Бие зөв авч яван Бурхныг алдаршуулах нь
1. Дүүргийн чуулганы үеэр Еховагийн Гэрчүүд олны анхаарлыг татдаг гэхийн учир юу вэ?
1 Мужийн чуулганы үеэр бид олны анхаарлыг татдаг. Чуулган болдог олон оронд манай арга хэмжээний талаар зурагтаар мэдээлдэг. Зочид буудал, зоогийн газрын ажилчид мөн тэр хавьд амьдардаг хүмүүс чуулганы пайз зүүснийг маань шууд анзаардаг. Чуулганы үеэр биеэ зөв авч яван Бурхнаа алдаршуулахын тулд юуг анхаарах хэрэгтэйг үзье (1 Петр 2:12).
2. Даруу хувцаслаж Еховаг алдаршуулахын тулд яах хэрэгтэй вэ?
2 Даруу хувцаслах нь: Чуулгандаа даруу хувцаслаж ирсэн маань хүмүүст таатай сайхан сэтгэгдэл төрүүлдэг. Гэхдээ, зочид буудалд буух, зоогийн газарт хооллох, дэлгүүр орох гэх мэт жирийн үед яаж хувцасласан байгааг хүмүүс илүү анхаардаг. Ийм үед чуулганд өмсдөг хувцастайгаа байх шаардлагагүй ч даруу, зохистой хувцасласан байх хэрэгтэй. Итгэгч бус хүмүүсээс бид ялгарах учиртай (Ром 12:2). Түүнчлэн пайзаа зүүж явбал чуулганаа сурталчлахаас гадна дэлгэрүүлэх боломж бүрдэнэ. Мөн бид бие биенээ амархан танина.
3. Хэрхэн тэвчээртэй, эелдэг боловсон байх вэ?
3 Тэвчээртэй бөгөөд эелдэг боловсон байх нь: Өнөө үед аминч, талархах сэтгэлгүй хүн их болсон учир тэвчээртэй, эелдэг боловсон байвал зочид буудал, зоогийн газрын ажилчид гэх мэтийн эргэн тойрныхоо хүмүүст сайхан сэтгэгдэл төрүүлэх биз ээ! (2 Тим. 3:1–5). Суудал авахдаа, шинээр гарсан хэвлэл авахаар дугаарлаж зогсохдоо өөрийгөө биш бусдыгаа бодох хэрэгтэй (1 Кор. 10:23, 24). Чуулганд анх удаа суусан нэг эрэгтэй: «Тэр өдөр ямар илтгэл сонссоноо сайн санахгүй байна. Харин Гэрчүүдийн биеэ яаж авч явж байсныг ер мартдаггүй юм» гэжээ.
4. Чуулганы ажилд сайн дураараа, боломжийнхоо хэрээр оролцох хэрэгтэйн учир юу вэ?
4 Сайн дураараа ажиллах нь: Сайн дураараа ажиллах нь жинхэнэ христиануудын онцлог шинж юм (Дуу. 110:3). Чуулганы сайн дурын ажилд та оролцож чадах уу? Нэг чуулганы өмнө 600 орчим хүн сайн дураараа цэвэрлэгээний ажилд оролцжээ. Танхимын ажилтан: «Урьд нь хэзээ ч ийм гайхалтай юм харж байсангүй. Ийм олон хүн сайн дураараа ажиллаж байна гэхэд үнэхээр итгэмээргүй юм» гэжээ. Удахгүй болох мужийн чуулганаа бид тэсэн ядан хүлээж байна. Чуулганы хөтөлбөрийг сонсож, Бурхнаар заалгах төдийгүй Бурхнаа алдаршуулах боломж бүрдэнэ.