Ikasa lya kwe Yehova Litafupila

1. Uzye e Musa walanjizizye wuli ukuti wasuwizile e Yehova pano wafumizye awina Israeli mu Egypt?

IBUKU lya Waheberi lyalanda pa wonsi na wanaci wano wasuwizile Yehova, pe wa-a pawa ne Musa wino wasuwizile sana Yehova. (Hebe. 3:​2-5; 11:​23-25) Walanjizizye ukuti walinji ni suwilo pano wafumizye awina Israeli mu Egypt, amuno atatinile Farao na wasilika wakwe. Wasuwizile nkaninye Yehova pano walamvizye awantu pe Sumbi Muwenzu nu kuwatungulula mu mayonde. (Hebe. 11:​27-29) Pano awina Israeli awavule walesile ukusuwila ukuti Yehova walinji nu kulawasakamala, e Musa weni watwalilizile ukumusuwila. Wo-o vino Musa wasuwizile Yehova atasovile, amuno Yehova watwalilizile ukuwasakamala pano walinji mu mayonde.a—Ukuf. 15:​22-25; Amalu. 78:​23-25.

2. Cani calenzile e Yehova awuzye Musa ukuti: “Wuzye ikasa lya Mfumu e Leza lyafupila”? (Impendwa 11:​21-23)

² E Musa walinji ni suwilo iliwome nkaninye. Lelo pansizi vye ya mwaka wonga ukufumilila pano wafumizile mu Egypt, e musa watalisile ukuvwilika nga cakuti e Yehova walinji nu kuwapa inyama zino wawalayile. Cino calenzile atalike ukuvwilika, amuno awina Israeli walinji awavule nkaninye. E Yehova wawuzizye e Musa ukuti: “Wuzye ikasa lya Mfumu e Leza lyafupila?” (Wazyani Impendwa 11:​21-23.) Pe lyo-o iwaliko izwi lino wawomvya ukuti “ikasa lya Mfumu e Leza” likalozya ku muzimu wakwe nanti amaka yano akawomvya. Mu mazwi yanji e Yehova wawuzyanga Musa ukuti, ‘Uzye molimonye ukulola ngati ntanga ncite vino Nalanda?’

3. Avyani vino twandi tusambilile mwe co-o icipande?

³ Uzye mukatela amuvwilikapo nga cakuti e Yehova wandi awamisakamala nanti ukusakamala ulupwa lwinu? Asamulandu mwavwilikapo nanti awe, mutasakamala. Twandi tusambilile pe vino vyalenzile e Musa na wina Israeli ukuvwilika nga cakuti Yehova walinji nu kulawasakamala. Twandi tulole na vino amawaliko yamwi yandi yamyavwe ukumanya ukuti ikasa lya kwe Yehova litafupila.

VINO TUNGASAMBILILA KWE MUSA NA KU WINA ISRAELI

4. Amulandu ci wuno awina Israeli watalisile ukuvwilicila nga Yehova angawasakamala?

⁴ Amulandu ci wuno awina Israeli awavule watalisile ukuvwilicila nga cakuti e Yehova walinji nu kulawasamala? Amuno woliwo na wantu wanji wano watalinji awina Israeli walinji mu mayonde pa mpindi intali pano watani wafike mu nsi ya wulayo. (Ukuf. 12:38; Amasu. 8:15) Wano watalinji awina Israeli cafuzile ukulya mana, na co-o calenjzile na wina Israeli nye awavule ukutalika ukuyilizyanya. (Impe. 11:​4-6) Pamulandu wakuti awantu watalisile ukulucila ivyakulya vino walyanga mu Egypt watalisile ukuyilizyanya kwe Musa. Na co-o calenzile e Musa atalike ukulola ukuti awino wazipizile ukuwavwambila inyama, nomba atamanyile ukwakuzifumya.—Impe. 11:​13, 14.

5-6. Avyani vino tukusambilila kwe vino awina Israeli watalisile ukucita pa mulandu wakukoncelela wano watalinji awina Israeli?

⁵ Awina Israeli watalisile ukuyilizyanya pa mulandu wakukoncelela wano watalinji awina Israeli. Nanti asweswenye, tungaleka ukusalifya pe vino Yehova akutucitila pamulandu wakukoncelela awantu wanji. Co-o cingacitika nga twatalika ukwizuka vino twakweti nanti ukutalika ukwivwila wanji uwuzuwa pe vino wakweti. Lelo tungawa ni nsansa nga cakuti tukutima na vino tukweti asamulandu na vino ivintu vili mu wumi.

⁶ Cimwi cino calinji nu kwavwa awina Israeli ukutwalilila ukusalifya, akwizuka ukuti e Yehova walinji nu kuwapa vino wawalayile nga wafika munsi ya wulayo asa mumayonde awe. Nanti asweswenye avino tuzipizile ukucita, ukucila ukuwika amano kwe vino tutakweti pe yo-o impindi tuzipizile ukuwika amano ku malayo yano Yehova watulaya munsi mpya. Cinji cino cingatwavwa akulawazya nu kwelenganya sana pa mawaliko yano yangatwavwa ukusuwila sana e Yehova.

7. Amulandu ci wuno tungasuwila ukuti e Yehova angatwavwa pano tuli ni ntazi?

⁷ Mpindi zimwi mungakwelenganya ukuti amulandu ci wuno Yehova wakolowozezizye e Musa ukuti: “Wuzye ikasa lya Mfumu e Leza lyafupila?” Cino wacitizile wo-o, walondanga ukwavwa Musa ukumanya ukuti wawa na maka nkaninye nu kuti angawomvya amaka yakwe ukuli konsinye. Nanti acakuti awina Israeli walinji mumayonde mukasi, e Yehova atalinji nu kupotwa ukuwapa inyama. E Yehova wawomvizye amaka yakwe “nikasa lyakwe ikalambane, nulukonchi lwakwe ulukazawane,” pakupa awina Israeli vino walondanga. (Amalu. 136:​11, 12) Acino ngatukupita mu ntazi tungasuwila ukuti e Yehova alitwavwa asamulandu na kuno tungawa.—Amalu. 138:​6, 7.

8. Avyani vino tungacita pakuti tutacita vino awina Israeli wacisile? (Lolani ni cikope.)

⁸ E Yehova waficilisizye vino wawalayile icakuti wawapile inkwale imvule. Lelo awina Israeli watasalifizye Yehova pe vino wawacitizile. Awavule walondanga ukusenda inkwale imvule ukucila mu cipimo. Wawomvile uwanda uwupuma na wunji pakasi wakulemavye inkwale. E Yehova wafuzilwe nkaninye swinya wasunzile wonsinye “wano walinji nulunkumbwa.” (Impe. 11:​31-34) Avyani vino tukusambililako kwe vino vyacitisile? Tukusambililako ukuti tuzipizile ukucenjela pakuti tutavwambisya ukuwa ni vivule. Asa mulandu swe wapina nanti swe wakankala, tuzipizile ukuwombesya ukusunjila “insawo nanti icuuma” citu mwiyulu ukupitila mukuwomya wuciwuza witu ne Yehova ne Yesu. (Mat. 6:​19, 20; Luk. 16:9) Nga twacita wo-o, tungasuwila ukuti e Yehova aliwatusakamala.

9. Avyani vino tungasuwila?

⁹ Na peyonye impindi e Yehova akalonda ukwavwa awantu wakwe. Lelo co-o citakusula mukuti tutanga tusowezye nanti ukukana kwata ivyakulya.b E Yehova watulaya ukuti atalitela atulecelezye. Alitwalilila ukutwavwa asamulandu na vino tungapitamo. Tungalanjizya wuli ukuti twasuwila ukuti e Yehova aliwatusakamala? Lekani tulande pa nzila ziwili; (1) pano tukuvwamba indalama zyakusakamalilamo ulupwa lwitu, (2) pano tukwelenganya pe vino tuliyikala nga twakota.

PANO TUKUVWAMBA INDALAMA ZYAKUSAKAMALILAMO ULUPWA LWITU

10. Antazi ci zino twandi twakwenecela pano tukupalamila kunsilo ya nsi?

¹⁰ Pano insilo yansi yikuya yikupalamila ivintu munsi vyandi vyaya vikuwipilako. Twandi twakwenecela izya nkondo, amasanso, izya ndwala apano ni vintu vinji. Vyo-o vyandi vyalenga awantu ukusya amang’anda yawo ni vintu vino wakwata nu kukanakwata incito zyakuwomba. Swinya candi cawomela awantu ukusakamala indupwa zyawo. Nomba tungalanjizya wuli ukuti twasuwila Yehova nga cawa wo-o?

11. Avyani vino vingamyavwa ukumanya vino mungacita nga cakuti musi ni ndalama? (Luka 12:​29-31)

¹¹ Icintu icicindame cino cingamyavwa akunena Yehova vino vikumisakamika. (Imilu. 16:3) Muzipizile ukumulenga mwi pepo ukuti amipe amano yano yangamyavwa ukupingula icete pa vintu nu kuteka umwezo pakuti “mutasakamikwa” pe vino mukupitamo. (Wazyani Luka 12:​29-31.) Mwamulenga nu kuti awamyavwa ukutima na vino mukweti. (1 Tim. 6:​7, 8) Cinji acakuti, mwavwambilizya ivyewo mu ma buku yitu vino vingamyavwa ukumanya vino mungacita nga cakuti musi ni ndalama. Awavule wazana ukuti ama vidyo ni vipande vino vyawa pa jw.org vikawavwa ukumanya vino wangacita nga wali ni ntazi ya ndalama.

12. Amawuzyo ci yano umwina Klistu angayikolowozya yano yangamwavwa ukupingulapo icete incito yakuwomba?

¹² Wamwi wasolapo ukusya indupwa zyawo nu kuya mukuwombela ukutali, lelo mukulecelezya wakakwiza awiluka ukuti watapinguzilepo icete. Fwandi pano mukulonda ukwinjila incito, mutakwelenganyavye pa ndalama zino muliwafola. Lelo mwakwelenganya pe vino yoyo incito yilikuma wuciwuza winu ne Yehova ponga na wamu lupwa lwinu. (Luk. 14:28) Mwayikolowozya ukuti: ‘Acani cino cilicitika kwi twala litu nga nafumapo pa mpindi intali? Uzye ndiwakumanisya ukuzanwa mu kulongana, ukuya mu mulimo nu kuwa ponga nawanawitu na wankazi?’ Ne nga cakuti mwawa na wana, mungayikolowozya ukuti: ‘Uzye “ndilelela wuli awana wane mwi sundo lya kwe Yehova” nga cakuti ntakuwa ponga nawo?’ (Efes. 6:4) Nga mukulonda ukupingula pa ncito yakuwomba mwakwelenganya pe vino Yehova akalola ivintu asa vino walupwa ni viwuza wano wasikonka vino Baibolo yikalanda wakuminena.c E Tony wino akakwikala ku Asia, wakweti ulongo ulwakuti angaya mukuwomba incito ku nsi zinji kuno walinji nu kuwamufolesya indalama imvule. Lelo pansizi yakupepelapo nu kulanzyanya ne wakwakwe, wasozilepo ukukanayinjila incito iyili yonsinye pe zyozyo. Cinji cino wacisile, wapepusizye imikalile yawo. E Tony watili: “Pamulandu wakukana yinjila zyo-o incito, navwa awantu ukumanya Yehova, swinya awana witu wakunda nkaninye e Yehova. Cino nene nu lupwa lwane twasambililako acakuti, nga tukukonka amazwi yano yawa pe Mateyu 6:​33, e Yehova alitwalilila ukutusakamala.”

PANO TUKWELENGANYA VINO TULIYIKALA NGA TWAKOTA

13. Avyani vino tuzipizile ukucita pakuti twize tuwe ni ndalama zyakuwomvya ku nkolelo?

¹³ Tungalanjizya ukuti twasuwila e Yehova pano tukupingulapo pe vino tuliyikala nga twiza twakota. E Baibolo yikatunena ukuti tuzipizile ukuwombesya pakuti twasunga indalama zino zingiza zitwavwe ku nkolelo. (Imilu. 6:​6-11) Fwandi nga cingacitika, mwasungako indalama zino zingiza zimyavwe ku nkolelo. Amuno indalama zingatwavwa mwe vimwi. (Ekawi. 7:12) Lelo tutazipizile ukuwika sana amano ku kuvwamba indalama ukucila vino twawika amano ku wuciwuza witu ne Yehova.

14. Amulandu ci wuno tuzipizile ukwelenganizizya pi waliko lya Waheberi 13:5 pano tukupekanya vino tuliyikala nga twiza twakota?

¹⁴ E Yesu walanzile pa mulumbe wuno walanjizyanga ukuti umuntu wino akasunga indalama lelo “atacindama kwe Yehova,” [NWT] lyo awavye. (Luk. 12:​16-21) Patawa wino akamanya vino ivintu viliwa mutondo. (Imilu. 23:​4, 5; Jemu. 4:​13-15) E Yesu walanzile nu kuti wensinye wino akulonda ukuwa amusambi wane, azipizile ‘ukusya’ vyonsinye vino wawa navyo. (Luk. 14:33.) Wonye avino calinji ku wina Klistu wa mu Yudeya mu mpindi ya watumwa. Wayikundizile ukusya vyonsinye vino walinji navyo. (Hebe. 10:34) Na peyonye impindi, awanawitu na wankazi incito zikasila pamulandu wakukana tunjilila awa mu vikanza vya nsi. (Ukuwu. 13:​16, 17) Cani cikalenga wasolepo ukuleka incito? Amuno wasuwila uwulayo wa kwe Yehova uwakuti: “Ntalitela nkusye; ntalitela nkulechelezye.” (Wazyani Waheberi 13:5.) Tukakwelezya na maka ukusunga indalama zino zingiza zitwavwe nga twakota. Lelo vimwi nga vyacitika, tuzipizile ukusuwila ukuti e Yehova aliwatwavwa.

15. Avyani vino awakwasi wazipizile wakwizuka nga cakuti wawa na wana? (Lolani ni cikope.)

¹⁵ Mu ntambi zimwi, awatwalane wakapapa awana pakutivye wize wawasunge nga wakota. Lelo e Baibolo yikati awakwasi awano wazipizile ukupekanizizya awana uwikalo. (2 Kor. 12:14) Icisinka acakuti, awakwasi nga wakota wakalondekwa awana wawo ukuwavwa mu vyandalama na mu vintu vinji. Swinya awana awavule wakayikundila ukuwavwa. (1 Tim. 5:4) Lelo awakwasi awina Klistu, wamanya ukuti cino cingalenga wawa ni nsansa, akwavwa awana wawo ukukunda Yehova, asa kuti wize wawasakamala mu vya ndalama nga wiza wakota.—3 Yoh. 4.

16. Uzye awakwasi wangavwa wuli awana wawo pakuti wize wayisakamala? (Waefeso 4:28)

¹⁶ Pano mukwavwa awana winu pe vino wangiza wayisakamala ku nkolelo, mwawalanjizya ukuti mwasuwila mwe Yehova. Mwawasambilizya uwuzima wuno wawa mu kuwombesya pano wacili awaticinye. (Imilu. 29:21; wazyani Waefeso 4:28.) Swinya pano wakuya wakukula mwawavwa pakuti wawika amano ku sukulu. Awakwasi wazipizile wavwambilizya ivyewo nu kuzana ivisinko vya masundo ya mu Baibolo, vino vingavwa awana ukupingula icete pa masambililo. Cino cizipizile ukulenga awakwasi wacita wo-o, apakuti wavwe awana wawo ukuti wize wayisakamala na pakuti wize wawombesya mu mulimo wa kwe Yehova.

17. Avyani vino tuzipizile ukusuwila?

¹⁷ Wonsinye wano wasuwila e Yehova, wamanya ukuti akalondesya ukuwasakamala. Pano tukuya tukupalamila ku nsilo ya kwe yo-o insi, apano tuzipizile ukusuwila sana e Yehova. Fwandi asamulandu na vino vingacitika, tuzipizile ukusuwila ukuti e Yehova aliwomvya amaka yakwe pa kutupekanizizya vino tukulondekwa. Tuzipizile nu kumanya ukuti e Yehova alitwalilila ukutwavwa asamulandu na kuno tungawa amuno ikasa lyakwe litafupila.