Mulili Dhimodha Mitanu Nammodha

Moyizeji ni Arawu ohogolowela owoga ni Farawo yegi: — ‘Mulugu awogile wihina wahahiya amwaana Ezarayeli odhowa, ginere odhaaliha elabwawo ponddela.’ Vano, mmavaade mwaatemwene mwakudda ejipisiyu odhaalamo ponddela. Mbwenye mmavaade mwa amwaana Ezarayeli kadhavolowilemo. Mulili ola ni dhoharela dhahihiyana ni dhobajha. Mwaha dhaafwanya mejipisiyu baahi. Bumwahaya Farawo adhe awogege egi: ‘Moyizeji, ginaloba wihina omulobe Yehova amarihe ponddela ndha, ginere wahiya amwaana Ezarayeli odhowa.’ Vano, Yehova omaaliha mulili ole. Mbwenye Farawo kaahiile amwaana Ezarayeli odhowa.

Yehova owoga egi: ‘Farawo aahihiya nlogo naaga odhowa, ginere wapa anenyama aatene akudda ejipisiyu.’ Labo noharela anenyama ewa aatene okwa. Mbwenye aamwaana Ezarayeli kiyakwile. Farawo onona wi anenyama aamwaana Ezarayeli kiyakwile, mbwenye naarive dhigaali ndo, kaahiile amwaana Ezarayeli odhowa.

Nuwindo, Yehova owoga ni Moyizeji egi: ‘Othukule nddora ovokedhe odhulu vamentoni va Farawo.’ Moyizeji nuwerana ele Yehova awogiliye, nipevo naatenene okala nthubi. Nthubi nne naafwanya athu obe anenyama, yokanna makwadda yawiddela vanlubale. Naarive dhigaali ndo, Farawo kaahiile amwaana Ezarayeli odhowa.

Nuwindo, Yehova omuruma Moyizeji wi ahogolowele owoga ni Farawo egi: ‘Woona wi kunafuna ohiya nlogo naaga odhowa, mangwaana elabo yaatene yoWijipitu winere orubwa muzongwe amaralala.’ Labo noharela, Yehova omurubwiha muzongwe amaralala, oojerima ni adari. Yaali ehinapadduwege ethu ninga yeele. Muzongwe ononga dhoojha ni muthankodha. Mbwenye mburo wakala amwaana Ezarayeli kaarubwilewo muzongwe. Vano Farawo owoga ni Moyizeji egi: ‘Ginaloba wihina omulobe Yehova wihina ammaalihe muzongwe ola.’ Eerana ndo, ginere wuhiyani odhowa. Moyizeji odhowa owoga ni Yehova, muzongwe ole omaala. Mbwenye Farawo kaarumile amwaana Ezarayeli odhowa.

Vano Moyizeji owoga ni Farawo egi: ‘Makupu aatene ehanle ni dhojhadha, dhinere ojhiwa ni kwaakwa.’ Nuwindo, matxikwi ni matxikwi a kwaakwa odhaala Wijipitu ni wajha makupu aamatene yahanle. Farawo owoga egi: ‘Ginaloba omulobe Yehova wihina avenyihevo kwaakwa ndha.’ Yehova weeriha wihina kwaakwa ndhe dhimale, mbwenye Farawo kaahiile amwaana Ezarayeli odhowa.

Bumwahaya Yehova omuruma Moyizeji wihina aatadele mada odhulu. Moyizeji nuwerana eyo, okalawo yiihi. Muwari mwa malabo mararu mejipisiyu kiyanda woona ethu newene muthu. Mbwenye yiihi kiyafwannye amwaana Ezarayeli.

Farawo omwithana Moyizeji ni owoga egihina: ‘Dhihikala Moyizeji, we ni nlogo nawo podi odhowa. Mbwenye muhiye ng’ombe ni mambila enyu.’ Moyizeji wakula egi: ‘Nnohowela odhowa ni anenyama ehu. Mwaha nnafuna nimukuthele mukutho Yehova.’ Farawo owoga ni Moyizeji vamodha ni Arawu ootakaleliwene egi: ‘Nvenyevo vamentoni vaaga! Mwahogolowela wuno ginere wupani!’