Programm tal-​Jum t’Assemblea Speċjali għall-​2010

1. (a) Liema temi Skritturali tal-​jiem t’assembleat speċjali ġew żviluppati fi snin reċenti? (b) Hemm xi punti prinċipali partikulari mill-​jiem t’assembleat speċjali taʼ qabel li għenukom fil-​ministeru tagħkom?

¹ “Aċċertaw Ruħkom Minn Dak li Hu Iktar Importanti,” “Inżommu Sod Bħala Merħla Waħda,” “Ibqgħu Ixhdu għall-​Verità,” u “Aħna t-​Tafal—Ġeħova l-​Fuħħari Tagħna.” (Flp. 1:9, 10, 27; Ġw. 18:37; Is. 64:8) Dawn huma biss ftit mill-​ħafna temi diskussi fil-​jiem t’assembleat speċjali li għaddew. Ħerqanin intom li tattendu għall-​jum t’assemblea speċjali għas-​sena taʼ servizz 2010? It-​tema li se tiġi żviluppata hi: “Iż-​Żmien li Fadal Tqassar,” meħuda mill-​1 Korintin 7:29.

2. Kif jistaʼ jitqanqal l-​entużjażmu għal din l-​assemblea?

² Ibdew ibnu l-​entużjażmu għall-​jum t’assemblea speċjali malli titħabbar id-​data fil-​kongregazzjoni tagħkom. Xi ġenituri jgħinu lil uliedhom iħarsu ’l quddiem lejn l-​assemblea billi jiktbu d-​data fil-​kalendarju tal-​familja, flimkien maʼ lista t’affarijiet li jkollhom bżonn, u mbagħad jibdew jgħoddu l-​jiem sakemm tasal il-​ġurnata. Matul il-​lejla tal-​Qima tal-​Familja forsi tkunu tixtiequ li tirrivedu xi noti mill-​jiem t’assembleat speċjali taʼ qabel. Tistgħu wkoll tippreparaw qalbkom għal din il-​ġrajja billi tirrivedu paġni 13-16 tal-​ktieb Benefit From Theocratic Ministry School Education (Ibbenefika mill-​Edukazzjoni tal-​Iskola tal-​Ministeru Teokratiku) biex jgħin lilkom u lill-​familja tagħkom ‘toqogħdu attenti kif tisimgħu.’—Lq. 8:18.

3. Kif nistgħu nibbenefikaw bis-​sħiħ minn dak li jiġi preżentat?

³ Applika Dak li Titgħallem: Espressjoni komuni li tinstemaʼ wara xi assemblea hi, “Xi programm meraviljuż kellna!” Dan dejjem hekk ikun, għax hu wieħed mill-​ħafna provvedimenti għonja mingħand Ġeħova. (Prov. 10:22) Sabiex l-​informazzjoni tagħti l-​frott, intom tridu timmeditaw fuqha u żżommuha. (Lq. 8:15) Intom u sejrin id-​dar wara l-​assemblea ħudu l-​ħin biex tiddiskutu l-​programm bħala familja jew maʼ dawk li jkunu magħkom fil-​karozza. Iddiskutu l-​miri u l-​punti taʼ xulxin li se jgħinukom fil-​ministeru tagħkom. Il-​fatt li tagħmlu hekk se jikkontribwixxi biex tibbenefikaw mill-​informazzjoni ħafna wara l-​assemblea.—Ġak. 1:25.

4. Din l-​assemblea għala se tkun speċjali għalina?

⁴ Dejjem inħossuna speċjali meta nirċievu xi rigal prattiku li jkun eżatt dak li neħtieġu. Ma nantiċipawx aħna b’mod ħerqan dak li Ġeħova għandu maħżun għalina fil-​jum t’assemblea speċjali tagħna li jmiss? Nistgħu nkunu ċerti li se jkun prattiku b’kull mod. Nistgħu nistennew li se nirċievu mingħand Ġeħova, Missierna tas-​sema, eżatt ir-​rigal adattat bħala inkuraġġiment u taħriġ biex inwettqu x-​xogħol li inkarigana nagħmlu.—2 Tim. 4:2; Ġak. 1:17.