Għajnuna u Protezzjoni għall-​Adoloxxenti

HUWA taʼ qsim il-​qalb meta tfajla​—li għadha tifla hi nfisha​—toħroġ tqila barra miż-​żwieġ. Madankollu, it-​tqala fost l-​adoloxxenti hija mifruxa, u qed tolqot lil kulħadd b’xi mod. It-​traġedja tat-​tqala fost l-​adoloxxenti hija biss prova waħda taʼ kemm hu għaqli l-​kmand t’Alla: “Aħarbu miż-​żína.”​—1 Korintin 6:​18.

Minkejja dan, minn żmien għal żmien, tfajla li tkun ġiet mgħallma l-​modi t’Alla tagħżel li tinjora jew tiċħad dak li taf. Hi tinvolvi ruħha f’immoralità sesswali u toħroġ tqila. Kristjani veri kif għandhom jirreaġixxu? Meta żagħżugħa li dinbet turi li hi niedma, il-​ġenituri tagħha u membri oħra tal-​kongregazzjoni Kristjana għandhom jagħtu għajnuna u appoġġ bl-​imħabba.

Erġaʼ ikkunsidra lil Nicole. Il-​ġenituri tagħha kienu qed irabbuha bħala waħda mix-​Xhieda taʼ Ġeħova. Għalhekk, kien iktar inkwetanti meta ħarġet tqila barra miż-​żwieġ. Madankollu, Nicole tiftakar, “Kristjani sħabi kienu jiġu d-​dar tiegħi u jipprovaw jinkuraġġuni biex nistudja l-​Bibbja u nibqaʼ qrib taʼ Ġeħova.”

Le, ix-​Xhieda taʼ Ġeħova ma japprovawx kondotta sesswali mhix xierqa. Imma huma jafu li billi japplikaw prinċipji Bibliċi, dawk li jkunu għamlu l-​ħażen jistgħu ‘jinbidlu.’ (Rumani 12:2) Għandhom fidi soda li Alla jaħfer lil dawk li jindmu. (Efesin 1:7) Jagħrfu wkoll li anki jekk titnissel tarbija barra miż-​żwieġ, it-​tarbija m’għamlet xejn ħażin. Għalhekk, minflok ma jwarrbuha, membri tal-​kongregazzjoni Kristjana għandhom juruha l-​istess affezzjoni tenera, ħniena, u qalb tajba li juru lil kwalunkwe tifel jew tifla fosthom.​—Kolossin 3:​12.

Waħda omm li qed trabbi lil uliedha waħedha bdiet tistudja l-​Bibbja max-​Xhieda taʼ Ġeħova. Hi malajr wieġbet għall-​messaġġ tal-​Bibbja u għamlet bidliet kbar f’ħajjitha. Hi qalet dwar ix-​Xhieda: “Huma kollha wrew interess ġenwin fija u fit-​tfal tiegħi. Tawni ikel u ħwejjeġ meta kont fil-​bżonn kif ukoll għajnuna finanzjarja. Meta kkwalifikajt biex noħroġ fil-​ministeru taʼ l-​għalqa max-​Xhieda taʼ Ġeħova, huma ġieli ħaduli ħsieb it-​tfal biex inkun nistaʼ noħroġ. Huma għamlu kulma setgħu biex jgħinuni niżviluppa mħabba vera għal Ġeħova.”

Prevenzjoni

Minkejja dan, huwa ħafna aħjar jekk ngħinu lill-​adoloxxenti jevitaw dawn il-​problemi minn qabel. Ix-​Xhieda taʼ Ġeħova b’hekk jipprovaw jipprovdu ambjent sabiħ u kollu mħabba għal uliedhom. Minflok ma jużaw tattiċi biex ibeżżgħuhom​—mill-​AIDS jew anki mit-​tqala—ix-​Xhieda jipprovaw inaqqxu fiż-​żgħażagħ tagħhom imħabba vera għal Alla Ġeħova u għal-​liġijiet tiegħu. (Salm 119:97) Huma jemmnu li t-​tfal għandhom bżonn informazzjoni eżatta dwar is-​sess. Iżjed minn hekk, jemmnu li t-​tfal għandhom bżonn jiġu mgħallmin il-​prinċipji morali li hemm fil-​Bibbja miċ-​ċokon. (2 Timotju 3:​15) Fis-​Swali tas-​Saltna lokali tax-​Xhieda taʼ Ġeħova tingħata istruzzjoni formali. Madankollu, ġenituri li huma Xhieda huma inkuraġġiti wkoll biex jistudjaw il-​Bibbja mat-​tfal tagħhom fuq bażi persunali. Letteratura, bħall-​ktieb Iż-​Żgħażagħ Jistaqsu​—Tweġibiet Prattiċi għall-​Mistoqsijiet Tagħhom, ġiet pubblikata biex tgħin lill-​ġenituri jagħtu lil uliedhom gwida morali.a

Li timxi mal-​livelli morali stretti tal-​Bibbja jmur kontra l-​immoralità li hija mifruxa fid-​dinja. Imma huwa l-​mod taʼ ħajja li jistaʼ jevita t-​traġedja tat-​tqala fost l-​adoloxxenti lil miljuni taʼ tfajliet.

[Nota taʼ taħt]

[Stampa f’paġna 12]

Kristjani veri jittrattaw lill-​ommijiet mhux miżżewġin b’qalb tajba u juruhom konsiderazzjoni