Үйлчлэлээ өргөжүүлэхийг одооноос төлөвлөгтүн
1. Дурсах цуглааны улиралд ямар боломж бүрддэг вэ? Хэрхэн бэлдэх вэ?
1 Жил бүрийн Дурсах цуглааны улиралд «ЭЗЭНд талархлыг элбэгээр өргөх» боломж бүрддэг (Дуу. 109:30). Та золиосны арга хэмжээ авсан Еховад талархдагаа илэрхийлэн 3-р сард үйлчлэлээ өргөжүүлэх үү? Тэгвэл одооноос төлөвлөх хэрэгтэй (Сур. 21:5).
2. Туслах эхлэгчийн цагийн нормыг өнгөрсөн жилийн 4-р сард багасгасныг та хэрхэн хүлээж авсан бэ? Бусад Гэрчийн жишээг ярина уу.
2 Туслах эхлэгчээр үйлчлэх: Өнгөрсөн жилийн 4-р сард туслах эхлэгчид багасгасан цагаар үйлчилсэн билээ. Энэ тухай мэдэгдэхэд дэлгэрүүлэгчид туйлын их баяртай хүлээж авсан юм. Нэг Гэрч хүү: «Би одоохондоо дунд сургуульд сурдаг учраас байнгын эхлэгчээр үйлчилж амждаггүй л дээ. Гэхдээ 4-р сард 30 цаг дэлгэрүүлэх туслах эхлэгчээр үйлчилнэ гэж анкет өгөөд 50 цаг дэлгэрүүлэхийг төлөвлөж байна» гэж бичжээ. Бүтэн өдрөөр ажилладаг нэг Гэрч эмэгтэй: «Гучин цагийг бол чадалгүй яах вэ!» гэж бичсэн юм. Өмнө нь эхлэгчээр үйлчилж байсан 80 гарсан Гэрч эмэгтэй ийм арга хэмжээ авах болсныг дуулаад: «Би энийг л хүлээж байсан юм! Ехова намайг эхлэгч байхдаа хамгийн жаргалтай явсныг мэдэж байгаа!» хэмээн хэлжээ. Туслах эхлэгчээр үйлчлэх боломжгүй хүмүүс ч дэлгэрүүлэх ажилд ердийнхөөсөө олон цаг зориулсан.
3. 3-р сард, цаашлаад 4, 5-р сард туслах эхлэгчээр үйлчлэх ямар боломж байна вэ?
3 Энэ жилийн 3-р сард ч бас 30 юм уу 50 цаг дэлгэрүүлэн туслах эхлэгчээр үйлчлэх боломжтой. Түүнчлэн, 4-р сарын 5-нд болох Дурсах цуглааны урилга тараах кампанит ажил 3-р сарын 17-ны Бямба гаригаас эхэлнэ. Олон хүн үйлчлэлээ өргөжүүлэхийн баяр баясгаланг эдэлж, 4, 5-р сард ч туслах эхлэгчээр үйлчлэн 50 цаг дэлгэрүүлнэ гэдэгт итгэлтэй байна.
4. Үйлчлэлээ өргөжүүлэхийн тулд яах хэрэгтэй вэ? Үр дүн нь юу байх вэ?
4 Танай гэр бүлийнхэн Дурсах цуглааны улиралд үйлчлэлээ өргөжүүлэхийн тулд дор бүрнээ юу хийж болохыг дараагийн Гэр бүлийн Библийн хичээлээрээ ярилцвал ямар вэ? (Сур. 15:22). Еховагаас тусламж дэмжлэг гуйгаарай (1 Иох. 3:22). Хэдийчинээ их дэлгэрүүлнэ, Еховаг төдийчинээ сайн алдаршуулж, өөрөө ч их баяр баясгалан эдэлнэ (2 Кор. 9:6).