പ്രിയ​പ്പെ​ട്ട​വരെ പരിച​രി​ക്കു​മ്പോൾ സന്തോഷം നിലനി​റു​ത്തു​ക

1-2. പ്രിയ​പ്പെ​ട്ട​വരെ പരിച​രി​ക്കു​ന്ന​വരെ യഹോവ എങ്ങനെ​യാ​ണു കാണു​ന്നത്‌? (സുഭാ​ഷി​തങ്ങൾ 19:17) (ചിത്ര​ങ്ങ​ളും കാണുക.)

കൊറി​യ​യിൽനി​ന്നുള്ള ജിൻ-യാൽ സഹോ​ദരൻ പറയുന്നു: “ഞാനും ഭാര്യ​യും കല്യാണം കഴിച്ചിട്ട്‌ 32 വർഷം കഴിഞ്ഞു. കഴിഞ്ഞ അഞ്ചു വർഷമാ​യി അവളുടെ എല്ലാ കാര്യ​ങ്ങ​ളും നോക്കു​ന്നതു ഞാനാണ്‌. അവൾക്കു പാർക്കിൻസൺസ്‌ അസുഖം ഉള്ളതു​കൊണ്ട്‌ അധികം അനങ്ങാൻ കഴിയില്ല. എന്റെ ഭാര്യ എനിക്കു വളരെ പ്രിയ​പ്പെ​ട്ട​വ​ളാണ്‌. അവളെ നോക്കു​ന്ന​തിൽ എനിക്കു സന്തോ​ഷ​മേ​യു​ള്ളൂ. രാത്രി അവൾ ഒരു പ്രത്യേക ബെഡ്ഡി​ലാണ്‌ ഉറങ്ങു​ന്നത്‌. ഞാനും അടുത്തു​ത​ന്നെ​യാ​യി കിടക്കും. ഞങ്ങൾ കൈകൾ ചേർത്തു​പി​ടിച്ച്‌ ഉറങ്ങും.”

² നിങ്ങൾ വളരെ സ്‌നേ​ഹി​ക്കുന്ന ആരെ​യെ​ങ്കി​ലും നിങ്ങൾക്കു ശുശ്രൂ​ഷി​ക്കേ​ണ്ട​താ​യു​ണ്ടോ? ഉദാഹ​ര​ണ​ത്തിന്‌, മാതാ​പി​താ​ക്ക​ളെ​യോ ഇണയെ​യോ കുട്ടി​യെ​യോ ഒരു സുഹൃ​ത്തി​നെ​യോ ഒക്കെ. ഉണ്ടെങ്കിൽ, അവരെ സഹായി​ക്കാൻ കിട്ടിയ ഈ അവസരത്തെ നിങ്ങൾ വളരെ വിലമ​തി​ക്കു​ന്നു​ണ്ടാ​കും. അതോ​ടൊ​പ്പം അവരെ ശുശ്രൂ​ഷി​ക്കു​മ്പോൾ നിങ്ങൾ യഹോ​വ​യോ​ടുള്ള ഭക്തി കാണി​ക്കു​ക​യും ആണ്‌. (1 തിമൊ. 5:4, 8; യാക്കോ. 1:27) എങ്കിലും ആരും കാണാത്ത പല പ്രശ്‌ന​ങ്ങ​ളും നിങ്ങൾ നേരി​ടു​ന്നു​ണ്ടാ​കാം. ചില​പ്പോൾ മറ്റുള്ളവർ നിങ്ങളു​ടെ പ്രശ്‌നങ്ങൾ കാര്യ​മാ​ക്കു​ന്നി​ല്ലെന്നു നിങ്ങൾക്കു തോന്നി​യേ​ക്കാം. പുറമേ ചിരി​ക്കു​ന്നു​ണ്ടെ​ങ്കി​ലും ഒറ്റയ്‌ക്കാ​യി​രി​ക്കു​മ്പോൾ നിങ്ങൾ കരയു​ക​യാ​യി​രി​ക്കും. (സങ്കീ. 6:6) ഇതൊ​ന്നും ആരും കാണു​ന്നി​ല്ലെ​ങ്കി​ലും യഹോവ കാണു​ന്നുണ്ട്‌. (പുറപ്പാട്‌ 3:7 താരത​മ്യം ചെയ്യുക.) നിങ്ങളു​ടെ കണ്ണീരും ത്യാഗ​ങ്ങ​ളും യഹോ​വ​യ്‌ക്കു വളരെ വില​പ്പെ​ട്ട​താണ്‌. (സങ്കീ. 56:8; 126:5) പ്രിയ​പ്പെ​ട്ട​വരെ സഹായി​ക്കാൻ നിങ്ങൾ ചെയ്യു​ന്ന​തെ​ല്ലാം യഹോവ ശ്രദ്ധി​ക്കു​ന്നു. അതെല്ലാം കാണു​മ്പോൾ യഹോവ നിങ്ങ​ളോ​ടു കടപ്പെ​ട്ടി​രി​ക്കു​ന്ന​താ​യി​ട്ടാണ്‌ യഹോ​വ​യ്‌ക്കു തോന്നു​ന്നത്‌. നിങ്ങൾക്കു പ്രതി​ഫലം തരു​മെന്നു ദൈവം ഉറപ്പു​ത​രു​ന്നു.—സുഭാ​ഷി​തങ്ങൾ 19:17 വായി​ക്കുക.

3. തേരഹി​നെ പരിച​രി​ക്കുന്ന കാര്യ​ത്തിൽ അബ്രാ​ഹാ​മി​നും സാറയ്‌ക്കും എന്തൊക്കെ ബുദ്ധി​മു​ട്ടു​കൾ നേരി​ട്ടി​ട്ടു​ണ്ടാ​കും?

³ പ്രിയ​പ്പെ​ട്ട​വരെ പരിച​രിച്ച പലരെ​യും കുറിച്ച്‌ ബൈബിൾ പറയു​ന്നുണ്ട്‌. ഉദാഹ​ര​ണ​ത്തിന്‌, അബ്രാ​ഹാ​മി​ന്റെ​യും സാറയു​ടെ​യും കാര്യ​മെ​ടു​ക്കുക. അവർ ഊർ ദേശം വിട്ട​പ്പോൾ അവരുടെ പിതാ​വായ തേരഹിന്‌ ഏതാണ്ട്‌ 200 വയസ്സു​ണ്ടാ​യി​രു​ന്നു. എങ്കിലും അദ്ദേഹ​വും അവരോ​ടൊ​പ്പം പുറ​പ്പെട്ടു. അവർ ഒരുമിച്ച്‌ ഹാരാൻവരെ ഏതാണ്ട്‌ 960 കിലോ​മീ​റ്റർ യാത്ര ചെയ്‌തു. (ഉൽപ. 11:31, 32) അബ്രാ​ഹാ​മും സാറയും തേരഹി​നെ വളരെ​യ​ധി​കം സ്‌നേ​ഹി​ച്ചി​രു​ന്നെ​ങ്കി​ലും ഇത്രയും പ്രായ​മുള്ള ഒരാളു​ടെ കാര്യങ്ങൾ നോക്കി അദ്ദേഹ​ത്തോ​ടൊ​പ്പം യാത്ര ചെയ്യു​ന്നത്‌ എത്ര ബുദ്ധി​മു​ട്ടുള്ള ഒരു കാര്യ​മാ​യി​രു​ന്നി​രി​ക്കും. അവർ ഒട്ടകത്തി​ന്റെ​യോ കഴുത​യു​ടെ​യോ പുറത്താ​യി​രി​ക്കും യാത്ര ചെയ്‌തി​രു​ന്നത്‌. അതു പ്രായ​മായ തേരഹിന്‌ ഒട്ടും എളുപ്പ​മാ​യി​രു​ന്നി​രി​ക്കില്ല. ആ സമയത്ത്‌ ചില​പ്പോ​ഴെ​ങ്കി​ലും അബ്രാ​ഹാ​മി​നും സാറയ്‌ക്കും വളരെ​യ​ധി​കം ക്ഷീണവും മടുപ്പും തോന്നി​യി​ട്ടു​ണ്ടാ​കും. എന്തുത​ന്നെ​യാ​യാ​ലും അവർക്ക്‌ ആവശ്യ​മായ ശക്തി യഹോവ കൊടു​ത്തു എന്നതിൽ സംശയ​മില്ല. അബ്രാ​ഹാ​മി​ന്റെ​യും സാറയു​ടെ​യും കാര്യ​ത്തിൽ എന്നപോ​ലെ യഹോവ നിങ്ങ​ളെ​യും താങ്ങു​ക​യും ബലപ്പെ​ടു​ത്തു​ക​യും ചെയ്യും.—സങ്കീ. 55:22.

4. ഈ ലേഖന​ത്തിൽ നമ്മൾ എന്തു ചർച്ച ചെയ്യും?

⁴ നിങ്ങൾക്കു സന്തോ​ഷ​മു​ണ്ടെ​ങ്കിൽ പ്രിയ​പ്പെ​ട്ട​വരെ പരിച​രി​ക്കു​ന്നതു കൂടുതൽ എളുപ്പ​മാ​യി​രി​ക്കും. (സുഭാ. 15:13) സാഹച​ര്യം എന്തുത​ന്നെ​യാ​യി​രു​ന്നാ​ലും നിങ്ങൾക്കു സന്തോ​ഷ​മു​ള്ള​വ​രാ​യി​രി​ക്കാൻ കഴിയും എന്ന്‌ ഓർക്കുക. (യാക്കോ. 1:2, 3) അത്തരം സന്തോഷം എങ്ങനെ വളർത്തി​യെ​ടു​ക്കാ​നാ​കും? ഒരു വിധം പ്രാർഥ​ന​യാണ്‌. സന്തോ​ഷി​ക്കാ​നുള്ള കാരണങ്ങൾ കണ്ടെത്താൻ സഹായി​ക്കണേ എന്ന്‌ യഹോ​വ​യോ​ടു പ്രാർഥി​ക്കുക. ഈ ലേഖന​ത്തിൽ, പ്രിയ​പ്പെ​ട്ട​വരെ പരിച​രി​ക്കു​ന്ന​വർക്കു സന്തോഷം നിലനി​റു​ത്താ​നാ​യി ചെയ്യാൻ കഴിയുന്ന വേറെ ചില കാര്യ​ങ്ങ​ളും നമ്മൾ നോക്കും. ഇനി മറ്റുള്ള​വർക്ക്‌ അവരെ എങ്ങനെ സഹായി​ക്കാ​മെ​ന്നും നമ്മൾ ചിന്തി​ക്കും. എന്നാൽ അതിനു മുമ്പ്‌, പ്രിയ​പ്പെ​ട്ട​വരെ പരിച​രി​ക്കു​ന്നവർ സന്തോഷം നിലനി​റു​ത്തേ​ണ്ടത്‌ എന്തു​കൊ​ണ്ടാ​ണെ​ന്നും അവരുടെ സന്തോഷം കവർന്നെ​ടു​ക്കുന്ന ചില കാര്യങ്ങൾ എന്തൊ​ക്കെ​യാ​ണെ​ന്നും നോക്കാം.

പരിച​രി​ക്കു​മ്പോൾ സന്തോഷം നഷ്ടപ്പെ​ട്ടേ​ക്കാം

5. പരിച​രി​ക്കു​ന്നവർ സന്തോഷം നിലനി​റു​ത്തേ​ണ്ടത്‌ എന്തു​കൊണ്ട്‌?

⁵ പ്രിയ​പ്പെ​ട്ട​വരെ പരിച​രി​ക്കു​ന്ന​വർക്കു സന്തോഷം നഷ്ടമാ​യാൽ അവർ പെട്ടെന്നു ക്ഷീണി​ച്ചു​പോ​കാൻ സാധ്യ​ത​യുണ്ട്‌. (സുഭാ. 24:10) അങ്ങനെ ക്ഷീണി​ച്ചു​പോ​യാൽ അവർ ദയയി​ല്ലാ​തെ ഇടപെ​ട്ടേ​ക്കാം; വിചാ​രി​ച്ചത്ര സഹായി​ക്കാ​നും പറ്റാ​തെ​വ​രും. അങ്ങനെ​യെ​ങ്കിൽ അവരുടെ സന്തോഷം നഷ്ടപ്പെ​ടു​ത്തുന്ന ചില കാര്യങ്ങൾ എന്തൊ​ക്കെ​യാണ്‌?

6. പരിച​രണം കൊടു​ക്കുന്ന ചിലർ വല്ലാതെ തളർന്നു​പോ​കു​ന്നത്‌ എന്തു​കൊണ്ട്‌?

⁶ പരിച​രി​ക്കു​ന്നവർ വല്ലാതെ തളർന്നു​പോ​യേ​ക്കാം. ലിയ എന്ന സഹോ​ദരി പറയുന്നു: “പ്രത്യേ​കിച്ച്‌ കുഴപ്പങ്ങൾ ഒന്നുമി​ല്ലാത്ത ദിവസ​ങ്ങ​ളിൽപ്പോ​ലും, പരിച​രി​ക്കു​ന്നതു നമ്മളെ മാനസി​ക​മാ​യി ക്ഷീണി​പ്പി​ച്ചേ​ക്കാം. മിക്ക ദിവസ​ത്തി​ന്റെ​യും അവസാനം പിന്നെ ഒന്നും ചെയ്യാ​നുള്ള ശക്തി എനിക്കു​ണ്ടാ​കില്ല. ഒരു മെസ്സേ​ജി​നു മറുപടി അയയ്‌ക്കാൻപോ​ലും തോന്നാ​റില്ല.” ഇനി മറ്റു ചിലർക്ക്‌ ആവശ്യ​ത്തി​നു വിശ്ര​മി​ക്കാ​നോ ചില​പ്പോ​ഴെ​ങ്കി​ലും ഉത്തരവാ​ദി​ത്വ​ങ്ങൾ ഒന്നുമി​ല്ലാ​തെ ഒന്നു സ്വസ്ഥമാ​യി ഇരിക്കാ​നോ പറ്റാ​തെ​വ​രു​ന്നു. ഈനസ്‌ സഹോ​ദരി പറയുന്നു: “എന്റെ ഭർത്താ​വി​ന്റെ അമ്മയെ ശുശ്രൂ​ഷി​ക്കേ​ണ്ട​തു​കൊണ്ട്‌ രാത്രി​ക​ളിൽ മിക്ക​പ്പോ​ഴും ഓരോ രണ്ടു മണിക്കൂർ കൂടു​മ്പോ​ഴും ഞാൻ എഴു​ന്നേൽക്കും. അതു​കൊണ്ട്‌ എനിക്ക്‌ ആവശ്യ​ത്തിന്‌ ഉറക്കം കിട്ടു​ന്നില്ല. ഭർത്താ​വും ഞാനും ഒരുമിച്ച്‌ ഒരു യാത്ര പോയിട്ട്‌ വർഷങ്ങ​ളാ​യി.” വേറെ ചിലർക്കു തങ്ങൾ പരിച​രി​ക്കു​ന്ന​വ​രു​ടെ അടുത്തു​നിന്ന്‌ ഒട്ടും മാറി നിൽക്കാൻ പറ്റാത്ത​തു​കൊണ്ട്‌ കൂട്ടു​കാ​രോ​ടൊ​പ്പം പുറത്ത്‌ പോകാ​നോ ചില ദിവ്യാ​ധി​പ​ത്യ​നി​യ​മ​നങ്ങൾ സ്വീക​രി​ക്കാ​നോ കഴിയാ​തെ​വ​രു​ന്നു. അങ്ങനെ ഇഷ്ടമുള്ള പലതും ചെയ്യാൻ പറ്റാ​തെ​വ​രു​മ്പോൾ അവർക്ക്‌ ഒറ്റപ്പെ​ട​ലും സങ്കടവും തോന്നി​യേ​ക്കാം.

7. പരിച​രി​ക്കുന്ന ചിലർക്കു കുറ്റ​ബോ​ധ​മോ സങ്കടമോ തോന്നു​ന്നത്‌ എന്തു​കൊണ്ട്‌?

⁷ പരിച​രി​ക്കു​ന്ന​വരെ കുറ്റ​ബോ​ധ​മോ സങ്കടമോ വേട്ടയാ​ടി​യേ​ക്കാം. ജെസ്സിക്ക എന്നൊരു സഹോ​ദരി പറയുന്നു: “ഡാഡിയെ കുറച്ചു​കൂ​ടി നന്നായി നോക്ക​ണ​മെന്ന്‌ എനിക്കു ചില​പ്പോൾ തോന്നാ​റുണ്ട്‌. ഞാൻ എനിക്കു​വേണ്ടി കുറച്ച്‌ സമയം മാറ്റി​വെ​ക്കു​മ്പോൾ ഞാൻ സ്വാർഥ​യാ​കു​ക​യാണ്‌ എന്ന്‌ എനിക്കു തോന്നും.” ജെസ്സി​ക്ക​യെ​പ്പോ​ലെ, പ്രിയ​പ്പെ​ട്ട​വരെ സഹായി​ക്കാ​നാ​യി തങ്ങൾ ചെയ്യു​ന്നതു പോരാ എന്ന കുറ്റ​ബോ​ധ​മാ​ണു ചിലർക്ക്‌. അതു​പോ​ലെ ആ വ്യക്തിയെ പരിച​രി​ക്കാൻ ഇനി തന്നെ​ക്കൊണ്ട്‌ ആകില്ല എന്നു ചില​പ്പോ​ഴൊ​ക്കെ ചിന്തി​ച്ചു​പോ​യതു കാരണം ചിലരു​ടെ മനസ്സാക്ഷി അവരെ കുറ്റ​പ്പെ​ടു​ത്തു​ന്നു. ഇനി, ദേഷ്യ​ത്തി​ന്റെ പുറത്ത്‌ വേദനി​പ്പി​ക്കുന്ന എന്തെങ്കി​ലും പറഞ്ഞു​പോ​യ​തു​കൊ​ണ്ടും കുറ്റ​ബോ​ധം ഉണ്ടാകാം. (യാക്കോ. 3:2) മറ്റു ചിലർക്ക്‌, ഒരിക്കൽ തങ്ങൾക്ക്‌ അറിയാ​മാ​യി​രുന്ന ചുറു​ചു​റു​ക്കും ആരോ​ഗ്യ​വും ഉള്ള ഒരു വ്യക്തിയെ നഷ്ടപ്പെ​ടു​ന്ന​തി​ന്റെ സങ്കടമാ​യി​രി​ക്കാം തോന്നു​ന്നത്‌. ബാർബറ എന്ന സഹോ​ദരി പറയുന്നു: “എന്റെ പ്രിയ​പ്പെട്ട സുഹൃ​ത്തി​ന്റെ ആരോ​ഗ്യം ഓരോ ദിവസ​വും ക്ഷയിക്കു​ന്നതു കാണു​മ്പോൾ എനിക്കു വല്ലാത്ത വേദന തോന്നു​ന്നു.”

8. ഏതാനും നന്ദിവാ​ക്കു​കൾ, പരിച​രി​ക്കു​ന്ന​വരെ എങ്ങനെ​യാ​ണു സ്വാധീ​നി​ക്കു​ന്ന​തെന്നു വ്യക്തമാ​ക്കുന്ന ഒരു അനുഭവം പറയുക.

⁸ പരിച​രി​ക്കു​ന്ന​വർക്കു മറ്റുള്ളവർ നന്ദി കാണി​ക്കു​ന്നി​ല്ലെന്നു തോന്നി​യേ​ക്കാം. എന്തു​കൊണ്ട്‌? കാരണം, അവരുടെ കഠിനാ​ധ്വാ​ന​ത്തി​നും ത്യാഗ​ങ്ങൾക്കും അധിക​മാ​രും നന്ദി പറയു​ക​യോ വിലമ​തി​പ്പു കാണി​ക്കു​ക​യോ ചെയ്യു​ന്നു​ണ്ടാ​കില്ല. കുറച്ച്‌ നന്ദി വാക്കു​കൾക്കു​തന്നെ അവർക്കു വലിയ ഊർജം പകരാ​നാ​കും. (1 തെസ്സ. 5:18) മെലീസ സഹോ​ദരി പറയുന്നു: “ചില സമയങ്ങ​ളിൽ ക്ഷീണവും നിരു​ത്സാ​ഹ​വും കാരണം ഞാൻ കരഞ്ഞു​പോ​യി​ട്ടുണ്ട്‌. എന്നാൽ ഞാൻ പരിച​രി​ക്കു​ന്നവർ എന്നോട്‌, ‘നീ ചെയ്യു​ന്ന​തിന്‌ ഒക്കെ ഒരുപാ​ടു നന്ദിയുണ്ട്‌’ എന്നു പറയു​മ്പോൾ അതു എന്നെ വളരെ​യ​ധി​കം സന്തോ​ഷി​പ്പി​ക്കും. അടുത്ത ദിവസം എഴു​ന്നേറ്റ്‌ അവർക്കു​വേണ്ടി എല്ലാ കാര്യ​ങ്ങ​ളും ചെയ്യാ​നുള്ള ശക്തി ആ വാക്കു​ക​ളിൽനിന്ന്‌ എനിക്കു കിട്ടും.” അമദു സഹോ​ദരൻ, നന്ദി വാക്കുകൾ തന്നെ എത്രമാ​ത്രം സ്വാധീ​നി​ക്കു​ന്നെന്നു വിശദീ​ക​രി​ക്കു​ന്നു. അദ്ദേഹ​ത്തോ​ടും ഭാര്യ​യോ​ടും ഒപ്പമാണ്‌ ഭാര്യ​യു​ടെ അനിയ​ത്തി​യു​ടെ മകൾ താമസി​ക്കു​ന്നത്‌. അവൾക്ക്‌ അപസ്‌മാ​ര​ത്തി​ന്റെ പ്രശ്‌ന​ങ്ങ​ളുണ്ട്‌. സഹോ​ദരൻ പറയുന്നു: “ഞങ്ങൾ എത്ര​ത്തോ​ളം ത്യാഗങ്ങൾ ചെയ്യു​ന്നു​ണ്ടെന്ന്‌ അവൾക്കു മുഴു​വ​നാ​യി മനസ്സി​ലാ​കു​ന്നു​ണ്ടാ​കില്ല. എങ്കിലും അവൾ നന്ദി പറയു​മ്പോ​ഴോ ‘ഐ ലവ്‌ യു’ എന്നു കുത്തി​ക്കു​റി​ക്കു​മ്പോ​ഴോ എന്റെ ഹൃദയം സന്തോ​ഷം​കൊണ്ട്‌ നിറയും.”

സന്തോഷം നിലനി​റു​ത്താൻ

9. പരിച​രി​ക്കു​ന്ന​വർക്ക്‌ എങ്ങനെ എളിമ​യു​ള്ള​വ​രാ​യി​രി​ക്കാം?

⁹ എളിമ​യു​ള്ള​വ​രാ​യി​രി​ക്കുക. (സുഭാ. 11:2) ആഗ്രഹി​ക്കു​ന്ന​തെ​ല്ലാം ചെയ്യാ​നുള്ള സമയവും ഊർജ​വും നമുക്ക്‌ ആർക്കും ഇല്ല. അതു​കൊണ്ട്‌ നമുക്ക്‌ എന്തൊക്കെ ചെയ്യാ​നാ​കും, ചെയ്യാ​നാ​കില്ല എന്ന കാര്യ​ത്തിൽ കൃത്യ​മായ ഒരു ധാരണ ഉണ്ടായി​രി​ക്കണം. ചില കാര്യ​ങ്ങ​ളോട്‌ “നോ” പറയേ​ണ്ടി​വ​ന്നേ​ക്കാം; അതു കുഴപ്പ​മില്ല. അതിലൂ​ടെ നിങ്ങൾ എളിമ​യു​ണ്ടെന്നു കാണി​ക്കു​ക​യാണ്‌. ഇനി മറ്റുള്ളവർ സഹായി​ക്കാൻ തയ്യാറാ​കു​മ്പോൾ സന്തോ​ഷ​ത്തോ​ടെ അതു സ്വീക​രി​ക്കുക. ജെയ്‌ എന്ന സഹോ​ദരൻ പറയുന്നു: “ഒരു ദിവസ​ത്തിൽ നമുക്കു ചെയ്യാൻ പറ്റുന്ന കാര്യ​ങ്ങൾക്കു പരിധി​യുണ്ട്‌. നിങ്ങളു​ടെ പരിമി​തി​കൾ മനസ്സി​ലാ​ക്കു​ന്ന​തും അതിന​പ്പു​റം പോകാ​തി​രി​ക്കു​ന്ന​തും സന്തോഷം നിലനി​റു​ത്താൻ സഹായി​ക്കും.”

10. നമ്മൾ പരിച​രി​ക്കുന്ന വ്യക്തി ഒരു പ്രത്യേ​ക​രീ​തി​യിൽ പെരു​മാ​റു​ന്ന​തി​ന്റെ കാരണം മനസ്സി​ലാ​ക്കേ​ണ്ടത്‌ എന്തു​കൊണ്ട്‌? (സുഭാ​ഷി​തങ്ങൾ 19:11)

¹⁰ കാരണം മനസ്സി​ലാ​ക്കുക. (സുഭാ​ഷി​തങ്ങൾ 19:11 വായി​ക്കുക.) ഒരു വ്യക്തി ദയയി​ല്ലാ​തെ ഇടപെ​ടു​ന്നത്‌ എന്തു​കൊ​ണ്ടാ​ണെന്ന്‌ മനസ്സി​ലാ​ക്കു​ന്നെ​ങ്കിൽ ആ സമയത്ത്‌ ശാന്തരാ​യി​രി​ക്കാൻ നമുക്കു കൂടുതൽ എളുപ്പ​മാ​യി​രി​ക്കും. ഗുരു​ത​ര​മായ ചില രോഗങ്ങൾ കാരണം ചിലർ ഇതുവരെ പെരു​മാ​റി​യി​ട്ടി​ല്ലാത്ത വിധത്തിൽ പെരു​മാ​റി​യേ​ക്കാം. (സഭാ. 7:7) ഉദാഹ​ര​ണ​ത്തിന്‌, പൊതു​വേ ചിന്തിച്ച്‌, ദയയോ​ടെ ഇടപെ​ട്ടി​രുന്ന ഒരാൾ നമ്മളോ​ടു ദേഷ്യ​പ്പെട്ട്‌ കയർത്ത്‌ സംസാ​രി​ച്ചേ​ക്കാം. അല്ലെങ്കിൽ അവർ വാശി​പി​ടി​ക്കാ​നോ എല്ലാത്തി​നും കുറ്റം പറയാ​നോ തുടങ്ങി​യേ​ക്കാം. ഇത്തരത്തിൽ ഗുരു​ത​ര​മായ രോഗ​മുള്ള ഒരാളെ നിങ്ങൾ ശുശ്രൂ​ഷി​ക്കു​ന്നു​ണ്ടെ​ങ്കിൽ അവരുടെ രോഗ​ത്തെ​ക്കു​റിച്ച്‌ കൂടുതൽ പഠിക്കു​ന്നതു നല്ലതാ​യി​രി​ക്കും. അവർ ഇത്തരത്തിൽ പെരു​മാ​റു​ന്നത്‌ അവരുടെ രോഗം കാരണ​മാണ്‌, അല്ലാതെ ആ വ്യക്തി അങ്ങനെ ആയതു​കൊ​ണ്ടല്ല എന്നു മനസ്സി​ലാ​ക്കാൻ അതു നിങ്ങളെ സഹായി​ക്കും.—സുഭാ. 14:29.

11. പരിച​രി​ക്കു​ന്നവർ ഏതു പ്രധാ​ന​പ്പെട്ട കാര്യ​ങ്ങൾക്കു ദിവസ​വും സമയം മാറ്റി​വെ​ക്കണം? (സങ്കീർത്തനം 132:4, 5)

¹¹ യഹോ​വ​യു​മാ​യുള്ള സൗഹൃദം ശക്തമാ​ക്കാൻ സമയം കണ്ടെത്തുക. ‘കൂടുതൽ പ്രാധാ​ന്യ​മുള്ള കാര്യ​ങ്ങൾക്കാ​യി’ ചില സാഹച​ര്യ​ങ്ങ​ളിൽ ചില കാര്യങ്ങൾ നമ്മൾ മാറ്റി​വെ​ക്കേ​ണ്ടി​വ​ന്നേ​ക്കാം. (ഫിലി. 1:10) യഹോ​വ​യു​മാ​യുള്ള ബന്ധം ശക്തമാ​ക്കു​ന്നത്‌ അത്തരത്തിൽ വളരെ പ്രാധാ​ന്യ​മുള്ള ഒരു കാര്യ​മാണ്‌. ദാവീദ്‌ രാജാവ്‌ യഹോ​വയെ ആരാധി​ക്കു​ന്ന​തി​നാണ്‌ ഒന്നാം സ്ഥാനം കൊടു​ത്തത്‌. (സങ്കീർത്തനം 132:4, 5 വായി​ക്കുക.) അതു​പോ​ലെ നിങ്ങളും ഓരോ ദിവസ​വും ബൈബിൾ വായി​ക്കാ​നും പ്രാർഥി​ക്കാ​നും സമയം മാറ്റി​വെ​ക്കേ​ണ്ടതു പ്രധാ​ന​മാണ്‌. അലീഷ എന്ന സഹോ​ദരി പറയുന്നു: “പ്രാർഥി​ക്കു​ന്ന​തും ആശ്വാസം നൽകുന്ന സങ്കീർത്ത​ന​ങ്ങ​ളെ​ക്കു​റിച്ച്‌ ധ്യാനി​ക്കു​ന്ന​തും സന്തോഷം നിലനി​റു​ത്താൻ എന്നെ സഹായി​ക്കു​ന്നു. പ്രാർഥ​ന​യാണ്‌ എന്നെ പിടി​ച്ചു​നി​റു​ത്തു​ന്നത്‌. ശാന്തമായ ഒരു മനസ്സി​നാ​യി ഞാൻ യഹോ​വ​യോട്‌ ഓരോ ദിവസ​വും പല തവണ പ്രാർഥി​ക്കാ​റുണ്ട്‌.”

12. മറ്റുള്ള​വരെ ശുശ്രൂ​ഷി​ക്കു​ന്നവർ സ്വന്തം ആരോ​ഗ്യ​വും ശ്രദ്ധി​ക്കേ​ണ്ടത്‌ എന്തു​കൊണ്ട്‌?

¹² നിങ്ങളു​ടെ ആരോ​ഗ്യ​ത്തി​നു വേണ്ടതു ചെയ്യുക. മറ്റുള്ള​വരെ ശുശ്രൂ​ഷി​ക്കു​ന്ന​വർക്ക്‌ എപ്പോ​ഴും തിരക്കാ​യ​തു​കൊണ്ട്‌ നല്ല ഭക്ഷണസാ​ധ​നങ്ങൾ നോക്കി വാങ്ങാ​നും പോഷ​ക​പ്ര​ദ​മായ ഭക്ഷണം ഉണ്ടാക്കാ​നും സമയം കുറവാ​യി​രി​ക്കും. എന്നാൽ നല്ല ഭക്ഷണ​ക്ര​മ​വും പതിവാ​യുള്ള വ്യായാ​മ​വും ശാരീ​രി​ക​വും മാനസി​ക​വും ആയ ആരോ​ഗ്യ​ത്തി​നു വളരെ പ്രധാ​ന​മാണ്‌. അതു​കൊണ്ട്‌ ഉള്ള സമയം നന്നായി ഉപയോ​ഗി​ച്ചു​കൊണ്ട്‌ നല്ല ആഹാരം കഴിക്കാ​നും വ്യായാ​മം ചെയ്യാ​നും ശ്രമി​ക്കുക. (എഫെ. 5:15, 16) അതു​പോ​ലെ ആവശ്യ​ത്തിന്‌ ഉറങ്ങാ​നും നോക്കണം. (സഭാ. 4:6) തലച്ചോ​റി​ലെ വിഷാം​ശങ്ങൾ പുറത്തു​ക​ള​യാൻ ഉറക്കം സഹായി​ക്കു​മെ​ന്നാണ്‌ പഠനങ്ങൾ കാണി​ക്കു​ന്നത്‌. ഐക്യ​നാ​ടു​ക​ളി​ലെ ബാനർ ഹെൽത്ത്‌ എന്ന സ്ഥാപനം പുറത്തി​റ​ക്കിയ ഒരു ലേഖനം പറയു​ന്നത്‌, ആവശ്യ​ത്തിന്‌ ഉറങ്ങു​ന്നത്‌ ഉത്‌കണ്‌ഠ കുറയ്‌ക്കാ​നും സമ്മർദം നിറഞ്ഞ സാഹച​ര്യ​ങ്ങൾ നേരി​ടാ​നും സഹായി​ച്ചേ​ക്കും എന്നാണ്‌. വിനോ​ദ​ത്തി​നാ​യും നിങ്ങൾ സമയം കണ്ടെത്തണം. (സഭാ. 8:15) സന്തോ​ഷ​ത്തോ​ടെ​യി​രി​ക്കാൻ തന്നെ സഹായി​ക്കു​ന്നത്‌ എന്താ​ണെന്ന്‌ ഒരു സഹോ​ദരി പറയുന്നു: “കാലാവസ്ഥ നല്ലതാ​യി​രി​ക്കു​മ്പോൾ ഞാനൊന്ന്‌ പുറ​ത്തേക്ക്‌ ഇറങ്ങി സൂര്യന്റെ ഇളം ചൂട്‌ ആസ്വദി​ക്കും. മാസത്തിൽ ഒരിക്ക​ലെ​ങ്കി​ലും ഒരു സുഹൃ​ത്തി​നോ​ടൊ​പ്പം പുറത്ത്‌ കറങ്ങാൻപോ​കാ​നും സമയം മാറ്റി​വെ​ക്കാ​റുണ്ട്‌.”

13. ചിരി​ക്കു​ന്നതു നല്ലതാ​യി​രി​ക്കു​ന്നത്‌ എന്തു​കൊണ്ട്‌? (സുഭാ​ഷി​തങ്ങൾ 17:22)

¹³ ചിരി​ക്കാ​നും തമാശ പറയാ​നും മറക്കരുത്‌. (സുഭാ​ഷി​തങ്ങൾ 17:22 വായി​ക്കുക; സഭാ. 3:1, 4) ചിരി​ക്കു​ന്നതു നമ്മുടെ ശരീര​ത്തി​നും മനസ്സി​നും നല്ലതാണ്‌. നമ്മൾ ഒരാളെ പരിച​രി​ക്കു​മ്പോൾ വിചാ​രി​ച്ച​തു​പോ​ലെ എപ്പോ​ഴും കാര്യങ്ങൾ പോക​ണ​മെ​ന്നില്ല. എന്നാൽ അത്തരം സാഹച​ര്യ​ങ്ങ​ളി​ലും തമാശ കണ്ടെത്താൻ ശ്രമി​ക്കു​ന്നെ​ങ്കിൽ അവ നേരി​ടാൻ നിങ്ങൾക്കു കൂടുതൽ എളുപ്പ​മാ​യി​രി​ക്കും. ഇനി നിങ്ങൾ ശുശ്രൂ​ഷി​ക്കുന്ന വ്യക്തി​യോട്‌ ഒപ്പം ചിരി​ക്കു​ന്നത്‌, നിങ്ങൾ തമ്മിലുള്ള ബന്ധം ശക്തമാ​ക്കും.

14. നല്ലൊരു സുഹൃ​ത്തി​നോട്‌ ഉള്ളുതു​റ​ക്കു​ന്നതു നിങ്ങളെ എങ്ങനെ സഹായി​ച്ചേ​ക്കാം?

¹⁴ നല്ലൊരു സുഹൃ​ത്തി​നോട്‌ ഉള്ളുതു​റ​ക്കുക. എന്തൊക്കെ ചെയ്‌താ​ലും ചില​പ്പോൾ നിങ്ങൾക്ക്‌ ഒരു മടുപ്പു​തോ​ന്നി​യേ​ക്കാം. അങ്ങനെ തോന്നു​മ്പോൾ, അമിത​മാ​യി പ്രതി​ക​രി​ക്കു​ക​യോ നിങ്ങളെ കുറ്റ​പ്പെ​ടു​ത്തു​ക​യോ ചെയ്യി​ല്ലെന്ന്‌ ഉറപ്പുള്ള ഒരു സുഹൃ​ത്തി​നോ​ടു നിങ്ങളു​ടെ വികാ​രങ്ങൾ തുറന്നു​പ​റ​യുക. (സുഭാ. 17:17) ആ വ്യക്തി നിങ്ങളെ ശ്രദ്ധി​ക്കു​ക​യും പ്രോ​ത്സാ​ഹി​പ്പി​ക്കു​ക​യും ചെയ്യും. ചില​പ്പോൾ അതു മതിയാ​യി​രി​ക്കും നിങ്ങൾക്കു സന്തോഷം വീണ്ടെ​ടു​ക്കാൻ.—സുഭാ. 12:25.

15. പറുദീ​സ​യെ​ക്കു​റിച്ച്‌ സംസാ​രി​ക്കു​ന്നതു സന്തോ​ഷ​മു​ള്ള​വ​രാ​യി​രി​ക്കാൻ സഹായി​ക്കു​ന്നത്‌ എങ്ങനെ?

¹⁵ പറുദീ​സ​യിൽ ഒരുമി​ച്ചുള്ള ജീവിതം ഭാവന​യിൽ കാണുക. പ്രായ​മാ​യ​വ​രെ​യോ രോഗി​ക​ളെ​യോ ശുശ്രൂ​ഷി​ക്കുക എന്ന ഉത്തരവാ​ദി​ത്വം താത്‌കാ​ലി​ക​മാണ്‌. അത്‌ യഹോ​വ​യു​ടെ ആദിമ ഉദ്ദേശ്യ​ത്തി​ന്റെ ഭാഗമാ​യി​രു​ന്നില്ല. (2 കൊരി. 4:16-18) ‘യഥാർഥ​ജീ​വി​തം’ വരാനി​രി​ക്കു​ന്ന​തേ​യു​ള്ളൂ. (1 തിമൊ. 6:19) പറുദീ​സ​യിൽ ഒരുമിച്ച്‌ ചെയ്യാൻ പോകുന്ന കാര്യ​ങ്ങ​ളെ​ക്കു​റിച്ച്‌ നിങ്ങളു​ടെ പ്രിയ​പ്പെ​ട്ട​വ​രോട്‌ സംസാ​രി​ക്കു​ന്നത്‌ സന്തോഷം നിലനി​റു​ത്താൻ സഹായി​ച്ചേ​ക്കും. (യശ. 33:24; 65:21) ഹെതർ എന്ന സഹോ​ദരി പറയുന്നു: “ഞാൻ പരിച​രി​ക്കു​ന്ന​വ​രോട്‌, ഭാവി​യിൽ ഒരുമിച്ച്‌ ചെയ്യാൻ പോകുന്ന പല കാര്യ​ങ്ങ​ളെ​ക്കു​റി​ച്ചും സംസാ​രി​ക്കാ​റുണ്ട്‌. അന്നു ഞങ്ങൾ ഒന്നിച്ച്‌ തയ്‌ക്കും, ഓടും, സൈക്കിൾ ചവിട്ടും, പുനരു​ത്ഥാ​ന​പ്പെ​ട്ടു​വ​രുന്ന പ്രിയ​പ്പെ​ട്ട​വർക്കു​വേണ്ടി ഭക്ഷണം ഉണ്ടാക്കും. ഇതെക്കു​റി​ച്ചെ​ല്ലാം ചിന്തി​ച്ചു​കൊണ്ട്‌ ഈ പ്രത്യാശ തന്ന യഹോ​വ​യോ​ടു ഞങ്ങൾ ഒരുമി​ച്ചി​രുന്ന്‌ നന്ദി പറയാ​റുണ്ട്‌.”

മറ്റുള്ള​വർക്ക്‌ എങ്ങനെ സഹായി​ക്കാം

16. പ്രിയ​പ്പെ​ട്ട​വരെ പരിച​രി​ക്കു​ന്നവർ നമ്മുടെ സഭയി​ലു​ണ്ടെ​ങ്കിൽ നമുക്ക്‌ എങ്ങനെ അവരെ സഹായി​ക്കാ​നാ​കും? (ചിത്ര​വും കാണുക.)

¹⁶ സ്വന്തം ആവശ്യ​ങ്ങൾക്കു സമയം കണ്ടെത്താൻ പരിച​രി​ക്കു​ന്ന​വരെ സഹായി​ക്കുക. അതിനാ​യി, അവർ ശുശ്രൂ​ഷി​ക്കു​ന്ന​വരെ കുറച്ച്‌ സമയം നോക്കാൻ സഭയിലെ സഹോ​ദ​ര​ങ്ങൾക്കു മുന്നോ​ട്ടു വരാനാ​കും. നമ്മൾ അങ്ങനെ ചെയ്യു​മ്പോൾ പരിച​രി​ക്കു​ന്ന​വർക്ക്‌ അൽപ്പം വിശ്ര​മി​ക്കാ​നും സ്വന്തം ആവശ്യ​ങ്ങൾക്കാ​യും സമയം കിട്ടും. (ഗലാ. 6:2) ഓരോ ആഴ്‌ച​യും അവരെ ആരു സഹായി​ക്കും എന്നതി​നുള്ള പട്ടിക ചില പ്രചാ​രകർ ഉണ്ടാക്കാ​റുണ്ട്‌. തളർന്നു​കി​ട​ക്കുന്ന തന്റെ ഭർത്താ​വി​നെ നോക്കുന്ന നഥാലിയ സഹോ​ദരി പറയുന്നു: “സഭയിലെ ഒരു സഹോ​ദരൻ ആഴ്‌ച​യിൽ ഒന്നോ രണ്ടോ തവണ എന്റെ ഭർത്താ​വി​നോ​ടൊ​പ്പം സമയം ചെലവ​ഴി​ക്കാ​നാ​യി വരും. അവർ ഒരുമിച്ച്‌ ശുശ്രൂഷ ചെയ്യും, വർത്തമാ​നം പറയും, സിനി​മകൾ കാണും. ഈ സമയം എന്റെ ഭർത്താ​വി​നു വളരെ​യ​ധി​കം ഇഷ്ടമാണ്‌. എനിക്കും അതു വലി​യൊ​രു സഹായ​മാണ്‌. എന്റെ സ്വന്തം കാര്യങ്ങൾ ചെയ്യാ​നും പുറത്ത്‌ ഒന്നു നടക്കാൻ പോകാ​നും ഒക്കെ അപ്പോൾ എനിക്കു പറ്റും.“ ഇനി ചില സാഹച​ര്യ​ങ്ങ​ളിൽ വയ്യാതി​രി​ക്കു​ന്ന​വരെ ഒരു രാത്രി നോക്കി​ക്കോ​ള്ളാം എന്നു നിങ്ങൾക്കു പറയാ​നാ​യേ​ക്കും. അങ്ങനെ​യാ​കു​മ്പോൾ പരിച​രി​ക്കു​ന്ന​വർക്ക്‌ ആ രാത്രി​യിൽ നന്നായി ഉറങ്ങാ​നാ​കു​മ​ല്ലോ.

17. മീറ്റി​ങ്ങി​ന്റെ സമയത്ത്‌ നമുക്ക്‌ എങ്ങനെ പരിച​രി​ക്കു​ന്ന​വരെ സഹായി​ക്കാം?

¹⁷ പരിച​രി​ക്കു​ന്ന​വരെ സഭാ​യോ​ഗ​ങ്ങ​ളു​ടെ സമയത്ത്‌ സഹായി​ക്കുക. പരിച​രണം നൽകു​ന്നവർ എപ്പോ​ഴും അതിന്റെ തിരക്കി​ലാ​യ​തു​കൊണ്ട്‌ മീറ്റി​ങ്ങു​കൾ, സമ്മേള​നങ്ങൾ, കൺ​വെൻ​ഷ​നു​കൾ തുടങ്ങി​യ​വ​യിൽനിന്ന്‌ അവർക്കു പൂർണ​പ്ര​യോ​ജനം നേടാ​നാ​കു​ന്നു​ണ്ടാ​കില്ല. അവരെ സഭയി​ലു​ള്ള​വർക്ക്‌ എങ്ങനെ സഹായി​ക്കാം? അവർ മീറ്റി​ങ്ങി​നു വരു​മ്പോൾ കുറച്ച്‌ സമയ​ത്തേ​ക്കോ അല്ലെങ്കിൽ മീറ്റി​ങ്ങി​ന്റെ സമയം മുഴു​വ​നാ​യോ പരിച​രണം വേണ്ടവ​രു​ടെ കൂടെ​യി​രി​ക്കാൻ നിങ്ങൾക്കു കഴി​ഞ്ഞേ​ക്കും. ഇനി പരിച​രണം വേണ്ടയാൾ മീറ്റി​ങ്ങി​നു നേരി​ട്ടു​വ​രാൻ പറ്റാത്ത അവസ്ഥയി​ലാ​ണെ​ങ്കി​ലോ? അപ്പോൾ നിങ്ങൾക്കു ചില​പ്പോ​ഴെ​ങ്കി​ലും അവരുടെ വീട്ടിൽ ചെന്ന്‌ ഓൺ​ലൈ​നാ​യി അവരോ​ടൊ​പ്പം മീറ്റിങ്ങ്‌ കൂടാ​നാ​കും. അതുവഴി അവരെ ശുശ്രൂ​ഷി​ക്കു​ന്ന​വർക്കു രാജ്യ​ഹാ​ളിൽ നേരി​ട്ടു​ചെന്ന്‌ മീറ്റിങ്ങ്‌ കൂടാൻ അവസരം കിട്ടും.

18. പരിച​രി​ക്കു​ന്ന​വർക്കു​വേണ്ടി നമുക്കു വേറെ എന്തൊക്കെ ചെയ്യാ​നാ​കും?

¹⁸ പരിച​രി​ക്കു​ന്ന​വരെ അഭിന​ന്ദി​ക്കുക, അവർക്കു​വേണ്ടി പ്രാർഥി​ക്കുക. ശുശ്രൂ​ഷി​ക്കു​ന്ന​വർക്കു പതിവാ​യി ഇടയസ​ന്ദർശനം നടത്താൻ മൂപ്പന്മാർ നല്ല ശ്രമം ചെയ്യുന്നു. (സുഭാ. 27:23) എന്നാൽ സഭയിലെ എല്ലാവർക്കും തങ്ങളുടെ സാഹച​ര്യം എന്തുത​ന്നെ​യാ​യി​രു​ന്നാ​ലും പരിച​രി​ക്കു​ന്ന​വർക്കു​വേണ്ടി ചെയ്യാൻ കഴിയുന്ന ചില കാര്യ​ങ്ങ​ളുണ്ട്‌. നമ്മൾ അവരെ സ്‌നേ​ഹി​ക്കു​ന്നു​ണ്ടെ​ന്നും അവർ ചെയ്യുന്ന കാര്യങ്ങൾ വളരെ​യ​ധി​കം വിലമ​തി​ക്കു​ന്നു​ണ്ടെ​ന്നും പതിവാ​യി അവരോ​ടു പറയാ​നാ​കും. ഇനി അവർക്കു​വേണ്ട ശക്തി കൊടു​ക്കണേ എന്നും സന്തോഷം നിലനി​റു​ത്താൻ സഹായി​ക്കണേ എന്നും യഹോ​വ​യോ​ടു പ്രാർഥി​ക്കാ​നും കഴിയും.—2 കൊരി. 1:11.

19. നമ്മൾ നോക്കി​യി​രി​ക്കുന്ന മഹത്തായ കാര്യങ്ങൾ എന്തൊ​ക്കെ​യാണ്‌?

¹⁹ പെട്ടെ​ന്നു​തന്നെ യഹോവ എല്ലാ മുഖങ്ങ​ളിൽനി​ന്നും കണ്ണീർ തുടച്ചു​ക​ള​യും; രോഗ​വും മരണവും പിന്നെ ഉണ്ടായി​രി​ക്കില്ല. (വെളി. 21:3, 4) “മുടന്തൻ മാനി​നെ​പ്പോ​ലെ ചാടും.” (യശ. 35:5, 6) പ്രായാ​ധി​ക്യ​ത്തി​ന്റെ ബുദ്ധി​മു​ട്ടു​ക​ളും രോഗി​ക​ളായ പ്രിയ​പ്പെ​ട്ട​വരെ ശുശ്രൂ​ഷി​ക്കു​ന്ന​തി​ന്റെ വേദന​യും “ആരു​ടെ​യും മനസ്സി​ലേക്കു” വരാത്ത പഴയ കാര്യ​ങ്ങ​ളാ​യി​ത്തീ​രും. (യശ. 65:17) മഹത്തായ ഈ ഭാവി​ക്കു​വേണ്ടി കാത്തി​രി​ക്കുന്ന ഈ സമയത്തും യഹോവ നമ്മളോ​ടൊ​പ്പം ഉണ്ടായി​രി​ക്കും. നമ്മൾ തുടർന്നും ശക്തിക്കാ​യി യഹോ​വ​യിൽ ആശ്രയി​ക്കു​ന്നെ​ങ്കിൽ “എല്ലാം സന്തോ​ഷ​ത്തോ​ടെ​യും ക്ഷമയോ​ടെ​യും സഹിക്കാൻ” യഹോവ നമ്മളെ സഹായി​ക്കും.—കൊലോ. 1:11.