L-​Istqarrija tad-​Dnub Twassal għall-​Fejqan

“JIEN bqajt sieket, u nfena ġismi, jiena u nokrob il-​jum kollu. Għax lejl u nhar it-​toqol taʼ idek fuqi; saħħti nfniet bħal bis-​sħana tas-​sajf.” (Salm 32:​3, 4) Dan il-​kliem taʼ qsim il-​qalb setaʼ rrifletta l-​uġigħ emozzjonali li ħass is-​Sultan David taʼ Iżrael tal-​qedem, uġigħ li kien ġabu hu stess fuqu nnifsu billi ħeba dnub serju minflok ma stqarru.

David kien raġel taʼ kapaċità kbira. Kien gwerrier qalbieni, statista taʼ ħila, poeta, u mużiċist. Iżda, hu straħ, mhux fuq il-​kapaċitajiet tiegħu, imma fuq Alla tiegħu. (1 Samwel 17:​45, 46) Kien deskritt bħala bniedem li qalbu kienet “kollha kemm hi mal-​Mulej.” (1 Slaten 11:4) Imma wieħed mid-​dnubiet li għamel kien tassew taʼ min jistmerru, u forsi għalih kien qed jirreferi f’Salm 32. Hemm ħafna x’nitgħallmu jekk neżaminaw iċ-​ċirkustanzi li wasslu għad-​dnub li għamel. Se nagħrfu n-​nases li rridu nevitaw u naraw ukoll il-​ħtieġa li nistqarru dnubietna sabiex nerġgħu nġeddu r-​relazzjoni tagħna m’Alla.

Sultan Leali Waqaʼ fid-​Dnub

Il-​ġens taʼ Iżrael kien involut f’kampanja militari kontra l-​Għammonin, imma David kien qed jgħammar f’Ġerusalemm. Lejla waħda, waqt li kien qed jippassiġġa fuq il-​bejt tal-​palazz tiegħu, lemaħ mara sabiħa qed tinħasel f’waħda mid-​djar fil-​qrib. Naqas li jrażżan lilu nnifsu u ħalla l-​passjoni tiegħu ġġagħlu jibda jixtieqha. Wara li sar jaf li kienet Batseba, mart Urija, li kien suldat fl-​armata tiegħu, David bagħat għaliha, u għamel adulterju magħha. Ftit taż-​żmien wara, Batseba bagħtet tgħid lil David li kienet ħarġet tqila.—2 Samwel 11:​1-5.

David inqabad f’nassa. Jekk dnubhom jinkixef, il-​kastig għalihom it-​tnejn kien il-​mewt. (Levitiku 20:10) Allura fassal pjan. Bagħat għal Urija, ir-​raġel taʼ Batseba, biex jiġi lura mill-​battalja. Wara li qagħad jistaqsih ħafna dwar il-​gwerra, David qal lil Urija biex imur lura d-​dar. David kien qed jittama li b’hekk jiġi jidher qisu li Urija kien missier it-​tarbija taʼ Batseba.—2 Samwel 11:​6-9.

B’diżappunt kbir għal David, Urija ma marx għand martu. Urija qal li lanqas biss kienet tgħaddilu minn moħħu li jmur lura d-​dar waqt li l-​armata kienet għadha għaddejja mill-​qilla tal-​battalja. Meta xi armata taʼ Iżrael kienet tkun involuta f’kampanja militari, l-​irġiel ma kienx ikollhom relazzjonijiet sesswali, lanqas man-​nisa tagħhom stess. Kellhom jibqgħu nodfa b’mod ċerimonjali. (1 Samwel 21:6 [21:​5, NW]) David imbagħad stieden lil Urija biex jiekol miegħu u spiċċa biex ġagħlu jisker, imma dan xorta ma marx id-​dar għand martu. Il-​kondotta leali taʼ Urija kkundannat id-​dnub serju taʼ David.—2 Samwel 11:​10-13.

In-nassa li daħal fiha bi dnubu stess kienet qed tissikka iktar madwar David. B’disprament, triq waħda biss ra quddiemu. Bagħat lil Urija lura lejn il-​battalja b’nota lil Ġowab, il-​ġeneral taʼ l-​armata. L-​iskop taʼ din in-​nota qasira kien ċar: “Qiegħed lil Urija fl-​eħrex tat-​taqbida quddiemnett, u intom tbiegħdu minn warajh, ħalli joqtluh u jmut.” B’daqqa taʼ pinna, dak is-​sultan setgħani donnu kien għatta dnubu, billi bagħat lil Urija għall-​mewt.—2 Samwel 11:​14-17.

Malli għadda żmien il-​vistu taʼ Batseba, David iżżewwiġha. Għadda ż-​żmien, u t-​tarbija tagħhom twieldet. Tul dan iż-​żmien kollu, David baqaʼ sieket dwar dnubietu. Forsi kien qed jipprova jiġġustifika l-​azzjonijiet tiegħu miegħu nnifsu. Urija mhux bl-​unuri miet fil-​battalja bħalma għamlu oħrajn? Wara kollox, mhux hu naqas li jobdi u ma riedx imur għand martu skond ma kien ordnalu s-​sultan? Il-​‘qalb kollha qerq’ se tuża kull xorta taʼ raġunar biex tipprova tiġġustifika d-​dnub.—Ġeremija 17:9; 2 Samwel 11:25.

Passi Ħżiena li Jwasslu għad-​Dnub

Kif setaʼ David, li tant kien iħobb is-​sewwa, jasal biex jagħmel adulterju u qtil? Jidher ċar li ż-​żrieragħ taʼ dnubu nżergħu tul medda taʼ żmien. Forsi ma nistgħux nifhmu għala David ma kienx maʼ l-​irġiel tiegħu, jappoġġahom fil-​kampanja militari kontra l-​għedewwa taʼ Jehovah. Għall-​kuntrarju, David kien qed jixxaħxaħ fil-​palazz tiegħu, fejn ir-​realtajiet tal-​gwerra kienu ’l bogħod wisq biex irażżnulu x-​xewqa ħażina li kellu għal mart wieħed mis-​suldati leali tiegħu. Illum, hija protezzjoni għall-​Kristjani veri meta jkunu involuti b’mod attiv f’affarijiet spiritwali mal-​kongregazzjonijiet tagħhom u meta jieħdu sehem regulari fix-​xogħol taʼ l-​evanġelizzar.—1 Timotju 6:12.

Is-sultan taʼ Iżrael kien intqallu li jrid jagħmel kopja tal-​Liġi u jaqraha kuljum. Il-​Bibbja tagħti r-​raġuni għal dan: “Biex jitgħallem jibżaʼ mill-​Mulej, Alla tiegħu, u jħares il-​kliem kollu taʼ din il-​liġi u dawn l-​istatuti, biex iħarishom; u ma jintrefax f’qalbu ’l fuq minn ħutu, u ma jilwix mill-​kmandamenti lejn il-​lemin jew lejn ix-​xellug.” (Dewteronomju 17:​18-20) Milli jidher, David setaʼ ma kienx qed isegwi din l-​istruzzjoni fiż-​żmien meta kkommetta dawk id-​dnubiet serji. Studju regulari u meditazzjoni fuq il-​Kelma t’Alla żgur li se jħarsuna mill-​ħażen f’dawn iż-​żminijiet kritiċi.—Proverbji 2:​10-12.

Iktar minn hekk, l-​aħħar wieħed mill-​Għaxar Kmandamenti stqarr speċifikament: “La tixtieqx il-​mara taʼ għajrek.” (Eżodu 20:17) Sa dan iż-​żmien David kellu għadd taʼ nisa u konkubini. (2 Samwel 3:​2-5) Imma din il-​ħaġa ma waqqfitux milli jixtieq mara oħra attraenti. Dan ir-​rakkont ifakkarna fis-​serjetà taʼ kliem Ġesù: “Kull min iħares lejn mara biex jixtieqha jkun ġa għamel adulterju magħha f’qalbu.” (Mattew 5:28) Minflok ma nżommu xewqat bħal dawn li m’humiex xierqa ġewwa fina, ejja nkunu pronti li nneħħuhom minn moħħna u minn qalbna.

Indiema u Ħniena

Ir-​rakkont onest u bil-​miftuħ li nsibu fil-​Bibbja dwar id-​dnub taʼ David żgur li mhux qiegħed hemm biex jissodisfa l-​interess pervers taʼ xi ħadd. Ir-​rakkont joffrilna l-​opportunità biex naraw kif Jehovah esprima b’mod attiv u li jqanqal il-​qalb waħda mill-​kwalitajiet li jispikkaw tiegħu, jiġifieri l-​ħniena.—Eżodu 34:​6, 7.

Wara li Batseba wildet iben, Jehovah bagħat lill-​profeta Natan biex jiffaċċja lil David. Dan kien att taʼ ħniena. Kieku David ma ġiex avviċinat u baqaʼ sieket, setaʼ wasal biex jgħaddas rasu fi triq taʼ dnub. (Lhud 3:13) Aħna ferħanin li David wieġeb għall-​ħniena t’Alla. Kliem Natan, li ntqal b’sengħa u b’mod ċar, qanqallu l-​kuxjenza lil David, u hu għaraf bl-​umiltà kollha li kien dineb kontra Alla. Fil-​fatt, Salm 51, li jitkellem dwar id-​dnub taʼ David f’konnessjoni maʼ Batseba, inkiteb wara li hu nidem u stqarr id-​dnub serju tiegħu. Jalla qatt ma nħallu lil qalbna tixrief jekk xi darba niġu megħlubin minn xi dnub serju.—2 Samwel 12:​1-13.

David ngħata l-​maħfra, imma ma ġiex meħlus mid-​dixxiplina jew mill-​konsegwenzi taʼ dnubu. (Proverbji 6:27) Bilfors hekk kellu jkun. Kieku Alla kellu sempliċement jagħlaq għajnejh għal kulma jsir, il-​livelli tiegħu ma jkunu jiswew għal xejn. Hu jkun ineffettiv bħalma kien il-​Qassis il-​Kbir Għeli, li ta ċanfira ħafif ħafif liż-​żewġ uliedu, li tant kienu mill-​agħar, u mbagħad ħalliehom ikomplu jagħmlu l-​għemejjel ħżiena tagħhom. (1 Samwel 2:​22-25) Xorta waħda, Jehovah ma jżommx lura milli juri qalb tajba bl-​imħabba lejn min ikun sogħbien għad-​dnub li jkun għamel. Il-​ħniena tiegħu, bħal ilma frisk li jagħti l-​ħajja, se tgħin lil min ikun żbalja biex jissaporti l-​konsegwenzi tad-​dnub. It-​tenerezza li biha tingħata l-​maħfra divina u s-​sħubija bnina maʼ adoraturi sħabu għandhom l-​effett li jerġgħu jsaħħuh spiritwalment. Iva, fuq il-​bażi tal-​fidwa taʼ Kristu, dak li jkun nidem jistaʼ jerġaʼ jduq “l-​għana tal-​grazzja” t’Alla.—Efesin 1:7.

‘Qalb Safja u Spirtu Mġedded’

Wara li David kien stqarr dnubu, hu ma qatax qalbu u ma bediex iħossu b’mod negattiv qisu li ma jiswa għal xejn. L-​espressjonijiet tiegħu fis-​salmi li kiteb dwar l-​istqarrijiet tad-​dnubiet juru s-​serħan li ħass u d-​determinazzjoni tiegħu li jaqdi ’l Alla fedelment. Ara, per eżempju, Salm 32. Fit-​tieni vers (32:​1, NW) naqraw: “Hieni l-​bniedem li ħtijietu maħfura, li għandu d-​dnub tiegħu mistur!” Ikun kemm ikun serju d-​dnub, dejjem hemm il-​possibbiltà taʼ soluzzjoni hienja jekk min jidneb ikun sinċier fl-​indiema tiegħu. Mod wieħed kif tistaʼ tintwera din is-​sinċerità hu billi wieħed jaċċetta r-​responsabbiltà kollha għal dak li jkun għamel, bħalma għamel David. (2 Samwel 12:13) Hu ma pprovax jiġġustifika ruħu quddiem Jehovah jew ipprova jagħti t-​tort lil xi ħadd ieħor. Vers 5 jgħid: “Id-​dnub tiegħi jien stqarrejtlek, u l-​ħażen tiegħi ma ħbejtulekx. Jien għedt: ‘Quddiem il-​Mulej nistqarr ħtijieti.’ U int ħfirtli l-​ħażen tad-​dnub tiegħi.” Meta wieħed jistqarr dnubu bis-​sinċerità, dan iġiblu serħan u b’hekk il-​kuxjenza tiegħu ma tibqax tħabbtu minħabba l-​ħażen li jkun għamel fil-​passat.

Wara li talab lil Jehovah bil-​ħniena għall-​maħfra, David talbu: “Oħloq fija qalb safja, o Alla, u spirtu qawwi ġedded fija.” (Salm 51:12 [51:​10, NW]) Meta talab għal “qalb safja” u ‘spirtu mġedded’ David wera li kien konxju tat-​tendenza li kellu għad-​dnub u li hu kellu bżonn l-​għajnuna t’Alla biex inaddaf qalbu u jerġaʼ jibda mill-​ġdid. Minflok ma qagħad jitħassar lilu nnifsu, kien determinat li jibqaʼ miexi ’l quddiem fis-​servizz tiegħu lejn Alla. Talab: “Iftaħli xufftejja, Sidi, u fommi jxandar it-​tifħir tiegħek.”—Salm 51:17 [51:​15, NW].

X’kienet ir-​reazzjoni taʼ Jehovah għall-​indiema sinċiera taʼ David u għall-​isforz determinat tiegħu li jaqdi ’l Alla? Hu ta lil David din l-​assiguranza li sserraħ il-​qalb: “Ngħallmek u nurik it-​triq li għandek tieħu; nwissik, u nżomm għajnejja fuqek.” (Salm 32:8) Hawn niġu aċċertati li Jehovah jagħti attenzjoni persunali lis-​sentimenti u l-​bżonnijiet taʼ min ikun niedem. Jehovah ħa passi biex lil David jagħtih iktar dehen ħalli l-​affarijiet ikun jistaʼ jifhimhom sew u ma joqgħodx biss fuq dak li jara b’għajnejh. Jekk jiġi ttantat fil-​futur, ikun jistaʼ jinduna x’jistaʼ jiġri minħabba l-​azzjonijiet tiegħu u l-​effett li dan ikollu fuq oħrajn. B’hekk ikun jistaʼ jaġixxi bil-​għaqal.

Dan l-​episodju fil-​ħajja taʼ David iservi bħala inkuraġġiment għal kulmin waqaʼ f’xi dnub serju. Jekk nistqarru dnubna u nuru ndiema sinċiera, nistgħu niksbu lura l-​iktar ħaġa prezzjuża li għandna, jiġifieri r-​relazzjoni tagħna m’Alla Jehovah. Aħjar l-​uġigħ mumentanju u l-​mistħija li forsi jkollna ngħaddu minnhom milli l-​għafsa taʼ qalb li nħossu meta nibqgħu siekta, jew il-​konsegwenzi koroh li jiġu fuqna jekk inħallu lilna nfusna nsiru rasna iebsa fi triq ribelluża. (Salm 32:9) Minflok, aħna nistgħu ngawdu l-​maħfra tenera mingħand Alla li jħobb u li hu kollu ħniena, “Missier il-​ħniena u Alla taʼ kull faraġ.”—2 Korintin 1:3.

[Stampa f’paġna 31]

David ittama li jiskansa l-​konsegwenzi taʼ dnubu billi bagħat lil Urija għall-​mewt