നാം ദൈവ​ത്തോട്‌ എങ്ങനെ പ്രാർഥി​ക്കണം?

പ്രാർഥന സംബന്ധിച്ച്‌ യേശു​വി​ന്റെ ഒരു ശിഷ്യൻ നിർദേശം തേടി​യ​പ്പോൾ, അതു നൽകാൻ യേശു വിസമ്മ​തി​ച്ചില്ല. ലൂക്കാ 11:2-4 പറയു​ന്ന​പ്ര​കാ​രം, അവൻ ഇങ്ങനെ മറുപടി നൽകി: “നിങ്ങൾ ഇങ്ങനെ പ്രാർത്‌ഥി​ക്കു​വിൻ. പിതാവേ, അങ്ങയുടെ നാമം പൂജി​ത​മാ​ക​ണമേ. അങ്ങയുടെ രാജ്യം വരണമേ; അന്നന്നു​വേണ്ട ആഹാരം ഓരോ ദിവസ​വും ഞങ്ങൾക്കു നല്‌ക​ണമേ. ഞങ്ങളുടെ പാപങ്ങൾ ഞങ്ങളോ​ടു ക്ഷമിക്ക​ണമേ, എന്തെന്നാൽ ഞങ്ങളുടെ കടക്കാ​രോ​ടു ഞങ്ങളും ക്ഷമിക്കു​ന്നു. ഞങ്ങളെ പ്രലോ​ഭ​ന​ത്തിൽ ഉൾപ്പെ​ടു​ത്ത​രു​തേ.” (പി.ഒ.സി. ബൈബിൾ) കർത്താ​വി​ന്റെ പ്രാർഥന എന്നാണ്‌ അതു പൊതു​വേ അറിയ​പ്പെ​ടു​ന്നത്‌. അതു വളരെ​യ​ധി​കം വിവരങ്ങൾ പ്രദാനം ചെയ്യു​ന്നുണ്ട്‌.

ഒന്നാമ​താ​യി, പ്രാർഥ​നകൾ ആരെ അഭിസം​ബോ​ധന ചെയ്‌തു​കൊ​ണ്ടു​ള്ള​താ​യി​രി​ക്ക​ണ​മെന്നു പ്രാരംഭ വാക്കു നമ്മോടു പറയുന്നു—നമ്മുടെ പിതാ​വി​നെ. വേറെ ആരോ​ടെ​ങ്കി​ലു​മോ പ്രതി​മ​യോ​ടോ “പുണ്യ​വാ​ളന്മാ”രോടോ തന്നോ​ടു​പോ​ലു​മോ പ്രാർഥി​ക്കു​ന്ന​തിന്‌ യേശു ഒരുവി​ധ​ത്തി​ലും അനുവാ​ദം നൽകി​യി​ല്ലെ​ന്നതു ശ്രദ്ധി​ക്കുക. എന്തിന്‌, ദൈവം​ത​ന്നെ​യും ഇങ്ങനെ പ്രഖ്യാ​പി​ച്ചി​രു​ന്നു: “എന്റെ മഹത്ത്വം ഞാൻ മറ്റാർക്കും നല്‌കു​ക​യില്ല; എന്റെ സ്‌തുതി കൊത്തു​വി​ഗ്ര​ഹ​ങ്ങൾക്കു കൊടു​ക്കു​ക​യു​മില്ല.” (ഏശയ്യാ 42:8, പി.ഒ.സി. ബൈ.) തന്മൂലം, നമ്മുടെ സ്വർഗീയ പിതാ​വി​നോ​ട​ല്ലാ​തെ വേറെ എന്തി​നോ​ടെ​ങ്കി​ലു​മോ ആരോ​ടെ​ങ്കി​ലു​മോ പ്രാർഥി​ക്കു​ന്നത്‌ ആരാധകൻ എത്രതന്നെ ആത്മാർഥ​ത​യു​ള്ള​വ​നാ​യി​രു​ന്നാ​ലും അവൻ കേൾക്കു​ക​യില്ല. ബൈബി​ളിൽ യഹോ​വ​യാം ദൈവം മാത്രമേ “പ്രാർത്ഥന കേൾക്കു​ന്നവ”ൻ എന്നു വിളി​ക്ക​പ്പെ​ടു​ന്നു​ള്ളൂ.—സങ്കീർത്തനം 65:2.

“പുണ്യ​വാ​ള​ന്മാർ” ദൈവ​മു​മ്പാ​കെ മധ്യസ്ഥ​രാ​യി വർത്തി​ക്കുക മാത്ര​മാ​ണു ചെയ്യു​ന്ന​തെന്നു ചിലർ പറഞ്ഞേ​ക്കാം. എന്നാൽ യേശു​ത​ന്നെ​യും ഇപ്രകാ​രം പഠിപ്പി​ച്ചു: “ഞാൻ തന്നേ വഴിയും സത്യവും ജീവനും ആകുന്നു; ഞാൻ മുഖാ​ന്ത​ര​മ​ല്ലാ​തെ ആരും പിതാ​വി​ന്റെ അടുക്കൽ എത്തുന്നില്ല. നിങ്ങൾ എന്റെ നാമത്തിൽ അപേക്ഷി​ക്കു​ന്നതു ഒക്കെയും പിതാവു പുത്ര​നിൽ മഹത്വ​പ്പെ​ടേ​ണ്ട​തി​ന്നു ഞാൻ ചെയ്‌തു​ത​രും.” (യോഹ​ന്നാൻ 14:6, 13) അങ്ങനെ, പുണ്യ​വാ​ള​നെന്നു വിളി​ക്ക​പ്പെ​ടുന്ന ആർക്കെ​ങ്കി​ലും മധ്യസ്ഥന്റെ സ്ഥാനത്തു വർത്തി​ക്കാൻ കഴിയു​മെന്ന ആശയത്തെ യേശു നിരാ​ക​രി​ച്ചു. ക്രിസ്‌തു​വി​നെ​ക്കു​റി​ച്ചു പൗലോസ്‌ അപ്പോ​സ്‌തലൻ പറഞ്ഞ​തെ​ന്താ​ണെ​ന്നും ശ്രദ്ധി​ക്കുക: “അവൻ നമുക്കു​വേണ്ടി മരിക്കുക മാത്രമല്ല—അവൻ മരിച്ച​വ​രിൽനിന്ന്‌ ഉയർപ്പി​ക്ക​പ്പെട്ട്‌, ദൈവ​ത്തി​ന്റെ വലതു​ഭാ​ഗ​ത്തു​നി​ന്നു നമുക്കു​വേണ്ടി യാചി​ക്കു​ക​യും ചെയ്യുന്നു.” “തന്നിലൂ​ടെ ദൈവത്തെ സമീപി​ക്കുന്ന സകലർക്കും​വേണ്ടി മധ്യസ്ഥം വഹിക്കാൻ അവൻ എന്നെന്നും ജീവി​ച്ചി​രി​ക്കു​ന്നു.”—റോമർ 8:34; എബ്രായർ 7:25; കത്തോ​ലി​ക്കാ ജറുസ​ലേം ബൈബിൾ.

പൂജി​ത​മാ​ക്ക​പ്പെ​ടേണ്ട നാമം

യേശു​വി​ന്റെ പ്രാർഥ​ന​യി​ലെ അടുത്ത വാക്കുകൾ ഇതായി​രു​ന്നു: “അങ്ങയുടെ നാമം പൂജി​ത​മാ​ക​ണമേ.” ദൈവ​ത്തി​ന്റെ നാമം അറിയു​ക​യും അത്‌ ഉപയോ​ഗി​ക്കു​ക​യും ചെയ്യാതെ ഒരുവന്‌ എങ്ങനെ അതു പൂജി​ത​മാ​കാൻ അതായത്‌, വിശു​ദ്ധീ​ക​രി​ക്കാൻ അല്ലെങ്കിൽ മാറ്റി നിർത്താൻ കഴിയും? “പഴയ നിയമ”ത്തിൽ 6,000-ത്തിലധി​കം തവണ യഹോവ എന്ന വ്യക്തി​ഗ​ത​മായ പേരി​നാൽ ദൈവം തിരി​ച്ച​റി​യി​ക്ക​പ്പെ​ടു​ന്നുണ്ട്‌.

പുറപ്പാട്‌ 6:3-ന്റെ ഒരു അടിക്കു​റി​പ്പിൽ കത്തോ​ലി​ക്കാ ഡുവേ ഭാഷാ​ന്തരം ദൈവ​നാ​മം സംബന്ധിച്ച്‌ ഇങ്ങനെ പറയുന്നു: “ചില ആധുനി​കർ യഹോവ എന്ന നാമം കെട്ടി​ച്ച​മ​ച്ചി​രി​ക്കു​ന്നു . . . , എബ്രാ​യ​പാ​ഠ​ത്തി​ലെ [ദൈവ] നാമത്തി​ന്റെ യഥാർഥ ഉച്ചാരണം, ദീർഘ​നാ​ളത്തെ ഉപയോ​ഗ​രാ​ഹി​ത്യ​ത്താൽ ഇപ്പോൾ തീർത്തും നഷ്ടപ്പെ​ട്ടി​ക്കു​ക​യാണ്‌.” അതു​കൊണ്ട്‌, കത്തോ​ലി​ക്കാ ന്യൂ ജറുസ​ലേം ബൈബിൾ യാഹ്‌വെ എന്ന നാമം ഉപയോ​ഗി​ക്കു​ന്നു. ചില പണ്ഡിത​ന്മാർ ആ ഉച്ചാര​ണത്തെ അനുകൂ​ലി​ക്കു​ന്നു​ണ്ടെ​ങ്കി​ലും, ദിവ്യ​നാ​മ​ത്തി​ന്റെ ന്യായാ​നു​സൃ​ത​വും ദീർഘ​കാ​ല​മാ​യി ഉപയോ​ഗി​ച്ചു​വ​രു​ന്ന​തു​മായ മലയാളം ഉച്ചാരണം “യഹോവ” എന്നാണ്‌. മറ്റു ഭാഷകൾക്ക്‌ ദിവ്യ​നാ​മം ഉച്ചരി​ക്കു​ന്ന​തിന്‌ അവയു​ടേ​തായ രീതി​ക​ളുണ്ട്‌. ആ നാമം പൂജി​ക്ക​പ്പെ​ട​ത്ത​ക്ക​വണ്ണം നാം ഉപയോ​ഗി​ക്ക​ണ​മെ​ന്ന​താ​ണു പ്രധാന സംഗതി. യഹോവ എന്ന നാമം പ്രാർഥ​ന​യിൽ ഉപയോ​ഗി​ക്കാൻ നിങ്ങളു​ടെ സഭ നിങ്ങളെ പഠിപ്പി​ച്ചി​ട്ടു​ണ്ടോ?

പ്രാർഥി​ക്കാ​നുള്ള ഉചിത​മായ വിഷയങ്ങൾ

അടുത്ത​താ​യി, “അങ്ങയുടെ രാജ്യം വരേണമേ” എന്നു പ്രാർഥി​ക്കാൻ യേശു തന്റെ ശിഷ്യ​ന്മാ​രെ പഠിപ്പി​ച്ചു. മത്തായി​യു​ടെ സുവി​ശേഷം ഈ വാക്കുകൾ കൂട്ടി​ച്ചേർക്കു​ന്നു: “അങ്ങയുടെ ഹിതം സ്വർഗ്‌ഗ​ത്തി​ലെ​പ്പോ​ലെ ഭൂമി​യി​ലു​മാ​ക​ണമേ.” (മത്തായി 6:10, പി.ഒ.സി. ബൈ.) ദൈവ​രാ​ജ്യം യേശു​ക്രി​സ്‌തു​വി​ന്റെ കരങ്ങളി​ലുള്ള ഒരു ഗവണ്മെ​ന്റാണ്‌. (യെശയ്യാ​വു 9:6, 7) ബൈബിൾ പ്രവച​ന​മ​നു​സ​രിച്ച്‌, അതു പെട്ടെ​ന്നു​തന്നെ സകല മനുഷ്യ ഗവണ്മെ​ന്റു​ക​ളെ​യും നീക്കി​ക്ക​ള​യു​ക​യും ആഗോള സമാധാ​ന​ത്തി​ന്റെ ഒരു യുഗം ആനയി​ക്കു​ക​യും ചെയ്യും. (സങ്കീർത്തനം 72:1-7; ദാനീ​യേൽ 2:44; വെളി​പ്പാ​ടു 21:3-5) തന്മൂലം, സത്യ ക്രിസ്‌ത്യാ​നി​കൾ ദൈവ​രാ​ജ്യ​ത്തി​ന്റെ ആഗമനം തങ്ങളുടെ പ്രാർഥ​ന​യിൽ ആവർത്ത​ക​മായ ഒരു പ്രതി​പാ​ദ്യ​വി​ഷ​യ​മാ​ക്കു​ന്നു. അതു ചെയ്യാൻ നിങ്ങളു​ടെ സഭ നിങ്ങളെ പഠിപ്പി​ച്ചി​ട്ടു​ണ്ടോ?

നമ്മെ ബാധി​ക്കുന്ന വ്യക്തി​പ​ര​മായ കാര്യങ്ങൾ പ്രാർഥ​ന​യിൽ ഉൾപ്പെ​ടു​ത്താ​മെ​ന്നും യേശു വ്യക്തമാ​ക്കി​യെ​ന്നതു രസാവ​ഹ​മാണ്‌. അവൻ പറഞ്ഞു: “അന്നന്നു​വേണ്ട ആഹാരം ഓരോ ദിവസ​വും ഞങ്ങൾക്കു നല്‌ക​ണമേ. ഞങ്ങളുടെ പാപങ്ങൾ ഞങ്ങളോ​ടു ക്ഷമിക്ക​ണമേ. എന്തെന്നാൽ ഞങ്ങളുടെ കടക്കാ​രോ​ടു ഞങ്ങളും ക്ഷമിക്കു​ന്നു. ഞങ്ങളെ പ്രലോ​ഭ​ന​ത്തിൽ ഉൾപ്പെ​ടു​ത്ത​രു​തേ.” (ലൂക്കാ 11:3, 4, പി.ഒ.സി. ബൈ.) ദൈനം​ദിന കാര്യ​ങ്ങ​ളിൽ നമുക്കു ദൈവ​ഹി​തം തേടാൻ സാധി​ക്കു​മെന്ന്‌, നമ്മെ വേദനി​പ്പി​ക്കു​ന്ന​തോ നമ്മുടെ സമാധാ​നം കെടു​ത്തു​ന്ന​തോ ആയ ഏതുസം​ഗതി സംബന്ധി​ച്ചും നമുക്കു ദൈവത്തെ സമീപി​ക്കാ​നാ​വു​മെന്ന്‌ യേശു​വി​ന്റെ വാക്കുകൾ അർഥമാ​ക്കു​ന്നു. ഇങ്ങനെ ക്രമമാ​യി ദൈവ​ത്തോട്‌ അപേക്ഷി​ക്കു​ന്നത്‌ അവനി​ലുള്ള നമ്മുടെ ആശ്രയ​ത്വം വിലമ​തി​ക്കാൻ നമ്മെ സഹായി​ക്കു​ന്നു. അങ്ങനെ, നമ്മുടെ ജീവി​ത​ത്തിൽ അവനുള്ള സ്വാധീ​ന​ത്തെ​ക്കു​റി​ച്ചു നാം കൂടുതൽ ബോധ്യ​മു​ള്ള​വ​രാ​യി​ത്തീ​രു​ന്നു. നമ്മുടെ പാപങ്ങൾ പൊറു​ക്കു​ന്ന​തി​നു ദിവസേന ദൈവ​ത്തോട്‌ അപേക്ഷി​ക്കു​ന്നത്‌ അതു​പോ​ലെ​തന്നെ പ്രയോ​ജ​ന​ക​ര​മാണ്‌. അതിലൂ​ടെ നാം നമ്മുടെ ബലഹീ​ന​തകൾ സംബന്ധി​ച്ചു കൂടുതൽ ബോധ്യ​മു​ള്ള​വ​രാ​യി​ത്തീ​രു​ന്നു—മറ്റുള്ള​വ​രു​ടെ പോരാ​യ്‌മകൾ പൊറു​ക്കാൻ കൂടുതൽ സഹിഷ്‌ണു​ത​യു​ള്ള​വ​രും. പ്രലോ​ഭ​ന​ത്തിൽനി​ന്നു വിടു​ത​ലി​നാ​യി അപേക്ഷി​ക്കാ​നുള്ള യേശു​വി​ന്റെ അനുശാ​സ​ന​വും ഉചിത​മാണ്‌. വിശേ​ഷിച്ച്‌ ഈ ലോക​ത്തി​ന്റെ അധഃപ​തി​ച്ചു​വ​രുന്ന ധാർമി​ക​ത​യു​ടെ വീക്ഷണ​ത്തിൽ. ആ പ്രാർഥ​ന​യോ​ടു ചേർച്ച​യിൽ, ദുഷ്‌പ്ര​വൃ​ത്തി​യി​ലേക്കു നയിക്കാ​നി​ട​യുള്ള സാഹച​ര്യ​ങ്ങ​ളും സന്ദർഭ​ങ്ങ​ളും ഒഴിവാ​ക്കാൻ നാം ജാഗരൂ​ക​രാണ്‌.

അപ്പോൾപ്പി​ന്നെ, ദൈവത്തെ പ്രീതി​പ്പെ​ടു​ത്തുന്ന പ്രാർഥന നടത്തേ​ണ്ടതു സംബന്ധി​ച്ചു കർത്താ​വി​ന്റെ പ്രാർഥന നമ്മോടു വളരെ​യേറെ കാര്യങ്ങൾ പറയു​ന്നു​വെ​ന്ന​തിൽ അശേഷം സംശയ​മില്ല. എന്നാൽ നാം ആ പ്രാർഥന ക്രമമാ​യി വെറുതെ ആവർത്തി​ച്ചു ചൊല്ലാൻ യേശു ഉദ്ദേശി​ച്ചി​രു​ന്നോ?

പ്രാർഥ​ന​യെ​ക്കു​റി​ച്ചു കൂടു​ത​ലായ ബുദ്ധ്യു​പ​ദേ​ശം

പ്രാർഥ​ന​യെ​ക്കു​റിച്ച്‌ യേശു കൂടു​ത​ലായ നിർദേ​ശങ്ങൾ നൽകി. മത്തായി 6:5, 6-ൽ നാം ഇങ്ങനെ വായി​ക്കു​ന്നു: “നിങ്ങൾ പ്രാർത്ഥി​ക്കു​മ്പോൾ കപടഭ​ക്തി​ക്കാ​രെ​പ്പോ​ലെ ആകരുതു; അവർ മനുഷ്യർക്കു വിള​ങ്ങേ​ണ്ട​തി​ന്നു പള്ളിക​ളി​ലും തെരു​ക്കോ​ണു​ക​ളി​ലും നിന്നു​കൊ​ണ്ടു പ്രാർത്ഥി​പ്പാൻ ഇഷ്ടപ്പെ​ടു​ന്നു; . . . നീയോ പ്രാർത്ഥി​ക്കു​മ്പോൾ അറയിൽ കടന്നു വാതിൽ അടെച്ചു രഹസ്യ​ത്തി​ലുള്ള നിന്റെ പിതാ​വി​നോ​ടു പ്രാർത്ഥിക്ക; രഹസ്യ​ത്തിൽ കാണുന്ന നിന്റെ പിതാവു നിനക്കു പ്രതി​ഫലം തരും.” മറ്റുള്ള​വ​രിൽ മതിപ്പു​ള​വാ​ക്ക​ത്ത​ക്ക​വണ്ണം ദൃഷ്ടി​ഹാ​രി​യായ, പ്രകട​നാ​ത്മ​ക​മായ രീതി​യിൽ പ്രാർഥന അർപ്പി​ക്ക​രു​തെന്ന്‌ ഈ വാക്കുകൾ നമ്മെ പഠിപ്പി​ക്കു​ന്നു. ബൈബിൾ പ്രചോ​ദി​പ്പി​ക്കു​ന്ന​തു​പോ​ലെ, നിങ്ങൾ രഹസ്യ​ത്തിൽ യഹോ​വ​യു​ടെ മുമ്പാകെ നിങ്ങളു​ടെ ഹൃദയം പകരാ​റു​ണ്ടോ?—സങ്കീർത്തനം 62:8.

യേശു ഈ മുന്നറി​യി​പ്പും നൽകി: “നിങ്ങൾ പ്രാർഥി​ക്കു​മ്പോൾ വിജാ​തീ​യ​രെ​പ്പോ​ലെ അർഥമി​ല്ലാത്ത ധാരാളം വാക്കുകൾ ഉരുവി​ട​രുത്‌. അതിഭാ​ഷ​ണം​കൊ​ണ്ടു തങ്ങളുടെ പ്രാർഥന കേൾക്ക​പ്പെ​ടു​മെന്ന്‌ അവർ കരുതു​ന്നു. (മത്തായി 6:7, ഓശാന ബൈബിൾ) പ്രാർഥ​നകൾ മനപ്പാ​ഠ​മാ​ക്കു​ന്ന​തി​നെ യേശു അംഗീ​ക​രി​ച്ചി​ല്ലെന്നു വ്യക്തമാണ്‌—ഏതെങ്കി​ലും പുസ്‌ത​ക​ത്തിൽനിന്ന്‌ അവ വായി​ക്കു​ന്ന​തി​ന്റെ കാര്യ​മൊ​ട്ടു പറയു​ക​യും​വേണ്ട. അവന്റെ വാക്കുകൾ കൊന്ത​യു​ടെ ഉപയോ​ഗ​ത്തെ​യും നിരാ​ക​രി​ക്കു​ന്നു.

ഒരു കത്തോ​ലി​ക്കാ കുർബാ​ന​പ്പു​സ്‌തകം ഇങ്ങനെ സമ്മതി​ക്കു​ന്നു: “നന്ദി പറയാ​നോ സങ്കടസ​മ​യ​ങ്ങ​ളിൽ ആവശ്യ​മ​റി​യി​ക്കാ​നോ അല്ലെങ്കിൽ പതിവുള്ള നമ്മുടെ അനുദിന ആരാധ​ന​യി​ലോ നാം അവനി​ലേക്കു തിരി​യു​മ്പോൾ നമ്മിലു​ള​വാ​കുന്ന സഹജന്യ​മായ ചിന്തക​ളാ​യി​രി​ക്കാം ഏറ്റവും ഉത്തമമായ പ്രാർഥന.” യേശു​വി​ന്റെ തന്നെയും പ്രാർഥ​നകൾ സഹജന്യ​മാ​യി​രു​ന്നു, മനപ്പാ​ഠ​മാ​ക്കി​യ​വ​യാ​യി​രു​ന്നില്ല. ഉദാഹ​ര​ണ​ത്തിന്‌, യോഹ​ന്നാൻ 17-ാം അധ്യാ​യ​ത്തിൽ രേഖ​പ്പെ​ടു​ത്തി​യി​രി​ക്കുന്ന യേശു​വി​ന്റെ പ്രാർഥന വായി​ച്ചു​നോ​ക്കൂ. യഹോ​വ​യു​ടെ നാമം വിശു​ദ്ധീ​ക​രി​ക്ക​പ്പെ​ടു​ന്നതു കാണാ​നുള്ള യേശു​വി​ന്റെ ആഗ്രഹ​ത്തിന്‌ ഊന്നൽ നൽകി​ക്കൊണ്ട്‌ അതു മാതൃകാ പ്രാർഥ​ന​യോ​ടു പറ്റിനിൽക്കു​ന്നു. യേശു​വി​ന്റെ പ്രാർഥന സഹജന്യ​വും അങ്ങേയറ്റം ഹൃദയ​സ്‌പർശ​ക​വു​മാ​യി​രു​ന്നു.

ദൈവം കേൾക്കുന്ന പ്രാർഥ​ന​കൾ

മനപ്പാ​ഠ​മാ​ക്കിയ പ്രാർഥ​നകൾ ഉരുവി​ടാ​നോ “പുണ്യ​വാ​ളന്മാ”രോടോ പ്രതി​മ​ക​ളോ​ടോ പ്രാർഥി​ക്കാ​നോ കൊന്ത പോലുള്ള മതപര​മായ വസ്‌തു​ക്കൾ ഉപയോ​ഗി​ക്കാ​നോ നിങ്ങളെ പഠിപ്പി​ച്ചി​രി​ക്കു​ന്ന​പക്ഷം, യേശു വിവരിച്ച രീതി​യിൽ പ്രാർഥി​ക്കു​ന്നത്‌ ആശങ്കാ​ജ​ന​ക​മാ​ണെന്ന തോന്നൽ ആദ്യ​മൊ​ക്കെ നിങ്ങളിൽ ഉളവാ​യേ​ക്കാം. എന്നാൽ, മുഖ്യ സംഗതി ദൈവത്തെ—അവന്റെ നാമം, ഉദ്ദേശ്യം, വ്യക്തി​ത്വം എന്നിവ സഹിതം—അറിയു​ക​യെ​ന്ന​താണ്‌. ബൈബി​ളി​ന്റെ സമഗ്ര​മായ പഠനത്തി​ലൂ​ടെ നിങ്ങൾക്ക​തി​നു സാധി​ക്കും. (യോഹ​ന്നാൻ 17:3) ഇക്കാര്യ​ത്തിൽ നിങ്ങളെ സഹായി​ക്കാൻ യഹോ​വ​യു​ടെ സാക്ഷികൾ മനസ്സൊ​രു​ക്ക​മു​ള്ള​വ​രാണ്‌. എന്തിന്‌, “യഹോവ നല്ലവൻ എന്നു രുചി​ച്ചറി”യാൻ ലോക​വ്യാ​പ​ക​മാ​യി ദശലക്ഷ​ക്ക​ണ​ക്കി​നാ​ളു​കളെ അവർ സഹായി​ച്ചി​ട്ടുണ്ട്‌! (സങ്കീർത്തനം 34:8) ദൈവത്തെ കൂടുതൽ അറിയു​ന്തോ​റും പ്രാർഥ​ന​യിൽ അവനെ സ്‌തു​തി​ക്കാൻ നിങ്ങൾ കൂടുതൽ പ്രേരി​ത​രാ​കും. ഭക്ത്യാ​ദ​ര​വോ​ടു കൂടിയ പ്രാർഥ​ന​യിൽ നിങ്ങൾ യഹോ​വ​യോട്‌ അടുക്കു​ന്തോ​റും അവനു​മാ​യുള്ള നിങ്ങളു​ടെ ബന്ധം കൂടുതൽ ഉറ്റതാ​യി​ത്തീ​രും.

തന്മൂലം, ദൈവ​ത്തി​ന്റെ ആരാധ​ക​രെ​ല്ലാം “ഇടവി​ടാ​തെ പ്രാർത്ഥി”ക്കാൻ ഉദ്‌ബോ​ധി​പ്പി​ക്ക​പ്പെ​ട്ടി​രി​ക്കു​ന്നു. (1 തെസ്സ​ലൊ​നീ​ക്യർ 5:17) നിങ്ങളു​ടെ പ്രാർഥ​നകൾ യേശു​ക്രി​സ്‌തു​വി​ന്റെ നിർദേ​ശ​ങ്ങ​ളുൾപ്പെടെ, ബൈബി​ളി​നോ​ടു ചേർച്ച​യി​ലാ​ണെന്ന്‌ ഉറപ്പു​വ​രു​ത്തുക. അങ്ങനെ, നിങ്ങളു​ടെ പ്രാർഥ​ന​കൾക്കു ദൈവാം​ഗീ​കാ​ര​മു​ണ്ടെന്നു നിങ്ങൾക്ക്‌ ഉറപ്പു​ണ്ടാ​യി​രി​ക്കാൻ കഴിയും.

[7-ാം പേജിലെ ചിത്രം]

യഹോവയെക്കുറിച്ചു കൂടുതൽ അറിയു​ന്തോ​റും അവനോ​ടു ഹൃദയം​ഗ​മ​മാ​യി പ്രാർഥി​ക്കാൻ നാം കൂടുതൽ പ്രേരി​ത​രാ​കു​ന്നു