Nerfgħu r-​Responsabbiltà taʼ li Nieħdu Ħsieb il-​Familja

“INTOM il-​missirijiet, iġġarbuhomx iżżejjed lil uliedkom; iżda rabbuhom fid-​dixxiplina u t-​twiddib tal-​Mulej.” (Efesin 6:4) B’dan il-​kliem ispirat, l-​appostlu Pawlu b’mod ċar poġġa r-​responsabbiltà taʼ li nieħdu ħsieb il-​familja fejn għandha tkun​—fuq spallejn il-​missier.

Fil-biċċa l-​kbira tal-​familji, il-​missier m’huwiex waħdu f’li jieħu ħsieb uliedu. Martu, omm uliedu, minn qalbha taqsam il-​piż maʼ żewġha. B’hekk, is-​Sultan Salamun iddikjara: “Ismaʼ, ibni, kliem missierek, u twarrabx tagħlim ommok.”—Proverbji 1:8.

Attenzjoni Materjali u Spiritwali

Ġenituri li jħobbu lil uliedhom ma jittraskurawhomx apposta. Tabilħaqq, għall-​Kristjani, li jagħmlu hekk ikun jiswa daqs li kieku jiċħdu l-​fidi tagħhom, bħalma nikkonkludu mill-​kliem taʼ Pawlu lil Timotju: “Jekk xi ħadd ma jiħux ħsieb niesu, l-​aktar dawk tal-​familja tiegħu, dan ċaħad il-​fidi u hu agħar minn wieħed li ma jemminx.” (1 Timotju 5:8) Il-​Kristjani jirrealizzaw illi li jrabbu t-​tfal “fid-​dixxiplina u t-​twiddib tal-​Mulej” jirrikjedi ħafna iktar milli jipprovdu għalihom b’mod materjali.

Ikkunsidra l-​eżortazzjoni taʼ Mosè lin-​nazzjon taʼ Iżrael meta kienu kkampjati fuq il-​pjanuri taʼ Mowab, eżatt qabel ma daħlu fl-​Art Imwiegħda. Hemmhekk hu tennielhom il-​liġijiet t’Alla u tahom l-​istruzzjoni: “Qiegħdu dawn il-​kelmiet tiegħi f’qalbkom u f’moħħkom.” (Dewteronomju 11:18) Iktar kmieni kien fakkarhom li għandhom iħobbu lil Jehovah b’qalbhom, b’ruħhom u bil-​forza vitali tagħhom kollha, billi żied: “Żomm f’qalbek dan il-​kliem u dawn il-​kmandamenti li qiegħed nagħtik illum.” (Dewteronomju 6:5, 6) Li jħallu l-​kliem tal-​Liġi t’Alla jippenetra ġo qalbhom kien vitali għall-​ġenituri Iżraeliti. Bi qlub imfawrin b’apprezzament spiritwali, ġenituri Iżraeliti setgħu jobdu effettivament il-​kliem li jmiss taʼ Mosè: “Trid iddaħħalhom sewwa [il-kliem tal-​Liġi t’Alla] f’moħħ ibnek u titkellem dwarhom meta tpoġġi f’darek u meta timxi fit-​triq u meta timtedd u meta tqum.”—Dewteronomju 6:7, NW; 11:19; qabbel Mattew 12:34, 35.

Innota li l-​missirijiet kellhom ‘idaħħlu sewwa’ dak il-​kliem f’moħħ uliedhom u ‘jitkellmu dwaru.’ Il-​Merriam-Webster’s Collegiate Dictionary jiddefinixxi l-​kelma Ingliża “inculcate” bħala “li tgħallem u ddaħħal sewwa fil-​moħħ permezz taʼ ripetizzjonijiet u twissijiet spissi.” Meta l-​ġenituri kienu jitkellmu dwar il-​Liġi t’Alla kuljum​—fil-​għodu, f’nofsinhar u fil-​għaxija—​it-tfal kienu jitgħallmu ħafna permezz taʼ dan. Meta t-​tfal kienu jħossu kemm il-​ġenituri tagħhom iħobbu l-​Liġi t’Alla, min-​naħa tagħhom kienu jiġu influwenzati biex jiżviluppaw relazzjoni mill-​qrib maʼ Jehovah. (Dewteronomju 6:24, 25) Taʼ interess, Mosè istruwixxa lill-​missirijiet speċifikament biex jgħallmu lil uliedhom ‘meta jpoġġu f’darhom.’ Tagħlim bħal dan kien parti mill-​attenzjoni li tingħata lill-​familja. Imma xi ngħidu għal-​lum?

“Meta Tpoġġi f’Darek”

“M’huwiex faċli,” tispjega Janet, omm Kristjana t’erbat itfal.a “Trid tkun persistenti,” jaqbel magħha żewġha, Paul. Bħal ħafna ġenituri oħrajn li huma Xhieda, Paul u Janet jagħmlu ħilithom biex jistudjaw il-​Bibbja maʼ wliedhom minn taʼ l-​inqas darba fil-​ġimgħa. “Nipprovaw inżommu d-​diskussjoni tal-​Bibbja tal-​familja kull nhar taʼ Tnejn fil-​għaxija f’ħin stabbilit,” jispjega Paul, waqt li jammetti: “Imma mhux dejjem jirnexxilna.” Bħala anzjan maħtur fil-​kongregazzjoni tiegħu, ġie li bagħtu għalih biex jittratta kwistjonijiet urġenti. Iż-​żewġ uliedu l-​kbar jaqdu bħala ministri full-time. Huma jsibu li fil-​għaxija huwa ħin produttiv biex jikkuntattjaw lin-​nies fil-​ministeru. B’hekk, bħala familja, huma aġġustaw il-​ħin għall-​istudju tal-​familja tagħhom. “Xi drabi nagħmlu l-​istudju eżatt wara l-​ikla tagħna taʼ fil-​għaxija,” jispjega Paul.

Avolja l-​ġenituri b’għaqal juru flessibiltà f’li jistabbilixxu ħin għall-​istudju tal-​familja tagħhom, huma jipprovaw iżommuh regulari. “Jekk il-​ħin taʼ l-​istudju tagħna jkollu jinbidel,” tinnota binthom Clare, “missieri dejjem iwaħħal nota bil-​ħin il-​ġdid mal-​bieba tal-​friġġ, ħalli lkoll inkunu nafu meta jkun se jsir.”

Li jiltaqgħu għal studju tal-​Bibbja tal-​familja regulari jipprovdi wkoll opportunità mill-​aħjar għall-​membri iżgħar tal-​familja biex jaqsmu t-​tħassib u l-​problemi tagħhom mal-​ġenituri tagħhom. Studju bħal dan ikollu riżultati tajbin meta ma jkunx daqshekk riġidu li t-​tfal sempliċement jaqraw it-​tweġibiet għall-​mistoqsijiet li jkun hemm fil-​ktieb taʼ studju tal-​Bibbja li jużaw. “L-​istudju tal-​familja tagħna huwa forum għal diskussjoni,” jispjega Martin, li għandu żewġ subjien. “Meta tinġabru flimkien darba fil-​ġimgħa biex tiddiskutu suġġett Skritturali, issir taf kif inhi sejra spiritwalment il-​familja tiegħek,” jikkummenta hu. “Joħorġu ħafna affarijiet fid-​diskussjoni. Tiskopri x’inhu jiġri l-​iskola, u iktar interessanti, issir taf x’attitudnijiet qed jiżviluppaw it-​tfal tiegħek.” Il-​mara tiegħu, Sandra, taqbel u tħoss li hi wkoll tibbenefika ħafna mill-​istudju tal-​familja. “Waqt li żewġi jkun qed jikkonduċi l-​istudju,” tirrakkonta hi, “nitgħallem ħafna billi noqgħod nismaʼ kif it-​tfal iwieġbu l-​mistoqsijiet tiegħu.” Imbagħad Sandra tinseġ il-​kummenti tagħha biex tgħin lis-​subjien tagħha. Hi tieħu iktar gost bl-​istudju għax tinvolvi ruħha b’mod attiv. Iva, il-​ħin taʼ l-​istudju tal-​familja joffri lill-​ġenituri opportunità biex ikunu jafu x’qegħdin jaħsbu wliedhom.—Proverbji 16:23; 20:5.

Kun Lest li Taddatta u Ippersevera

Meta jasal il-​ħin għall-​istudju tal-​familja tiegħek, għandek mnejn issib li wieħed mit-​tfal ikun fuq ruħu u juri interess, mentri ieħor ikollu bżonn li żżiegħel bih biex jikkonċentra u jibbenefika. Waħda omm Kristjana tikkummenta: “Dik hi l-​ħajja tal-​familja! Taf x’għandek tagħmel bħala ġenitur. Għalhekk, meta tippersisti, Jehovah jgħinek, u jkollok riżultati tajbin.”

L-ammont taʼ ħin li tifel kapaċi jdum attent għandu mnejn ivarja bil-​kbir skond l-​età tiegħu. Ġenitur li juri dixxerniment se jikkunsidrah dan. Waħda koppja għandha ħamest itfal, li l-​etajiet tagħhom ivarjaw minn 6 snin sa fuq l-​20 sena. Il-​missier, Michael, jgħid: “Agħti l-​opportunità liż-​żgħar l-​ewwel biex iwieġbu l-​mistoqsijiet. Imbagħad ħalli lit-​tfal il-​kbar iżidu d-​dettalji u joħorġu l-​punti li jkunu ppreparaw.” Dan il-​mod taʼ kif jittrattaw b’dixxerniment mat-​tfal tagħhom jagħmilha possibbli għall-​ġenituri li jgħallmu l-​valur taʼ li wieħed juri konsiderazzjoni lejn oħrajn. “Wieħed mit-​tfal tagħna għandu mnejn jifhem,” jinnota Martin, “imma t-​tifel l-​ieħor ikollu bżonn ħafna għajnuna biex jifhem il-​punt. Jien insib li s-​sessjoni taʼ l-​istudju ssir bażi taʼ taħriġ biex nuru paċenzja Kristjana u frott ieħor taʼ l-​ispirtu.”—Galatin 5:22, 23; Filippin 2:4.

Kun ippreparat biex taddatta għall-​abbiltajiet u l-​etajiet li jvarjaw taʼ wliedek. Simon u Mark, li issa huma adolexxenti, sabu li meta kienu iżgħar, tassew kienu jieħdu gost jistudjaw il-​ktieb L-​Aqwa Bniedem Li Qatt Għex mal-​ġenituri tagħhom. “Missierna kien ikun iridna nirreċtaw partijiet differenti bħal f’reċta,” huma jiftakru. Missierhom jiftakar lilu nnifsu jitbaxxa fuq idejh u saqajh biex jirreċta maʼ wliedu l-​parabbola tas-​Samaritan taʼ qalb tajba. (Luqa 10:30-35) “Kienet xi ħaġa realistika u veru konna nieħdu pjaċir.”

Ħafna tfal juru reżistenza għar-​rutina taʼ studju tal-​familja. Għandu dan iwaqqaf lill-​ġenituri milli jikkonduċu l-​istudju fil-​ħin li jkunu ppjanaw? Ċertament li le. “Il-​bluha b’għeruqha fil-​qalb taʼ kull tifel [jew tifla],” jistqarr Proverbji 22:15. Waħda omm bla raġel ħasbet li ma kienx qed jirnexxilha tikkonduċi l-​istudju tal-​familja tajjeb meta, ħafna drabi, id-​distrazzjonijiet kienu jidhru li qed ifixklu s-​sessjoni. Imma hi pperseverat. Issa t-​tfal tagħha għandhom rispett kbir lejha u saru jistmaw l-​imħabba u t-​tħassib li wriet billi ppersistiet f’li tikkonduċi studju tal-​familja regulari.

Ngħinu “l-​Iltiema”

L-​anzjani Kristjani jridu ‘jirgħu l-​merħla t’Alla.’ (1 Pietru 5:2, 3) Żjajjar perjodiċi lill-​familji fil-​kongregazzjonijiet tagħhom joffrulhom opportunitajiet biex ifaħħru lil ġenituri li jerfgħu r-​responsabbiltajiet Kristjani tagħhom. Fuq spallejn min taqaʼ r-​responsabbiltà taʼ li jgħallem lit-​tfal taʼ ġenituri waħedhom? Qatt tinsa li r-​responsabbiltà biex jistruwixxi lit-​tfal taqaʼ fuq il-​ġenitur.

Il-prudenza Kristjana se tgħin lill-​anzjani biex jevitaw sitwazzjonijiet kompromettenti li jistgħu jqumu jekk huma jassumu l-​irwol tal-​ġenitur nieqes. Għalkemm żewġ aħwa rġiel għandhom mnejn ikunu jistgħu jżuru oħt Kristjana li hija omm bla raġel, f’kull ħin huma se jkunu meqjusin f’dak li jirranġaw biex jiġi appoġġjat l-​arranġament taʼ l-​istudju tal-​familja. Xi drabi, stedina lit-​tfal (u, tabilħaqq, lill-​ġenitur waħdu) biex jingħaqdu mal-​familja taʼ l-​anzjan għall-​istudju tal-​familja tagħhom għandha mnejn tirriżulta li tkun edifikanti u prattika. Madankollu, qatt tinsa li Jehovah hu l-​Missier kbir tagħna tas-​sema. Hu żgur li jkun hemm biex jiggwida u jgħin lill-​omm meta tikkonduċi studju mat-​tfal tagħha, avolja dan tagħmlu waħedha.

Xi ngħidu għas-​sitwazzjoni fejn persuna żagħżugħa hija inklinata spiritwalment, imma l-​ġenituri tagħha juru ftit jew ebda tħassib għar-​responsabbiltajiet spiritwali tagħhom? Il-​qaddejja leali taʼ Jehovah qatt m’għandhom għalfejn jaqtgħu qalbhom. “F’idejk [Alla Jehovah] jintelaq l-​imsejken,” kanta s-​salmista. “Taʼ l-​iltim int sirt l-​għajnuna.” (Salm 10:14) Min-​naħa tagħhom, anzjani tal-​kongregazzjoni li juru mħabba se jagħmlu mill-​aħjar biex jinkuraġġixxu lill-​ġenituri waqt li jieħdu ħsieb uliedhom. Jistgħu jissuġġerixxu diskussjoni tal-​familja u mbagħad jattendu għaliha biex joffru xi suġġerimenti prattiċi dwar kif jistudjaw flimkien. M’għandniex xi ngħidu, m’humiex se jieħdu r-​responsabbiltà tal-​ġenituri, li, skond l-​Iskrittura, taqaʼ fuq spallejhom.

Tfal li l-​ġenituri tagħhom ma jħaddnux l-​istess fidi għandhom bżonn ħafna appoġġ. Li tinkludihom fl-​istudju tal-​familja tiegħek jistaʼ jirriżulta li jkun taʼ benefiċċju jekk il-​ġenituri tagħhom jaqblu maʼ dan. Robert, li issa hu adult bil-​familja tiegħu stess, kien jattendi għal-​laqgħat Kristjani mal-​ġenituri tiegħu meta kellu biss tliet snin. Kellu memorji sbieħ taʼ dawk il-​laqgħat anki wara li l-​ġenituri tiegħu waqfu jassoċjaw mal-​kongregazzjoni Kristjana. Meta kellu għaxar snin, iltaqaʼ maʼ tifel li kien Xhud, li ħadu miegħu għal-​laqgħat. Il-​ġenituri tat-​tifel li kien Xhud minn qalbhom ħadu ħsieb Robert bħala ltim spiritwali u iktar tard studjaw miegħu. Grazzi għal din l-​attenzjoni b’imħabba, għamel progress mgħaġġel u issa huwa l-​pjaċir tiegħu li jaqdi bħala anzjan fil-​kongregazzjoni.

Anki meta l-​ġenituri jopponu l-​progress taʼ wliedhom, it-​tfal m’humiex waħedhom. Jehovah jibqaʼ Missier tas-​sema leali. “Missier l-​iltiema . . . hekk hu Alla fl-​għamara mqaddsa tiegħu,” jiddikjara Salm 68:6 [Salm 68:5, NW]. Subjien u bniet li huma ltiema spiritwalment jafu li jistgħu jduru lejh fit-​talb, u hu se jsostnihom. (Salm 55:23 [Salm 55:22, NW]; Salm 146:9) L-​organizzazzjoni taʼ Jehovah li taġixxi bħal omm, b’mod diliġenti twettaq ir-​responsabbiltà tagħha biex tipprepara ikliet spiritwali delizzjużi li jiġu servuti permezz tal-​pubblikazzjonijiet tagħha u fil-​laqgħat taʼ l-​iktar minn 85,000 kongregazzjoni Kristjana madwar id-​dinja kollha. B’hekk, permezz t’għajnuna spiritwali mingħand Missierna, Jehovah, u l-​organizzazzjoni tiegħu li taġixxi bħal omm, anki “l-​iltiema” se jgawdu xi forma taʼ studju tal-​Bibbja.

Ġenituri Kristjani li jikkonduċu studju tal-​Bibbja tal-​familja regulari mat-​tfal tagħhom jistħoqqilhom tifħir. Ġenituri waħedhom li jipperseveraw f’li jħarrġu lit-​tfal tagħhom fil-​mogħdijiet taʼ Jehovah jimmeritaw attenzjoni speċjali u tifħir għall-​isforzi tagħhom. (Proverbji 22:6) Dawk kollha li juru tħassib għal tfal li huma ltiema spiritwalment jafu li dan jogħġob lil Missierna tas-​sema, Jehovah. Li nieħdu ħsieb il-​bżonnijiet spiritwali tal-​familja hija responsabbiltà tqila. Imma ‘tegħja qatt tagħmel il-​ġid; għax jekk ma taqtax qalbek, taħsad fi żmienu.’—Galatin 6:9.

[Nota taʼ taħt]

[Stampa f’paġna 23]

Studju tal-​familja jipprovdi opportunità mill-​aħjar għall-​membri iżgħar tal-​familja biex jaqsmu t-​tħassib tagħhom mal-​ġenituri tagħhom

[Sors taʼ l-​Istampa f’paġna 20]

Harper’s