ധൈര്യ​ത്തോ​ടെ എന്നാൽ നയപൂർവം പ്രസം​ഗി​ക്കൽ

¹ “വചനം പ്രസം​ഗി​ക്കുക, സകല ദീർഘ​ക്ഷ​മ​യും പഠിപ്പി​ക്കൽ കലയും സഹിതം അനുകൂ​ല​കാ​ല​ത്തും പ്രതി​കൂ​ല​കാ​ല​ത്തും അടിയ​ന്തി​ര​ത​യോ​ടെ അതിൽ മുഴു​കി​യി​രി​ക്കുക. എന്തെന്നാൽ മനുഷ്യർ ആരോ​ഗ്യാ​വ​ഹ​മായ പഠിപ്പി​ക്കൽ പൊറു​ക്കു​ക​യി​ല്ലാത്ത ഒരു കാലഘട്ടം ഉണ്ടായി​രി​ക്കും” എന്ന്‌ അപ്പോ​സ്‌ത​ല​നായ പൗലോസ്‌ തിമൊ​ഥെ​യോ​സി​നെ ഉദ്‌ബോ​ധി​പ്പി​ച്ചു. (2 തിമൊ. 4:2, 3, NW) അന്ത്യനാ​ളു​ക​ളി​ലെ ദുർഘട സമയങ്ങ​ളി​ലേക്കു നാം കൂടുതൽ ആഴത്തിൽ പ്രവേ​ശി​ക്കു​മ്പോൾ വർധി​ച്ചു​വ​രുന്ന ഒരു കൂട്ടം ആളുകൾ ബൈബി​ളി​ന്റെ ആരോ​ഗ്യാ​വ​ഹ​മായ പഠിപ്പി​ക്കൽ സ്വീക​രി​ക്കാൻ മനസ്സി​ല്ലാ​ത്ത​വ​രാ​യി​ത്തീ​രു​ക​യാണ്‌. ചില​പ്പോൾ, നാം അവരുടെ മുമ്പാകെ അവതരി​പ്പി​ക്കുന്ന സത്യത്തെ അവർ കേവലം അവഗണി​ക്കു​ന്ന​തിൽനിന്ന്‌ ഈ മനോ​ഭാ​വം പ്രകട​മാണ്‌. മേൽപ്പറഞ്ഞ ബൈബിൾ ഭാഗം തുടർന്നു പറയു​ന്ന​തു​പോ​ലെ “തങ്ങളുടെ കാതു​കൾക്കു രസി​ക്കേ​ണ്ട​തി​നു തങ്ങൾക്കു​വേ​ണ്ടി​ത്തന്നെ ഉപദേ​ഷ്ടാ​ക്കൻമാ​രെ പെരു​ക്കാൻ” [NW] അവർ കൂടുതൽ ഇഷ്ടപ്പെ​ടു​ന്നു. എന്നിരു​ന്നാ​ലും, മററു സമയങ്ങ​ളിൽ ഉദ്ധതരും ആത്മനി​യ​ന്ത്ര​ണ​മി​ല്ലാ​ത്ത​വ​രും ഉഗ്രൻമാ​രും ആയിരി​ക്കു​ക​വഴി അവർ തിരു​വെ​ഴു​ത്തി​നെ നിവർത്തി​ക്കു​ന്നു. അതു നമ്മുടെ നിയോ​ഗം പൂർത്തീ​ക​രി​ക്കു​ന്നതു ദുഷ്‌ക​ര​മാ​ക്കി​ത്തീർക്കു​ന്നു. നാം ഈ വേല തുടരു​ക​യും, “പ്രതി​കൂ​ല​കാ​ല​ത്തും” അടിയ​ന്തി​ര​ത​യോ​ടെ അതിൽ മുഴു​കി​യി​രി​ക്കു​ക​യും ചെയ്യേ​ണ്ട​തു​കൊണ്ട്‌, ധൈര്യ​ത്തോ​ടെ എന്നാൽ നയപൂർവം നമുക്ക്‌ എങ്ങനെ പ്രസം​ഗി​ക്കാൻ കഴിയും?—2 തിമൊ. 3:1-3.

² എതിർപ്പ്‌ യഹോ​വ​യു​ടെ സാക്ഷി​കൾക്ക്‌ ഒട്ടും പുത്തരി​യല്ല. തന്റെ ദൈവ​ഭക്തി നിമിത്തം ഹാബേൽ കൊല്ല​പ്പെട്ട കാലം​മു​തൽ സാത്താന്റെ പിണയാ​ളി​ക​ളു​ടെ കരങ്ങളിൽ യഹോ​വ​യു​ടെ സത്യാ​രാ​ധകർ പീഡനം അനുഭ​വി​ച്ചി​ട്ടുണ്ട്‌. യേശു​വി​ന്റെ ശിഷ്യൻമാർ പീഡി​പ്പി​ക്ക​പ്പെ​ടു​മെന്നു സൂചി​പ്പി​ക്കുന്ന ധാരാളം പ്രവച​നങ്ങൾ തിരു​വെ​ഴു​ത്തു​ക​ളി​ലുണ്ട്‌. (മത്താ. 23:34) വിശേ​ഷിച്ച്‌ ഈ അന്ത്യകാ​ലത്ത്‌, തനിക്കു കഴിയു​ന്നി​ട​ത്തോ​ളം യഹോ​വ​യു​ടെ ദാസൻമാ​രെ വിഴു​ങ്ങാൻ ശ്രമി​ച്ചു​കൊണ്ട്‌ ഒരു അലറുന്ന സിംഹ​ത്തെ​പ്പോ​ലെ സാത്താൻ പെരു​മാ​റു​ന്ന​താ​യി നാം കണ്ടെത്തു​ന്നു. കാരണം “തനിക്കു അല്‌പ​കാ​ല​മേ​യു​ളളു എന്നു അറിഞ്ഞു​കൊ​ണ്ടു മഹാ​ക്രോ​ധ​ത്തോ​ടെ” അവൻ ഭൂമി​യു​ടെ സമീപത്തു കഴിയു​ക​യാണ്‌. (1 പത്രൊ. 5:8; വെളി. 12:12) അതേസ​മയം, പരി​ശോ​ധ​നാ​പ​ര​മായ അനുഭ​വങ്ങൾ നമുക്ക്‌ ഉണ്ടാകു​മെന്ന്‌ അറിയാ​മെ​ങ്കി​ലും കുഴപ്പം ക്ഷണിച്ചു​വ​രു​ത്താ​നോ പീഡന​ത്തി​ന്റെ ഗതിയിൽ അനാവ​ശ്യ​മാ​യി നമ്മേത്തന്നെ ആക്കി​വെ​ക്കാ​നോ നാം ആഗ്രഹി​ക്കു​ന്നില്ല. ‘സർപ്പങ്ങ​ളെ​പ്പോ​ലെ സൂക്ഷ്‌മ​ത​യു​ള​ള​വ​രാ​യി​രി​ക്കാ​നും’ നമ്മെ എതിർക്കുന്ന ‘മനുഷ്യ​രെ സൂക്ഷി​ച്ചു​കൊൾവാ​നും’ യേശു നമ്മെ ഉദ്‌ബോ​ധി​പ്പി​ച്ചു. അങ്ങനെ ആയിരി​ക്കാൻ നമുക്ക്‌ എങ്ങനെ കഴിയും?—മത്താ. 10:16, 17, NW.

³ യേശു​വി​ന്റെ മാതൃക: പ്രപഞ്ച​ത്തി​ലെ ഏററവും വലിയ സുവി​ശേ​ഷകൻ എന്നനി​ല​യിൽ ധൈര്യ​ത്തി​ന്റെ​യും നയത്തി​ന്റെ​യും കാര്യ​ത്തിൽ യേശു ഏതു മാതൃ​ക​യാ​ണു വെച്ചത്‌? ലാഭമു​ണ്ടാ​ക്കാ​നു​ളള ഒരു മാർഗ​മാ​യി യഹോ​വ​യു​ടെ നിയമത്തെ ഉപയോ​ഗി​ച്ചു​കൊണ്ട്‌ അതിൽനിന്ന്‌ അനുചി​ത​മായ നേട്ടമു​ണ്ടാ​ക്കാൻ ശ്രമിച്ച കച്ചവട​ക്കാ​രെ ആലയത്തിൽനി​ന്നു പുറത്താ​ക്കാൻ അവിടുന്ന്‌ അക്ഷരാർഥ​ത്തിൽ നടപടി സ്വീക​രിച്ച രണ്ടു സന്ദർഭങ്ങൾ നിങ്ങൾ ഓർക്കു​ന്നു​ണ്ടോ? (യോഹ. 2:13-17; മത്താ. 21:12, 13. ഏററവും മഹാനായ മനുഷ്യൻ പുസ്‌ത​ക​ത്തി​ലെ 16-ഉം 103-ഉം അധ്യാ​യങ്ങൾ കാണുക.) ശാസ്‌ത്രി​മാ​രു​ടെ​യും പരീശൻമാ​രു​ടെ​യും ആരാധ​ന​യി​ലെ കപടഭ​ക്തി​യും ആത്മാർഥ​ത​യി​ല്ലാ​യ്‌മ​യും നിമിത്തം അവരെ അവിടുന്ന്‌ എത്ര കൂടെ​ക്കൂ​ടെ അപലപി​ച്ചു—ചില​പ്പോൾ ദൃഷ്ടാ​ന്ത​ങ്ങ​ളാ​ലും ചില​പ്പോൾ തുറന്ന​ടി​ച്ചു​ളള വാക്കു​ക​ളാ​ലും.—മത്താ. 16:6, 12; അധ്യായം 23.

⁴ സമാന​മാ​യി ഇന്ന്‌, നാം ശുശ്രൂ​ഷ​യിൽ ധൈര്യ​മു​ള​ള​വ​രാ​യി​രി​ക്കേ​ണ്ട​തുണ്ട്‌. വ്യാജാ​രാ​ധ​ന​യു​ടെ മൂർത്ത​രൂ​പ​ങ്ങളെ അക്ഷരീ​യ​മാ​യി നശിപ്പി​ക്കാൻ നമുക്കു തീർച്ച​യാ​യും അധികാ​ര​മില്ല. അത്തരം ആരാധ​ന​യിൽ പങ്കെടു​ക്കുന്ന വ്യക്തി​കളെ നാം കുററം വിധി​ക്കു​ന്നു​മില്ല. എന്നാൽ വ്യാജത്തെ ഖണ്ഡിച്ചു നശിപ്പി​ക്കാൻ ഒരു വാളായി ദൈവ​വ​ച​നത്തെ ഉപയോ​ഗി​ക്കാൻ നാം എപ്പോ​ഴും സജ്ജരാണ്‌. (എഫെ. 6:17; എബ്രാ. 4:12) മനുഷ്യർക്കു നിത്യ​ജീ​വൻ കിട്ടാ​നു​ളള ഏകമാർഗം യഹോ​വയെ സത്യ​ത്തോ​ടും ആത്മാ​വോ​ടും കൂടെ സേവി​ക്കു​ന്ന​താ​ണെന്നു നാം ധൈര്യ​പൂർവം പ്രഖ്യാ​പി​ക്കു​ന്നു. മനുഷ്യ​രെ പ്രസാ​ദി​പ്പി​ക്കാ​നാ​യി നാം ഒരിക്ക​ലും ദൈവ​ത്തി​ന്റെ സന്ദേശ​ത്തിൽ വെളളം ചേർക്കു​ക​യോ, ഏതെങ്കി​ലും തരം മിശ്ര​വി​ശ്വാ​സ​പ​ര​മായ പ്രവർത്ത​ന​ങ്ങ​ളിൽ പങ്കെടു​ത്തു​കൊ​ണ്ടോ ഏതെങ്കി​ലും തരം വ്യാജാ​രാ​ധ​നയെ പിന്തു​ണ​ച്ചു​കൊ​ണ്ടോ നമ്മുടെ വിശ്വാ​സ​ങ്ങളെ അനുര​ഞ്‌ജ​ന​പ്പെ​ടു​ത്തു​ക​യോ ചെയ്യു​ന്നില്ല. ഈ ധൈര്യം നമ്മോടു യോജി​ക്കാത്ത വ്യക്തി​ക​ളു​മാ​യി നമ്മെ മിക്ക​പ്പോ​ഴും എതിർപ്പിൽ കൊ​ണ്ടെ​ത്തി​ക്കു​ന്നു. അപ്പോ​ഴോ?

⁵ നയമു​ള​ള​വ​രാ​യി​രി​ക്കൽ: ഒരിക്കൽക്കൂ​ടെ നമുക്കു യേശു​വി​ന്റെ ദൃഷ്ടാ​ന്ത​മെ​ടു​ക്കാം. ശബത്തിൽ ഒരു മമനു​ഷ്യ​ന്റെ വരണ്ട കൈ യേശു സുഖ​പ്പെ​ടു​ത്തു​മോ എന്നു കാണാൻ പരീശൻമാ​രും ശാസ്‌ത്രി​മാ​രും വിമർശ​ന​ദൃ​ഷ്ടി​യോ​ടെ തന്നെ നിരീ​ക്ഷി​ക്കു​ന്നു​ണ്ടെന്നു യേശു​വിന്‌ അറിയാ​മാ​യി​രുന്ന ഒരു സംഭവം ഓർക്കുക. യേശു ധൈര്യ​പൂർവം ആ മനുഷ്യ​നെ സിന്ന​ഗോ​ഗി​ന്റെ “നടുവി”ലേക്കു വിളിച്ചു സുഖ​പ്പെ​ടു​ത്തി​യി​ല്ലേ? എന്നാൽ, അവർ “ഭ്രാന്തു നിറഞ്ഞ​വ​രാ​യി” യേശു​വി​നെ കൊല്ലാൻ ഗൂഢാ​ലോ​ചന നടത്തി​യ​പ്പോൾ താൻ പീഡനം സഹി​ക്കേ​ണ്ട​താ​ണെന്നു ന്യായ​വാ​ദം ചെയ്‌തു​കൊണ്ട്‌ അവിടുന്ന്‌ അവി​ടെ​ത്തന്നെ നിന്നോ? ഇല്ല! “യേശു . . . അവിടം വിട്ടു​പോ​യി.”—മത്താ. 12:14-17; ലൂക്കൊ. 6:6-11. കൂടാതെ ഏററവും മഹാനായ മനുഷ്യൻ പുസ്‌ത​ക​ത്തി​ന്റെ 32-ഉം 33-ഉം അധ്യാ​യങ്ങൾ കൂടി കാണുക.

⁶ പരീശൻമാർ അവരുടെ പിതാ​വായ പിശാ​ചിൽനി​ന്നു​ള​ള​വ​രാണ്‌ എന്നു പറഞ്ഞു​കൊണ്ട്‌ ആലയത്തിൽവെച്ച്‌ അവിടുന്ന്‌ അവരെ ശക്തമായി അപലപിച്ച സമയം നിങ്ങൾ ഓർക്കു​ന്നു​ണ്ടോ? തന്നെ എറിയാൻ അവർ കല്ലുക​ളെ​ടു​ത്ത​പ്പോൾ അഹങ്കാ​ര​ത്തോ​ടെ അവിടെ നിന്നു​കൊ​ണ്ടു കല്ലേറു​കൊ​ള​ളാൻ അവിടുന്ന്‌ സ്വയം അനുവ​ദി​ച്ചില്ല. പകരം, അവിടുന്ന്‌ ഒളിക്കു​ക​യും പിന്നീട്‌ രഹസ്യ​മാ​യി ആലയം വിട്ടു​പോ​കു​ക​യും ചെയ്‌തു. (യോഹ. 8:37-59) യഹോ​വ​യു​മാ​യു​ളള തന്റെ ബന്ധത്തെ തുറന്നു​തന്നെ പ്രഖ്യാ​പി​ച്ച​പ്പോൾ യഹൂദൻമാർ “അവനെ എറിവാൻ പിന്നെ​യും കല്ലു എടുത്ത” അവസര​ത്തി​ലോ? അവിടുന്ന്‌ അവരോ​ടു ന്യായ​വാ​ദം ചെയ്യാൻ ശ്രമിച്ചു, എന്നാൽ “അവർ അവനെ പിന്നെ​യും പിടി​പ്പാൻ നോക്കി”യപ്പോൾ ഓടി​പ്പോ​കു​ന്നതു തന്റെ മാന്യ​ത​യ്‌ക്കു ചേർന്നതല്ല എന്നു വിചാ​രി​ക്കാ​തെ അവിടുന്ന്‌ ഓടു​ക​യും “അവരുടെ കയ്യിൽനി​ന്നു ഒഴിഞ്ഞു”പോകു​ക​യും ചെയ്‌തു. വാസ്‌ത​വ​ത്തിൽ ആ സന്ദർഭ​ത്തിൽ ആ പ്രവി​ശ്യ​തന്നെ വിട്ടു​പോ​കു​ന്നത്‌ ഉചിത​മാ​ണെന്ന്‌ അവിടുന്ന്‌ കണ്ടു.—യോഹ. 10:24-42; മത്താ. 10:23 താരത​മ്യ​പ്പെ​ടു​ത്തുക. ഏററവും മഹാനായ മനുഷ്യൻ പുസ്‌ത​ക​ത്തി​ന്റെ 69-ഉം 81-ഉം അധ്യാ​യങ്ങൾ കാണുക.

⁷ നമ്മുടെ പ്രദേ​ശത്ത്‌: രാജ്യ​ത്തെ​ക്കു​റി​ച്ചു​ളള സുവാർത്ത പ്രസം​ഗി​ച്ചു​കൊണ്ട്‌ യേശു​വി​ന്റെ കാലടി​കളെ നാം അനുഗ​മി​ക്കു​മ്പോൾ നാം എത്ര നയപൂർവം നമ്മുടെ സന്ദേശം അവതരി​പ്പി​ച്ചാൽപ്പോ​ലും നമ്മുടെ പ്രവർത്ത​നത്തെ എതിർക്കുന്ന വീട്ടു​കാ​രെ നാം കാണാ​റുണ്ട്‌. നമ്മുടെ നിലപാട്‌ ആദരപൂർവം നാം വിശദീ​ക​രി​ക്കു​മ്പോ​ഴും ആ വ്യക്തി​യു​ടെ മനോ​ഭാ​വ​ത്തി​നു മാററം വരുന്നി​ല്ലെ​ങ്കിൽ മര്യാ​ദ​യോ​ടെ സംഭാ​ഷണം നിറുത്തി രംഗം വിട്ട്‌ അടുത്ത വീട്ടി​ലേക്കു പോകു​ന്ന​താ​ണു മിക്ക​പ്പോ​ഴും ഏററവും നല്ലത്‌.—മത്താ. 10:14.

⁸ എന്നിരു​ന്നാ​ലും വീട്ടു​വാ​തിൽക്കൽവെച്ച്‌ ഒച്ചയി​ടാൻ തുടങ്ങുന്ന ചിലരെ നാം കണ്ടുമു​ട്ടാ​റുണ്ട്‌. അത്തര​മൊ​രു സാഹച​ര്യ​ത്തിൽ ആ ദിവസ​ത്തേക്ക്‌ ആ പ്രദേശം വിട്ടു​പോ​കു​ന്ന​താ​ണു വിവേകം, പിന്നീട്‌ ആ വ്യക്തി​യു​ടെ അയൽക്കാ​രെ സന്ദർശി​ക്കാൻ മടങ്ങി​ച്ചെ​ല്ലാ​വു​ന്ന​താണ്‌. ഒരു പ്രത്യേക പ്രദേ​ശത്ത്‌ അത്തരം സംഭവങ്ങൾ ധാരാളം പ്രാവ​ശ്യം ഉണ്ടാകു​ന്ന​താ​യി നമുക്ക്‌ അനുഭ​വ​മു​ണ്ടെ​ങ്കി​ലോ? ഒരുപക്ഷേ ഭയപ്പെ​ടു​ത്തും​വി​ധം ആളുകൾ കൂട്ടം​ചേർന്നു നമ്മെ ഉപദ്ര​വി​ക്കു​മെന്നു ഭീഷണി​പ്പെ​ടു​ത്തു​ന്നു​വെ​ങ്കി​ലോ? ആ സാഹച​ര്യ​ത്തിൽ ബഹളം ശമിക്കു​ന്ന​തു​വരെ ആ പ്രദേശം പ്രവർത്തി​ക്കു​ന്ന​തിൽനിന്ന്‌ ആഴ്‌ച​ക​ളോ​ളം, മാസങ്ങ​ളോ​ളം​പോ​ലും, വിട്ടു​നിൽക്കു​ന്നതു ജ്ഞാനപൂർവ​ക​മായ മാർഗ​മാ​യി​രി​ക്കും. കുറെ കാലത്തി​നു​ശേഷം ആ പ്രദേ​ശ​ത്തു​ളള ആളുക​ളു​ടെ മനോ​ഭാ​വ​ത്തി​നു മാററം വന്നിട്ടു​ണ്ടോ​യെ​ന്നും അവർ നമ്മുടെ സന്ദേശ​ത്തോ​ടു കൂടുതൽ അനുകൂല മനോ​ഭാ​വ​മു​ള​ള​വ​രാ​ണോ​യെ​ന്നും അറിയാൻ നമുക്കു വീണ്ടും അവിടെ ജാഗ്ര​ത​യോ​ടെ പ്രവർത്തി​ച്ചു​നോ​ക്കാ​വു​ന്ന​താണ്‌.—സന്ദർശനം നടത്തരു​തെന്നു വ്യക്തികൾ പ്രത്യേ​ക​മാ​യി അഭ്യർഥി​ക്കു​ക​യോ അതു​കൊ​ണ്ടു​തന്നെ അവരുടെ വീട്ടു​വാ​തി​ലിൽ അടയാ​ളങ്ങൾ വയ്‌ക്കു​ക​യോ ചെയ്യുന്ന കേസുകൾ എങ്ങനെ കൈകാ​ര്യം ചെയ്യണ​മെ​ന്നതു സംബന്ധിച്ച നിർദേ​ശങ്ങൾ സംബന്ധി​ച്ചു നമ്മുടെ രാജ്യ ശുശ്രൂ​ഷ​യു​ടെ ഈ ലക്കത്തിലെ ചോദ്യ​പ്പെട്ടി കാണുക.

⁹ ആദ്യം​തന്നെ നാം കൂടുതൽ നയമു​ള​ള​വ​രാ​യി​രി​ക്കു​ക​വഴി അത്തരം സംഭവങ്ങൾ മിക്ക​പ്പോ​ഴും ഒഴിവാ​ക്കാൻ കഴിയും. തങ്ങളുടെ സ്വന്തം മതത്തെ പിന്താ​ങ്ങു​ന്ന​തിൽ അനേക​മാ​ളു​കൾ തീവ്ര​വാ​ദ​മ​നോ​ഭാ​വം ഉളളവ​രാ​യി​ത്തീ​രു​ക​യാ​ണെന്നു നമുക്ക​റി​യാം. അത്തരം വ്യക്തികൾ മേധാ​വി​ത്വം പുലർത്തു​ന്നു​വെന്നു നമുക്ക​റി​യാ​വുന്ന പ്രദേ​ശ​ങ്ങ​ളിൽ അല്ലെങ്കിൽ ഒരു മതത്തെ പരസ്യ​പ്പെ​ടു​ത്തു​ക​യും വാഴ്‌ത്തു​ക​യും ചെയ്യുന്ന ധാരാളം എഴുത്തു​ക​ളും സ്‌ററി​ക്ക​റു​ക​ളും വാതി​ലിൽ ഉളള​പ്പോൾ നാം നമ്മുടെ വാക്കുകൾ ശ്രദ്ധാ​പൂർവം തൂക്കി​നോ​ക്കേ​ണ്ട​തുണ്ട്‌. ഒരു ‘ബൈബിൾ’ സ്ഥാപന​ത്തിൽനി​ന്നോ ‘ക്രിസ്‌തീയ’ സ്ഥാപന​ത്തിൽനി​ന്നോ വരുന്നു എന്നു പരിച​യ​പ്പെ​ടു​ത്തു​ന്ന​തി​നു പകരം നമ്മുടെ പ്രവർത്ത​ന​ത്തി​ന്റെ വിദ്യാ​ഭ്യാ​സ​പ​ര​മായ സ്വഭാ​വ​ത്തി​നു നമുക്ക്‌ ഊന്നൽ നൽകാ​വു​ന്ന​താണ്‌. ആളുകൾക്കു ദൈവ​വ​ചനം കാട്ടി​ക്കൊ​ടു​ക്കു​ന്ന​തും അതു വായി​ക്കു​ന്ന​തും ഒരിക്ക​ലും നിറു​ത്താൻ നാം ആഗ്രഹി​ക്കു​ന്നി​ല്ലെ​ങ്കി​ലും ഏതെങ്കി​ലും വാക്യം ഉപയോ​ഗി​ക്കു​ന്നെ​ങ്കിൽ അത്തരം വാക്യങ്ങൾ ശ്രദ്ധാ​പൂർവം തിര​ഞ്ഞെ​ടു​ത്തു​കൊണ്ട്‌ ബൈബിൾ ഉപയോ​ഗി​ക്കു​ന്നതു സംബന്ധി​ച്ചു നമുക്കു ജാഗ്ര​ത​യു​ള​ള​വ​രാ​യി​രി​ക്കാൻ കഴിയും. മുറി​പ്പെ​ടു​ത്തു​മെന്നു നമുക്ക​റി​യാ​വുന്ന ‘മിഷനറി,’ ‘മതപ്ര​സം​ഗം,’ പ്രത്യേ​കിച്ച്‌, ‘മതപരി​വർത്തനം’ തുടങ്ങിയ വാക്കുകൾ അപ്പോ​ഴും അനാവ​ശ്യ​മാ​യി ഉപയോ​ഗി​ക്കു​ന്ന​തിൽനിന്ന്‌ ഒഴിഞ്ഞി​രി​ക്കാൻ നമുക്കു കഴിയും.

¹⁰ നാം സൂക്ഷ്‌മത പുലർത്തേണ്ട മറെറാ​രു മണ്ഡലത്തി​ലേക്ക്‌ ഇതു നമ്മെ എത്തിക്കു​ന്നു. പ്രവചി​ക്ക​പ്പെ​ട്ടി​രി​ക്കു​ന്ന​തു​പോ​ലെ എല്ലാ ഗോ​ത്ര​ങ്ങ​ളി​ലും ഭാഷക​ളി​ലും ജനതക​ളി​ലും—മതപശ്ചാ​ത്ത​ല​ങ്ങ​ളി​ലും—നിന്നുളള ആളുകൾ യഹോ​വ​യു​ടെ ഉന്നതമായ ആരാധ​ന​യി​ലേക്ക്‌ ഒഴുകി​യെ​ത്തു​ക​യാണ്‌. (യെശ. 2:2, 3; വെളി. 7:9) ഇതിനെ ദൈവാ​നു​ഗ്ര​ഹ​ത്തി​ന്റെ ഒരു അടയാ​ള​മാ​യി നാം കണക്കാ​ക്കു​ക​യും ചെറി​യവൻ ആയിര​വും കുറഞ്ഞവൻ ഒരു മഹാജാ​തി​യും ആയിത്തീ​രു​ന്ന​തിൽ സന്തോ​ഷി​ക്കു​ക​യും ചെയ്യുന്നു. (യെശ. 60:22) അതേസ​മയം, സത്യാ​രാ​ധ​ന​ക്കു​വേണ്ടി ഒരു നിലപാ​ടു സ്വീക​രി​ച്ചി​രി​ക്കുന്ന ആരു​ടെ​യെ​ങ്കി​ലും മതപര​മായ പശ്ചാത്തലം വ്യാപ​ക​മാ​യി പരസ്യ​പ്പെ​ടു​ത്തേണ്ട യാതൊ​രു ആവശ്യ​വു​മില്ല.

¹¹ വീടു​തോ​റു​മു​ളള വേലയി​ലും മററു​ള​ളി​ട​ത്തും പുതിയ പ്രസാ​ധ​ക​രു​ടെ മുൻ മതത്തെ പരാമർശി​ക്കു​ക​യും അവർ വരുത്തി​യി​രി​ക്കുന്ന മാററം വീട്ടു​കാ​രന്റെ ശ്രദ്ധയിൽ പെടു​ത്തു​ക​യും ചെയ്‌തു​കൊ​ണ്ടു സഹോ​ദ​രങ്ങൾ അവരെ പരിച​യ​പ്പെ​ടു​ത്തു​ന്ന​താ​യി അറിവാ​യി​ട്ടുണ്ട്‌. ഇതു വീട്ടു​കാ​രനെ മുറി​പ്പെ​ടു​ത്തു​ക​യും നമ്മുടെ ഏക ലക്ഷ്യം ഒരു പ്രത്യേക മതത്തിൽപ്പെട്ട വ്യക്തി​കളെ ക്രിസ്‌ത്യാ​നി​ത്വ​ത്തി​ലേക്കു ‘മതപരി​വർത്തനം ചെയ്യി​ക്കുക’ എന്നതാ​ണെന്ന ധാരണ അയാൾക്കു നൽകു​ക​യും ചെയ്യുന്നു. ദൈവം മുഖപ​ക്ഷ​മു​ള​ള​വനല്ല—ആളുക​ളു​ടെ മതം ഏതായി​രു​ന്നാ​ലും പ്രത്യാ​ശ​യു​ടെ ഒരു സന്ദേശം അവിടുന്ന്‌ എല്ലാവർക്കും പ്രദാനം ചെയ്‌തു​കൊ​ണ്ടാ​ണി​രി​ക്കു​ന്നത്‌, എല്ലാ പശ്ചാത്ത​ല​ങ്ങ​ളി​ലു​മു​ളള ആളുകൾ അതു സ്വീക​രി​ക്കു​ന്നു​മുണ്ട്‌. (പ്രവൃ. 10:34, 35) ആരെങ്കി​ലു​മൊ​രാൾ യഹോ​വ​യു​ടെ ഒരു ആരാധ​ക​നാ​യി​ത്തീ​രു​മ്പോൾ നാം സന്തോ​ഷി​ക്കു​ക​യും അയാളു​ടെ മതപര​മായ പശ്ചാത്തലം എന്തായി​രു​ന്നാ​ലും നാം അയാളെ സ്വാഗതം ചെയ്യു​ക​യും ചെയ്യുന്നു. എന്നാൽ അയാളു​ടെ മുമ്പത്തെ മതവും അയാൾ വരുത്തി​യി​രി​ക്കുന്ന മാററ​ത്തി​ന്റെ അളവും എന്തെങ്കി​ലും പ്രത്യേ​ക​ത​യെ​ന്ന​പോ​ലെ വ്യാപ​ക​മാ​യി പരസ്യ​പ്പെ​ടു​ത്തേ​ണ്ട​തില്ല.

¹² അന്ത്യം കൂടുതൽ അടുത്തു​വ​രു​മ്പോൾ കൂടുതൽ പീഡി​പ്പി​ക്ക​പ്പെ​ടു​മെ​ന്നും ആളുക​ളു​ടെ പെരു​മാ​ററം കൂടുതൽ മോശ​മാ​കു​മെ​ന്നും നമുക്കു പ്രതീ​ക്ഷി​ക്കാൻ കഴിയും. (2 തിമൊ. 3:12, 13) ചരി​ത്ര​ത്തി​ലു​ട​നീ​ളം നമ്മുടെ സഹ അടിമ​ക​ളിൽ പലരും വിജയി​ക​ളാ​യി​ത്തീർന്നി​ട്ടു​ണ്ടെ​ന്നു​ളള സംഗതി, യഹോ​വ​യു​ടെ ആത്മാവി​ന്റെ സഹായ​ത്താൽ നമുക്കും അങ്ങനെ ചെയ്യാൻ കഴിയു​മെന്ന വിശ്വാ​സം നമുക്കു പ്രദാനം ചെയ്യുന്നു. അതിനി​ട​യിൽ, “എല്ലാത്തരം ആളുകൾക്കും രക്ഷ കൈവ​രു​ത്തുന്ന ദൈവ​ത്തി​ന്റെ അനർഹദയ”യെക്കു​റി​ച്ചു പ്രഖ്യാ​പി​ക്കു​ന്ന​തിൽ നാം തുടരും. ധൈര്യ​ത്തോ​ടെ എന്നാൽ നയപൂർവം പ്രസം​ഗി​ച്ചു​കൊണ്ട്‌.—തീത്തൊ. 2:11, NW.