«Амьдрал, үйл хэрэг цуглаанаар үзэх материал»-ын хавсралт
8 САРЫН 6–12
БУРХНЫ ҮГЭН ДЭХ ЭРДЭНЭС | ЛУК 17, 18
«Талархсанаа илэрхийлээрэй»
nwtsty Лу 17:12, 14-ийн тайлбар
уяман өвчтэй арван хүн: Библи бичигдэж байх үед уяман өвчтэй хүмүүс нэг дор цуглаад эсвэл хамт амьдарч бие биедээ тусалдаг байсан бололтой (Х.дэ 7:3–5). Мосегийн хуульд зааснаар уяман өвчтэй хүмүүс тусгаарлагдах ёстой байсан. Бас уяман өвчтэйгөө бусдад мэдэгдэж «Бузартсан, бузартсан» гэж хашхирах хэрэгтэй байжээ (Ле 13:45, 46). Энэ зүйлд гарсан уяман өвчтэй хүмүүс Хуульд заасны дагуу Есүсээс зайдуу зогсож байлаа (Библийн үгийн тайлбараас «Уяман өвчин, уяман өвчтэй хүн» гэснийг үзнэ үү).
өөрсдийгөө тахилчдад үзүүл: Тухайн үед Мосегийн хууль хүчинтэй байсан бөгөөд Аароны удмын тахилчдын арга хэмжээ ч бас хүчинтэй байжээ. Есүс үүнийг ойлгож, эдгээсэн хүмүүстээ тахилчид очоорой гэж хэлсэн (Мт 8:4; Мр 1:44). Мосегийн хуулийн дагуу тахилч уяман өвчтэй хүн эдгэснийг батлах хэрэгтэй байв. Эдгэрсэн хүн сүмд очиж Хуульд заасан тахилыг өргөдөг (Ле 14:2–32).
w08 8/1 14-15 ¶8-9
Яагаад талархлаа илэрхийлэх хэрэгтэй вэ?
Бусад нь талархлаа илэрхийлээгүйд Есүс яасан бол? Библид цааш нь «Харин Есүс: “10 хүн цэвэршээгүй бил үү? Нөгөө 9 нь хаачив аа? Энэ харь хүнээс өөр хэн ч Бурханд талархал өргөхөөр буцаж ирээгүй гэж үү?” гэлээ» гэж бичсэн байдаг (Лук 17:17, 18).
Уяман өвчтэй тэдгээр есөн хүн муу хүмүүс биш байв. Тэд Есүст итгэдгээ харуулсан бөгөөд тахилчдад өөрсдийгөө үзүүлэхийн тулд Иерусалим руу яв гэснийг дуулгавартай дагасан. Гэхдээ тэд Есүсийн сайхан сэтгэлд дотроо их талархаж байсан ч илэрхийлээгүй. Энэ нь Христийн урмыг хугалсан. Бид яадаг вэ? Хэн нэг нь бидэнд сайхан сэтгэлээр хандахад шууд баярлалаа гэж хэлэх юм уу тохиромжтой бол талархлын захиа бичдэг үү?
Эрдэнэс хайх нь
nwtsty Лу 17:10-ийн тайлбар
өчүүхэн: Үгч., «хэрэггүй, үнэ цэнгүй». Есүс энэ жишээгээрээ боолууд буюу шавь нар нь өөрсдийгөө хэрэггүй, үнэ цэнгүйд тооцох ёстой гэж хэлээгүй. Хам сэдвээс үзэхэд «үнэ цэнгүй» гэсэн утгатай энэ үгээр боол өөрийгөө онцгой анхаарал тавихаар, магтаал хүлээхээр хүн гэж үзэлгүй даруу байх хэрэгтэйг зааж байна. Зарим эрдэмтний тайлбарласнаар энэ нь хэтрүүлэг бөгөөд «Бид онцгой анхаарал тавихаар хүн биш, зүгээр нэг боол» гэсэн утгатай.
nwtsty Лу 18:8-ын тайлбар
жинхэнэ ёсоор итгэдэг хүн: Эсвэл «энэ төрлийн итгэл». Үгч., «энэ итгэл». Грек эх бичигт «итгэл» гэдэг үгийн өмнө тухайлах ялгац гишүүн тавьсан. Энэ нь Есүс зүгээр нэг итгэлийг биш, харин хэлсэн жишээндээ гарсан бэлэвсэн эмэгтэйнх шиг итгэлийг хэлснийг харуулж байна (Лу 18:1–8). Үүнд залбирал үр нөлөөтэй гэдэгт итгэх, бас Бурхан сонгосон хүмүүсийнхээ төлөө шударга ёсыг тогтооно гэдэгт итгэх орно. Итгэлийн талаарх асуултдаа Есүс өөрөө хариулаагүй. Шавь нараа хэр зэрэг итгэлтэйгээ бодоосой гэснийх бололтой. Шавь нарт нь сорилт тулгарах тухай ярьж байгаад Есүс залбирал болон итгэлийн тухай жишээ татсан нь яг оновчтой байсан (Лу 17:22–37).
8 САРЫН 13–19
БУРХНЫ ҮГЭН ДЭХ ЭРДЭНЭС | ЛУК 19, 20
«Арван минаны жишээ ямар сургамжтай вэ?»
jy 232 ¶2-4
Арван минаны жишээ
Есүс: «Нэгэн язгууртан хүн хаан болоод буцаж ирэхээр алс холыг зорьжээ» гэж хэлсэн (Лук 19:12). Тийм аялалд их цаг орно. Есүс өөрөө энэ жишээнд гарсан «язгууртан» бөгөөд «алс холыг зорих» буюу тэнгэрт очиж, Эцгээсээ хаан байх эрх мэдлийг авна.
Жишээн дээр «язгууртан» аян замд гарахаасаа өмнө арван зарцаа дуудаж хүн бүрд нэг мөнгөн мина өгөөд «Намайг иртэл энэ мөнгөөр наймаа хий» гэж хэлсэн (Лук 19:13). Мөнгөн мина бол их хэмжээний мөнгө. Энэ нь тариачны 3 сарын цалинтай тэнцдэг.
Шавь нар нь өөрсдийгөө жишээнд гарсан арван зарцтай адил гэдгийг ойлгосон байх. Учир нь өмнө нь Есүс тэднийг ургац хураагчидтай адилтгасан юм (Матай 9:35–38). Мэдээж Есүс шавь нартаа бодит ургац хураахыг захиагүй. Тэд Бурхны Хаант төрд орох найдвартай бусад шавь нарыг цуглуулах буюу хураах хэрэгтэй. Шавь нар Хаант төрийн өвлөгчдийг илүү их цуглуулахын тулд байгаа бүхнээ зориулдаг.
jy 232 ¶7
Арван минаны жишээ
Шавь нар нь тэр боолуудтай адилаар эд хөрөнгөө бүрэн ашиглаад илүү олон хүнийг шавь болговол Есүс баярлаж, ажилсаг байсанд нь шагнана гэдэгт итгэлтэй байж болно. Мэдээж Есүсийн шавь нар амьдрал, боломж бололцоо, хүч чадлын хувьд харилцан адилгүй байдаг. Гэхдээ «хаан» Есүс шавь болгох ажлыг үнэнчээр хийсэн тэднийг ойлгож, ивээнэ (Матай 28:19, 20).
jy 233 ¶1
Арван минаны жишээ
Энэ боол эзнийхээ хаант улсын эд хөрөнгийг олшруулах гэж хичээгээгүй учраас байгаагаа алджээ. Элчүүд Есүсийг Бурхны Хаант төрд захирах цагийг хүлээж байсан. Тийм учраас сүүлийн боолд хэлсэн Есүсийн үгийг сонсоод тэд уйгагүй хичээхгүй бол Хаант төрд орохгүйг ойлгосон биз ээ.
Эрдэнэс хайх нь
nwtsty Лу 19:43-ын тайлбар
шовх оройтой шонгоор бэхлэлт: Эсвэл «хашаа». Харакс гэдэг грек үг Грек Судрын зөвхөн энэ зүйлд гардаг. Энэ үгийг «хэсэг газрыг хашихын тулд хэрэглэдэг шовх оройтой саваа юм уу шон; гадас» эсвэл «гадсаар байгуулсан цэргийн бэхлэлт; хашаа» гэж тодотгодог. МЭ 70 онд Тит тэргүүтэй Ромын цэрэг Иерусалимыг тойруулан бүслэлтийн хана буюу хашаа барихад Есүсийн үг биелсэн. Тит иудейчүүдийг зугтахаас сэргийлж, бууж өг гэж дарамталж, ард олныг өлсгөж эрхэндээ оруулах гэсэн гурван зорилгоор бэхлэлт босгосон. Иерусалимыг тойруулан бэхлэлт босгохын тулд хотын гадна байсан бүх модыг цавчжээ.
nwtsty Лу 20:38-ын тайлбар
Түүний хувьд бүх хүн амьд: Бурхнаас хөндийрсөн хүмүүс амьд байлаа ч гэсэн Бурхны хувьд үхсэн гэж Библи заадаг (Эф 2:1; 1 Ти 5:6). Үүнчлэн, Бурхны сайшаалыг олсон үйлчлэгчид үхсэн байлаа ч Еховагийн хувьд амьд хэвээрээ байдаг. Яагаад гэвэл тэднийг амилуулах гэсэн Бурхны санаа зорилго заавал биелнэ (Ро 4:16, 17).
8 САРЫН 20–26
БУРХНЫ ҮГЭН ДЭХ ЭРДЭНЭС | ЛУК 21, 22
«Та нарыг аврах цаг ойртож байгаа»
kr 226 ¶9
Бурхны Хаант төр дайснуудаа устгана
9 Тэнгэр дэх үзэгдэл. Есүс: «Нар харанхуйлж, сар гэрэлтэхгүй, одод тэнгэрээс унана» гэж зөгнөсөн. Гэрлийг хүссэн хүмүүс шашны удирдагчдад хандахгүй. Шашны удирдагчид гэрэл гэж тооцогдохгүй болно. Тэгвэл Есүс тэнгэрт ер бусын үзэгдэл болно гэсэн утгаар хэлсэн үү? Тийм байж болох юм (Ис. 13:9–11; Иоел 2:1, 30, 31). Хүмүүс нүдээрээ үзэж байгаа зүйлээс болоод яах бол? Тэд «айж түгшин учраа олохоо болино» (Лук 21:25; Зеф. 1:17). Тийм ээ, Бурхны Хаант төрийн дайснууд хаанаасаа эхлэн боол хүртлээ бүгд «тохиолдох зүйлийг ойлгоод, айснаасаа болж ухаан алдах» бөгөөд нуугдах газар хайн зугтана. Гэхдээ тэд Хааны уур хилэнгээс нуугдах газар олж чадахгүй (Лук 21:26; 23:30; Илч. 6:15–17).
Эрдэнэс хайх нь
nwtsty Лу 21:33-ын тайлбар
Тэнгэр газар үгүй болох: Библийн бусад зүйлийг үзвэл тэнгэр газар үүрд мөнх оршино (Эх 9:16; Ду 104:5; Но 1:4). Тиймээс, Есүс боломжгүй юм болох байлаа ч үг нь заавал биелнэ гэдгийг хэтрүүлэн хэлсэн байж болох юм (Мт 5:18-тай харьцуулна уу). Гэхдээ, энэ удаа Есүсийн хэлсэн тэнгэр газар нь Ил 21:1-д гарсан «шинэ тэнгэр, шинэ газартай» адилаар бэлгэдлийн утгатай ч байж болох юм.
миний үг яасан ч үгүй болохгүй: Грек эх бичгийг үзвэл үйл үгийн өмнө үгүйсгэсэн утгатай үг хоёр орсон нь ямар нэгэн санааг онцлон үгүйсгэнэ гэсэн утгатай. Есүсийн үг үүрд мөнх үгүй болохгүйг онцолжээ.
8 САРЫН 27—9 САРЫН 2
БУРХНЫ ҮГЭН ДЭХ ЭРДЭНЭС | ЛУК 23, 24
«Уучлахад бэлэн бай»
cl 297 ¶16
«Христийн хайрыг мэдээсэй гэснийх юм»
16 Есүс бас өөр нэг аргаар Эцгийнхээ хайрыг төгс дуурайсан. Есүс «уучлахад бэлэн» байв (Дуулал 86:5). Энэ зан чанар Есүсийг тарчлаах шонд хадуулсан үед ч илэрхий харагдсан. Гар хөлдөө хадаасаар хадуулж гутамшигтайгаар нас барж байсан Есүс юу гэж хэлсэн бол? Ял гүйцэтгэгчдийг шийтгээч гэж Еховагаас гуйн хашхирсан уу? Үгүй. Есүс: «Эцэг минь, тэднийг өршөөгөөрэй. Учир нь тэд юу хийж байгаагаа мэдэхгүй байна» гэж хэлсэн (Лук 23:34).
g 2/08 11 ¶5-6
Бурхан ноцтой нүглийг уучилдаг уу?
Ехова зөвхөн нүглийг биш, харин нүгэлтний хандлагыг бас анхаардаг (Исаиа 1:16–19). Есүсийн дэргэд хадуулсан хоёр гэмт хэрэгтний тухай бодоод үз дээ. Нэг нь «Хийсэн хэргийнхээ хариуг хүртэж байгаа маань энэ. Харин энэ хүн ямар ч буруу юм хийгээгүй» гэж хэлснээс үзэхэд тэр хоёр хоёулаа ноцтой нүгэл үйлдсэн нь лавтай. Бас Есүсийн тухай хэлснийг нь үзвэл Есүсийг тодорхой хэмжээгээр мэдэж байсан бололтой. Тийм учраас хандлага нь сайнаар өөрчлөгдсөн. Үүнийг яаж мэдэх вэ? Тэр Есүсээс «Та Хаан болохлоороо намайг санаарай» гэж гуйжээ. Чин сэтгэлээсээ гуйсанд нь Христ яасан бол? «Өнөөдөр би батлан хэлье. Чи надтай хамт Диваажинд байх болно» гэж хэлсэн (Лук 23:41–43).
Бодоод үз дээ. Хүмүүн амьдралынхаа эцэст Есүст хэлж чадах үг цөөн үлджээ. Ийм үед, цаазаар авхуулах зохистой гэдгээ хүлээн зөвшөөрсөн хүнийг энэрч дээрх үгийг хэлсэн. Сэтгэл үнэхээр дулаацмаар байгаа биз! Тийм учраас Есүс Христ болон түүний Эцэг Ехова чин сэтгэлээсээ гэмшсэн хүнд, өмнө нь ямар нүгэл үйлдэж байснаас нь үл хамааран өрөвч сэтгэлээр хандана гэдэгт итгэлтэй байж болно (Ром 4:7).
cl 297-298 ¶17-18
«Христийн хайрыг мэдээсэй гэснийх юм»
17 Есүс Петртэй хэрхэн харьцсанаас уучлахын илүү сэтгэл хөдөлгөм жишээг харж болно. Петр Есүсийг хайрласан нь эргэлзээгүй. Амьдралынх нь сүүлчийн өдөр болох Нисан сарын 14-ний шөнө Петр Есүст «Эзэн, би тантай хамт шоронд ороход ч, үхэхэд ч бэлэн байна» гэж хэлжээ. Гэхдээ хэдхэн цагийн дараа Есүсийг таньдгаа ч хүртэл гурван удаа үгүйсгэсэн! Петрийг гурав дахь удаа үгүйсгэхэд «Эзэн эргэж Петрийг харлаа» гэж Библид бичсэн байдаг. Хэр ноцтой нүгэл үйлдсэнээ ухаарсан Петр «гадагш гарч, ихэд харамсан цурхиран уйлав». Яг тэр өдөр Есүсийг нас барахад энэ элч «Эзэн намайг уучилсан болов уу?» гэж бодсон байх (Лук 22:33, 61, 62).
18 Үүнийг мэдэх гэж Петр удаан хүлээгээгүй. Есүс Нисан сарын 16-нд амилсан бөгөөд яг тэр өдөртөө Петртэй уулзсан бололтой (Лук 24:34; 1 Коринт 15:4–8). Өөрийг нь тийм их үгүйсгэсэн элчдээ Есүс яагаад онцгой санаа тавьсан бэ? Гэмшсэн Петрийг Эзэн нь хайрлаж, эрхэмлэсээр байгаа гэдэгт итгүүлэх гэснийх бололтой. Гэхдээ Есүс Петрийг тайвшруулаад л болчихоогүй.
Эрдэнэс хайх нь
nwtsty Лу 23:31-ийн тайлбар
Мод чийгтэй байхад ... мод хатсан хойно: Есүс иудей үндэстний тухай хэлсэн нь лавтай. Есүс болон түүнд итгэдэг хэсэг иудейчүүд байсан учраас иудей үндэстэн, үхэж байгаа ч бага зэрэг чийгтэй модтой адил байв. Гэхдээ Есүс удахгүй цаазлагдаж, үнэнч иудейчүүд Бурхны агуу хүчээр тослогдон бэлгэдлийн Израйлыг бүрдүүлэх байсан (Ро 2:28, 29; Гал 6:16). Тэгэхэд Израйл үндэстэн Бурханд гологдох учраас хатаж үхсэн мод адил болно (Мт 21:43).
nwtsty үзүүлэн таниулах материал
Хадаасанд зоосон өсгийний яс
Зурагт үзүүлсэн нь 11,5 см төмөр хадаасанд зоогдсон хүний өсгийний ясны дуураймал юм. Үүний эх хувь нь 1968 онд Иерусалимын хойд хэсгийг ухаж байхад олдсон бөгөөд Ромын үеийнх гэгддэг. Энэ нь тухайн үед гэмт хэрэгтнийг цаазлахдаа модон шонд хадаасаар зоодог байсан байж болохыг харуулсан археологийн баримт юм. Ромын цэргүүд Есүс Христийг шонд хадахдаа үүнтэй төстэй хадаас хэрэглэсэн бололтой. Цогцсыг ялзарсны дараа үлдсэн ясыг хийдэг чулуун хайрцгаас хадаасанд зоогдсон энэ ясыг олсон. Эндээс цаазлагдсан хүнийг ч оршуулдаг байсныг мэдэж болно.