Mistoqsijiet mill-Qarrejja
Jagħti Proverbji 22:6 garanzija li jekk it-tfal Kristjani jiġu mħarrġin kif suppost, huma m’humiex se joħorġu mit-triq taʼ Ġeħova?
Dan il-vers jgħid: “Ħarreġ tifel jimxi fit-triq it-tajba; ma joħroġx minnha lanqas meta jixjieħ.” Sewwasew bħalma l-irbit taʼ fergħa jeffettwa l-forma tiegħu hekk kif jikber f’siġra, tfal li jiġu mħarrġin kif suppost huma iktar inklinati li jkomplu jaqdu lil Ġeħova meta jikbru. Bħalma jaf kull ġenitur, dan it-taħriġ jinvolvi ħin u sforz konsiderevoli. Sabiex it-tfal isiru dixxipli Kristjani, il-ġenituri għandhom jistruwixxu, iwiddbu, jinkuraġġixxu, u jiddixxiplinaw lit-tfal tagħhom bir-reqqa kif ukoll jagħtuhom eżempju tajjeb. Dan għandhom jagħmluh b’mod konsistenti u bl-imħabba għal ħafna snin.
Però, ifisser dan li jekk xi ħadd mill-ulied ma jibqax jaqdi lil Ġeħova, it-taħriġ tal-ġenituri ma kienx kif suppost? F’xi każi, il-ġenituri forsi naqsu fl-isforzi tagħhom biex irabbu lil uliedhom fid-dixxiplina u l-gwida mentali taʼ Ġeħova. (Efesin 6:4) Mill-banda l-oħra, il-proverbju m’huwiex garanzija li taħriġ tajjeb se jipproduċi tfal li huma leali lejn Alla. Il-ġenituri ma jistgħux isawru lil uliedhom f’dak kollu li jridu huma. It-tfal, bħall-adulti, għandhom il-libertà taʼ l-għażla, u fl-aħħar mill-aħħar huma jridu jiddeċiedu x’ħajja se jgħixu. (Dewteronomju 30:15, 16, 19) Minkejja l-iktar sforzi ħabrieka tal-ġenituri, xi tfal ma jibqgħux leali, bħal Salamun, li kiteb il-vers li qed nikkunsidraw. Anki Ġeħova kellu wlied li ma baqgħux leali.
B’hekk, l-iskrittura ma tfissirx li f’kull każ it-tifel, jew it-tifla, “ma joħroġx minnha” imma b’mod ġenerali dan ikun ir-riżultat. X’inkuraġġiment hu dan għall-ġenituri! Il-ġenituri għandhom iħossuhom inkuraġġiti meta jkunu jafu li l-isforzi ħabrieka tagħhom biex iħarrġu lil uliedhom fit-triq taʼ Ġeħova se jipproduċu riżultati tajbin. Ladarba l-irwol tagħhom huwa importanti u l-influwenza tagħhom hija kbira, il-ġenituri huma mħeġġin biex jieħdu l-irwol tagħhom bis-serjetà.—Dewteronomju 6:6, 7.
Anki meta t-tfal ma jibqgħux jaqdu lil Ġeħova, il-ġenituri li ħarrġu lil uliedhom b’mod diliġenti jistaʼ jkollhom it-tama li wliedhom se jiġu f’sensihom. Il-verità tal-Bibbja hija qawwija, u t-taħriġ tal-ġenituri ma jintesiex malajr.—Salm 19:8 (19:7, NW).