Ieqfu Sħaħ u b’Konvinzjoni Soda

In-​New World Translation Apprezzata minn Miljuni fid-​Dinja Kollha

RIEDET 12-il sena, 3 xhur, u 11-il ġurnata taʼ xogħol bir-​reqqa. Madankollu, fit-​13 taʼ Marzu, 1960, tlestiet l-​aħħar parti mit-​traduzzjoni l-​ġdida tal-​Bibbja. Din ġiet imsejħa n-​New World Translation of the Holy Scriptures.

Sena wara, ix-​Xhieda taʼ Jehovah ippubblikaw din it-​traduzzjoni f’volum wieħed. Minn dik l-​edizzjoni taʼ l-​1961 ġew stampati miljun kopja. Illum, in-​numru taʼ kopji stampati qabeż il-​mitt miljun. Dan għamel lin-​New World Translation waħda mill-​iktar Bibbji li tqassmu maʼ kullimkien. Imma, x’kien li qanqal lix-​Xhieda biex iħejju din it-​traduzzjoni?

Għala Kien Hemm Bżonn taʼ Traduzzjoni Ġdida tal-​Bibbja?

Matul is-​snin, ix-​Xhieda taʼ Jehovah użaw ħafna traduzzjonijiet Ingliżi differenti tal-​Bibbja sabiex jifhmu u jxandru l-​messaġġ taʼ l-​Iskrittura Mqaddsa. Waqt li dawn il-​verżjonijiet għandhom it-​tajjeb tagħhom, taʼ spiss dawn huma influwenzati mit-​tradizzjonijiet reliġjużi u d-​duttrini tal-​Kristjaneżmu. (Mattew 15:6) Għaldaqstant, ix-​Xhieda taʼ Jehovah għarfu li kien hemm bżonn taʼ traduzzjoni tal-​Bibbja li tippreżenta bl-​eżatt dak li hemm fil-​kitbiet oriġinali u ispirati.

L-ewwel pass biex tintlaħaq din il-​ħtieġa ttieħed f’Ottubru taʼ l-​1946 meta Nathan H. Knorr, membru tal-​Ġemgħa li Tiggverna tax-​Xhieda taʼ Jehovah, ippropona li toħroġ traduzzjoni ġdida tal-​Bibbja. Fit-​2 taʼ Diċembru, 1947, il-​Kumitat tat-​Traduzzjoni tal-​Bibbja New World daħal għax-​xogħol biex jipprepara traduzzjoni li tkun eżatta maʼ l-​oriġinal, tinkludi l-​aħħar sejbiet li jkunu ġabru l-​istudjużi mill-​manuskritti Bibliċi li jkun għadhom kif instabu, u tuża lingwa li tistaʼ tinftiehem faċilment mill-​qarrejja taʼ llum.

Meta fl-​1950 ġie pubblikat l-​ewwel volum—in-​New World Translation of the Christian Greek Scriptures—deher ċar li t-​tradutturi kienu laħqu l-​objettivi tagħhom. Ċerti versi tal-​Bibbja, li qabel ftit li xejn kienu jagħmlu sens, issa saru jinftiehmu ċar daqs il-​kristall. Per eżempju, ikkunsidra l-​kliem li tant ħabbel imħuħ li nsibu f’Mattew 5:3: “Henjin il-​foqra fl-​ispirtu.” Dan ġie tradott: “Henjin huma dawk konxji tal-​bżonn spiritwali tagħhom.” Il-​kliem taʼ Ġesù tradott “is-​sinjal tal-​miġja” ġie tradott bħala “s-​sinjal tal-​preżenza.” (Mattew 24:3) U l-​kliem taʼ l-​appostlu Pawlu “l-​misteru tar-​reliġjon tagħna” jaqra, “is-​sigriet sagru taʼ din id-​devozzjoni lejn Alla.” (1 Timotju 3:16) Jidher ċar li n-​New World Translation fetħet sfera ġdida f’dik li hi fehma Biblika.

Diversi studjużi baqgħu impressjonati. Per eżempju, l-​istudjuż Britanniku Alexander Thomson innota li n-​New World Translation tispikka fil-​mod konsistenti kif tittraduċi l-​verbi Griegi fl-​imperfett. Biex nagħtu eżempju: Efesin 5:25 fin-​New World Translation jaqra “Irġiel miżżewġin, komplu ħobbu lin-​nisa tagħkom” minflok ma jgħid biss “Intom, l-​irġiel, ħobbu n-​nisa tagħkom.” “L-​ebda verżjoni oħra ma jidher li għandha din il-​karatteristika mill-​aqwa b’mod tant komplet u regulari,” qal Thomson dwar in-​New World Translation.

Aspett ieħor li jispikka fin-​New World Translation huwa l-​użu taʼ l-​isem persunali t’Alla, Jehovah, kemm fil-​parti Ebrajka kif ukoll fil-​parti Griega taʼ l-​Iskrittura. Ladarba l-​isem Ebrajk t’Alla jidher kważi 7,000 darba f’dak li hu msejjaħ it-​Testment il-​Qadim waħdu, jidher ċar li l-​Ħallieq tagħna jrid li l-​adoraturi tiegħu jużaw ismu u li jkunu jafuh bħala persuna. (Eżodu 34:​6, 7) In-​New World Translation għenet lil miljuni taʼ nies biex jagħmlu hekk.

In-​New World Translation Toħroġ b’Diversi Lingwi

Minn mindu ħarġet bl-​Ingliż, ix-​Xhieda taʼ Jehovah madwar id-​dinja xxennqu biex ikollhom in-​New World Translation bil-​lingwa tagħhom—u bir-​raġun. F’xi pajjiżi, kien diffiċli li takkwista traduzzjonijiet bil-​lingwi lokali għaliex ir-​rappreżentanti tas-​soċjetajiet li jqassmu l-​Bibbja ma ħadux pjaċir jaraw il-​provvista tal-​Bibbji tagħhom tispiċċa f’idejn ix-​Xhieda taʼ Jehovah. Iktar minn hekk, dawn il-​Bibbji bil-​lingwa tal-​pajjiż taʼ spiss jaħbu tagħlim vitali. Eżempju tipiku hu verżjoni b’waħda mil-​lingwi taʼ l-​Ewropa t’Isfel li taħbi referenza importanti għall-​isem t’Alla. Dan tagħmlu billi minflok il-​kliem taʼ Ġesù “Jitqaddes ismek” tpoġġi “Jalla n-​nies jagħtuk ġieħ.”—Mattew 6:9.

Fl-1961, it-​tradutturi kienu diġà bdew jaqilbu t-​test Ingliż tan-​New World Translation b’lingwi oħrajn. Wara biss sentejn, in-​New World Translation of the Christian Greek Scriptures tlestiet b’sitt lingwi oħra. Sa dak iż-​żmien, 3 minn kull 4 Xhieda mad-​dinja kollha setgħu jaqraw il-​Bibbja bil-​lingwa tagħhom stess. Madankollu, kien għad hemm ħafna xogħol xi jsir jekk ix-​Xhieda taʼ Jehovah riedu li miljuni taʼ nies oħrajn ikollhom kopja taʼ din il-​Bibbja.

Fl-1989, din il-​mira saret iktar faċli li tintlaħaq meta twaqqaf is-​Servizzi tat-​Traduzzjoni fil-​kwartieri ġenerali tax-​Xhieda taʼ Jehovah. Dan id-​dipartiment żviluppa metodu taʼ traduzzjoni li għaqqad flimkien l-​istudju tal-​kliem Bibliku mat-​teknoloġija tal-​kompjuter. B’din is-​sistema, l-​Iskrittura Griega Kristjana setgħet tiġi tradotta b’xi lingwi f’sena waħda u l-​Iskrittura Ebrajka f’sentejn biss—frazzjoni miż-​żmien kollu li normalment ikun meħtieġ għal proġett taʼ traduzzjoni tal-​Bibbja. Mindu ġie żviluppat dan il-​metodu, ġew pubblikati 29 edizzjoni tan-​New World Translation tradotti mill-​Ingliż b’lingwi mitkellma minn iktar minn elfejn miljun ruħ. Bħalissa qed isir xogħol bi 12-il lingwa oħra. Sa llum, in-​New World Translation bl-​Ingliż ġiet tradotta, sħiħa jew parti minnha, b’41 lingwa oħra.

Issa għaddew ’il fuq minn 50 sena mindu ħarġet l-​ewwel parti tan-​New World Translation. Dan kien fit-​3 t’Awissu, 1950, fl-​Assemblea Żjieda tat-​Teokrazija li x-​Xhieda taʼ Jehovah għamlu fil-​Belt taʼ New York. F’dik l-​okkażjoni, Nathan H. Knorr ħeġġeġ lil dawk li attendew il-​konvenzjoni: “Ħudu din it-​traduzzjoni. Aqrawha mill-​bidu sa l-​aħħar, xi ħaġa li se tieħdu gost tagħmluha. Studjawha, għaliex din se tgħinkom tifhmu aħjar il-​Kelma t’Alla. Qassmuha lin-​nies.” Aħna ninkuraġġuk biex taqra l-​Bibbja kuljum, għax il-​messaġġ tagħha jistaʼ jgħinek ‘tieqaf sħiħ u b’konvinzjoni soda fir-​rieda kollha t’Alla.’—Kolossin 4:​12, NW.

[Tabella/Stampi f’paġna 8, 9]

(Għall-formazzjoni sħiħa tat-test, ara pubblikazzjoni)

“Ħarġiet tan-​New World Translation”

Għalkemm għall-​ewwel inħarġet bl-​Ingliż, issa n-​New World Translation hija disponibbli, sħiħa jew parti minnha, b’41 lingwa oħra

L-​Iskrittura Griega Kristjana Bibbja Sħiħa

1950 1

1960-​69 6 5

1970-​79 4 2

1980-​89 2 2

1990-Sa llum 29 19