Mulili Wanekumi

Moyizeji ahimpaganya Farawo wihina kaahogolowele vamentoni vaye. Mbwenye ahinavenyevo vamentoni va Farawo oliye owoga egi: ‘Vaari va mahiyu anamwani aatene owasuza aakudda Ejipitu enere okwa.’ Okuma mwaana a mudhaari ofiyedha aliba oreela.

Vano, Yehova waruma amwaana Ezarayeli wihina kadda murala wawegeredhe mathanga. Mulugu owoga egi: ‘Mpe mwananimbila obe mbuzi enna yaka modha. Muthukule nikamena mudholihe kaxilu. Moose nyamaya, mutakune ni pawu yowoosa mbwenye ehinna emela. Mukale owiwegeredhene wihina mmaruwe. Emahiyu ya peeno, ginere wuwobolani Wijipitu.’ Mohanganyedha amwaana Ezarayeli yahithabwa ohagalala! Aliwa yere ohiya okala adhaari!

Vaari va mahiyu mungero a Yehova ovira mmavaade mwatemwene mwakudda ejipisiyu. Oliye aahoona nikame vakaxiluni, oovolowa mbamwa ompamo mwaana oomusuza. Mbwenye oona wihina kaxiluya ehidholihiwa nikame oliye kavolowamo. Bumwahaya Ejipitu aatene ale ooreela, oohawa yahayelela aniwa owasuza. Mbwenye kaavo mwaana oomusuza aamwaana Ezarayeli akwile.

Ni mwaanaya oomusuza a Farawo ahikwa. Farawo ahithabwa wukuuwa, bumwahaya omwithana Moyizeji ni Arawu ni owoga egi: ‘Thukulani eli yenyu mudhowege. Mudhowe mwamwebedhe Mulugu enyu. Mwaathukule anenyama enyu, mukumemo mwilaboni mwaga!’

Emahiyu yele, mweeri waraga, amwaana Ezarayeli okuma elabo yoWijipitu. Mbwenye yakummewo owegeredheyene, yaali makuru-makuru. Alobwana yaali 600 000, naahiyana owinjhiva vamodha ni anamwani. Teto amodha yahaali amwaana Ezarayeli yahahara wihina yamwebedhege Yehova. Vano amwaana Ezarayeli yahivuluwa muudharini!

Wihina amwaana Ezarayeli ehiddiwale makalelo Yehova aavulusiye Wijipitu, yowawerana mathanga yithaniwa Paskwa.