Isiru Ommijiet Kmieni Wisq

“L-​għarus tiegħi kien ġuvni gustuż. Kellu l-​flus, u stajna noħorġu u niddevertu. Meta ma ġinix il-​“period,” malajr indunajt li kien hemm xi ħaġa ħażina. Kif kont se ngħid lil ommi? Dan kif setaʼ jiġri lili? Kelli biss 16-il sena, u ma kontx naf x’se naqbad nagħmel.”​—Nicole.

ILLUM Nicole,a li għandha fuq it-​30 sena, hija omm kunfidenti u enerġetika bi tlett itfal. L-​akbar waħda minn uliedha għandha 20 sena. Iva, snin ilu Nicole kienet waħda minn fost miljuni t’adoloxxenti li kienu ħarġu tqal u ma kinux miżżewġin. Bħal ommijiet adoloxxenti oħra, hi sabet ruħha mitlufa f’taħwida taʼ sfidi diffiċli, deċiżjonijiet ebsin, u prospetti dubjużi.

Nicole ma tantx titkellem dwar ix-​xokk, iċ-​ċaħda, il-​biżaʼ, ir-​rabja, u d-​disprament li għaddiet minnhom fiż-​żgħożija tagħha​—żmien meta dawk taʼ mparha kienu jinkwetaw biss dwar il-​ħwejjeġ u l-​marki tagħhom fl-​iskola. Minkejja dan, is-​sitwazzjoni taʼ Nicole ma kinitx bla tama. Hi trabbiet ġo familja li kienet turi l-​imħabba u li pprovat tnaqqax fiha prinċipji morali għoljin. Għalkemm għal xi żmien għażlet li ma tagħtix kas dawn il-​prinċipji​—u għalhekk kellha tbati l-​konsegwenzi​—iktar tard, dawk l-​istess prinċipji għenuha biex ikollha ħajja produttiva u mimlija skop. Il-​motto tagħha sar “Għad hemm tama.”

Sfortunatament, mhux kull omm adoloxxenti għandha familja li tappoġġaha​—jew ħarsa daqshekk pożittiva. Ħafna malajr isibu ruħhom maqbudin f’sitwazzjoni taʼ faqar li tkun donnha bla tama. Xi wħud iridu jkampaw maʼ l-​effetti emozzjonali taʼ l-​istupru u l-​vjolenza.

Il-problemi li jridu jiffaċċjaw ommijiet li għadhom żgħar jistgħu jkollhom effetti negattivi anki fuq uliedhom. Il-​ktieb Teen Moms​—The Pain and the Promise jgħid li trabi t’ommijiet li huma adoloxxenti “għandhom it-​tendenza li jitwieldu żgħar ħafna, li jimirdu iktar, li jmutu waqt li jkunu għadhom trabi, li jkollhom ftit kura medika, li jsofru iktar minn ġuħ u malnutrizzjoni, li jkunu esposti għal iktar vjolenza, u li jiżviluppaw iktar bil-​mod minn tfal t’ommijiet li huma akbar fl-​età.” Tabilħaqq, it-​tfal bniet t’ommijiet adoloxxenti għandhom iktar probabbiltà li jsiru ommijiet adoloxxenti huma wkoll minn dawk it-​tfal li għandhom ommijiet akbar fl-​età.

Kemm hi mifruxa t-​tqala fost l-​adoloxxenti? Ommijiet adoloxxenti kif jistgħu jiffaċċjaw l-​isfidi tat-​trobbija taʼ wliedhom b’suċċess? Hemm xi mod kif nistgħu ngħinu lill-​adoloxxenti jevitaw li jaqgħu f’dawn is-​sitwazzjonijiet stressanti? L-​artiklu li jmiss iwieġeb dawn il-​mistoqsijiet.

[Nota taʼ taħt]