​രു​ന്നു. (2 ദിനവൃ​ത്താ​ന്തം 26:6) അവരുടെ മററു പ്രമുഖ നഗരങ്ങ​ളാ​യി ബൈബിൾ വിവര​ണ​ങ്ങ​ളിൽ വേറെ​യും കാണു​ന്നുണ്ട്‌, എക്രോൻ, അഷ്‌കെ​ലോൻ, ഗാസ എന്നിവ.

മഹാനായ അലക്‌സാ​ണ്ടർ ഫെലി​സ്‌ത്യ നഗരമായ ഗാസ പിടി​ച്ച​ടക്കി, എന്നാൽ കാല​ക്ര​മേണ ഫെലി​സ്‌ത്യർ ഒരു വ്യതി​രിക്ത ജനമല്ലാ​താ​യി​ത്തീർന്നു​വെ​ന്നതു വ്യക്തമാണ്‌. ബിബ്ലിക്കൽ ആർക്കെ​യോ​ളജി റിവ്യൂ (1991 മേയ്‌⁄ജൂൺ)-ൽ പ്രൊ​ഫസ്സർ ലോറൻസ്‌ ഇ. സ്‌റേ​റാ​ജർ എഴുതി: “ഫെലി​സ്‌ത്യ​രും ബാബി​ലോ​നി​ലേക്കു നാടു​ക​ട​ത്ത​പ്പെട്ടു. . . . പ്രവാ​സ​ത്തി​ലായ ഫെലി​സ്‌ത്യർക്ക്‌ എന്തു സംഭവി​ച്ചു​വെ​ന്ന​തി​നൊ​ന്നും യാതൊ​രു രേഖക​ളു​മില്ല. നെബു​ക്ക​ഡ്‌നെ​സ്സ​റു​ടെ പിടി​ച്ച​ട​ക്ക​ലി​നു​ശേഷം അഷ്‌കെ​ലോ​നിൽത്തന്നെ താമസി​ച്ച​വർക്ക്‌ വംശീയ സ്വഭാ​വ​വും നഷ്ടപ്പെട്ടു. അതോടെ അവർ ചരി​ത്ര​ത്തി​ന്റെ പിന്നാ​മ്പു​റ​ങ്ങ​ളി​ലാ​യി.”

പാലസ്‌തീൻ എന്ന ആധുനിക നാമം ഉത്ഭവി​ച്ചതു ലത്തീൻ, ഗ്രീക്ക്‌ എന്നീ ഭാഷാ​പ​ദ​ങ്ങ​ളിൽനി​ന്നാണ്‌. ഇനിയും പുറ​കോ​ട്ടു ചെന്നാൽ അത്‌ എബ്രായ പദമായ “ഫെലി​സ്‌ത്യ”യിൽ എത്തുന്നു. അറബി ഭാഷയി​ലുള്ള ചില പരിഭാ​ഷകൾ “ഫെലി​സ്‌ത്യർ” എന്നതിന്‌ ഉപയോ​ഗി​ക്കുന്ന പദം ആധുനിക പാലസ്‌തീൻകാർക്ക്‌ ഉപയോ​ഗി​ക്കുന്ന പദവു​മാ​യി എളുപ്പം കൂടി​ക്കു​ഴഞ്ഞ്‌ ആശയക്കു​ഴപ്പം സൃഷ്ടി​ക്കു​ന്നു. എന്നിരു​ന്നാ​ലും, ടുഡേ​യ്‌സ്‌ അറബിക്‌ വേർഷൻ ഒരു വ്യത്യസ്‌ത അറബി വാക്കാണ്‌ ഉപയോ​ഗി​ക്കു​ന്നത്‌. അങ്ങനെ അതു പുരാതന ഫെലി​സ്‌ത്യ​രെ​യും ആധുനിക പാലസ്‌തീ​നെ​യും തമ്മിൽ വേർതി​രി​ച്ചു​പ​റ​യു​ന്നു.

[31-ാം പേജിലെ ചിത്രം]

അഷ്‌കെലോനിൽ കുറച്ചു നാശാ​വ​ശി​ഷ്ട​ങ്ങൾ

[ചിത്ര​ങ്ങൾക്കു കടപ്പാട്‌]

Pictorial Archive (Near Eastern History) Est.