Ukulingana ne Mateyo

5 Walile Yesu walola iwumba ilikulu limukonsile, wayile pa mwamba, apano aya ayikala. Awasambi wakwe nawonye awamukonka. 2 Nga pano atalika ukusambilizya awantu wonsinye ukuti:

3 “Awa nsansa wano wamanya ukuti wakalonda ivya kwe Leza, amuno Uwufumu wa kwe Leza wino wawa mwi yulu awawo.

4 “Awa nsansa wano wawa nu wulanda, amuno waliwasansamusya.

5 “Awa nsansa wano wayicefya, amuno walipyana insi.

6 “Awa nsansa wano wakunda ivizima,* amuno Leza aliwapa vino wakalondesya.

7 “Awa nsansa wano wakatetela wanji amuno nawonye waliwatetela.

8 “Awa nsansa wano wawa ni myezo ya cisinka, amuno walilola* Leza.

9 “Awa nsansa wano wakapanga umutende, amuno waliyitwa ukuti awana wa kwe Leza.

10 “Awa nsansa wano wakacula pa mulandu wakucita ivizima, amuno Uwufumu wa mwi yulu awawo.

11 “Mwe wa nsansa nga cakuti awantu wakumituka nu kumicuzya, swinya wakumiwipizya nu wufi wa misango yonsinye pa mulandu wane. 12 Muwasecelela nkaninye nu kuwa ni nsansa amuno Leza alimipa icilambu icikulu. Wonye wo-o avino wacuzyanga na wakasesema wano walinjiko pano mutani mukwatwe.

13 “Mwe mucele wa mu nsi, umucele nga waleka ukunona wutanga wuwombe na swinya, ukawa awakusumba vye. Na wantu awatalika ukuwulyata.

14 “Mwawa ngati mwe luswepo lwa mwe yo-o insi muno mwawa imfinzi. Umusumba wuno wawa pa mwamba papela wutanga wuvwame. 15 Nga cakuti awantu wasya ulukozyo, wasilukupicila, lelo wakaluwika pi tebulo pa pela. Nalo lukakozezya wonsinye wano wali mu ng’anda. 16 Wonye avino namwenye mwaleka uluswepo lwinu lwawala pakuti awantu wonsinye walulola nu kulumbanya Umukwasi winu uwa mwi yulu.

17 “Mutakwelenganya ukuti niza mukufumyapo Amasundo nanti vino Wakasesema wasambilizyanga, niza mukuvificilisya. 18 Nkuminena nkuti, cingapepukapo pa nsi ni yulu ukufumapo, ukulusya akalilembo nanti akalitoni akali konsinye aki Sundo ukononeka. Vyonsinye vino vyalembwamo vilicitika. 19 Acino wensinyene wino wakana ukwivwila isundo lyonga pa masundo yano awantu wakalola ukuti yatacindama sana, watalika nu kusambilizya wanji ukucita wowonye, walimucefya mu Wufumu wa mwi yulu. Lelo wensinyene wino akacita vino yakalanda nu kusambilizya wanji ukuti wacita wowonye, walimukuzya mu Wufumu wa mwi yulu. 20 Acino nkuminena nkuti, nga musi ni cisinka kwe Leza ukucila Awafalisi na wakasambilizya wa Masundo, lyo mutaliyinjila mu Wufumu wa mwi yulu.

21 “Mwamanya isundo lino wapile awakwasi winu awakukali ilyakuti: ‘Utakoma. Wensinye wino wakoma walimutwala ku koti.’ 22 Nomba nkuminena nkuti, wensinye wino watwalilila ukufulilwa umunyina, aliwa nu mulandu wakuluwulula; Ne wensinye wino wawomvya amazwi amawipe aya ntusi ku munyina, aliwa nu mulandu wakuluwulula ku koti; ne wino wanena umunyina ukuti, ‘We cipuwa we, utawa ni ncito!’* Aliwa nu mulandu wakumutwala ku Gehena.*

23 “Nga cakuti pano ukutwala icawupe pa ng’anda ya kwe Leza, wizuka ukuti munyonko akufulizilwe, 24 uzipizile ukucisya pa ng’anda ya kwe Leza nu kunyocelamo. Te muye mukivwane nawe, apano unyoke nu kupa icawupe cako.

25 “Uwapanga zuwa umutende na wino akukutwala ku koti, pakuti atakusya mu makasa ya kwe kapingula, ne kapingula atakupa mu makasa ye wino wandi akwinjizye mu cifungo. 26 Nkuminena nkuti, mutalitela mufume mpaka mwize mulipile indalama zyonsinye zino mwawa nazyo, ukufika na ku kandalama akatici nkaninye.

27 “Mwivwa vino calanzilwe ukuti: ‘Mutacita uwucende.’ 28 Lelo nkuminena nkuti, wensinye wino watwalilila ukulolecesya umwanaci nu ku mukumbwa. Lyo acisile nawe uwucende mu mwezo wakwe. 29 Nga cakuti ilinso lyako likulenga uwaluvyanya, lifumye nu kulisumba. Cazipa usyale ni linso lyonga, ukucila ukuti wonone umuwili wako wonsinye.* 30 Acili conganye ni kasa lyako, nga likukulenga ukuti uwaluvyanya, liputule, nu kulisumba. Cazipapo ukusyala ni kasa lyonga ukucila ukuti wonone umuwili wako wonsinye.*

31 “Mwivwa vino awakukali walanzile ukuti: ‘Wensinyene wino waleka wakwakwe, azipizile ukumupa kalata yakumulecelapo.’ 32 Nomba nkuminena nkuti, wensinye wino waleka umuci pa milandu yinji yino asa wuzelele, lyo wamuwika mu welezyo wakucita uwucende, swinya wino watwala we-e umwanaci, lyo nawenye, wacita uwucende.

33 “Naswinya mwivwa vino awantu wakukaali walandanga ukuti: ‘Mutalaya nu kukanaficilisya, lelo mwaficilisya vino mwalaya kwe Yehova.’ 34 Nkuminena nkuti: ‘Mutalanda ukuti iyulu we kamboni wane, amuno akuno Imfumu e Leza wikala; 35 nanti akulapa ukuwomvya insi, amuno acili icilimba ca matamba ya kwe Leza; swinya mutalapa mukulumbula Yerusalemu amuno amusumba wa Mfumu iyikulu e Leza. 36 Nanti ukulapa ukuwomvya umutwe wako, amuno utawa na maka yakupilula inyele zyako. Lumwi luwe alutiswe ne lunji luwe alutifi. 37 Nga mwazumila ukucita cimwi, mwaficilisya. Nga mwakana, lekani ciwe wowonye. Amuno nga mukulandavye ukwasowa ukuficilisya, lyo mukukolanya Ciwa.

38 “Mwivwa vino awakaali walanzile ukuti: ‘Wino wafotola umuwuye ilinso, nawenye awamufotola. Wino wafumya umuwuye ilino, nawenye awamufumya.’ 39 Lelo nkuminena nkuti: Mutanyocezya iciwipe ku mulwani. Wino wakuma kwi tama lyonga, mupiliwulile ayume na kuliwuyenye. 40 Swinya nga cakuti umuntu akulonda ukukutwala ku koti pakuti aye akupoke icakuzwala ca mukasi, akumuleka asenda ni cakunzinye; 41 nga cakuti uwa mu wutunguluzi wakupaticizya ukuti umuwombele cimwi, muwombele ukucizya na pe vino tekunenile. 42 Nga cakuti umuntu wumwi wamilenga vimwi, muzipizile ukumupa. Swinya nga cakuti wumwi akulonda ukwazima vimwi mutakana.

43 “Mwamanya vino awasambilizya winu wakalanda ukuti: ‘Uwakunda umuwuyo nu kupata umulwani wako.’ 44 Lelo nkuminena nkuti: Muwakunda awalwani winu. Swinya mwapepelako wano wakamicuzya. 45 Nga mwacita wo-o, mulilanjizya ukuti mukakolanya Umukwasi winu uwa mwi yulu. Akalenga ilanzi ukuwalila awalungamane na wawipenye. Ni mvulanye, akatonyezya wano wakacita ivizima na wano wakacita iviwipe. 46 Amuno nga mwakunda vye wano wamikunda, lyo acilambu ci cino mulipocelela? Uzye wonye asa vino na wano wakasoncezya imisonko* wakacita? 47 Nga cakuti mwawavye icete ku viwuza vinu vitupunye, lyo pasi icizima cimwi cino mukucita. Amuno wonye avino na wa munsi wakacita 48 Mwawa awapwililike ndi vino Umukwasi winu uwa mwi yulu wawa.