Suġġerimenti dwar Kif Nippreżentaw il-​Fuljetti

Erbaʼ Passi Faċli: Ħafna aħwa ħallew dawn il-​fuljetti man-​nies billi użaw preżentazzjoni sempliċi. (1) Uri ftit fuljetti differenti lill-​individwu u staqsih liema wieħed l-​iktar li jinteressah. (2) Wara li jagħżel wieħed minnhom, staqsih mistoqsija li tkun ippreparajt sew biex tenfasizza xi punt prinċipali fil-​fuljett. (3) Wieġeb il-​mistoqsija billi taqra paragrafu jew skrittura adattata mill-​fuljett. (4) Jekk l-​individwu juri interess, kompli iddiskuti dak li hemm miktub fil-​fuljett jew irreferi għal waħda mil-​lezzjonijiet fil-​browxer X’Jirrikjedi jew għal kapitlu fil-​ktieb Għarfien li jkompli jiddiskuti l-​istess punt. Dan jistaʼ jwassal biex jinbeda studju tal-​Bibbja. Is-​suġġerimenti li ġejjin se jgħinuk tipprepara x’għandek tgħid meta tuża xi wħud minn dawn il-​fuljetti.

Tixtieq Tkun Taf Iżjed dwar il-​Bibbja?

“Ħafna nies jixtiequ jkunu jafu iktar dwar il-​Bibbja imma ma tantx għandhom ħin. Dan il-​fuljett jispjega kif jistaʼ jinkiseb studju mingħajr ħlas li jistaʼ jgħinek issib it-​tweġibiet għall-​mistoqsijiet tiegħek dwar il-​Bibbja.” Imbagħad urih paġni 4 u 5 taʼ dan il-​fuljett.

Se Tibqaʼ Teżisti Din id-​Dinja?

“Meta nitkellmu man-​nies innotajna li ħafna minnhom huma inkwetati dwar . . . [agħżel xi ġrajja kurrenti mill-​aħbarijiet]. Jidher li l-​kundizzjonijiet tad-​dinja sejrin mill-​ħażin għall-​agħar. Xi wħud jiddubitaw jekk din id-​dinja tistax tibqaʼ teżisti. Int x’taħseb dwar dan? [Agħti ċans lill-​inkwilin biex iwieġeb. Ħafna nies huma ottimisti.] Qrajt xi ħaġa inkuraġġanti li nixtieq naqsamha miegħek. [Agħti l-​fuljett Se Tibqaʼ Teżisti Din id-​Dinja? lill-​inkwilin u żomm wieħed bħalu f’idek.] Innota kif Ġesù pprofetizza li . . . “ Aqra wieħed mill-​paragrafi minn paġna 4 jew 5 li jaqbel mal-​ġrajja taʼ l-​aħbarijiet li tkun semmejt fl-​introduzzjoni tiegħek.

Il-​Ħajja f’Dinja Ġdida taʼ Paċi:

“Taħseb li hu possibbli li n-​nies xi darba se jgħixu fil-​paċi kif jidher hawn fl-​istampa taʼ barra taʼ dan il-​fuljett? [Agħti ċans lill-​inkwilin biex iwieġeb.] Jekk jogħġbok ħares lejn l-​aħħar sentenza fl-​ewwel paragrafu f’paġna 2. Din tistaqsi: ‘Iżda hija din sempliċi ħolma, jew fantasija, li temmen li dawn il-​kundizzjonijiet xi darba se jeżistu fuq l-​art?’ [Imbagħad aqra l-​paragrafu li jmiss fil-​fuljett.] Din il-​kwotazzjoni dwar smewwiet ġodda u art ġdida hi mill-​Bibbja.”​—Salm 104:5.

“Min Tassew Jaħkem lid-​Dinja?”

Staqsi lill-​inkwilin: “Min taħseb li tassew qed jaħkem lid-​dinja?” Jekk l-​individwu jgħidlek: “Alla” jew “Ma nafx,” aqralu l-​ewwel żewġ sentenzi f’paġna 2 u l-​ewwel paragrafu f’paġna 3. Enfasizza l-​1 Ġwanni 5:19 u Rivelazzjoni 12:9. L-​individwu jistaʼ jew jgħidlek li ma jemminx li Satana x-​Xitan veru jeżisti jew inkella jistaʼ jaqbel li x-​Xitan għandu influwenza kbira fuq id-​dinja. Tkun xi tkun it-​tweġiba tiegħu, int tistaʼ tkompli l-​konversazzjoni billi tirreferi għall-​irraġunar li jinsab taħt is-​sottitlu “Ħjiel mill-​Kundizzjonijiet tad-​Dinja.”

X’Tama Hemm għall-​Maħbubin Mejtin?

“Taħseb li għad nerġgħu narawhom lill-​maħbubin tagħna li mietu?” Wara t-​tweġiba taʼ l-​individwu, urih it-​tieni ­paragrafu f’paġna 4 tal-​fuljett u aqra Ġwanni 5:​28, 29. Imbagħad spjega li jkun t’għajnuna jekk hu jifhem aħjar l-​informazzjoni li hemm taħt l-​ewwel sottitlu fil-​fuljett.

Gawdi l-​Ħajja tal-​Familja

“Int wisq probabbli taqbel li llum il-​familja tinsab mhedda. X’taħseb li jistaʼ jsir biex jissaħħu r-​rabtiet tal-​familja?” Wara li jwieġeb, iġbed l-​attenzjoni taʼ l-​inkwilin lejn il-​punti fl-​aħħar paragrafu f’paġna 5. Agħżel waħda mill-​iskritturi kwotati f’paġni 4 u 5 tal-​fuljett u spjega xi tfisser.