Ebda Paċi Għall-​messaġġieri Foloz!

“Il-​ħżiena jitqaċċtu ’l barra . . . Imma l-​ġwejdin għad jirtu l-​art, u bi sliem kotran jitgħaxxqu.”—SALM 37:9, 11.

1. Għala għandna nistennew li nsibu messaġġieri, kemm veri u kemm foloz, fiż-​“żmien taʼ l-​aħħar”?

MESSAĠĠIERI​—foloz jew veri? Kien hemm iż-​żewġ tipi fi żminijiet Bibliċi. Imma xi ngħidu dwar żmienna? F’Danjel 12:9, 10, naqraw li messaġġier mis-​sema qal lill-​profeta t’Alla: “Dan id-​diskors huwa magħluq u ssiġillat saż-​żmien taʼ l-​aħħar. Ikunu ħafna dawk li jintgħażlu mill-​bqija, jindafu u jissaffew; imma l-​ħżiena jibqgħu jagħmlu l-​ħażin, u ebda wieħed minnhom ma jifhem xejn, jifhmu biss dawk li jkunu bil-​għaqal [“għandhom id-​dehen,” NW].” Aħna issa qegħdin ngħixu f’dak iż-​“żmien taʼ l-​aħħar.” Qegħdin aħna naraw distinzjoni qawwija bejn “il-​ħżiena” u ‘dawk li għandhom id-​dehen’? Ċertament li qegħdin narawha!

2. Isaija 57:20, 21 kif qiegħed jitwettaq illum?

² F’kapitlu 57, versi 20 u 21, naqraw il-​kliem taʼ Isaija l-​messaġġier t’Alla: “‘[I]l-ħżiena bħal baħar imqanqal, li ma jistaʼ jsib kwiet b’xejn, u ilmijietu jqanqlu ħama u tajn. M’hemmx sliem għall-​ħżiena,’ jgħid Alla tiegħi.” Kemm jiddeskriviha tajjeb dan il-​kliem lil din id-​dinja hekk kif qiegħda toqrob lejn is-​seklu 21! Xi wħud saħansitra jistaqsu, ‘Se jirnexxilna nilħquh dak is-​seklu?’ X’għandhom x’jgħidulna l-​messaġġieri li għandhom id-​dehen?

3. (a) Liema kuntrast jiġi mislut minn 1 Ġwann 5:19? (b) Dawk li “għandhom id-​dehen” kif inhuma deskritti f’Apokalissi kapitlu 7?

³ L-​appostlu Ġwanni kellu dehen imnebbaħ b’mod divin. Fl-​1 Ġwann 5:19, jiġi mistqarr: “Nafu li aħna ġejjin minn Alla u li d-​dinja kollha qiegħda taħt idejn il-​Ħażin.” B’kuntrast maʼ din id-​dinja hemm il-​144,000 Israeliti spiritwali, u għad hawn fostna fdal minnhom li kulma jmur qegħdin iktar jixjieħu. Flimkien maʼ dawn illum hemm il-​“kotra kbira . . . minn kull ġens u tribù, minn kull poplu u lsien,” li issa tgħodd iktar minn ħames miljuni, u li wkoll għandhom id-​dehen. “Dawn huma dawk li ġejjin mit-​taħbit il-​kbir [“tribulazzjoni l-​kbira,” NW].” U għala jiġu ppremjati? Għaliex anki huma “l-​ilbiesi tagħhom ħasluhom u bajjduhom fid-​demm tal-​Ħaruf” billi eżerċitaw fidi fir-​rahan taʼ Ġesù. Bħala messaġġieri tad-​dawl, huma wkoll qegħdin, “lejl u nhar jaqduh [lil Alla] fit-​tempju tiegħu.”—Apokalissi 7:4, 9, 14, 15.

It-​Taparsi Messaġġieri Tal-​Paċi

4. (a) It-​taparsi messaġġieri tal-​paċi fid-​dinja taʼ Satana għala huma kkundannati għall-​falliment? (b) Efesin 4:18, 19 kif japplika llum?

⁴ Xi ngħidu, iżda, dwar it-​taparsi messaġġieri tal-​paċi fis-​sistema dinjija taʼ Satana? F’Isaija kapitlu 33, vers 7 [KŻ], naqraw: “Ara, il-​qalbenin tagħhom igħajtu minn barra: il-​messaġġieri tas-​sliem jibku biki taʼ mrar.” Kemm huwa minnu dan dwar dawk li jiġġerrew ’l hemm u ’l hawn donnhom f’dillirju minn belt kapitali tad-​dinja għal oħra, fi sforzi biex iġibu l-​paċi! Kollu taʼ xejn! Dan għala? Għaliex huma jittrattaw mas-​sintomi taʼ l-​inkwiet tad-​dinja minflok ma jissaraw maʼ l-​għerq tal-​kwistjonijiet. L-​ewwelnett, huma għomja rigward l-​eżistenza taʼ Satana, li lilu l-​appostlu Pawlu jiddeskrivih bħala “l-​alla taʼ din id-​dinja.” (2 Korintin 4:4) Satana żaraʼ żrieragħ taʼ ħażen fost l-​ispeċi umana, bir-​riżultat li l-​maġġoranza, inklużi ħafna mill-​ħakkiema, issa tixirqilhom id-​deskrizzjoni f’Efesin 4:18, 19: “Il-​fehma tagħhom hi mdallma, maqtugħa mill-​ħajja taʼ Alla minħabba l-​injoranza li għandhom u l-​ebusija taʼ qalbhom. Huma tilfu kull sentiment u ntelqu għal ħajja bla rażan, għal kull xorta taʼ żina bla xabaʼ.”

5. (a) Aġenziji umani għala ma jirnexxux bħala wħud li jġibu l-​paċi? (b) Salm 37 jagħti liema messaġġ taʼ faraġ?

⁵ L-​ebda aġenzija taʼ bnedmin imperfetti ma tistaʼ tqaċċat mill-​għeruq tal-​qlub umani r-​regħba, l-​egoiżmu, u l-​mibegħda li tant huma prevalenti llum. Il-​Ħallieq tagħna, il-​Mulej Sovran Jehovah biss, jistaʼ jagħmlu dan! Barra minn hekk, huma l-​ġwejdin biss, minoranza fost l-​umanità, li huma lesti li jissottomettu ruħhom għall-​gwida tiegħu. Ir-​riżultati għal dawn u għan-​nies mill-​agħar tad-​dinja huma kkuntrastati f’Salm 37:9-11: “Il-​ħżiena jitqaċċtu ’l barra; min jittama fil-​Mulej jikseb l-​art. Ftit ieħor, u l-​ħażin ma jkunx aktar . . . Imma l-​ġwejdin għad jirtu l-​art, u bi sliem kotran jitgħaxxqu.”

6, 7. Liema rekord tar-​reliġjonijiet tad-​dinja juri li dawn fallew li jaqdu bħala messaġġieri tal-​paċi?

⁶ Jistgħu, allura, messaġġieri tal-​paċi jinstabu fost ir-​reliġjonijiet taʼ din id-​dinja marida? Sewwa, x’rekord għandha r-​reliġjon sal-​ġurnata tal-​lum? L-​istorja turi li r-​reliġjon kellha sehem fi, iva, kienet saħansitra l-​instigatriċi taʼ ħafna mit-​tixrid taʼ demm matul is-​sekli. Per eżempju, il-​Christian Century tal-​ġimgħa tat-​30 t’Awissu, 1995, li rrapportat fuq it-​taqlib f’dik li qabel kienet il-​Jugoslavja, stqarret: “Fil-​Bosnja kkontrollata mis-​Serbi, qassisin joqogħdu bil-​qiegħda fl-​ewwel filliera tal-​parlament li fformaw huma stess, u qegħdin ukoll fuq il-​front tal-​gwerra, fejn skwadri u saħansitra armi jiġu mberkin qabel il-​battalji.”

⁷ Seklu taʼ xogħol missjunarju tal-​Kristjaneżmu fl-​Afrika ma kellux riżultat aħjar, bħalma ġie muri tajjeb fl-​Irwanda, pajjiż li għandu r-​reputazzjoni li huwa 80 fil-​mija Kattoliku. The New York Times tas-​7 taʼ Lulju, 1995, irrapportat: “Golias, rivista Kattolika liberali lajka ppubblikata f’Lyons [Franza], tippjana li tidentifika 27 qassis Irwandiż ieħor u erbaʼ sorijiet li din tgħid li qatlu jew inkuraġġew il-​qtil is-​sena l-​oħra fl-​Irwanda.” African Rights, organizzazzjoni tad-​drittijiet tal-​bniedem f’Londra, għamlet dan il-​kumment: “Saħansitra iktar mis-​silenzju tagħhom, il-​knejjes iridu jagħtu kont tal-​kompliċità attiva taʼ xi wħud mill-​qassisin, mexxejja spiritwali u sorijiet tagħhom fil-​ġenoċidju.” Dan jixbah is-​sitwazzjoni f’Israel meta Ġeremija, il-​messaġġier veru taʼ Jehovah iddeskriva kif Israel kellu “jirgħex” flimkien mal-​ħakkiema tiegħu, mal-​qassisin tiegħu, u mal-​profeti tiegħu, billi żied: “Fil-​kefef taʼ lbiesek jinsab id-​demm taʼ nies bla ħtija.”—Ġeremija 2:26, 34.

8. Għala jistaʼ jingħad li Ġeremija kien messaġġier tal-​paċi?

⁸ Ġeremija taʼ spiss ġie msejjaħ profeta taʼ kundanna, imma setaʼ wkoll jissejjaħ il-​messaġġier tal-​paċi t’Alla. Hu rrefera għal-​paċi daqs kemm kien irrefera għaliha Isaija qablu. Jehovah uża lil Ġeremija biex jippronunzja ġudizzju fuq Ġerusalemm, billi qal: “Din il-​belt sa minn mindu bnewha sa llum kienet il-​kaġun taʼ l-​għadab u l-​qilla tiegħi; għalhekk issa jkolli niknisha minn quddiemi minħabba l-​ħażen kollu taʼ wlied Iżrael u wlied Ġuda li għamlu biex jinkuni, huma, is-​slaten tagħhom, il-​prinċpijiet tagħhom, il-​qassisin tagħhom, il-​profeti tagħhom u n-​nies taʼ Ġuda u dawk li jgħammru f’Ġerusalemm.” (Ġeremija 32:31, 32) Dan ta stampa bil-​quddiem tal-​ġudizzju taʼ Jehovah fuq il-​ħakkiema u l-​kleru fil-​Kristjaneżmu llum. Biex issaltan il-​paċi vera, dawn l-​instigaturi tal-​ħażen u l-​vjolenza jridu jitneħħew min-​nofs! Ċertament li m’huma ebda messaġġieri tal-​paċi.

Il-​ĠM Bħala Waħda Li Ġġib Il-​Paċi?

9. Il-​ĠM kif sostniet li hija messaġġier tal-​paċi?

⁹ Ma tistax il-​Ġnus Magħquda ssir messaġġier veru tal-​paċi? Wara kollox, l-​introduzzjoni tal-​kostituzzjoni tagħha, ippreżentata f’Ġunju 1945, 41 jum biss qabel ma l-​bomba atomika għamlet ħerba lil Ħiroxima, stqarret l-​iskop tagħha: “biex issalva lil ġenerazzjonijiet suċċessivi mill-​pjaga tal-​gwerra.” Il-​ħamsin membru prospettiv tal-​Ġnus Magħquda kellhom “jgħaqqdu s-​saħħa [tagħhom] biex iżommu paċi u sigurtà internazzjonali.” Illum il-​ĠM għandha 185 nazzjon bħala membri, ilkoll suppost iddedikati għall-​istess kawża.

10, 11. (a) Il-​mexxejja reliġjużi kif lissnu l-​appoġġ tagħhom għall-​ĠM? (b) Il-​papiet b’liema mod irrappreżentaw ħażin “l-​Aħbar Tajba tas-​Saltna t’Alla”?

¹⁰ Matul is-​snin il-​ĠM ġiet imfaħħra bil-​kbir, speċjalment minn mexxejja reliġjużi. Fil-​11 t’April, 1963, il-​Papa Ġwanni XXIII iffirma l-​enċiklika tiegħu intitolata “Pacem in Terris” (Paċi Fuq L-​Art) li fiha stqarr: “Hija x-​xewqa serja tagħna li l-​organizzazzjoni tal-​Ġnus Magħquda​—fl-​istruttura tagħha u fil-​mezzi tagħha—tistaʼ ssir dejjem iżjed kapaċi tlaħħaq mal-​kobor u n-​nobbiltà taʼ l-​impennji tagħha.” Iktar tard, f’Ġunju 1965, mexxejja reliġjużi, li suppost jirrappreżentaw nofs il-​popolazzjoni tad-​dinja, f’San Francisco ċċelebraw l-​20 sena mit-​twelid tal-​ĠM. Anki fl-​1965, il-​Papa Pawlu VI, fi żjara lill-​ĠM iddeskrivieha bħala “l-​aħħar tama taʼ qbil u paċi.” Fl-​1986, Papa Ġwanni Pawlu II kkopera biex jippromwovi s-​Sena Internazzjonali Tal-​Paċi tal-​ĠM.

¹¹ Għal darb’oħra, matul iż-​żjara tiegħu f’Ottubru 1995, il-​papa ddikjara: “Illum qegħdin niċċelebraw l-​Aħbar Tajba tas-​Saltna t’Alla.” Imma huwa hu attwalment il-​messaġġier t’Alla taʼ l-​aħbar tajba tas-​Saltna? Waqt li tkellem dwar il-​problemi tad-​dinja, hu ssokta jgħid: “Hekk kif niffaċċjaw dawn l-​isfidi enormi, kif nistgħu nonqsu li nirrikonoxxu l-​irwol taʼ l-​Organizzazzjoni tal-​Ġnus Magħquda?” Il-​ĠM, iktar milli s-​Saltna t’Alla, hija l-​għażla tal-​papa.

Raġunijiet Għal ‘Biki B’Imrar’

12, 13. (a) Il-​ĠM kif aġixxiet bil-​mod deskritt f’Ġeremija 6:14? (b) It-​tmexxija tal-​ĠM għala hija inkluża fid-​deskrizzjoni f’Isaija 33:7?

¹² Iċ-​ċelebrazzjoni tal-​50 anniversarju tal-​ĠM naqset li tirrivela xi prospett reali taʼ “paċi fuq l-​art.” Raġuni waħda kienet indikata minn kittieb fit-​Toronto Star tal-​Kanada, li kiteb: “Il-​Ġ.M. hija ljun bla snien, li jgħajjat meta jiġi kkonfrontat minn salvaġiżmu uman, imma jkollha tistenna sakemm il-​membri tagħha jlibbsuha d-​dentatura qabel tkun tistaʼ tigdem.” Taʼ spiss dik il-​gidma kienet żgħira wisq u tard wisq. Il-​messaġġieri tal-​paċi fis-​sistema dinjija preżenti, u speċjalment dawk fil-​Kristjaneżmu, għadhom jidwu l-​kliem taʼ Ġeremija 6:14: “U jippretendu li jdewwu l-​ġerħa tal-​poplu tiegħi bħallikieku xejn u jgħidu: ‘Sliem, Sliem’ u m’huwa sliem xejn.”

¹³ Segretarji ġenerali suċċessivi tal-​ĠM ħadmu iebes, u bla dubju b’mod sinċier, biex iġagħlu lill-​ĠM tirnexxi. Imma t-​tilwim kontinwu bejn il-​185 membru b’ħafna skopijiet ġo moħħhom dwar kif jikkontrollaw il-​gwerer, ifasslu l-​politika, u jittrattaw l-​iffinanzjar fixkel il-​prospetti għas-​suċċess. Fir-​rapport annwali tiegħu għall-​1995, is-​segretarju ġenerali taʼ dak inhar kiteb dwar l-​“ispettru taʼ katakliżmu nukleari globali” li qiegħed imajna bħala li qiegħed jiftaħ it-​triq biex il-​“ġnus jaħdmu flimkien lejn progress ekonomiku u soċjali għall-​ispeċi umana kollha kemm hi.” Imma żied: “B’sogħba, ir-​rekord taʼ ġrajjiet dinjin għal dawn l-​aħħar ftit tas-​snin ikkontradixxa bil-​kbir lil dawk l-​istennijiet ottimisti.” Verament, it-​taparsi messaġġieri tal-​paċi qegħdin ‘jibku b’imrar.’

14. (a) Għala jistaʼ jingħad li l-​ĠM hija falluta kemm finanzjarjament u kemm moralment? (b) Ġeremija 8:15 kif qiegħed jitwettaq?

¹⁴ Titlu f’The Orange County Register taʼ California qal: “Il-​Ġ.M. Hija Falluta Finanzjarjament u Moralment.” L-​artiklu stqarr li bejn l-​1945 u l-​1990, kien hemm iktar minn 80 gwerra, li swew iktar minn 30 miljun ruħ. Dan ikkwota kittieb mill-​ħarġa tar-​Reader’s Digest t’Ottubru 1995 li “jiddeskrivi operazzjonijiet militari tal-​Ġ.M. bħala li huma kkaratterizzati minn ‘kmandanti inkompetenti, suldati bla dixxiplina, alleanzi m’aggressuri, nuqqas li jevitaw atroċitajiet u xi drabi saħansitra jikkontribwixxu għall-​orrur.’ Iktar minn hekk, ‘il-​livell taʼ ħela, frodi, u abbuż huwa estrem.’” F’sezzjoni intitolata “Il-​Ġ.M. taʼ 50,” The New York Times ġabet it-​titlu “Immaniġġar Ħażin u Ħela Jherru L-​Aqwa Intenzjonijiet Tal-​Ġ.M.” The Times taʼ Londra, l-​Ingilterra, intitolat artiklu bil-​kliem, “Fraġli taʼ Ħamsin​—Il-​ĠM teħtieġ programm t’eżerċizzju biex terġaʼ tiġi f’tagħha.” Fi qbil mal-​fatti, dan huwa bħalma naqraw f’Ġeremija kapitlu 8, vers 15: “Stennejna s-​sliem, imma ma sibna ebda riżq; is-​siegħa tal-​fejqan, imma ma sibniex ħlief twerwir!” U t-​theddida t’olokawst nukleari għadha mdendla fuq l-​umanità. Jidher ċar li l-​ĠM m’hijiex il-​messaġġier tal-​paċi li l-​umanità teħtieġ.

15. Babilonja tal-​qedem u n-​nisel reliġjuż tagħha kif taw prova li huma kemm distruttivi u kemm li jilloppjawk?

¹⁵ X’se jkun ir-​riżultat taʼ dan kollu? Il-​Kelma profetika taʼ Jehovah ma tħalli ebda dubju. L-​ewwelnett, x’hemm fil-​futur għar-​reliġjonijiet foloz tad-​dinja li tant taʼ spiss tħabbew iżżejjed mal-​ĠM? Dawn huma n-​nisel minn sors idolatruż ewlieni wieħed, Babilonja tal-​qedem. Kif jixraq, dawn huma deskritti f’Apokalissi 17:5 bħala “Babilonja l-​Kbira, omm in-​nisa żienja u l-​qżiżijiet taʼ l-​art.” Ġeremija ddeskriva l-​kundanna taʼ din il-​ġemgħa mħallta ipokrita. Bħal prostituta, huma sseduċew lill-​politikanti taʼ l-​art, billi neffħu lill-​ĠM u fformaw relazzjonijiet illeċiti mal-​qawwiet politiċi membri tagħha. Kienu parteċipanti ewlenin fil-​gwerer taʼ l-​istorja. Kummentatur wieħed stqarr b’referenza għall-​ġlied reliġjuż fl-​Indja: “Karl Marx irrefera għar-​reliġjon bħala l-​oppju tal-​mases. Imma dik l-​istqarrija ma tistax tkun eżatta għal kollox għaliex l-​oppju jiddippressak, ibennen lin-​nies sakemm jiġu lloppjati. Le, ir-​reliġjon iktar hija bħall-​kokaina irfinuta. Din tiżbroffa fi vjolenza tremenda u hija forza ferm distruttiva.” Lanqas dak il-​kittieb m’hu eżatt. Ir-​reliġjon falza hija kemm li tilloppjak u kemm distruttiva.

16. Nies taʼ qalb onesta għala għandhom jaħarbu issa minn Babilonja l-​Kbira? (Ara wkoll Apokalissi 18:4, 5.)

¹⁶ X’għandhom, allura, jagħmlu nies taʼ qalb onesta? Ġeremija, il-​messaġġier t’Alla, jagħtina t-​tweġiba: “Aħarbu minn nofs Babilonja, u jaħseb kulħadd għal ħajtu. . . . għax hu żmien il-​vendetta għall-​Mulej.” Ninsabu henjin li miljuni ħarbu mill-​konfini taʼ Babilonja l-​Kbira, l-​imperu dinji taʼ reliġjon falza. Int wieħed minnhom? Allura tistaʼ tifhem tajjeb kif Babilonja l-​Kbira effettwat lill-​ġnus taʼ l-​art: “Il-​ġnus xorbu minn inbidha, u għalhekk bliehu l-​ġnus.”—Ġeremija 51:6, 7.

17. Liema ġudizzju wasal biex jiġi esegwit fuq Babilonja l-​Kbira, u x’se jiġi wara din l-​azzjoni?

¹⁷ F’qasir żmien, membri ‘boloh’ tal-​ĠM se jiġu mmanuvrati minn Jehovah biex iduru għar-​reliġjon falza, bħalma hu deskritt f’Apokalissi 17:16: “Dawn ikollhom mibegħda għall-​Mara żienja, jagħmluha bħal deżert u jneżżgħuha, u jiklulha laħamha u jaħarquha bin-​nar.” Dan se jimmarka l-​bidu tat-​tribulazzjoni l-​kbira li hemm referenza għaliha f’Mattew 24:21 u li se tilħaq il-​quċċata tagħha f’Armageddon, il-​gwerra tal-​jum il-​kbir t’Alla li Jistaʼ Kollox. Bħal Babilonja tal-​qedem, Babilonja l-​Kbira se tiffaċċja l-​ġudizzju mħabbar f’Ġeremija 51:13, 25: “‘Int li toqgħod ħdejn il-​gliegel taʼ l-​ilma, li għandek teżori kbar, wasal tmiemek, waslet għall-​qtugħ il-​medda tiegħek. Arani kontrik, muntanja qerrieda, oraklu tal-​Mulej, li qridt l-​art kollha. Jien inmidd idejja għal fuqek, u n[g]errbek minn fuq il-​blat, u nagħmel minnek muntanja nar.’” Ġnus korrotti li jaqilgħu l-​gwerer se jsegwu lir-​reliġjon falza għall-​qerda hekk kif jilħaqhom ukoll jum il-​vendetta taʼ Jehovah.

18. Isaija 48:22 meta u kif għad irid jitwettaq?

¹⁸ Fl-​1 Tessalonikin 5:3, jingħad dwar dawk mill-​agħar: “Meta kulħadd jibda jgħid: ‘Sliem u mistrieħ’, dak il-​ħin stess, bħall-​uġigħ fuq mara li tkun waslet għall-​ħlas, tiġi fuqhom għal għarrieda l-​qerda u ma jeħilsu b’xejn.” Dawn huma dawk li dwarhom Isaija qal: “Ara, . . . il-​messaġġieri tas-​sliem jibku biki taʼ mrar.” (Isaija 33:7, KŻ) Tabilħaqq, bħalma naqraw f’Isaija 48:22, “‘Għall-​ħżiena, m’hemmx sliem, jgħid il-​Mulej.’” Imma x’futur hemm jistenna lill-​messaġġieri veri tal-​paċi divina? L-​artiklu li jmiss se jgħidilna. (w97 5/1)

Mistoqsijiet Għal Reviżjoni

◻ Il-​profeti t’Alla b’liema kliem iebes kixfu lill-​messaġġieri foloz?

◻ Aġenziji umani għala ma jirnexxux f’li jipprovaw iġibu paċi dejjiema?

◻ Il-​messaġġieri veri tal-​paċi kif inhuma f’kuntrast maʼ dawk li jappoġġjaw il-​ĠM?

◻ Il-​ġwejdin x’iridu jagħmlu sabiex isibu għaxqa fil-​paċi mwiegħda taʼ Jehovah?

[Stampi f’paġna 25]

Isaija, Ġeremija, u Danjel kollha bassru l-​falliment tas-​sempliċi sforzi għall-​paċi mill-​bniedem

[Stampa f’paġna 26]

“[I]d-dinja kollha qiegħda taħt idejn il-​Ħażin.”​—L-​appostlu Ġwanni

[Stampa f’paġna 27]

“Il-​fehma tagħhom hija mdallma.”​—L-​appostlu Pawlu