IL-ĦARSA TAL-BIBBJA
L-anġli
L-anġli jidhru fil-kotba, fl-arti, u fil-films. Imma min huma l-anġli, u xi rwol għandhom?
Min huma l-anġli?
DAK LI TGĦID IL-BIBBJA
Qabel m’Alla ħalaq l-univers u l-ewwel bnedmin, kien diġà ħalaq ħlejjaq intelliġenti superjuri. Huma iktar b’saħħithom mill-bnedmin u jgħixu fl-istess post fejn jgħix Alla nnifsu. Dan il-post ma jintlaħaqx mill-bnedmin u hu inviżibbli għalihom. (Ġob 38:4, 7) Lil dawn il-ħlejjaq superjuri, il-Bibbja ssejħilhom “spirti” u “anġli.”—Salm 104:4.a
Kemm jeżistu anġli? Għadd enormi. Madwar it-tron t’Alla hemm “mirjadi taʼ mirjadi” jew “għaxart elef għal għaxriet t’eluf” t’anġli. (Rivelazzjoni 5:11; nota taʼ taħt) Jekk din l-espressjoni niħduha f’sens letterali, allura hemm mijiet taʼ miljuni t’anġli!
“[Jien] rajt . . . ħafna anġli li kienu madwar it-tron . . . , u l-għadd tagħhom kien mirjadi taʼ mirjadi u eluf t’eluf.”—Rivelazzjoni 5:11.
X’kienu jagħmlu l-anġli fiż-żminijiet tal-qedem?
DAK LI TGĦID IL-BIBBJA
L-anġli spiss intużaw bħala kelliema jew messaġġiera t’Alla.b Fil-Bibbja jiġu deskritti wkoll bħala li jwettqu xi għemejjel mirakolużi t’Alla. Alla bagħat anġlu biex ibierek lil Abraham u biex iżommu milli jissagrifika lil ibnu Iżakk. (Ġenesi 22:11-18) Anġlu deher lil Mosè f’nofs siġra taqbad biex iwassallu messaġġ li biddel il-ħajjiet. (Eżodu 3:1, 2) Meta l-profeta Danjel ġie mitfugħ f’ħofra tal-iljuni, “Alla . . . bagħat l-anġlu tiegħu u għalaq ħalq l-iljuni.”—Danjel 6:22.
“Imbagħad l-anġlu taʼ Ġeħova deherlu [lil Mosè] fi fjamma tan-nar f’nofs għollieqa.”—Eżodu 3:2.
X’inhuma jagħmlu l-anġli issa?
DAK LI TGĦID IL-BIBBJA
Ma nistgħux inkunu nafu dak kollu li qed jagħmlu l-anġli llum. Però, il-Bibbja tindika li huma involuti f’li jgħinu lil nies sinċieri jsiru jafu iktar dwar Alla.—Atti 8:26-35; 10:1-22; Rivelazzjoni 14:6, 7.
Ġeħova ta lill-patrijarka Ġakobb ħolma li fiha ra anġli telgħin u neżlin “sellum” jew taraġ li kien bejn is-sema u l-art. (Ġenesi 28:10-12) X’aktarx li minn din il-ħolma Ġakobb ikkonkluda dak li nistgħu nikkonkludu aħna—li Alla Ġeħova jibgħat l-anġli fuq l-art fuq missjonijiet, biex jaġixxu għall-benefiċċju taʼ bnedmin leali li għandhom bżonn l-għajnuna tiegħu.—Ġenesi 24:40; Eżodu 14:19; Salm 34:7.
“Kien hemm sellum wieqaf fuq l-art u l-quċċata tiegħu kienet tasal sas-smewwiet; u, ara, kien hemm l-anġli t’Alla telgħin u neżlin fuqu.”—Ġenesi 28:12.
a Il-Bibbja turi li xi spirti rribellaw kontra l-awtorità t’Alla u ssejjaħ lil dawn l-anġli mill-agħar “demonji.”—Luqa 10:17-20.
b Infatti, il-kliem oriġinali bl-Ebrajk u l-Grieg li jintużaw fil-Bibbja għall-kelma “anġlu” jfissru “messaġġier.”