Мужийн чуулган — үнэнийг баттай гэрчлэх арга хэмжээ
1. Жил бүр болдог гурван баяраар израильчуудад юуг эргэцүүлэн бодож, юун тухай ярилцах боломж бүрддэг байсан бэ?
1 Эртний израильчууд жил бүрийн гурван баяраар хуран цугладаг байв. Дан эрчүүд Иерусалимд очих тушаалтай байсан ч тэр баярт сайхан үйл явдалд гэр бүлүүд бас очдог байсан (Д.хууль 16:15, 16). Баярын үеэр сүнслэг зүйлийг эргэцүүлэн бодож, Еховаг өгөөмөр, халамжит Тэжээгч гэдгийг, найдвартай удирдаж, хамгаалдгийг нь хэлэлцэж сүнслэг яриа өрнүүлэх боломж бүрддэг байв (Д.хууль 15:4, 5; 32:9, 10). Бас Еховагийн нэрийг авч явдаг ард түмний хувьд шударга занг нь дууриах ёстойгоо эргэцүүлэн бодож болох байлаа (Д.хууль 7:6, 11). Жил бүр болдог мужийн чуулган бидэнд ч адилхан ач холбогдолтой.
2. Мужийн чуулганы хөтөлбөр үнэний гэрлийг илүү тод тусгадаг гэхийн учир юу вэ?
2 Чуулганы хөтөлбөр үнэний гэрлийг илүү тод тусгадаг: Мужийн чуулганаар Библийн үнэний гэрлийг илүү тод тусгадаг илтгэл, ярилцлага сонсож, жүжиг, үзүүлбэр үздэг (Иох. 17:17). Энэ жилийн мужийн чуулганы бэлтгэл ажил эхэлчихээд байгаа. Ехова газар газрын хүмүүсийн хэрэгцээ шаардлагад яг нийцэх хөтөлбөрийг байгууллагаараа бэлдүүлж байгаа (Мат. 24:45–47). Та бэлтгэсэн бүхнийг сонсож, үзэхийг тэсэн ядан хүлээж байна уу?
3. Чуулганы ач тус хүртэхийн тулд яах хэрэгтэй вэ?
3 Чуулганаа таслалгүй хоёр өдөр эхнээс нь дуустал сууж, анхааралтай сонсвол ач тусыг нь бүрэн дүүрэн хүртэнэ. Одоогоор ажил албаа зохицуулж амжаагүй бол захиралтайгаа ярилцаж, чөлөө аваарай. Хөтөлбөрийг анхааралтай сонсохын тулд чуулганы өдрүүдэд эрт унтаж байгаарай. Мөн илтгэгчийг харах, товч тэмдэглэл хийх нь анхаарлаа сарниулахгүй байхад тус болдог нь туршлагаар батлагддаг. Гар утастай бол дууг нь хааж, бусдыгаа хүндэтгээрэй. Хөтөлбөрийн үеэр бие биетэйгээ ярих, мессеж бичих, юм идэх, уух зэргээр хүмүүсийн анхаарлыг сарниулахгүй байгаарай.
4. Эцэг эхчүүд хүүхдээ чуулганаас ач тус хүртээсэй гэж боддог бол яах нь зүйтэй вэ?
4 Израильчууд амралтын жилийн Майхан баяраар гэр бүлүүдээрээ цуглаж Хуулийг сонсохдоо «хүүхэд багачуудаа» ч байлгадаг байсан. Энэ нь Бурхны сургаалыг хүүхдүүддээ «сонсгон, заах» зорилготойнх байв (Д.хууль 31:12). Чуулганд гэр бүлүүдийг нэг дор сууж, хүүхэд багачууд хөтөлбөрийг анхааралтай сонсож, сэргэг байхыг харахад ямар урамтай гээч! Сонирхолтой санагдсан зүйлийг орой нь гэр бүлээрээ тэмдэглэлээсээ хэлэлцэж бас болно. «Мунхаг байдал хүүхдийн зүрхэнд уяастай байдаг» гэдэг. Тиймээс эцэг эхчүүд завсарлагаанаар бага насны болон өсвөр насны хүүхдүүдийг ч «дур зоргоороо» аашлахаас сэргийлж, зохих хараа хяналт тавих хэрэгтэй (Сур. 22:15; 29:15).
5. Чуулганы үеэр зохистой хувцаслах нь үнэнийг чимдэг гэж хэлэхийн учир юу вэ?
5 Биеэ зөв авч явбал үнэнийг чимдэг: Чуулганы үеэр биеэ зөв авч явбал үнэнийг чимнэ гэсэн үг (Тит 2:10, ШЕ). Нэрийн хуудсаа зүүж явах нь нэг талаас, чуулганаа сурталчлах, нөгөө талаас, чуулганд ирсэн хүмүүстэй танилцах боломж бүрдүүлдгийн зэрэгцээ биднийг ажиглаж байгаа хүмүүст гэрчлэл болдог. Чуулганы танхимын ойр хавьд амьдардаг хүмүүс нэрийн хуудас зүүж яваа хүмүүсийг цэвэр цэмцгэр, даруухан хувцсаар нь хайш яйш, ил задгай хувцасладаг хүмүүсээс ялгаатайг анзаарна (1 Тим. 2:9, 10). Тийм учраас, чуулган болох танхимд байхдаа, эсвэл танхимын ойролцоох олон нийтийн газар байхдаа хувцаслалт, гадаад байдлаа анхаарах хэрэгтэй. Биеийн тамирын хувцас, богино өмд өмсөх гэх мэтээр хэтэрхий чөлөөтэй хувцаслах нь чуулганыг үл хүндэтгэсэн хэрэг юм. Чуулган цэнгэлдэх хүрээлэн юм уу ил задгай газарт болох байлаа ч намбатай хувцаслаж, чуулганы арга хэмжээг хүндэтгэх хэрэгтэй. Чуулган тарахад хувцсаа солиод цайны газар орохоор шийдэж болох юм. Чуулганы төлөөлөгч гэдгээ бодож хэтэрхий чөлөөтэй, хайш яйш хувцаслахгүй байх нь зүйтэй.
6. Яавал чуулганы үеэр христиан эв нэгдлээ илүү мэдрэх вэ?
6 Израильчууд жил бүрийн баяраар өөр нутаг юм уу өөр улсаас ирсэн итгэл нэгтнүүдтэйгээ уулзан ярилцаж, сэтгэлээ сэргээн, эв нэгдлээ бэхжүүлдэг байсан (Үйлс 2:1, 5). Бид мужийн чуулганы үеэр христиан ахан дүүсийн барилдлагаа хэзээ хэзээнээс илүү мэдэрдэг. Сүнслэг диваажингийн маань ийм таатай уур амьсгал хөндлөнгийн хүмүүсийн ч сэтгэлийг хөдөлгөдөг (Дуу. 133:1). Хөтөлбөрийн завсарлагаанаар идэх юм авах гэж гадагш гарахын оронд гэрээсээ хөнгөн хоол авчирч, ойр сууж байгаа итгэл нэгтнүүдтэйгээ танилцаж, яриа өрнүүлэх нь сайн!
7. Сайн дурын ажилд боломжоороо оролцох нь сайн гэхийн учир юу вэ?
7 Ер нь, ажиглагчид чуулган маань ямар нарийн зохион байгуулалттай, эмх цэгцтэй явагддагийг, тэр дундаа бүх ажлыг сайн дураараа хийдгийг маань мэдээд сэтгэл нь хөдөлдөг. Та «сайн дураараа үйлчлэх» боломжтой юу? (Дуу. 110:3). Сайн дурын ажилд оролцох нь олон талын ач холбогдолтой. Тухайлбал, олон эцэг эх гэр бүлээрээ ийм ажил хийн, хүүхдүүдээ бусдад үйлчилж сургадаг. Бүрэг ичимхий зантай хүмүүс ч чуулганы ажилд оролцоод олон найз нөхөдтэй болох нь байдаг. Нэг гэрч эмэгтэй: «Надад гэрийнхэн, цөөн хэдэн найзаас маань өөр таних хүн бараг байгаагүй. Гэхдээ цэвэрлэгээ хийгээд олон итгэл нэгтэнтэйгээ танилцсан юм. Их сайхан байсан» гэж хэлжээ. Сайн дурын ажилд оролцон найз нөхдийнхөө хүрээг тэлж өргөнөөр нээлттэй байвал сэтгэлийн таашаал эдэлдэг (2 Кор. 6:12, 13). Сайн дурын ажилд оролцох хүн ямар шаардлага хангах ёстойг ахлагчдаас асуугаарай.
8. Хүмүүсийг чуулганд яаж урих вэ?
8 Хүмүүсийг урьж үнэнийг сонсгоорой: Энэ жил ч бас чуулган болохоос гурван долоо хоногийн өмнө чуулганы урилга тараах кампанит ажил эхэлнэ. Хурал болгон харьяа нутаг дэвсгэртээ аль болох олон хүнд урилга тараах гэж хичээх нь лавтай. («Урилга яаж тараах вэ?» гэсэн хавсралтыг үзнэ үү.) Кампанит ажлын үеэр урилгаа бүгдийг нь тарааж амжаагүй бол чуулганд авч ирээрэй. Үлдэгдэл урилгыг чуулганд ирсэн дэлгэрүүлэгчид албан бусаар дэлгэрүүлэхдээ тарааж болно.
9. Жил бүр явуулдаг кампанит ажил үр дүнд хүрдгийг батлах жишээ хэлнэ үү.
9 Кампанит ажил маань үр дүнд хүрдэг үү? Нэгэн чуулган дээр зохицуулагч, эхнэр нөхөр хоёрт суудал олж өгчээ. Тэд урилга уншаад «сонирхолтой арга хэмжээ болох юм байна гэж ойлгосон» гэдгээ хэлсэн аж. Тэр хоёр 320 гаруй километр зам туулж ирсэн байна! Бас нэг Гэрч эмэгтэй айлаар дэлгэрүүлж яваад нэг эрэгтэйд чуулганы урилга өгчээ. Өнөөх эрэгтэй чуулганы талаар сонирхсон янзтай байсанд цаг гарган дэлгэрэнгүй тайлбарлажээ. Хэд хоногийн дараа Гэрч эмэгтэй нөгөө хүнийг найзтайгаа хамт чуулганд ирээд бүр шинэ хэвлэл аваад явж байхтай нь таарчээ!
10. Жил бүр мужийн чуулганд очих нь яагаад чухал бэ?
10 Жил бүрийн гурван баяр нь израильчуудын төлөө Еховагийн хайрын сэтгэлээр авсан арга хэмжээ байсан. Ехова тэднийг өөрт нь «чин сэтгэл болон үнэнээр үйлчлэхэд» тусалдаг байсан (Иош. 24:14). Үүнтэй адилаар, жил бүр мужийн чуулганд очих нь «үнэний дотор» явахад бидэнд тустайн зэрэгцээ шүтлэгийн маань салшгүй хэсэг юм (3 Иох. 3). Чуулганд очиж, ач тусыг нь бүрэн дүүрэн хүртэх гэж хичээдэг, үнэнийг хайрладаг бүх хүний хүчин зүтгэлийг Ехова ивээх болтугай!
[5-р хуудасны товчлол]
Чуулганы үеэр биеэ зөв авч явбал үнэнийг чимнэ
[6-р хуудасны товчлол]
Чуулганаас гурван долоо хоногийн өмнө чуулганы урилга тараах кампанит ажил эхэлнэ
[6-р хуудасны хавсралт]
Урилга яаж тараах вэ?
Аль болох олон хүнд урилга тараахын тулд товч ярих хэрэгтэй. Жишээлбэл: «Сайн байна уу? Бид олон оронд ийм урилга тарааж байгаа юм. Танд бас урилга өгье. Дэлгэрэнгүй мэдээллийг урилгаас уншаарай» гэж хэлж болно. Урам зоригтой яриарай. Урилгаа амралтын өдрөөр тараахдаа, тохиромжтой бол сэтгүүл бас өгөөрэй.