എ.ഡി. 33-ലെ പെസഹയ്ക്കുവേണ്ടി പത്രോസും യോഹന്നാനും മുറി ഒരുക്കുന്നു
ക്രിസ്ത്യാനികളായി ജീവിക്കാം
സ്‌മാരകാചരണത്തിനു നിങ്ങൾ തയ്യാറായോ?
യേശു തന്റെ അവസാനത്തെ പെസഹ ആചരിക്കാൻ പോകുകയായിരുന്നു. മരണം തൊട്ടടുത്തെത്തിയിരുന്നതുകൊണ്ട്‌, ഈ പെസഹാഭക്ഷണം തന്റെ അപ്പോസ്‌തലന്മാരോടൊത്ത്‌ ഭക്ഷിക്കാനും കർത്താവിന്റെ അത്താഴം എന്ന പുതിയ ആചരണം ഏർപ്പെടുത്താനും യേശു പദ്ധതിയിട്ടിരുന്നു. അതിനാൽ ഈ പെസഹയ്‌ക്കു വളരെയധികം പ്രാധാന്യമുണ്ടായിരുന്നു. അതുകൊണ്ട്‌, അതിനുവേണ്ട മുറി ഒരുക്കാൻ യേശു പത്രോസിനെയും യോഹന്നാനെയും അയച്ചു. (ലൂക്ക 22:7-13; പുറംതാളിലെ ചിത്രം കാണുക.) മാർച്ച്‌ 27-നു നടക്കാൻപോകുന്ന സ്‌മാരകത്തിനുവേണ്ടി മുന്നമേ ഒരുങ്ങാൻ ഇതു നമ്മളെ ഓർമിപ്പിക്കുന്നു. പ്രസംഗകൻ, ചിഹ്നങ്ങൾ ഇങ്ങനെ പല കാര്യങ്ങളും സഭകൾ ഇതിനോടകം ക്രമീകരിച്ചിട്ടുണ്ടാകും. എങ്കിലും, വ്യക്തികൾ എന്ന നിലയിൽ സ്‌മാരകത്തിനു നമുക്ക്‌ എങ്ങനെ ഒരുങ്ങാം?
യേശുവിന്റെ ബലിയോടുള്ള നിങ്ങളുടെ നന്ദി ആഴമുള്ളതാക്കുക. സ്‌മാരകകാലത്തെ ബൈബിൾവായനാഭാഗങ്ങൾ വായിക്കുകയും ധ്യാനിക്കുകയും ചെയ്യുക. ദിനവാക്യപുസ്‌തകത്തിൽ അതിനുള്ള പട്ടിക കാണാം. വിശുദ്ധ തിരുവെഴുത്തുകൾ—പുതിയ ലോക ഭാഷാന്തരത്തിലെ അനുബന്ധം ബി12-ൽ കുറച്ചുകൂടെ വിശദമായ ഒരു പട്ടിക കൊടുത്തിട്ടുണ്ട്‌. (2020 ഏപ്രിൽ ലക്കം ജീവിത-സേവന യോഗത്തിനുള്ള പഠനസഹായിയും കൂടെ കാണുക.) കുടുംബാരാധനയിൽ ചർച്ച ചെയ്യാനായി മോചനവിലയുടെ പ്രാധാന്യത്തെക്കുറിച്ച്‌ പറയുന്ന വിവരങ്ങൾ കുടുംബങ്ങൾക്ക്‌ വാച്ച്‌ടവർ പ്രസിദ്ധീകരണ സൂചികയിലും (ഇംഗ്ലീഷ്‌) യഹോവയുടെ സാക്ഷികൾക്കുവേണ്ടിയുള്ള ഗവേഷണസഹായിയിലും കണ്ടെത്താവുന്നതാണ്‌.
സ്‌മാരകത്തിനു മറ്റുള്ളവരെയും ക്ഷണിക്കുക. ക്ഷണക്കത്തിന്റെ പ്രചാരണപരിപാടിയിൽ പരമാവധി ഉൾപ്പെടുക. നിങ്ങളുടെ മടക്കസന്ദർശനത്തിലുള്ളവർ, പഴയ ബൈബിൾവിദ്യാർഥികൾ, സുഹൃത്തുക്കൾ, ബന്ധുക്കൾ തുടങ്ങി നിങ്ങൾക്കു ക്ഷണിക്കാൻ കഴിയുന്നവരെക്കുറിച്ച്‌ ചിന്തിക്കുക. നിഷ്‌ക്രിയരെ ക്ഷണിക്കാൻ മൂപ്പന്മാർ പ്രത്യേകം ശ്രദ്ധിക്കണം. നിങ്ങൾ ക്ഷണിക്കുന്ന ചിലർ നിങ്ങളുടെ സഭാപ്രദേശത്തല്ല താമസിക്കുന്നതെങ്കിൽ, അവർ താമസിക്കുന്നിടത്ത്‌ സ്‌മാരകം നടക്കുന്ന സ്ഥലവും സമയവും അറിയാൻ, jw.org-ന്റെ തുടക്കം പേജിലെ ഞങ്ങളെക്കുറിച്ച്‌ എന്നതിൽ ക്ലിക്ക്‌ ചെയ്യുക, എന്നിട്ട്‌ “സ്‌മാരകം” തിരഞ്ഞെടുക്കുക.
സ്‌മാരകത്തിന്‌ ഒരുങ്ങാനായി നമുക്കു മറ്റെന്തുകൂടെ ചെയ്യാം?