Yesu Onomusakula Sawulo

Sawulo aabaliwe luwani yoTarsu, teto oliye aali mfarizewu aanonne pamadhene malamulo amaJudewu, ohiya eyo, oliye owawidda maJudewu. Oliye oovira nyumba ni nyumba asayelaga alobwana ni ahiyana yaali makiristawu wihina aavokedhe mukambura.

Sawulo oothabwa wawidda makiristawu ofiyedha omuloba namakutha munlubale wihina amweenye odhowa oDamasku wi aamage makiristawu aatene. Vano Sawulo aaddamelaga oDamasku okumelela waara winlubale osogolo waye ofiyedha oliye omothela vati. Voharela Sawulo wiwa ndhu nawoga nuliye negi: ‘Sawulo onagiharaharela ddi?’ Nuwindo Sawulo wakula egi: ‘Nyunwa muli aani nabwiyani?’ Ndhu nne omwakula negi: ‘Miyo gili Yesu, kadhowa oDamasku wafiya wengo onere onona ethu onahoweliwe werana.’ Mudhidhi yoole, Sawulo obajha ohoona, teto wihina afiye oDamasku alobwana yaali nuliye omuhiddela moono.

Odamasku, wahikala mukiristawu dhaala oororomeleya ithaniwa Ananiya. Yesu omuthwanyuwela Ananiya murohani ni omwaddela wihina adhowe vaade va Judasi ni ahare dila yithaniwa Moono woojha amusayelaga Sawulo. Mbwenye Ananiya wakula egi: ‘Nabwiyani miyo gihiwa dhithu dhowinjhiva wodhela Sawulo, oliye anafuna wihina aamage makiristawu aatene wi aavokedhe mukambura.’ Vano Yesu owogave ni Ananiya egi: ‘Kadhowa mwaha miyo gihimusakula wihina alaleye muthenga dhapama mburo dhowinjhiva.’

Nuwindo Ananiya omaruwa ni odhowa ogumana ni Sawulo ni owoga nuliye egi: ‘Yesu eere ogiruma wihina guvulumuse, vano Sawulo wambela woona.’ Voharela oliye ohudhera wodhela Yesu ni othoma okala namahara a Yesu, vano nubaddiziwa oliye obajha olaleya muthenga dhapama musinagoga ni makiristawu amodha. Kubuwela makalelo makiristawu yaliwa ootakaleliwene numoona Sawulo aahudhihaga athu wodhela Yesu.

Sawulo ahimala yaka tharu alaleyaga oDamasku, mbwenye maJudewu yomwidda ni yosayela makalelo oompa Sawulo. Mbwenye makiristawu nuunona ele maJudewu yubuweliwa werana, aliwa omukavihera Sawulo wihina athawe. Aliwa ompweha mmuddangani munlubale ni omukitihela ode wa txinga wa luwani yoDamasku.

Vano Sawulo nufiya oJeruzale osayela witaganyihedha ni makiristawu amodha, mbwenye aliwa wambela omoova. Vano namahara dhaala ithaniwa Barnabe omwaakela nuupama ni omuthukulela waali arumiwi teto wawaddela wihina Sawulo ahisaddula egumi yaye. Nuwindo Sawulo wambela olaleya muthenga dhapama ni makiristawu ooJeruzale. Teto vasogolova wambela withaniwa Pawulo.