ÑA̱ KÉʼÉYÓ NA̱ TESTIGO

¿Á xa̱a̱ kúnda̱a̱-iniún ndáaña kivi keʼún tá ná kuma̱ní xu̱ʼún nu̱ún?

Va̱ása ndákanda̱-iniyó tá xítoyó ña̱ iníísaá ñuyǐví ku̱a̱ʼání na̱ yiví iin kama ndíʼi-xa̱ʼa̱ ndiʼi ña̱ ku̱i̱ká ña̱ kúúmiína. Saáchi íyoyó tiempo ña̱ so̱ndíʼi, ña̱kán Biblia káʼa̱nña xíʼinyó ña̱ ná kǒo kandíxayó “ña̱ ku̱i̱ká ña̱ íyo loʼo kuití tiempo” (1Ti 6:17; 2Ti 3:1). ¿Ndáa ki̱ʼva chindeétáʼan ña̱ ke̱ʼé ta̱ rey Jehosafat xíʼinyó ña̱ xa̱a̱ ya̱chi̱ka koo tu̱ʼvayó tá ná kuma̱ní xu̱ʼún nu̱úyó?

Tá ni̱xa̱ʼa̱n na̱ inka ñuu ña̱ kanitáʼanna xíʼin ta̱ Jehosafat, ta̱yóʼo ka̱ndíxaníra ña̱ mií Jehová chindeétáʼan xíʼinra (2Cr 20:9-12). Ta saátu ndu̱kúra ndáa ki̱ʼva chindeétáʼanra xíʼin na̱ ñuu: xa̱a̱ ya̱chi̱ka nda̱sakútu̱ra nama̱ ña̱ ndási sa̱tá ñuu yóʼo ta i̱xatu̱ʼvara na̱ soldado na̱ ku̱ʼu̱n nu̱ú ku̱a̱chi (2Cr 17:1, 2, 12, 13). Saátu xíniñúʼu keʼé miíyó, ná kandíxaníyó Jehová ta xa̱a̱ ya̱chi̱ka ná koo tu̱ʼvayó tá kúma̱níka kixi tu̱ndóʼo nu̱úyó.

¿NDÁAÑA XÍNIÑÚʼU KEʼÉYÓ ÑA̱ YA̱CHI̱KA KOO TU̱ʼVAYÓ TÁ NÁ KUMA̱NÍ XU̱ʼÚN NU̱ÚYÓ?

Xa̱a̱ ya̱chi̱ka taán va̱ʼún ña̱ kuniñúʼún ña̱ sakúaʼún xa̱ʼa̱ Ndióxi̱. Kusi̱í-ini xíʼin ña̱ xa̱a̱ kúúmiíún ta kundaa-ini Jehová ña̱ taxira ña̱ kuniñúʼún (Mt 6:26; 1Ti 6:8). Kǒo ya̱ʼandosóún ña̱ káʼa̱n tu̱ʼun Ndióxi̱ tá ndúkún ña̱ kuniñúʼún (Ro 2:21). Xa̱a̱ ya̱chi̱ka ndakanixi̱níún ndáa mií kiʼún tutu ña̱ kuniñúʼún sakúaʼún xa̱ʼa̱ Ndióxi̱ tá ná ku̱ʼu̱n luz á internet. Tá kúú, xa̱a̱ ya̱chi̱ka taán va̱ʼún tutu ña̱ kuniñúʼún, á kivitu sanúu kúeún ña̱yóʼo nu̱ú celular á tableta.

Xa̱a̱ ya̱chi̱ka kiʼún kuenta ndáaña kivi kuniñúʼún. Tá níkáún xu̱ʼún, chika̱a̱ ndee̱ ña̱ chaʼviúnña ta va̱ása satáún ku̱a̱ʼání ña̱ʼa, ña̱kán tá ná kixi tu̱ndóʼo nu̱ún koova xu̱ʼún ña̱ kuniñúʼún (Pr 22:7). Tá kívi, xa̱a̱ ya̱chi̱ka taán va̱ʼandó ña̱ʼa ña̱ kuxundó xíʼin inkaka ña̱ʼa ña̱ kuniñúʼundó. Inka ña̱ kivi keʼéndó kúú ña̱ chiʼindó ña̱ʼa ña̱ kuniñúʼundó ña̱ va̱ʼa loʼo xu̱ʼún kuniñúʼundó.

TÁNDI̱ʼI XI̱TONDÓ VIDEO ÑA̱ NANÍ NDÁA ÑA̱ KEʼÉYÓ ÑA̱ VA̱ʼA KOO TU̱ʼVAYÓ TÁ NÁ YA̱ʼAYÓ NU̱Ú IIN TU̱NDÓʼO, NDAKUIINNDÓ PREGUNTA YÓʼO:

Na̱ʼná ña̱ va̱xi nu̱ú video ña̱ naní “Ndáa ña̱ keʼéyó ña̱ va̱ʼa koo tu̱ʼvayó tá ná ya̱ʼayó nu̱ú iin tu̱ndóʼo”. Na̱ʼná iin Biblia, iin mochila xíʼin iin celular, xíʼin inka na̱ʼná na̱ káchíñu.

¿Ndáaña kivi keʼún ña̱ koo tu̱ʼvaún tá iin kama ná kixi tu̱ndóʼo nu̱ún?

textarea-1

Na̱ʼná ña̱ va̱xi nu̱ú video ña̱ naní “Ndáa ña̱ keʼéyó ña̱ va̱ʼa koo tu̱ʼvayó tá ná ya̱ʼayó nu̱ú iin tu̱ndóʼo”. Na̱ʼná na̱ hermano na̱ chíndeétáʼan nu̱ú ku̱u iin tu̱ndóʼo. Savana káchíñuna nu̱ú kúva̱ʼa veʼe ta savana sánuuna caja sa̱tá carro.

¿Ndáaña kivi keʼún ña̱ koo tu̱ʼvaún chindeétáʼún xíʼin inkana?

textarea-2