Programm Ġdid Tal-​Jum T’Assemblea Speċjali

¹ “Kunu Persuni Mgħallmin Minn Jehovah” hija t-​tema tal-​programm ġdid tal-​jum t’assemblea speċjali li se jibda minn Settembru li ġej. (Ġwn. 6:​45) It-​tagħlim divin mingħand Jehovah verament jgħinna biex ngħixu ħajjiet sodisfaċenti. Dan jiżviluppa ġewwa fina apprezzament ħerqan lejn il-​wirt spiritwali tagħna. L-​isforzi tagħna biex ngħinu lil oħrajn jisimgħu l-​aħbar tajba jagħmluna membri siewja tas-​soċjetà. F’dan il-​jum t’assemblea speċjali se tingħata attenzjoni lejn il-​barkiet li jitgawdew minn persuni mgħallmin minn Jehovah.

² Il-​programm se jagħmel kuntrast bejn il-​benefiċċji tat-​tagħlim divin u l-​perikli tat-​tagħlim dinji. Se naraw b’mod iktar ċar kif Jehovah jipprovdi l-​ogħla għamla t’edukazzjoni​—edukazzjoni bbażata fuq il-​Kelma tiegħu, il-​Bibbja. Se jsir enfasi fuq tliet aspetti taʼ qima fejn aħna nesperjenzaw ferħ f’li niġu mgħallmin minn Alla. Flimkien maʼ dan, iż-​żgħażagħ se jiġu mħeġġin biex jimitaw eżempji li jispikkaw mill-​Bibbja bħalma huma David u Timotju u li jsawru ħajjiethom madwar attivitajiet spiritwali. Il-​fidi tagħna se tiġi msaħħa hekk kif tingħata wkoll attenzjoni lejn il-​lealtà taʼ wħud ixjeħ. Uħud iddedikati ġodda li jikkwalifikaw ikunu jistgħu jiġu mgħammdin. Minn ħafna żmien qabel il-​jum taʼ l-​assemblea, dawn għandhom jinformaw lill-​indokratur li jippresiedi b’din ix-​xewqa.

³ It-​taħdita prinċipali f’dan il-​jum t’assemblea speċjali hija intitolata “Mgħallmin Minn Jehovah Biex Nagħmlu R-​Rieda Tiegħu.” Din se tisħaq fuq raġunijiet għala lkoll kemm aħna jeħtieġ li nibqgħu nitgħallmu, li nkunu sodi fil-​fidi, u li nkomplu nimxu ’l quddiem. Se niġu inkuraġġiti biex nimitaw lil Jehovah billi ngħallmu lil oħrajn il-​verità li twassal għall-​ħajja taʼ dejjem. Se jiġu inklużi esperjenzi li jibnu biex juru kif il-​pubblikazzjonijiet tas-​Soċjetà għenu lil ħafna biex jiġu mgħallmin minn Jehovah. Se tingħata attenzjoni lejn il-​kisbiet pożittivi tal-​programm globali taʼ tagħlim taʼ Jehovah.

⁴ Agħmel pjanijiet definiti biex tattendi. Ħeġġeġ lil dawk kollha li wrew interess biex ikunu preżenti. Ħares ’il quddiem lejn li tiġi mgħallem ħafna affarijiet tajbin mill-​Imgħallem Grandjuż tagħna.​—Isa. 30:20.