Karta Nanabili Aamulebeliye Timotiyu

3 Mbwenye onone wi malabo ookuthula, onaakale mudhidhi wabure ni worusa okalawo. 2 Mwaha athu eniidhivelege yekiwa, oodhiveliwa korowa, owiikumbula, oothabwa wiithukula, ooruwana dhithu dhootaleleya, oohawiwelela makolo, oohutamalela, oohuroromeleya, 3 oohukanna emuthu yapama, oohiwananeyana, owaaba, oohiivanya, owoopiha, enerege widda opama, 4 enerege wawerela obure akwiwa, oovuluvuliha, owithithimiha, enasayelege wihagalasa ohiya omuhagalasa Mulugu, 5 enerege okala ninga enomulabela Mulugu, mbwenye dhowera dhiwadha dhihili dhendo. Athu yayo waarabele. 6 Vikaleliwa, enookumelelavo athu eniidela mmavaade mwaahiyana oolodhowa wihina yaahidde ni ekale adhaari ewa, ahiyana ayo ehinyemeliwa dhoothega ni eneeddihiwa ni munigwa dhohiyana-iyana, 7 yayo enakala ohudherave mudhidhi waatene mbwenye kinanda ofwanya enonelo yeebaribari.

8 Mowindala ninga Jamesi ni Jambere yanvanyihiliwa Moyizeji, naaliwaya enna ovanyiha ebaribari. Alobwana ala, mubuwelo wewa ohunongeya teto Mulugu kanaarumedha mwaha aliwa kinedda mowiwanana ni nroromelo. 9 Mowindo, aliwa kinaadhowe woolapela mwaha otaduwa wewa oneere ononiwa ni athu aatene ninga yapadduwele alobwana ale abiili. 10 Mbwenye we ohuhara pamadhene dhohudhiha dhaaga, mweeddelo waaga, efunelo yaaga, nroromelo naaga, ovilela waaga, odhivela waaga ni ororomeleya waaga, 11 oharahariwa waaga ni goyi ninga ele goonilimi wAntiyokiya, wIkoniyu ni oListara. Miyo gihivilelana oharahariwa wula teto Nabwiya ohugivulusa mwa dhaatedhene. 12 Mohanganyedha, aatene yaale enaafunege omwebedha Mulugu egaali mwimodhani ni Kiristu Yesu, enerege oharahariwa. 13 Mbwenye athu abure ni agwalagwambi enerege odhowave ethabwaga, yalekethaga athu wula naaliwaya elekethiwaga.

14 Mbwenye we odidele ohara dhithu ohudhihiwiwe ni orumedhiliwe. Mwaha we ohumunona baani uhudhihile 15 teto obajha ehimaawo, ohunona dholebela dhotaleleya dhinukavihere okala muthu athotho wihina ovulusiwe wodhela omuroromela Kiristu Yesu. 16 Dholebela dhaatedhene dhinadhela wa Mulugu teto dhihikanna mpurelo wohudhiha, wosumulula, wowogola dhithu, wolaga mowogowa, 17 wihina muthu a Mulugu akale oofwanelela ni owiwegeredhene mowakwanela wi aapare mabasa aatene apama.