Familji bla Missier Sinjal taż-Żminijiet
LIEMA taħseb li hi l-iktar problema soċjali sinjifikanti taʼ żmienna? Kważi 80 fil-mija taʼ dawk li ġew mistħarrġin fi stħarriġ taʼ Gallup fl-Istati Uniti jemmnu li din hija “l-assenza fiżika tal-missier mid-dar.” Skond Gallup, iktar minn 27 miljun tifel u tifla fl-Istati Uniti ma jgħixux mal-missirijiet bijoloġiċi tagħhom, u dan in-numru qiegħed jiżdied bil-ħeffa. Rapport mill-Fond tal-Ġnus Magħquda għat-Tfal jgħid li madwar 50 fil-mija tat-tfal bojod li twieldu fl-Istati Uniti mill-1980 ’l hawn, “se jqattgħu parti mit-tfulija tagħhom f’familja b’ġenitur wieħed. Għat-tfal suwed il-proporzjon huwa madwar 80%.” USA Today b’hekk innominat lill-Istati Uniti bħala ‘l-iktar pajjiż minn taʼ quddiem fid-dinja fejn għandhom x’jaqsmu familji bla missier.’
Madankollu, artiklu f’The Atlantic Monthly josserva: “Iż-żjieda fit-taħwid fil-familja m’hijiex unika għas-soċjetà Amerikana. Hija evidenti kważi fil-ġnus avanzati kollha, inkluż il-Ġappun.” U filwaqt li l-istatistiċi huma diffiċli biex jinkisbu, ħafna pajjiżi li qed jiżviluppaw milli jidher qed jiffaċċjaw kriżi simili. Skond ir-rivista World Watch, “l-irġiel [f’pajjiżi fqar] taʼ spiss jabbandunaw lin-nisa u lit-tfal tagħhom minħabba l-pressjonijiet ekonomiċi li qed jiżdiedu.” Fil-fatt, stħarriġ f’pajjiż fil-Karibew wera li 22 fil-mija biss tal-missirijiet li kellhom tfal taʼ tmien snin attwalment kienu jgħixu maʼ wliedhom.
It-tfal bla missier kienu komuni fi żminijiet Bibliċi ukoll. (Dewteronomju 27:19; Salm 94:6) Madankollu, dakinhar, ir-raġuni ewlenija għala ż-żgħar kienu jispiċċaw bla missier kien minħabba li dan ikun miet. Il-kittieb David Blankenhorn jgħid, ‘Illum, il-kaġun prinċipali għala t-tfal jisfaw bla missier hija l-għażla tal-missier stess.’ Tabilħaqq, kif se naraw, l-għadd li qed jiżdied taʼ tfal bla missier jagħti evidenza li ħafna nies illum huma “bla qalb.” Skond il-Bibbja, din hija biss prova oħra li qegħdin ngħixu fl-“aħħar tad-dinja.”—2 Timotju 3:1-3.
Madankollu, għat-tfal iż-żgħar din tkun traġedja persunali meta l-missier jgħib minn ħajjithom. Minħabba f’hekk jibda ċiklu taʼ wġigħ u ħsara kbira li jistaʼ jkollu konsegwenzi fit-tul. Għalhekk, f’din is-serje se niddiskutu dan iċ-ċiklu, mhux biex lill-qarrejja naqtgħulhom qalbhom, imma biex nipprovdu tagħrif li jistaʼ jgħin lill-familji jwaqqfu din ix-xejra qerrieda.