ഉണർന്നിരിക്കുക!
രാഷ്‌ട്രീയം ആളുകളെ ഭിന്നിപ്പിക്കുന്നത്‌ എന്തുകൊണ്ട്‌?—ബൈബിളിനു പറയാനുള്ളത്‌
ലോകമെങ്ങുമുള്ള രാജ്യങ്ങളിൽ ആളുകളെ ഭിന്നിപ്പിക്കുന്ന ഒന്നായി മാറിയിരിക്കുകയാണ്‌ രാഷ്‌ട്രീയം. 2022-ൽ ഒരു ഗവേഷണകേന്ദ്രം (Pew Research Center) 19 രാജ്യങ്ങളിൽ നടത്തിയ സർവേ അനുസരിച്ച്‌ “ആ രാജ്യങ്ങളിലെ 65 ശതമാനം മുതിർന്നവരും പറയുന്നത്‌, അവരുടെ രാജ്യത്ത്‌ വ്യത്യസ്‌ത രാഷ്‌ട്രീയപാർട്ടികളെ പിന്തുണയ്‌ക്കുന്ന ആളുകൾക്കിടയിൽ വളരെ ശക്തമായ വിയോജിപ്പുകൾ ഉണ്ടെന്നാണ്‌.”
രാഷ്‌ട്രീയത്തിന്റെ പേരിലുള്ള ഇത്തരം ഭിന്നിപ്പുകൾ നിങ്ങളുടെ നാട്ടിലുണ്ടോ? എന്താണ്‌ അതിന്റെ കാരണം? അത്‌ പരിഹരിക്കാൻ പറ്റുമോ? അതെക്കുറിച്ച്‌ ബൈബിൾ എന്താണു പറയുന്നതെന്നു നോക്കാം.
ഭിന്നതയും ആളുകളുടെ മനോഭാവവും
നമ്മുടെ ഈ കാലത്തെ ബൈബിൾ വിശേഷിപ്പിക്കുന്നത്‌ ‘അവസാനകാലം’ എന്നാണ്‌. ഈ “അവസാനകാലത്ത്‌” ഐക്യം തകർക്കുന്ന തരത്തിലുള്ള മനോഭാവങ്ങൾ ആളുകൾ കാണിക്കുമെന്ന്‌ ബൈബിൾ മുൻകൂട്ടിപ്പറഞ്ഞു.
‘അവസാനകാലത്ത്‌ ബുദ്ധിമുട്ടു നിറഞ്ഞ സമയങ്ങൾ ഉണ്ടാകുമെന്നു മനസ്സിലാക്കിക്കൊള്ളുക. കാരണം മനുഷ്യർ സ്വസ്‌നേഹികളും ഒരു കാര്യത്തോടും യോജിക്കാത്തവരും ആയിരിക്കും.’—2 തിമൊഥെയൊസ്‌ 3:1-3.
എത്ര ശ്രമം നടത്തിയിട്ടും ഒരു മികച്ച ഭരണം കാഴ്‌ചവെക്കാൻ ഗവൺമെന്റുകൾക്കു കഴിയുന്നില്ല. അതിന്‌ ഒരു കാരണം അവർക്കിടയിലുള്ള അഭിപ്രായഭിന്നതയാണ്‌. അതുകൊണ്ടുതന്നെ അവർക്ക്‌ ഒന്നിച്ചുനിന്ന്‌ പൊതുജനങ്ങളുടെ പ്രശ്‌നങ്ങൾ പരിഹരിക്കുക ബുദ്ധിമുട്ടാണ്‌, പലപ്പോഴും അത്‌ അസാധ്യവുമാണ്‌. ബൈബിൾ പറഞ്ഞിരിക്കുന്നത്‌ എത്രയോ സത്യമാണ്‌ എന്നല്ലേ ഇതിലൂടെ തെളിയുന്നത്‌!
“മനുഷ്യൻ മനുഷ്യന്റെ മേൽ ആധിപത്യം നടത്തിയത്‌ . . . അവർക്കു ദോഷം ചെയ്‌തിരിക്കുന്നു.”—സഭാപ്രസംഗകൻ 8:9.
എങ്കിലും ബൈബിൾ ഒരു പരിഹാരം കാണിച്ചുതരുന്നുണ്ട്‌. സമൂഹത്തിലെ ഭിന്നതകളെല്ലാം മാറ്റാൻ കഴിവുള്ള ഒരു വ്യക്തി ഭരിക്കുന്ന ഗവൺമെന്റ്‌ വരുമെന്നു ബൈബിൾ പറയുന്നു.
കരുതലുള്ള, യോഗ്യനായ ഒരു നേതാവ്‌
പ്രശ്‌നങ്ങളെല്ലാം പരിഹരിക്കാൻ കഴിവുള്ള അതുല്യനായ ഒരു നേതാവിനെപ്പറ്റി ബൈബിൾ പറയുന്നു. യേശുക്രിസ്‌തുവാണ്‌ അത്‌. യേശുവിന്‌ ശക്തിയുണ്ട്‌, അധികാരമുണ്ട്‌, മനുഷ്യർക്കിടയിൽ ഐക്യവും സമാധാനവും കൊണ്ടുവരാനുള്ള ആഗ്രഹവുമുണ്ട്‌.
“അവന്റെ കാലത്ത്‌ നീതിമാന്മാർ തഴച്ചുവളരും; . . . സമാധാനസമൃദ്ധിയുണ്ടാകും.”—സങ്കീർത്തനം 72:7.
“സകല ജനതകളും അവനെ സേവിക്കും.”—സങ്കീർത്തനം 72:11.
എല്ലാം തികഞ്ഞ ഒരു നേതാവാണ്‌ യേശു. കാരണം യേശുവിന്‌ ആളുകളോട്‌ സ്‌നേഹമുണ്ട്‌, അവരെ സഹായിക്കാനുള്ള ആഗ്രഹവുമുണ്ട്‌, പ്രത്യേകിച്ചും അനീതി അനുഭവിക്കുന്ന ആളുകളെ.
“സഹായത്തിനായി കേഴുന്ന ദരിദ്രനെ അവൻ രക്ഷിക്കും; എളിയവനെയും ആരോരുമില്ലാത്തവനെയും അവൻ വിടുവിക്കും. എളിയവനോടും ദരിദ്രനോടും അവനു കനിവ്‌ തോന്നും; പാവപ്പെട്ടവന്റെ ജീവനെ അവൻ രക്ഷിക്കും. അടിച്ചമർത്തലിനും അക്രമത്തിനും ഇരയാകുന്നവരെ അവൻ മോചിപ്പിക്കും.”—സങ്കീർത്തനം 72:12-14.
ദൈവരാജ്യത്തെക്കുറിച്ച്‌, അതായത്‌ യേശുവിന്റെ നേതൃത്വത്തിലുള്ള സ്വർഗീയഗവൺമെന്റിനെക്കുറിച്ച്‌ കൂടുതൽ പഠിക്കുക. ആ ഭരണത്തെ എങ്ങനെ പിന്തുണയ്‌ക്കാമെന്നും അതിൽനിന്ന്‌ എങ്ങനെ പ്രയോജനം നേടാമെന്നും അറിയാൻ . . .
എന്താണ്‌ ദൈവരാജ്യം? എന്ന വീഡിയോ കാണുക.
“ദൈവരാജ്യം—അഴിമതിയില്ലാത്ത ഗവൺമെന്റ്‌” എന്ന ലേഖനം വായിക്കുക.