OHUDHERA 49
Yehova anere wawakula malobelo aaga?
‘Nyu munere ogithana ni munere odha wa miyo ni nlobelo, ginere wuvuruwanani.’ — JER. 29:12.
JHIBO 41 Mwaavuruwane malobelo aaga
DHITHU NNAAHUDHERIHUa
1-2. Mwahaya bwaddi malabo mamodha nigubuwela wihina Yehova kanawakula malobelo ehu?
‘OFWANYE ohagalala webaribari ni Yehova, Oliye anere wakwaneliha efunelo ya mmurimani mwawo.’ (Sal. 37:4) Ola mpaganyo woriya vanlubale! Nerege eyo enatapulela wihina Yehova anere onivaha dhithu dhatedhene nnamulobihu? Mwahaya bwaddi nigakoha ndo? Kubuwela ayi. Murogola dhaala ali muddiye anolobela wa Yehova wihina adhowe akurusari Eskola ya Anamalaleya oOmwene. Mbwenye dhinovira yaka dhowinjhivadhene oliye kanithaniwa. Ddibila dhaala ali muzombwe anolobela wa Yehova alobaga wihina amukavihere ovulumuwa wihina awenjhedhedhe mabasa anampareliye Yehova, mbwenye naarive dhigaali ndo oliye kanavulumuwa. Makolo a muzombwe dhaala enolobela wihina mwaniwa akaleve mwebaribarene, mbwenye omakuthulowa mwaniwa anothoma ohiya omulabela Yehova.
2 Podi wera we onowabihaga olobela olobaga ethu-sithu, mbwenye kuwakenle ele walobiliwe. Mwaha wa yeyo, we podi wubuwelaga wihina Yehova anawaakula malobelo aathu amodhaya, mbwenye awo kanawakula, obe podi wera ohambela wubuwela wihina oherana ethu yabure. Murogola dhaala anithaniwa Janiceb ubuwela ndo. Oliye vamodha ni mamune yoolobela wodhela efunelo yewa yolaba oBeteli oliye anowoga egi: “Miyo gahikanna ebaribari wihina nere withaniwa mowaguva wi nalabege oBeteli.” Mbwenye wahivira mudhidhi wowinjhivene aliwa yahithaniwe. Janice anowogave egi: “Miyo gahukuwa ni kagonelamo dhithudha, miyo gowikohesa akala gaherana ethu yamuukunle Yehova. Gahimwaddela pamadhene ethu gafunimi. Mbwenye mwahaya bwaddi Oliye adhe ahakulege nlobelo naaga?
3. Ohudhera wula nnaasuze ddi?
3 Malabo mamodha iyo podi wikohaga akala Yehova anowavuruwana malobelo ehu. Adhaari amodhaya oororomeleya a Yehova akale, yothuwathuwa ni muselu yola. (Jó 30:20; Sal. 22:2; Hab. 1:2) Ddiniyani enukavihere wonelamo wihina Yehova mwebaribarene anere wawakula malobelo awo? (Sal. 65:2) Wihina nande wakula nikoho nna, nnafuna noone ponto tharu: (1) Nijhehege ddi wa Yehova? (2) Yehova anajheha wihina nerena ddi? (3) Mwahaya bwaddi malabo mamodha egahoweleya waasaddula malobelo ehu?
NIJHEHEGE DDI WA YEHOVA?
4. Mowiwanana ni Jeremias 29:12, ethu baani Yehova anapaganyiye werana?
4 Yehova anopaganya wihina anere wavuruwana malobelo ehu. (Omwileri Jeremias 29:12.) Mulugu ehu anowadhivela adhaari aye oororomeleya, bumwahaya Oliye kadha aapwaza malobelo ewa. (Sal. 10:17; 37:28) Mbwenye eyo kinatapulela wihina Oliye anere onivaha dhithu dhatedhene nnamulobihu. Dhithu dhimodha nnamulobihu nnakele baahi mwilaboni exa.
5. Ethu baani Yehova anubuweliye awiwaga malobelo? Owogemo.
5 Yehova anowubuwela makalelo dhooloba dhehu dhiniwananiwa ni efunelo yaye. (Isa. 55:8, 9) Ethu modha enakosa epaddi ya efunelo ya Yehova sowihina mwilaboni yavati mudhaaliwemo ni athu owiwanana ni oohagalala enathongiwege ni Omwene waye. Mbwenye Saddana aawogile wihina athu yere okala oohagalala yithongaga yekiwa. (Gén. 3:1-5) Wihina Yehova ooniwe wihina dhithu awogile Saddana sowoota, Oliye anowenya wihina onamathonga wa athu okalewo. Mbwenye onamathonga wa athu bunatatamula makathamiho owinjhiva ninnihuna peeno. (Ecl. 8:9) Iyo nihinona wihina Yehova kanaamarihe makathamiho aatene ovanene. Oliye aherena ndo, athu yerege wubuwela wihina onamathonga wa athu onokavihera ni ohanda wamariha makathamiho aatene amwilaboni yavati.
6. Mwahaya bwaddi nikanna ebaribari wihina Yehova anere werana dhithudha nuudhivela ni mwamakalelo apama?
6 Yehova podi wawakula malobelo ooligana mwamakalelo oohiyana. Motajhiha, mwene Ezekiya nuukala muredda oliye ahimpigireyela Yehova ninlobelo wihina Yehova anvulumuse, teto Yehova ahinvulumusa. (2 Reis 20:1-6) Mbwenye murumiwi Pawulo numpigireyela Yehova amulobaga wihina ‘amwangule mwinga waali mmwiilini mwaaye,’ podi wera mwinga ola waali oredda murumiwi Pawulo anniyena, Yehova kerilena eyo. (2 Cor. 12:7-9) Teto kasugwa yampadduwenle murumiwi Tiyagu ni Peduru. Mwene Erodi afuna aape aabilene, teto mulogo waatene wahimulobelela Peduru, teto podi wera ni Tiyaguya. Tiyagu ahipiwa mbwenye Peduru aahoboliwa mukambura mune mwamakalelo ootikiniha wodhela mungero. (At. 12:1-11) Iyo podi wikoha, ‘Mwahaya bwaddi Yehova adhe anvulusege Peduru mbwenye weenya wihina Tiyagu apiwe?’ Bibiliya kanawoga.c Mbwenye ethu modha nnonihu sowihina Yehova, Mulugu ‘owogowa.’ (Deut. 32:4) Teto iyo nihinona pamadhene wihina Yehova owadhivela aabiilene, Tiyagu vamodha ni Peduru. (Apo. 21:14) Malabo mamodha Yehova podi wawakula malobelo ehu mwamakalelo nahajhehedhihu. Mbwenye naarive dhigaali ndo, iyo nihikanna ebaribari wihina Yehova anowerana dhithudha nuudhivela ni mowogowa. Bumwahaya iyo kannathuwathuwela onona mwahaya bwaddi Yehova adhe asakulege wawakula malobelo mwamakalelo anafuniye. — Jó 33:13.
7. Ethu baani nahinahowelihu werana, ki mwahaya bwaddi?
7 Iyo kannafuna oliganiha dhithu dhinanipadduwela ni dhithu dhinaapadduwela athu amodhaya. Motajhiha, podi wera iyo nnomuloba Yehova wihina anikavihere ni ethu enanithuwathuwiha, mbwenye yoloba yehu kinaakuliwa. Nuuvira mudhidhi iyo onona wihina ohukalawo muthu alobenle alobaga ethu emodhave teto enakala ninga Yehova ohakula nlobelo naye. Murogola dhaala anithaniwa Ana ehimpadduwela ethu ninga yela. Oliye ahilobela wihina mamune, Matewuji, avulumuwe mwaha wa oredda anniyena wa kanser. Mbwenye mudhidhi mmodhave arogola abiili owunnuwelavo yanna owanana oredda mmodhave wa kanser. Ana ahilobela vanlubale amulobelelaga mamune Matewuji vamodha ni arogola ale abiili owunnuwelavo. Arogola ale abiili yahivulumuwa, mbwenye mamune okwa. Omambelelowene Ana ahibajha wikoha akala arogola ale abiili owunnuwelavo yaakaviheriwe ni Yehova. Vano akala di Yehova aakavihenre, mwahaya bwaddi Oliye adhe ahimukaviherege mamune? Ebaribari wihina kannone mwayaha bwaddi arogola ale abiili edhe evulumuwege mbwenye mamune Ana naari. Mbwenye nnonihu sowihina Yehova anopaganya wamariha makathamiho ehu aatene osogolo ni Oliye anofuna vanlubale wavenyiha akwaye ekwile. — Jó 14:15.
8. (a) Mowiwanana ni Isaías 43:2, Yehova ananikavihera aavi? (b) Malobelo enanikavihera aavi nafwanyiwaga makathamiho? (Osugwe vidiyu, Malobelo enonikavihera owanana makathamiho.)
8 Yehova kadha anihiya yekihu. Ninga baabi oodhivela Oliye kanadhiveliwa aanoonaga iyo nonaga goyi. (Isa. 63:9) Naarive dhigaali ndo, Yehova kananibarela wa makathamiho aatene enaliganihiwa ni muhinjhe obe ni mootho. (Omwileri Isaías 43:2.) Mbwenye Oliye anonipaganya wihina anerege onikavihera ‘wawanana makathamiho’ ala teto kanenye wihina makathamiho a peeno enigonjhihe, ohiya eyo Yehova anonivaha muzimu waye wotxena wihina anivahe kopolo, wihina anikavihere ohuselela. (Luc. 11:13; Fil. 4:13) Bumwahaya iyo podi okanna ebaribari wihina malabo amatene nnerege okanna ele nnahowelihu wi nande ovilela ni okalave oororomeleya wa Yehova.d
YEHOVA ANAJHEHA WIHINA NERENA DDI?
9. Mowiwanana ni Tiago 1:6, 7, mwahaya bwaddi nnohowela ororomela wihina Yehova anere onikavihera?
9 Yehova anajheha wihina nimuroromelege. (Heb. 11:6) Malabo mamodha makathamiho ehu enoothabwa orusa ofiyedha iyo wubuwelaga wi kannande wavilelana. Iyo podi wambela wanganyedha akala Yehova anere onikavihera. Mbwenye Bibiliya anihina ni kopolo dha Mulugu, iyo podi ‘ogwelela mwango.’ (Sal. 18:29) Bumwahaya ohiya wanganyedhaga akala Yehova anere onikavihera, nnohowela olobela ni nroromelo ninlubale nroromelaga wihina Yehova anere wawakula malobelo ehu. — Omwileri Tiago 1:6, 7.
10. Owoge yopadduwa enoniha enooniha makalelo owerana dhithu mowiwanana ni malobelo ehu.
10 Yehova anajheha wihina nalobela, nerena ethu-sithu mowiwanana ni ele nlobilihu. Motajhiha, podi wera ddibila anolobela alobaga wi avahiwe feriya omabasani wihina ande woona musonkano wa malabo mararu. Yehova aakule aavi nlobelo nna? Wodhela onvaha ddibila ole oliba murima anahoweliye wihina awoge ni patarawu aye. Naarive dhigaali ndo ddibila ole onohowela werana epaddi yaye, odhowa wihina awoge ni patarawu aye, podi wera oliye anere ohowela oloba dila dhowinjhivadhene. Oliye podi omuloba mukwaye oomabasani wihina ahale vamburoni vaye, teto yahoweleyaga oliye anohowela orumedha patarawu aye awoga wihina mweri yole anere ovugula korowa anaakeliye.
11. Mwahaya bwaddi nnohowela olobela dila dhowinjhivadhene nimwaddelaga Yehova dhothuwathuwiha dhehu?
11 Yehova anajheha wihina nididele olobela nlobaga dhithu dhili dhathima mwigumini mwehu. (1 Tes. 5:17) Yesu ohoniha wi dhooloba dhehu dhimodha, kadhinakuliwe mowaguva. (Luc. 11:9) Bumwahaya kuselele! Olobelege ni murima wawo wamutene. (Luc. 18:1-7) Nadidela olobela wodhela muselu bu muselu nnomoniha Yehova wihina ethu ele nnalobihu sathima wa iyo vano, teto kahiyo ethu nnafunihu mudhidhi yole baahi. Ohiya eyo nnowoniha wi nihikanna nroromelo wihina Oliye anere onikavihera.
MWAHAYA BWADDI MALABO MAMODHA EGAHOWELEYA WAASADDULA MALOBELO EHU?
12. (a) Nikoho baani nnahowelihu werana wodhela malobelo ehu? (b) Nnonihe aavi wihina nnomuriha Yehova naalobelaga? (Osugwe kwaduru “Malobelo aaga enowoniha wihina ginomuriha Yehova?”)
12 Akala ethu nimulobilihu Yehova kinapadduwa ninga mwafunelihu, nnohowela wawerana makoho mararu. Noobajha, ‘Ethu yela ginalobimi ginohowela mwebaribarene?’ Malabo owinjhiva nnubuwela wihina nihinona ethu eli yapama wa iyo. Mbwenye podi wera ethu nnalobihu ovanene kinanikavihere osogolo. Akala nnolobela nlobaga wihina Yehova amarihe muladdu, podi wera ehikalawo makalelo mamodhaya oweddiha muselu ole. Teto ethu emodhaya sowihina dhithu dhimodha nnamulobihu Yehova podi wera kadhiniwanana ni efunelo yaye. (1 João 5:14) Kubuwela yotajhiha ya abaabi ale esorihiwe ddima yobajha. Aliwa yahimuloba Yehova wihina mwaniwa akaleve mwibaribarini. Enakala ninga yoloba ela kahi yabure mbwenye Yehova kadha amuwaddihedha muthu omulabela. Oliye anafuna wihina aatene iyo vamodha ni aniihuya, esakule omulabela Oliye. (Deut. 10:12, 13; 30:19, 20) Bumwahaya ohiya oloba wihina mwaniwa akaleve mwibaribarini, abaabi podi omuloba Yehova wihina aakavihere odahinya murima wa mwaniwa ni omukongomedha omudhivela Yehova ni wandana nuliye.— Pro. 22:6; Efé. 6:4.
13. Mowiwanana ni Hebreus 4:16, Yehova anaanikavihere alini? Owogemo.
13 Nikoho nanabiili nnahowelihu wikoha thinna, ‘Ola mudhidhi wofwanelela wihina Yehova agivahe ethu ginalobimi?’ Podi wera we onubuwela wi onohowela yowakula yowaguveya, mbwenye ebaribariya sowihina Yehova ohunona mudhidhi wapama wonikavihera. (Omwileri Hebreus 4:16.) Dhooloba dhehu dhahakuliwa iyo podi wubuwela wi yowakula ya Yehova sowihina ‘Naari.’ Mbwenye podi wera yowakulaya sowi ‘Ovanene naari.’ Motajhiha kamubuwele dila biili muzombwe ole aloba wihina Yehova anvulumuse. Ahere Yehova awerana matikiniho ni anvulumusa. Saddana eere owoga wihina ddibila ole ahididela omulabela Yehova mwaha wihina ahivulumusiwa. (Jó 1:9-11; 2:4) Ohiya eyo Yehova ohupaganya wihina osogolo anere omariha oredda watene. (Isa. 33:24; Apo. 21:3, 4) Mudhidhi oyo wahinafiye kanijhehe ovulumusiwa mwamakalelo ootikiniha. Vano ddibila ole anohowela olobela wa Yehova wihina anvahe kopolo ni murenddele wa mmubuweloni wihina adidele ovilela. Naarive agaali muredda adhowegeve amulabelaga Yehova nuroromeleya. — Sal. 29:11.
14. Ohudhenre ddi ni yopadduwa ya Janice?
14 Onomubuwela murogola ole Janice, alobela wihina adhowe alabege oBeteli? Dhahivira yaka tanu wihina ande wonelamo wihina Yehova ahaakula nlobelo naye. Oliye anowoga egi: “Muwari mwa yaka ndha Yehova ohugihudhiha ni ohugikavihera okala mukiristawu apama. Miyo gohowela omuroromelaga Oliye ni owomihedha makalelo owerana ohudhera waga wavayeka. Ohiya eyo miyo gohowela ohudhera wihina ohagalala waga kunadha mwaha wa mburo ginamulabelimiwo Yehova.” Nuuvira mudhidhi Janice vamodha ni mamune yahithaniwa wihina ekale anameeddela mulogo. Asugwaga mundduli Janice anowoga egi: “Yehova ohawakula malobelo aaga, mbwenye ohiya mwamakalelo gajhehedhimi. Wahivira mwana mudhidheene ofiyedha miyo wonelamo wihina yowakula ya Yehova waali mukono woriya vanlubale. Miyo ginotamalela vanlubale mwaha gihanda woona opama ni odhivela wa Yehova.”
Akala onubuwela wihina Yehova kanawakula malobelo awo, ononamo aavi olobela olobaga dhithu dhimodha? (osugwe ddima 15)f
15. Mwahaya bwaddi malabo mamodha sapama osaddula malobelo ehu? (Osugwe fotu)
15 Nikoho nanatharu thinna: ‘Gerege ginohowela osaddula nlobelo naaga?’ Naarive egaali ethu yapama omwaddela Yehova kadda ethu naalobelaga, Podi wera nnere onona pama ethu Yehova ananifuniyena, nahithabwaga osoriha kadda ethu nnalobihu naalobelaga. Kasugwa yotajhiha ya murogola ole asorihiwe mundduli ali muddiye, alobela wihina akursari eskola ya Anamalaleya oOmwene. Oliye afuna akavihere murudda winahoweleya anamalaleya. Mbwenye wula alobelaga wihina ithaniwe, oliye podi olobela wihina Yehova amukavihere woona makalelo mamodhaya, owawenjhedhedha mabasaye anampareliye Yehova. (Atos 16:9, 10) Vasogolova, mowiwanana ni ela alobiliye oliye podi omukoha nameeddela mulogo akala ohukalawo mulogo wowaddamela winahoweleya apiyonero. Obe oliye podi olebela karta oBeteli akohaga akala wihikala mburo winahoweleya anamalaleya.e
16. Ebaribari baani nnahowelihu okanna?
16 Ninga nonilihu, iyo podi okanna ebaribari wihina Yehova anere wawakula malobelo ehu, nuudhivela ni mwamakalelo apama. (Sal. 4:3; Isa. 30:18) Malabo mamodha podi wera nlobelo nehu kannakuliwe ninga munafunelihu. Mbwenye Yehova kadha aapwaza malobelo ehu, mwaha Oliye ononidhivela vanlubale ni kadha annyanyala. (Sal. 9:10) Bumwahaya mudhowegeve ‘mmuroromelaga oliye’ ni mulobelege wa Yehova ni muriminyu waatene. — Sal. 62:8.
JHIBO 43 Nlobelo notamalela
a Ohudhera wula onere owoga mwahaya bwaddi nigahowela ororomelaga wihina Yehova anerege wawakula malobelo ehu, nuudhivela ni mwamakalelo apama.
b Mandina mamodha ehisadduliwa.
c Osugwe ohudhera onna “Onororomela makalelo Yehova aneddihiye dhithudha?” mu Namasugwera a Fevereiro a 2022, epaddi 2-4 ddima 3-6.
d Wihina onone dhithu dhimodha wodhela makalelo Yehova ananikaviheriye wavilelana makathamiho, osugwe vidiyu, Malobelo enonikavihera owanana makathamiho, mu sayitini jw.org.
e Wihina onone makalelo owiivahedha wihina wapare mabasa oolaleya filiyale dhimodha, osayele livuru Organizados para Fazer a Vontade de Jeová, epaddi 10 ddima 6-9.
f OTAPULELA WA FOTU: Arogola abiili enolobela yahinathi operenxeri petisawu yanamalaleya oOmwene. Nuuvira mudhidhi mmodha wa aliwa anowithaniwa, mbwenye mmodhaya naari. Ohiya otakaleliwa murogola ole ahiithaniwe anolobela wa Yehova amulobaga wihina amukavihere wihina amulabelegeve Oliye. Vano anowalebela karta addibila oBeteli ivahedhaga wihina akavihere murudda winahoweleya anamalaleya.